Yeˬsuˇ shiˇ-eu keuˆ laˇ ngeh, Beˬtuˆluˆ, Yaˬkoˆ, Yoˇhaˬ, Aˬdehˬlehˬ, heu deuˬ nehˬ-ehˇ dawˬ ngehˬ cawˬ-euˬ meh. Aˇ saˬ saˬ-eu aˇ yamˬ-ahˇ Yeˬsuˇ zaꞈ le taˬ-euˬ lehˇ aˬ jeˬ-ahˇ haw-awˇ ya siˬ nmˇ lehˇ ja luꞈ ngeh, aˇ yehˇ huiˬ-eu gaˇ kawˆ tiˬ hmˬ-ahˇ Yeˬsuˇ naˇ haˬ-eu, “ngaˬ-euˬ miˬ sawˇ zaˬ-ahˇ haw-awˇ, aˇ yamˬ tsaˬ ni dzaˬ dzaˬ dawˇ dawˇ biꞈ nehˬ de lehˇ, nymˇ sahˇ g’aˬ neh k’ehˇ taˬ-euˬ zaˬ k’aˆ aˬ geu g’aˬ-a?” (Maꞈtehˬ 24:3, 45 YS97; Maˬkuˆ 13:3, 4). “Nymˇ sahˇ g’aˬ” pyeuꞈ-eu Yeˬsuˇ aˬ yawꞈ-euˬ g’aˬ k’ehˇ deuˬ-ahˇ kamˬ nehˬ-eu, aˇ saˬ saˬ-eu aˇ yamˬ laꞈ k’oeˇ aˬ yawꞈ-euˬ zaˬ lahˇ deuˬ-ahˇ, aˇ yamˬ tsaˬ ni Miˬyehˇ-euˬ zaˬ siˬ nui gahˇ bi dzaˬ bi dawˇ-eu g’aˇ duˬ, zaˬ k’aˆ tiˬ deuˬ tseˇ doˆ taˬ ma lehˇ ehˇ nehˬ-euˬ meh. Saˇ jaˇ ziꞈ-awˇ noeˬ dahˇ doe-eu zaˬ k’aˆ aˬ suˇ g’aˬ nga?

Yeˬsuˇ neh tseˇ doˆ taˬ-euˬ g’aˬ k’ehˇ, aˇ muˇ muˇ zaˬ pyeuꞈ meh. “Zaˬ k’aˆ” lehˇ ehˇ-eu heu naˇ, Yeˬhawˇbaˬ-euˬ Saˇ kiˇ-euˬ Uˆ lahˇ-eu aˇ muˇ-ahˇ ehˇ-eu meh. Aˬ yawꞈ maꞈ naˇ, Yeˬhawˇbaˬ-ahˇ uˬ duˬ tahˬ-eu deuˬ-ahˇ, aˇ yamˬ tsaˬ ni Miˬyehˇ-euˬ zaˬ siˬ nui gahˇ bi dzaˬ bi dawˇ-eu g’aˇ duˬ, gaˇ mˇ-eu leh jeh dui dui-eu meh. Nga maꞈ “aˇ yamˬ tsaˬ” ni dzaˬ dzaˬ dawˇ dawˇ-ahˇ za-eu g’aˇ duˬ, saˇ jaˇ ziꞈ-eu zaˬ k’aˆ deuˬ-ahˇ ya g’oe-eu meh.—Luˇkaꞈ 12:42.

Aˬ yawꞈ maꞈ Miˬyehˇ-euˬ nymˇ jiˇ-ahˇ haw piˇ-eu deuˬ pyeuꞈ meh. (1 Tiˆmoˇseˬ 3:15) Yeˬsuˇ zaˬ k’aˆ heu deuˬ-ahˇ, miˇ tsaˬ k’oeˇ taˆ jaˆ-eu Yeˬhawˇbaˬ aˇ maꞈ aˇ muˇ-euˬ, aˇ yehˇ huiˬ-eu gaˇ deuˬ-ahˇ bi haw piˇ-euˬ meh. Aˬ jeˬ-ahˇ bi haw piˇ-euˬ nga? Myawˬ gahˬ deuˬ hawˇ-eu tsaꞈ gaˬ-eu gaˇ, aˇ muˇ deuˬ-ahˇ mehˬ nehˬ tsoˆ nehˬ-eu gaˇ, heu deuˬ-ahˇ bi haw piˇ-euˬ meh. Teu miˇ neh, nga maꞈ loˬ-eu jeˬ-ahˇ loˬ-eu aˇ yamˬ laꞈ k’oeˇ caw ba nehˬ nya ni, “saˇ jaˇ ziꞈ-eu zaˬ k’aˆ” heu deuˬ naˇ, sahˬ boꞈ paˇ dmˬ deuˬ-ahˇ neh maˬ ehˇ, aˇ muˇ bawˬ dzaˬ gaˇ neh maˬ ehˇ, huiˬ-eu mehˬ bawˬ-ahˇ neh maˬ ehˇ, saꞈ laˇ-euˬ dzaˇ deuˬ-ahˇ biˇ k’awˬ nehˬ laꞈ-eu meh.

Zaˬ k’aˆ heu deuˬ naˇ, Jaˇliꞈ-euˬ yaw tsaˬ yaw dawˇ hawˇ-eu aˬ yawꞈ maꞈ-ahˇ biꞈ taˬ-euˬ tsaꞈ gaˬ-eu gaˇ deuˬ-ahˇ saˇ jaˇ ziꞈ-eu meh. Ka li neh a nehˬ taˬ-euˬ miˇ tsaˬ k’oeˇ taˆ jaˆ-eu myawˬ gahˬ deuˬ-ahˇ haw piˇ ngeh jawˇ k’awꞈ ni, noeˬ dahˇ doe-eu laꞈ k’oeˇ neh haw piˇ luꞈ-eu meh. (G’aˬk’ehˇ 10:42) K’oeˇ miˇ neh, Yeˬhawˇbaˬ aˬ yawꞈ maꞈ mˇ luꞈ-eu gaˇ deuˬ-ahˇ, huiˬ laˇ mahˇ laˇ ni guiˬ lahˬ biꞈ nehˬ-awˇ, Miˬyehˇ-euˬ zaˬ siˬ nui gahˇ deuˬ-ahˇ k’awꞈ, yaw muiˬ-ehˇ bi dzaˬ bi dawˇ nya ni caw ba nehˬ-eu meh.—Iˇsaˬyaˇ 60:22; 65:13.

• Miˬyehˇ-euˬ zaˬ siˬ nui gahˇ deuˬ-ahˇ bi biˇ k’awˬ-eu g’aˇ duˬ, Yeˬsuˇ aˬ geu deuˬ-ahˇ tseˇ taˬ-euˬ nga?

• Zaˬ k’aˆ heu deuˬ aˬ jeˬ-ahˇ saˇ jaˇ ziꞈ-awˇ, aˬ jeˬ-ahˇ noeˬ dahˇ doe-eu nga?