Gaˇ hu neh Yeˬhawˇbaˬ, nymˇ jiˇ yawˬ jiˇ na luꞈ-ahˇ, aˇ yamˬ tiˬ kawˆ loꞈ-ehˇ bi zmˬ mawꞈ-eu meh. Aˬ jeˬ-euˬ g’aˇ duˬ nga? Nymˇ jiˇ laꞈ k’oeˇ jah-eu jeˬ g’aˬ k’aˆ laˇ-awˇ, tiˬ g’aˬ tiˇ g’aˬ gaˬ-eu jeˬ bi myaˬ laˇ-eu g’aˇ duˬ meh. (Dawˬmehˬmehˬ-eu 6:6, 7) K’oeˇ miˇ neh Yeˬhawˇbaˬ-euˬ Saˇ kiˇ deuˬ, yawˬ ha-euˬ nymˇ jiˇ Miˬyehˇ-ahˇ uˬ duˬ tahˬ-eu g’aˇ duˬ, tiˬ jaw-ahˇ tiˬ yamˬ tseˇ taˬ-euˬ meh. Teu ngeh, nymˇ jiˇ-ahˇ loˬ-eu jeˬ, Jaˇliꞈ-euˬ gaˇ kawˆ deuˬ nehˬ-ehˇ lawˬ ka ni ja sawˇ nya meh. Nawˇ tiˬ g’aˬ tehꞈ-ehˇ jawˇ k’awꞈ, Jaˇliꞈ gui gui-ehˇ poeˬ-eu aˇ yamˬ heu Miˬyehˇ nehˬ-ehˇ zmˬ nya meh.

Yeˬhawˇbaˬ Miˬyehˇ nehˬ-ehˇ peh dzehˬ leˇ-eu aˇ yamˬ. “Miˬyehˇ-euˬ dawˬ peh jiˆ laˇ-awˬ, naw maꞈ-euˬ dawˬ peh, Miˬyehˇ jiˆ le tehꞈ-a.” (Yaˬkoˆ 4:8) Jaˇliꞈ laꞈ k’oeˇ-euˬ Yeˬhawˇbaˬ-euˬ nui noeˬ nui duˇ deuˬ hawˇ-eu mˇ jeˬ shaˇ kawˆ deuˬ-ahˇ pyehˆ tseˇ ngeh, aˬ yawꞈ-euˬ gaˇ kawˆ deuˬ-ahˇ paˇ siˬ nya dzehˬ laˇ-eu meh. Jaˇliꞈ gui ngeh teˇ saˇ gui doˆ-eu heu naˇ, nymˇ jiˇ uˬ duˬ tahˬ-eu dahˬ beh-eu yaw awˬ tiˬ jeˬ pyeuꞈ meh. Yawˬ jaw na luꞈ, Dehꞈ ziˇ hawˇ-eu tsaꞈ gaˬ-eu gaˇ mˇ-eu mehˬ bawˬ-euˬ g’aˇ duˬ biꞈ taˬ-euˬ Jaˇliꞈ aˇ bymˇ k’oeˇ, nymˇ jiˇ laꞈ k’oeˇ tiˬ g’aˬ-ahˇ tiˬ bymˇ biˇ nehˬ-awˇ gui nya meh. Teu-euˬ laꞈ k’oeˇ neh, aˬ jeˬ za-euˬ nga lehˇ, yawˬ g’aˬ na luꞈ ja sawˇ nya meh.

Nymˇ jiˇ laꞈ k’oeˇ tiˬ g’aˬ tiˇ g’aˬ g’oeˇ dzehˬ laˇ-eu aˇ yamˬ. Pehˬ zaˬ ma zaˬ Jaˇliꞈ dzaw ngeh jawˇ, k’aˬ dzeˇ zaˬ hawˇ-eu zaˬ miˬ zaˬ maˬ ehˇ, zaˬ hawˇ-eu aˬ da aˬ ma yaw kaˬ maˬ ehˇ, g’oeˇ-eu gaˬ-eu jeˬ ziꞈ dah ni pyeuꞈ laˇ-eu meh. Teu yamˬ-ahˇ, yawˬ g’aˬ na luꞈ laꞈ k’aˬ cehˇ taˆ ni noeˬ tmˬ-awˇ loꞈ luꞈ-eu aˇ yamˬ ya bi pyeuꞈ meh. Aˬ da aˬ ma deuˬ dzaw-eu gaˇ kawˆ tseˇ ngeh, zaˬ aˬ yawꞈ shehˆ aˬ yawꞈ-ahˇ tsaˬ leˇ-eu gaˇ kawˆ deuˬ-ahˇ tseˇ-awˇ, ya ja sawˇ-eu meh. Loꞈ-eu nymˇgoˇ paˇ dmˬ hawˇ-eu Noeˬlaˇ-awˬ lehˇ kuˇ-eu paˇ dmˬ, maˬ ngeuˇ naˇ jw.org g’oeˇ saiˇ laꞈ k’oeˇ-euˬ gaˇ kawˆ deuˬ-ahˇ zmˬ-awˇ neh k’awꞈ ja sawˇ nya meh. K’oeˇ naˇ, zaˬ deuˬ aˇ boꞈ dzaw nymˇ-ahˇ ya tahˬ puˬ luꞈ-eu gaˇ kawˆ deuˬ-ahˇ, aˬ joˆ-ehˇ jahˇ-awˇ neh ya laˆ piˇ-eu lehˇ ja sawˇ nya-awˇ JW tiˬ biˬ (tv.pr418.com)-ahˇ k’awꞈ haw-awˇ ja sawˇ nya meh. Bawˬ dzaˬ gaˇ caˇ-eu dawˬ caˇ deuˬ-ahˇ k’awꞈ caˇ dzaw nya meh. Nymˇ jiˇ uˬ duˬ tahˬ g’aˬ naˇ, tiˬ kawˆ loꞈ-ehˇ dzaˬ taꞈ dawˇ taꞈ nya meh.

Jawˇ nah yawˬ jaw na luꞈ aˇ yamˬ yuˇ-awˇ neh, Yeˬhawˇbaˬ-ahˇ uˬ duˬ tahˬ-eu heu naˇ, nymˇ jiˇ laꞈ k’oeˇ yawˬ g’aˬ na luꞈ, Miˬyehˇ-euˬ dawˬ-ahˇ laꞈ k’aˬ cehˇ laˇ ni caw ba nehˬ-awˇ, nawˬ neh leh jeh-euˬ gaˇ deuˬ-ahˇ Miˬyehˇ guiˬ lahˬ biꞈ tehꞈ-a.—Ja ceuˬ 1:1-3.

• Aˬ dui ha-euˬ nymˇ jiˇ Miˬyehˇ-ahˇ uˬ duˬ tahˬ-eu aˇ yamˬ, aˬ jeˬ miˇ neh ya tseˇ doˆ taˬ-eu nga?

• Aˇ yamˬ heu yamˬ-ahˇ, nymˇ jiˇ laꞈ k’oeˇ jawˇ-eu yawˬ g’aˬ na luꞈ laꞈ k’aˬ cehˇ nya ni, aˬ da aˬ ma deuˬ aˬ joˆ-ehˇ ya jahˇ-eu nga?