Yeˬsuˇ aˬ yawꞈ shiˇ-eu dawˬ peh peh laˇ ngeh, heu loꞈ-ehˇ ehˇ taˬ yaꞈ-euˬ meh. “Miˬyehˇ Miˇ k’ahˬ gaˇ kawˆ laꞈ k’aˬ cehˇ-eu guiˬ lahˬ dawˬ mehˬ doe tehꞈ-a. K’oeˇ dzeuˇ ngeh, aˇ saˬ saˬ-eu aˇ yamˬ keuˆ le tehꞈ-a.” (Maꞈtehˬ 24:14) Ehˇ k’awꞈ, gaˇ heu miˇ k’ahˬ-ahˇ aˬ joˆ-ehˇ mˇ doe nmˇ? Yeˬsuˇ miˇ tsaˬ k’oeˇ taˆ jawˇ ngeh mˇ yaꞈ-euˬ loꞈ-ehˇ mˇ caw-eu baˬ da neh doe iˇ nya-eu meh.—Luˇkaꞈ 8:1.

Nga maꞈ iˇ kahˇ keuˆ ni iˇ-awˇ, aˬ yawꞈ maꞈ-ahˇ ya mawˇ ni leh jeh luꞈ ma. Yeˬsuˇ aˬ yawꞈ-euˬ g’aˬ k’ehˇ deuˬ-ahˇ, tiˬ nymˇ maˬ doe maˬ doe-ehˇ tsaꞈ gaˬ iˇ-eu g’aˇ duˬ, dzaw mehˬ nehˬ yaꞈ-euˬ meh. (Maꞈtehˬ 10:11-13; G’aˬk’ehˇ 5:42; 20:20) Gaˇ hu tsaꞈ gaˬ iˇ-eu deuˬ-ahˇ k’awꞈ, aˬ gaˇ gaˇ ya tsaꞈ gaˬ iˇ-eu lehˇ yaw muiˬ-ehˇ dehˬ biˇ nehˬ-euˬ meh. (Maꞈtehˬ 10:5, 6; 2 Gawˇliˬtu 10:13) K’oeˇ loꞈ-ehˇ duˇ ni, nymˇ iˬ nah nga maꞈ aˇ muˇ yawˬ gaˇ na luꞈ, tsaꞈ gaˬ-eu gaˇ heu hmˬ-ahˇ yaw muiˬ-ehˇ dehˬ biˇ-awˇ neh mˇ luꞈ ma. K’oeˇ miˇ neh, Yeˬsuˇ neh “miˇ k’ahˬ zaˬ deuˬ-ahˇ dawˬ mehˬ mehˬ-awˇ . . . saˇ kiˇ kamˬ”-awˬ lehˇ, ehˇ taˬ yaꞈ-euˬ dawˬ-ahˇ mˇ caw nya-eu ma.—G’aˬk’ehˇ 10:42

Tsawˇ haˬ k’aˇ jawˇ gaˇ tsaꞈ gaˬ-eu g’aˇ duˬ, nga maꞈ leh jeh luꞈ ma. Aˬ dui bi dzaw geuꞈ-eu g’aˇ duˬ,Yeˬsuˇ lah gaˇ dzeˇ maˬ ehˇ, tsawˇ haˬ yaw myaˬ zmˬ-eu lah duˬ-ahˇ maˬ ehˇ, pu kaˬ lehˆ kawˆ-ahˇ maˬ ehˇ, tsaꞈ gaˬ iˇ-euˬ meh. (Maˬkuˆ 4:1; Yoˇhaˬ 4:5-15) K’oeˇ loꞈ-ehˇ duˇ ni nymˇ nga maꞈ k’awꞈ, gaˇ pehˇ maˬ ehˇ, gaˇ mˇ gaˇ maˬ ehˇ, dawˬ deh g’a duˬ-ahˇ maˬ ehˇ, naˬ gaˬ neh maˬ ehˇ, Jaˇliꞈ-euˬ gaˇ kawˆ-ahˇ, nga maꞈ k’aˇ g’eh nya-eu loꞈ-ehˇ tsaꞈ gaˬ luꞈ ma. K’oeˇ tehꞈ-ehˇ maˬ g’aˬ ni, nga maꞈ-euˬ iˇ kahˇ dawˬ peh jawˇ-eu deuˬ-ahˇ maˬ ehˇ, gaˇ mˇ cawˬ deuˬ-ahˇ maˬ ehˇ, aˇ boꞈ dzaw cawˬ deuˬ-ahˇ maˬ ehˇ, aˬ yuiꞈ aˬ nyiˇ deuˬ-ahˇ maˬ ehˇ, k’aˇ yehꞈ laˇ-eu loꞈ-ehˇ nga maꞈ leh jeh-awˇ saˇ kiˇ kamˬ luꞈ ma. Heu loꞈ-ehˇ leh jeh-eu baˬ da neh, “ka k’oꞈ nehˬ laꞈ-euˬ laꞈ k’aˬ cehˇ-eu guiˬ lahˬ dawˬ”-ahˇ, miˇ tsaˬ k’oeˇ taˆ tsawˇ haˬ yaw myaˬ lam g’aˬ ya gaˬ-eu meh.—Ja ceuˬ 96:2.

Miˬyehˇ Miˇ k’ahˬ gaˇ kawˆ hawˇ-eu g’awˬ myahˇ maˬ g’eh-ehˇ Miˬyehˇ biꞈ nehˬ laꞈ-eu laꞈ sawˬ deuˬ, nawˇ aˬ suˇ g’aˬ-ahˇ ja nehˬ mawꞈ nya? Noeˬ tmˬ-eu jeˬ pyeuꞈ-eu guiˬ lahˬ dawˬ heu, nawˬ-euˬ laꞈ k’oeˇ tehꞈ-ehˇ taˬ yuˇ taˬ, aˬ cawˬ-ahˇ yaw kawˇ ma-ehˇ tsaꞈ gaˬ nehˬ-awˬ.

• Aˬ jeˬ-euˬ “guiˬ lahˬ dawˬ” ya tsaꞈ gaˬ iˇ-eu nga?

• Yeˬhawˇbaˬ-euˬ Saˇ kiˇ deuˬ tsaꞈ gaˬ iˇ ngeh, Yeˬsuˇ-ahˇ aˬ joˆ-ehˇ dzaw geuꞈ-eu nga?