Aˬ jeˬ miˇ neh aˇ yeˇ huiˬ nga?: Jaˇliꞈ dzaw zaˬ deuˬ jeˬ hu lehˬ hmˬ taˬ naˇ, aˬ dui neh mehˬ-eu jeˬ-ahˇ noeˬ taˬ nya-awˇ, g’oˆ shaw leˇ nya-eu meh. Aˬ yawꞈ maꞈ iˇ cuꞈ shawˇ dzeuˇ-euˬ k’awꞈ ni, aˬ yawꞈ maꞈ neh dzaw-euˬ jeˬ-ahˇ noeˬ taˬ nya-awˇ g’oˆ shaw nya naˇ, huiˬ laˇ mahˇ laˇ-eu yaw kawˇ meh. Aˬ yawꞈ maꞈ “yaw beuˇ beuˇ-ehˇ dehꞈ” nya-eu g’aˇ duˬ, bawˬ dzaˬ iˇ ngeh maˬ ehˇ, tsaꞈ gaˬ iˇ ngeh maˬ ehˇ, ya lehˬ hmˬ-eu meh. (Tehˬ 25:13) Teu miˇ neh, aˬ joˆ-ehˇ ya pyehˆ tseˇ-eu lehˇ siˬ nya-awˇ, pyehˆ tseˇ-eu aˇ yamˬ yaw muiˬ-ehˇ biˇ taˬ-eu heu naˇ, aˬ yawꞈ-euˬ tiˬ ziˇ gaˇ dahˇ tsoeˬ-eu meh. Dzaw dahˬ beh ngeh neh, Jaˇliꞈ dzaw zaˬ deuˬ yaw muiˬ-ehˇ lehˬ hmˬ nya ni aˬ dui ya caw ba nehˬ-eu meh.

Mˇ paˬ-ehˇ g’eh-eu jeˬ:

• Yaw muiˬ jeˬ mˇ mehˬ nehˬ. (Maˆ 2:21) Dzaw zaˬ-euˬ nui ma-ahˇ ahˇ leˇ ni, dzaw zaˬ aˬ yawꞈ g’aˬ yawꞈ-ahˇ noeˬ keuˆ-awˇ lehˬ hmˬ. (km-E 11/15 3) Nawˬ neh kawˆ taˬ-euˬ gaˇ bi haw.

• Dzaw zaˬ deuˬ-ahˇ jeˬ hu lehˬ hmˬ taˬ lehˇ g’aˬ biꞈ. Jaˇliꞈ dzaw dahˬ beh ngeh, jeˬ hu lehˬ hmˬ taˬ-eu heu naˇ, Jaˇliꞈ dzaw-eu jeˬ laꞈ k’oeˇ tiˬ jeˬ pyeuꞈ-awˇ, aˬ joˆ-ehˇ gaˇ dahˇ tsoeˬ nga lehˇ ehˇ mawˇ nehˬ. K’oeˇ naˇ, lehˬ hmˬ-eu g’aˇ duˬ aˇ yamˬ aˬ joˆ-ehˇ ya biˇ-eu lehˇ jiˇ mehˬ nehˬ. Dzaw mehˬ nehˬ-eu tiˬ g’aˬ na, jeˬ hu lehˬ hmˬ taˬ-eu heu gaˇ dahˇ aˬ joˆ-ehˇ tsoeˬ-eu nga lehˇ dzaw zaˬ deuˬ-ahˇ bi siˬ nya-eu g’aˇ duˬ, aˬ yawꞈ neh kawˆ taˬ-euˬ paˇ dmˬ-ahˇ bi haw-eu meh. Dzaw zaˬ jeˬ hu lehˬ hmˬ taˬ naˇ aˬ yawꞈ-ahˇ ja ceuˬ nehˬ.

• Aˬ joˆ-ehˇ ya lehˬ hmˬ-eu lehˇ mˇ mawˇ nehˬ. Dzawˬ dahˬ beh ngeh, mehˬ-eu tiˬ g’aˬ na, dzaw zaˬ-ahˇ aˬ joˆ-ehˇ ya lehˬ hmˬ-eu lehˇ mehˬ-eu g’aˇ duˬ, dzaw-eu laꞈ k’oeˇ aˇ yamˬ zmˬ-awˇ mˇ mehˬ nehˬ-eu meh