Tsawˇ haˬ heu deuˬ, aˬ jeˬ miˇ neh teu naˆ naˆ-ehˇ laꞈ k’aˬ cehˇ-eu nga? Yeˬhawˇbaˬ-euˬ Saˇ kiˇ deuˬ-euˬ huiˬ-eu mehˬ bawˬ-ahˇ iˇ keuˆ taˬ-euˬ miˇ neh meh. Gaˇ hu ba Miˬyehˇ aˬ yawꞈ-euˬ zaˬ lahˇ deuˬ-ahˇ, tiˬ k’oꞈ-ahˇ smˬ poˆ bi uiˬ laˇ-euˬ loꞈ-ehˇ, nymˇ nga maꞈ k’awꞈ k’oeˇ loꞈ-ehˇ duˇ ni, huiˬ-eu mehˬ bawˬ-ahˇ tiˬ kawˆ loꞈ-ehˇ tahˬ dzoeˇ-eu g’aˇ duˬ noeˬ tmˬ-awˇ loꞈ luꞈ ma. (Dawˬmehˬmehˬ-eu 16:16) Nga maꞈ tiˬ k’oꞈ laꞈ k’oeˇ bawˬ dzaˬ-eu smˇ jeˬ jaˆ ma. Tiˬ nah mehˬ bawˬ nyiˬ poˆ, Smˬ nah mehˬ bawˬ tiˬ poˆ lehˇ jaˆ ma. Bawˬ dzaˬ gaˇ iˇ-eu baˬ da neh, nga maꞈ aˬ jeˬ za-eu nga?

Ka li zaˬ mehˇ nmˇ deuˬ mehˬ bawˬ gm dzehˬ laˇ-eu meh. Huiˬ-eu mehˬ bawˬ heu laꞈ k’oeˇ, Yeˬhawˇ baˬ Miˬyehˇ-ahˇ uˬ duˬ tahˬ-eu lehˇ “uiˬ laˇ taˬ-euˬ” gaˇ, Iˇsaˬleˬlaˆ tsawˇ jeuˬ deuˬ laꞈ k’aˬ cehˇ dui dui-eu meh. K’oeˇ loꞈ-ehˇ duˇ ni, nga maꞈ k’awꞈ huiˬ-eu mehˬ bawˬ-ahˇ, mehˇ nmˇ deuˬ nehˬ-ehˇ tiˬ kawˆ loꞈ-ehˇ, Miˬyehˇ-ahˇ uˬ duˬ ya tahˬ-eu miˇ neh laꞈ k’aˬ cehˇ dui dui miˇ-a. (Ja ceuˬ 26:12; 111:1) Huiˬ-eu mehˬ bawˬ baˬ da neh, yawˬ k’ahˬ yawˬ miˇ yawˬ-ahˇ jawˇ-eu mehˇ nmˇ deuˬ nehˬ-ehˇ ya tahˬ dzoeˇ-awˇ, nah g’ahˇ hawˬ jiˇ ni tiˬ kawˆ loꞈ-ehˇ paˇ ya dzaˬ taꞈ-euˬ miˇ neh, tiˬ g’aˬ tiˇ g’aˬ g’oeˇ-eu gaˬ-eu jeˬ paˇ myaˬ laˇ-eu meh. (G’aˬk’ehˇ 2:42) Huiˬ-eu mehˬ bawˬ heu laꞈ k’oeˇ, miˇ k’ahˬ doe ni jawˇ-eu “Ka li-ahˇ jah-eu tsawˇ haˬ” yawˬ g’aˬ na luꞈ, g’oeˇ-eu gaˬ-eu jeˬ byah-awˇ, nui ma tiˬ siˬ tehꞈ-ehˇ taꞈ gaˇ ya mawˇ-euˬ ma.—1 Beˬtuˆluˆ 2:17.

Nga maꞈ-euˬ nui jah huiˬ laˇ mahˇ laˇ ni caw ba nehˬ laꞈ-eu meh. Iˇsaˬleˬlaˆ tsawˇ jeuˬ deuˬ, Jaˇliꞈ laꞈ k’oeˇ-euˬ dawˬ tsuiꞈ deuˬ-ahˇ “g’oˆ shaw-euˬ” miˇ neh, aˬ yawꞈ maꞈ-euˬ g’aˇ duˬ gaˇ dahˇ tsoeˬ dui dui-euˬ meh. (Neˬhaˬmiˇ 8:8, 12) K’oeˇ loꞈ-ehˇ duˇ ni nga maꞈ k’awꞈ, huiˬ-eu mehˬ bawˬ-ahˇ neh ya gaˬ-euˬ Jaˇliꞈ mehˬ nehˬ tsoˆ nehˬ-eu jeˬ-ahˇ, aˇ poeˬ taˬ baw dui dui-eu ma. Mehˬ-eu yawˬ kawˆ na luꞈ Jaˇliꞈ-ahˇ g’oe-awˇ neh mehˬ-eu meh. Nga maꞈ-euˬ dehꞈ ziˇ Miˬyehˇ nui ma tsaˬ-eu jeˬ-ahˇ, aˬ joˆ-ehˇ ya mˇ-eu lehˇ dawˬ mehˬ mehˬ-awˇ, puˬ haw laꞈ-euˬ jeˬ-ahˇ aˇ baˇ jahˇ byaˬ nehˬ-eu meh. Mehˇ nmˇ deuˬ shaˬ zahˬ-ahˇ aˬ joˆ-ehˇ g’aˬ leˇ-euˬ gaˇ kawˆ ya gaˬ ngeh, g’aˬ ahˇ laˇ miˇ-a. Smˬ nah mehˬ bawˬ-ahˇ, gaˇ hu-euˬ moeˬ tsoeˬ dm-awˇ aˇ baˇ jahˇ byaˬ-eu heu naˇ, Jaˇliꞈ laꞈ k’oeˇ-euˬ gaˇ kawˆ deuˬ-ahˇ bi maˇ dzehˬ laˇ-awˇ, aˬ dui dehꞈ ziˇ laꞈ k’oeˇ zmˬ nya-eu jeˬ k’awꞈ pyeuꞈ meh. Yawˬ poˆ na luꞈ huiˬ-eu mehˬ bawˬ heu laꞈ k’oeˇ, Miˬyehˇ-ahˇ a nehˬ dzeuˇ maˬ lehˇ, ehˇ nehˬ mawꞈ-eu deuˬ-euˬ g’aˇ duˬ, iˇ cuꞈ shawˇ-eu jeˬ-ahˇ lehˬ hmˬ nehˬ taˬ-euˬ meh.

• Huiˬ-eu mehˬ bawˬ, aˬ jeˬ miˇ neh laꞈ k’aˬ cehˇ yamˬ pyeuꞈ nga?

• Huiˬ-eu mehˬ bawˬ-ahˇ iˇ-eu, nawˬ-euˬ g’aˇ duˬ aˬ jeˬ za-eu nga?