Nawˇ Yeˬhawˇbaˬ-euˬ Saˇ kiˇ aˇ myaˆ g’aˬ-ahˇ siˬ nya le? Nga maꞈ tiˬ deuˬ na-aˬ, nawˬ nehˬ-ehˇ nymˇ kaˬ taꞈ-eu, nawˬ nehˬ-ehˇ mˇ myawˬ mˇ-awˇ, sahˬ boꞈ tiˬ kawˆ loꞈ-ehˇ dzaw-eu deuˬ k’awꞈ pyeuꞈ nya meh. Maˬ ngeuˇ naˇ nawˬ nehˬ-ehˇ Jaˇliꞈ ja sawˇ luꞈ-eu g’aˬ k’awꞈ pyeuꞈ nya meh. Nga maꞈ aˬ suˇ g’aˬ nga? Aˬ jeˬ miˇ neh nga maꞈ jah-eu jeˬ, miˇ k’ahˬ zaˬ-ahˇ tsaꞈ gaˬ luꞈ nga?

Nga maꞈ k’awꞈ, aˬ cawˬ loꞈ-ehˇ tehꞈ ma. Nga maꞈ naˇ, dehꞈ jeˬ dehꞈ kawˆ hawˇ-eu dehꞈ-eu aˇ tiˆ k’awꞈ maˬ duˇ leˇ-eu laꞈ k’oeˇ neh doˆ laˇ taˬ-euˬ ma. Tiˬ deuˬ na zahˇ beu gaˇ-awˇ, tiˬ deuˬ na Miˬyehˇ maˬ jawˇ-a lehˇ k’awꞈ jah haw-euˬ meh. Aˬ jeˬ lehˇ g’eh k’awꞈ, nga maꞈ yawˬ g’aˬ na luꞈ Yeˬhawˇbaˬ-euˬ Saˇ kiˇ maˬ pyeuꞈ laˇ mi na-ehˇ, Jaˇliꞈ-euˬ gaˇ kawˆ-ahˇ pyehˆ tseˇ-eu g’aˇ duˬ, aˇ yamˬ g’awˬ mya ni zmˬ-euˬ ma. (G’aˬk’ehˇ 17:11) Ya siˬ nya-euˬ jeˬ nga maꞈ-euˬ nui ma-ahˇ tsaˬ-eu miˇ neh, Yeˬhawˇbaˬ Miˬyehˇ-ahˇ uˬ duˬ tahˬ-eu g’aˇ duˬ, yawˬ ha-euˬ nui ma neh tseˇ geuꞈ-euˬ ma.

Jaˇliꞈ dzaw gaˇ neh, gaˇ dahˇ tsoeˬ-eu jeˬ-ahˇ za-euˬ deuˬ pyeuꞈ ma. Aˬ cawˬ loꞈ-ehˇ duˇ ni nga maꞈ k’awꞈ, yawˬ ha laꞈ k’oeˇ g’aˬ baˬ-eu jeˬ hawˇ-eu shaˬ-eu zahˬ-eu jeˬ-ahˇ ya tahˬ puˬ luꞈ-eu maˬ. Ehˇ k’awꞈ ni, nga maꞈ yawˬ nah na luꞈ Jaˇliꞈ zahˇ-ahˇ zmˬ-eu miˇ neh, nga maꞈ-euˬ dehꞈ jeˬ dehꞈ kawˆ tiˬ nah saˇ-i tiˬ nah muiˬ daˆ laˇ-euˬ meh. (Ja ceuˬ 128:1, 2) Teu miˇ neh, nga maꞈ neh ya siˬ nya-euˬ Jaˇliꞈ laꞈ k’oeˇ-euˬ muiˬ-eu gaˇ kawˆ heu deuˬ-ahˇ, yawˬ g’aˬ na luꞈ siˬ nya laˇ ni tsaꞈ gaˬ nehˬ luꞈ-eu ma.

Nga maꞈ Jaˇliꞈ zahˇ-ahˇ g’oe-awˇ neh dehꞈ-eu ma. Jaˇliꞈ zahˇ heu naˇ, nga maꞈ-ahˇ nui saˇ biꞈ-awˇ, aˬ cawˬ-ahˇ yaw zeu baw ni maˬ ehˇ, g’awˬ shaˬ gaˬ-awˇ yaw dawˇ dawˇ-ehˇ dehꞈ ni maˬ ehˇ, caw ba nehˬ laꞈ-eu meh. K’oeˇ naˇ, aˬ cawˬ nehˬ-ehˇ tsaˬ leˇ-awˇ nymˇ jiˇ laꞈ k’oeˇ mehˬ bawˬ gm ni maˬ ehˇ, paˇ caw ba nehˬ laꞈ-eu meh. “Miˬyehˇ myaˆ pyawˬ huiˬ nyiˇ maˬ tseˇ”-a lehˇ nga maꞈ jah-eu ma. K’oeˇ miˇ neh, nga maꞈ yawˬ k’ahˬ na luꞈ taꞈ-eu saꞈ laˇ paw-euˬ mehˇ nmˇ pyeuꞈ ma. Tsawˇ jeuˬ maˬ biˇ paˆ, miˬ beuˆ mi cehˇ maˬ nyehꞈ tehˬ. Nga maꞈ aˬ cawˬ loꞈ-ehˇ tsawˇ myahˇ maˬ doˆ k’awꞈ, laˆ uiˬ leꞈ ngeh jawˇ, zahˬ leˇ paˬ-ehˇ aˬ cawˬ nehˬ-ehˇ beu gaˇ-eu deuˬ pyeuꞈ ma.—G’aˬk’ehˇ 4:13; 10:34, 35.

• Yeˬhawˇbaˬ-euˬ Saˇ kiˇ deuˬ aˬ cawˬ nehˬ-ehˇ, aˬ geu tsahˇ duˇ leˇ-eu nga?

• Yeˬhawˇbaˬ-euˬ Saˇ kiˇ deuˬ, Jaˇliꞈ dzaw-eu baˬ da neh aˬ jeˬ za-eu nga?