Aˇ hu ba-euˬ Ka li zaˬ aˇ muˇ deuˬ uiˬ leˇ-awˇ mehˬ bawˬ k’aˇ bawˬ dzaˬ ngeh, dawˬ caˇ caˇ-awˇ guiˬ lahˬ shaˇ g’aˬ naˇ, Jaˇliꞈ gui gui-ehˇ ja sawˇ-euˬ meh. Heu maˬ ngeuˇ naˇ, yawˬ jeˬ yawˬ lehˇ tiˬ jeˬ-iˬ maˬ jaˆ. (1 Gawˇliˬtu 14:26) Nymˇ nga maꞈ k’awꞈ, aˇ hu-euˬ Ka li zaˬ aˇ muˇ-ahˇ duˇ ni bawˬ dzaˬ-eu ma.

Jaˇliꞈ-ahˇ dawˬ pehˬ taˬ-awˇ mehˬ-eu dawˬ, aˬ diˇ zmˬ nya-eu meh. Bawˬ dzaˬ duˬ yawˬ gaˇ na luꞈ k’aˇ bawˬ dzaˬ ngeh, dehꞈ ziˇ-euˬ gaˇ kawˆ hawˇ-eu nymˇ saˇ ka nehˬ-ehˇ taꞈ leˇ-eu gaˇ kawˆ deuˬ-ahˇ, naˬ liˬ 30 peu Jaˇliꞈ-ahˇ dawˬ pehˬ taˬ-awˇ dawˬ mehˬ mehˬ-eu meh. Aˇ yamˬ heu laꞈ k’oeˇ yawˬ ha-euˬ Jaˇliꞈ-ahˇ zmˬ-awˇ haw caw-eu g’aˇ duˬ g’aˬ biꞈ ma. Dawˬ mehˬ mehˬ g’aˬ naˇ, “Loꞈ-eu nymˇgoˇ” paˇ dmˬ-ahˇ Ja sawˇ-eu g’aˇ duˬ, naˬ liˬ tiˬ laꞈ aˇ yamˬ zmˬ-eu ma. Aˇ yamˬ heu laꞈ k’oeˇ, yawˬ g’aˬ na luꞈ ja noeˬ ja sawˇ mˇ nya meh. Ja noeˬ ja sawˇ-eu heu naˇ, Jaˇliꞈ mehˬ nehˬ tsoˆ nehˬ laꞈ-eu jeˬ, nga maꞈ-euˬ dehꞈ ziˇ laꞈ k’oeˇ aˬ diˇ zmˬ nya ni g’aˇ duˬ caw ba nehˬ laꞈ-eu meh. Miˇ tsaˬ k’oeˇ taˆ bawˬ dzaˬ duˬ 110,000 tsahˇ dzehˬ ni jaˆ k’awꞈ, gaˇ kawˆ aˬ yawꞈ tiˬ kawˆ-ahˇ tehꞈ-ehˇ dzaw geuꞈ luꞈ ma.

Mehˬ-eu paw dzeˇ bym laˇ ni caw ba nehˬ-eu. Jawˇ nah yaw kaˬ mehˬ bawˬ uˬ ciꞈ uˬ taw paw, Ka li zaˬ-euˬ dehꞈ ziˇ hawˇ-eu tsaꞈ gaˬ-eu gaˇ mˇ-eu mehˬ bawˬ-ahˇ nga maꞈ bawˬ dzaˬ ngeh, gaˇ kawˆ deuˬ yawˬ siˬ na luꞈ doˆ laˇ-eu Ka li zaˬ-euˬ dehꞈ ziˇ hawˇ-eu tsaꞈ gaˬ-eu gaˇ mˇ-eu Bawˬ dzaˬ-eu sahˬ boꞈ aˇ taꞈ-ahˇ g’oe-eu ma. Bawˬ dzaˬ ngeh gaˇ kawˆ smˬ kawˆ biˇ paˆ-eu meh. Dahˬ beh-eu kawˆ naˇ, Jaˇliꞈ laꞈ k’oeˇ-euˬ poeˬ-eu zaˬ siˬ nui gahˇ gaˇ kawˆ pyeuꞈ meh. Heu naˇ Jaˇliꞈ laꞈ k’oeˇ-euˬ aˇ deuˆ tiˬ deuˆ-ahˇ siˬ nya laˇ ni caw ba nehˬ-awˇ, mehˇ nmˇ deuˬ neh gui leꞈ-euˬ jeˬ pyeuꞈ meh. Nyiˬ kawˆ aˬ yawꞈ kawˆ naˇ, Tsaꞈ gaˬ-eu gaˇ-ahˇ zmˬ iˇ-eu jeˬ gaˇ kawˆ pyeuꞈ meh. Heu naˇ, aˬ cawˬ-ahˇ Jaˇliꞈ aˬ joˆ-ehˇ ya ja sawˇ iˇ-eu lehˇ aˇ baˇ jahˇ byaˬ-awˇ, toeˬ mehˬ-eu g’aˬ k’awꞈ, gui-eu hawˇ-eu ngehˬ-eu paw dzeˇ bym laˇ ni caw ba nehˬ-eu meh. (1 Tiˆmoˇseˬ 4:13) Smˬ kawˆ aˬ yawꞈ kawˆ naˇ, Ka li zaˬ-euˬ dehꞈ ziˇ gaˇ kawˆ pyeuꞈ meh. Heu naˇ, Jaˇliꞈ zahˇ aˬ dui dehꞈ ziˇ laꞈ k’oeˇ aˬ joˆ-ehˇ ya zmˬ iˇ-eu lehˇ ja sawˇ-awˇ, Jaˇliꞈ-ahˇ g’oˆ shaw dzehˬ laˇ ni, naˇ haˬ-awˇ ehˇ k’oꞈ-eu yamˬ pyeuꞈ meh.

Nga maꞈ bawˬ dzaˬ gaˇ oe ngeh jawˇ, aˇ poeˬ k’aˆ dui dui-eu Jaˇliꞈ-euˬ zaˬ siˬ nui gahˇ mehˬ gaˇ ya gaˬ ngeh, nawˬ-euˬ nui ma-ahˇ zaw leˇ tehꞈ-a.—Iˇsaˬyaˇ 54:13.

• Yeˬhawˇbaˬ-euˬ Saˇ kiˇ deuˬ-euˬ bawˬ dzaˬ duˬ-ahˇ, nawˇ aˬ jeˬ jeˇ ya gaˬ-eu nga?

• Nymˇ nawˇ aˬ geu kawˆ bawˬ dzaˬ gaˇ oe mawꞈ nya?