Maˬ noeˬ gaˇ mehˇ nmˇ deuˬ-ahˇ shaˬ zahˬ keuˆ le ngeh jawˇ, Yeˬhawˇbaˬ-euˬ Saˇ kiˇ deuˬ yaw kawˇ ma-ehˇ caw ba iˇ-eu ma. Heu loꞈ-ehˇ leh jeh-awˇ caw ba-eu heu naˇ, nga maꞈ tiˬ g’aˬ tiˇ g’aˬ g’oeˇ-eu gaˬ-eu jeˬ-ahˇ mˇ mawˇ-eu jeˬ pyeuꞈ-eu ma. (Yoˇhaˬ 13:34, 35; 1 Yoˇhaˬ 3:17, 18) Nga maꞈ aˬ jeˬ lehˇ caw ba-eu nga?

Pyuˇ damˬ nehˬ-eu. Gaˇ hu ba Yuˇdaˆ miˇ k’ahˬ-ahˇ, huiˬ dui dui-eu mehꞈ-eu shuꞈ-eu jeˬ keuˆ le ngeh jawˇ, Aˬdiˇawˬ meuˬ-ahˇ jawˇ-eu Ka li zaˬ deuˬ, aˬ yawꞈ maꞈ-euˬ cawˬ saꞈ laˇ paw-euˬ mehˇ nmˇ deuˬ-euˬ g’aˇ duˬ, pyuˇ caw ba nehˬ leˇ-euˬ meh. (G’aˬk’ehˇ 11:27-30) K’oeˇ loꞈ-ehˇ duˇ ni nymˇ iˬ nah nga maꞈ k’awꞈ, mehˇ nmˇ deuˬ shaˬ-eu zahˬ-eu jeˬ-ahˇ tahˬ puˬ luꞈ-eu lehˇ ya siˬ nya ngeh jawˇ, nga maꞈ k’aˇ g’eh nya-eu loꞈ-ehˇ pyuˇ damˬ dawˆ-awˇ neh caw ba nehˬ-eu ma.—2 Gawˇliˬtu 8:13-15.

Caw ba iˇ-eu. Shaˬ zahˬ pyeuꞈ laˇ-euˬ tsahˇ-ahˇ jawˇ-eu aˇ muˇ-ahˇ sheuˬ g’eh-eu deuˬ naˇ, aˇ muˇ laꞈ k’oeˇ-euˬ mehˇ nmˇ deuˬ aˬ joˆ-ehˇ pyeuꞈ luꞈ nga lehˇ siˬ nya-eu g’aˇ duˬ, leh jeh-awˇ poˆ-eu meh. Dzaˬ duˬ, jawˇ duˬ, jaˆ g’aˬ jaˆ luˇ, dm g’aˬ dm lmˇ heu deuˬ-ahˇ, shaˬ zahˬ pyeuꞈ laˇ gaˇ caw ba-eu aˇ muˇ deuˬ haw teˬ nehˬ-eu meh. G’eh nya-eu Saˇ kiˇ deuˬ yawˬ ha-euˬ pyuˇ yawˬ ha zmˬ awˇ, shaˬ zahˬ pyeuꞈ laˇ-euˬ tsahˇ-ahˇ iˇ-awˇ neh, caw ba-eu aˇ muˇ deuˬ nehˬ-ehˇ gm leˇ-awˇ, cawˆ iˇ taˬ-euˬ iˇ kahˇ hawˇ-eu Bawˬ dzaˬ nymˇ-ahˇ tsoˆ muiˬ k’oꞈ nehˬ-eu meh. Nga maꞈ mehˬ bawˬ gm-eu aˇ muˇ pyeuꞈ-eu miˇ neh, shaˬ zahˬ pyeuꞈ laˇ ngeh jawˇ k’awꞈ, caw ba-eu tsawˇ haˬ deuˬ yaw kawˇ ma-ehˇ laˆ uiˬ nya-eu meh. “Jah-eu laꞈ k’oeˇ aˬ dui-euˬ aˬ yuiꞈ aˬ nyiˇ” deuˬ-ahˇ caw ba-eu tehꞈ-ehˇ maˬ g’aˬ ni, zahˇ maˬ duˇ leˇ-eu deuˬ-ahˇ k’awꞈ, nga maꞈ k’aˇ g’eh nya-eu loꞈ-ehˇ caw ba nehˬ-eu ma.—Gaˬlaˬtiˆ 6:10.

Nui ma saˇ laˇ ni, Jaˇliꞈ neh g’aˬ biꞈ-eu. Shaˬ zahˬ puˬ luꞈ-eu deuˬ yawˬ g’aˬ na luꞈ, nui ma saˇ laˇ ni g’aˬ biꞈ nehˬ laꞈ-eu jeˬ-ahˇ geuꞈ mawꞈ-eu meh. Aˇ yamˬ heu laꞈ k’oeˇ, “g’awˬ shaˬ gaˬ nya-eu” Yeˬhawˇbaˬ Miˬyehˇ jawˇ gaˇ neh, nga maꞈ g’aˬ yuˇ geuꞈ-eu ma. (2 Gawˇliˬtu 1:3, 4) Noeˬ tmˬ-eu jeˬ maˬ jaˆ ni jawˇ luꞈ-eu deuˬ-ahˇ noeˬ tmˬ-eu jeˬ jaˆ laˇ ni, Jaˇliꞈ laꞈ k’oeˇ-euˬ saˇ jaˇ dawˬ deuˬ-ahˇ, nga maꞈ laꞈ k’aˬ tiˬ cehˇ dzawˇ nehˬ-eu ma. G’awˬ myahˇ maˬ g’eh-ehˇ, Miˬyehˇ Miˇ k’ahˬ, shaˬ zahˬ naˇ gawˇ bi pyeuꞈ laˇ-eu maˬ muiˬ maˬ jaˬ-eu jeˬ dawˬ tawˆ luꞈ-ahˇ, laˆ cawˆ jiˇ meh lehˇ noeˬ tmˬ nya-eu meh.—Pah mehˬ-eu 21:4.

• Yeˬhawˇbaˬ-euˬ Saˇ kiˇ deuˬ, shaˬ zahˬ pyeuꞈ laˇ ngeh jawˇ, aˬ jeˬ miˇ neh yaw kawˇ-ehˇ caw ba nehˬ nya-eu nga?

• Shaˬ zahˬ-ahˇ neh buˬ iˇ-euˬ deuˬ-ahˇ, Jaˇliꞈ aˬ jeˬ lehˇ g’aˬ biꞈ-eu nga?