“Eyi taɖo mísɔ míwoɖekiwo hwe do Mawu lɔ̀ sɛnŋ lɔ gɔnmɛ, nɔ akɔ mí yi ji le hwenu nywitɔ ji, yí mídro míwo nulolokpɔwo pleŋ do ji, ɖo élenɔ be nɔ mí.”—1 Piɛ 5:6, 7, Xexe Yeye Gɔmeɖeɖe.

 “Mí hwe míwoɖekiwo kpɔtɔ do Mawu ŋsɛn lɔ̀ gɔnmɛ, nɔ́ Á kɔ mí yì eji hwecinu É drui. Mí sɔ míwo susuwo jo nɔ Mawu, ɖo é kpenɔ ŋkuvi do mí nu.”—1 Piɛ 5:6, 7, Mawu Nyɔ.

 Ci apotru Piɛ nu nyɔ cɛwɔ, ésɔ na kankandoji Kristotɔwo mɔ, woatɛnŋ asɔ kankandoji do gbe ɖaɖa nɔ Mawu so wowo cukaɖawo koɖo enulolokpɔwo nu. Mawu donɔ afixɔxɔ mɛ ciwo yí sɔnɔ wowoɖekiwo hwe nu, yí acu fɛn nɔ wo gɔɖɔɔ.

 “Mísɔ míwoɖekiwo hwe do Mawu lɔ̀ sɛnŋ lɔ gɔnmɛ.” Blaŋblaŋ le Bibla mɛɔ, Mawu lɔ̀ dɔnnɔ susu yi yi ŋsɛn ci esɔ hwlɛnnɔ amɛ gan alo sɔ glɔnnɔ ta nɔ amɛ ji. (Hunhun 3:19; 2 Ese Wema 26:8; Ezra 8:22) Kristotɔwo sɔnɔ wowoɖekiwo hwe do Mawu lɔ̀ gɔnmɛ nɔ woɖoŋ do nu. Wojenɔshi wowo sɛnxuwo yí nyanɔ mɔ yewodatɛnŋ aɖu tetekpɔwo ji le yewoɖeki shi o. (Elododo Wema 3:5, 6; Filipitɔwo 4:13) Wokando ji mɔ Mawu ɖo ŋsɛn akpedo yewo nu le gamɛ nywitɔ koɖo emɔ nywitɔ ji.—Ezai 41:10.

 “Nɔ akɔ mí yi ji le hwenu nywitɔ ji.” Mɛ ciwo yí do Ʒinxo yí do ji le cukaɖawo mɛ atɛnŋ akando ji mɔ Mawu avakɔ yewo yi ji, yi gɔnmɛ nyi mɔ ácu fɛn nɔ yewo. Dálɔn woate yi sɛntɔwo kpɔ mamimami alo sɔwu ci ji woasun o. (1 Korɛntitɔwo 10:13) Vɔ nɔ wokpɔtɔ wakɔ nunywiɔ, Mawu acu fɛn nɔ wo dandandan le “gamɛnywi” ji.—Galatitɔwo 6:9.

 “Mídro míwo nulolokpɔwo pleŋ do ji, ɖo élenɔ be nɔ mí.” Kristotɔwo atɛnŋ adro alo asɔ wowo nulolokpɔwo pleŋ jo nɔ Mawu, nɔ wodonɔ gbe ɖaɖa ni koɖo amɛɖekisɔsɔhwe. Enyɔsoxu ɖeka ɖe mɛ mɔ: “Edɔwanyɔ dro gɔnmɛsese yí nyi mɔ míatekpɔ acucu agban ɖe xuin le mìwoɖekiwo ji. Edasɛ mɔ mìaɖui koŋ awɛ.” Nɔ Kristotɔ ɖe dro yi nulolokpɔwo do Mawu jiɔ, enulolokpɔ lɔwo atɛnŋ afoɖa ni yí akpɔ enu ci Bibla yɔ mɔ “fafa Mawutɔ.” (Filipitɔwo 4:6, 7) Átɛnŋ akando ji mɔ Mawu ji mɔ yeakpedo ye nu, ɖo énya mɔ Mawu lenɔ bu nɔ ye yí atɛnŋ azan Yi ŋsɛn gangan lɔ asɔ le ye do te.—Ehajiji Wema 37:5; 55:22.

 Eta 5 lɔ yí cu ta nɔ wema ŋkɔtɔ ci apotru Piɛ ŋwlɛ ɖaɖa Kristotɔwo. (1 Piɛ 1:1) Shigbe lé ele egbɛ nɛɔ, Kristo dokplɔtɔwo donɔ go tetekpɔ vovovowo hwenɔnu, ciwo yí do wowo xɔse kpɔ yí tɛnŋ na wolo nu kpɔ. (1 Piɛ 1:6, 7) Ci Piɛ nya nu so wowo cukaɖawo nuɔ, éŋwlɛ ŋsɛndoamɛ wema ci mɛ lɔnlɔn le le exwe 62 yi 64 han mɛ K.H.—1 Piɛ 5:12.

 Piɛ cu ta nɔ yi wema lɔ koɖo eŋwiɖoɖonyɔ doŋsɛn-amɛ ɖeka nɔ mɛ ciwo yí dokɔ go tetekpɔwo le wowo xɔse ŋci. Nɔ wokpɔtɔ sɔ wowoɖekiwo hwe yí ɖoŋ do Mawu nuɔ, woatɛnŋ akando ji mɔ Mawu akpedo yewo nu yí yewoanɔ te sɛnsinɖe. (1 Piɛ 5:5-10) Piɛ nyɔ lɔwo atɛnŋ ado ŋsɛn Kristotɔ ciwo wocikɔ yumɛ nɔ le egbɛ mɛ can.

 Kpɔ video kpoli cɛ keŋ akpɔ enumɛtoto nɔ 1 Piɛ wema lɔ.