“Nushianu ci míwawaɔ, míwɛ so míwo jiwo pleŋ mɛ shigbe mɔ Yehowa yí míwɛkɔ nɔ hannɛ, yí denyi agbetɔwo yí míwɛwɛ nɔ o.”​—Kolosetɔwo 3:23, Xexe Yeye Gɔmeɖeɖe.

 “Le míwo dɔwawawo mɛ ɔ, mí a wa wo nywiɖe. Mí a wa edɔ shigbe Axwetɔ yí mí le edɔ wakɔ nɔ ɛnɛ, de agbetɔwo yí mí wawa edɔ nɔ o.”​—Kolosetɔwo 3:23, Mawu Nyɔ.

 Kristotɔ ɖo aje agbla awa dɔ sɛnsinɖe, ɖo lé ewanɔ dɔ do ca ka koɖo Yehowa Mawu sɛnsɛn yitɔ.

 “Nushianu ci míwawa.” Amɛ ciwo ji mɔ yewoasɛn Yehowa tenɔkpɔ mɔ yewoawa do nyɔ ciwo Bibla nu ji le nushianu ci wowakɔ mɛ. Woje agbla yí wanɔ dɔ sɛnŋsɛnŋɖe, nunɔ nyɔnɔnwi yí gbenyinɔ mɛ ciwo ji wokannɔdo le nu ciwo pleŋ wowanɔ gbeɖeka duu mɛ le axomɛ, le dɔ mɛ koɖo le suklu.​—Elododo Wema 11:13; Rɔmatɔwo 12:11; Ebretɔwo 13:18.

 “Míwɛ so míwo jiwo pleŋ mɛ.” Grɛkigbe mɛ yí woɖe nyɔgbe “so míwo ji pleŋ mɛ” so. Le Grɛkigbe mɛɔ, nyɔgbe lɔ “drenɔ mɛ ci yí xa ɖui yí sɔ yi ŋsɛnwo pleŋ wawa do egbe ci eɖo nɔ Mawu ji.” a

 Eyi taɖo edɔwatɔ ŋtɔ́ zannɔ yi ŋsɛn koɖo yi susuwo pleŋ keŋ awa ci ji ekpe nɔ éwakɔ dɔ ɖe. Bibla gɔnmɛɖeɖe buwo nu mɔ “koɖo wowo ji pleŋ,” alo “so xomɛ,” alo “koɖo wowo kla pleŋ.”

 “Shigbe mɔ Yehowa yí míwɛkɔ nɔ hannɛ, yí denyi agbetɔwo yí míwɛwɛ nɔ o.” Kristotɔwo lenɔ bu nɔ edɔ ɖekpokpui ci wowakɔ veviɖe, ɖo wonya mɔ lé yewowakɔ dɔ lɔ do adɔ exlɔ ci yewonyi koɖo Yehowa Mawu asɛnŋ alo adahɛn. Ŋci yí le veviɖe nɔ wo koŋ yí nyi lé woawɛ keke wowo nu ajeŋ nɔ Mawu denyi nɔ edɔmɛga, axwetɔ alo mɛbu ɖe o. Nɔ Kristotɔ ɖe sɔ susu nywi kpɔnɔ edɔ ci ewakɔ yí gbewanɔ dɔ lɔ nywiɖeɔ, de yiɖekɛ yí amɛwo kpɔnɔ nywiɖe o, vɔ wogbekpɔnɔ Mawu ci esɛnkɔ nywiɖe hɛnnɛ. Nɔ Kristotɔ ɖe wɛni ahan ɔ, anyi éwakɔ ŋci atɛnŋ awa nɔ “amɛ ɖe da gbé Mawu ŋkɔ koɖo mìwo nukplakpla o.”​—1 Timɔte 6:1; Kolosetɔwo 3:22.

 Apotru Pɔlu yí ŋwlɛ Kolosetɔwo wema ci yí le Bibla mɛ ɖaɖa Kristotɔ ciwo yí le blema jugan ci woyɔnɔ mɔ Kolose b mɛ. Anyi mɔ ale vɔvɔnu nɔ hwenu wocui do ga mɛ ŋkɔtɔ le Rɔma le exwe 60-61 K.H. han yí eŋwlɛ wema cɛ.

 Enukplamuwo le Kolosetɔwo wema lɔ mɛ yí kpenɔdo Kristotɔwo pleŋ nu yí egbe nɔnɔ ju nɔ wo yí wosɛnnɔ Mawu doju, nɔ woso fiɖekpokpui alo le nɔnɔmɛ ɖekpokpui mɛ can. (Kolosetɔwo 3:11) Édonɔ ŋsɛn wo yí wojinɔ mɔ yewoaɖyi Mawu yí aɖo yi nɔnɔmɛ nywiwo shigbe lɔnlɔn, xomɛvu koɖo ŋshishikuku nɔ amɛ nɛ. (Kolosetɔwo 3:12-14) Wema cɛ dre mɛ mɔ yɛle veviɖe mɔ, Mawu sɛnsɛn akpɔ ŋsɛn do amɛ gbenɔnɔ kpaxwe ɖeshiaɖe ji.​—Kolosetɔwo 3:18–4:1.

 Kpɔ video kpoli cɛ keŋ akpɔ enumɛtoto nɔ Kolosetɔwo wema lɔ mɛ.