JAJƐWO BIƆNƆ SE MƆ
Lé Nawɛ Akpanŋkɔ Veviseseɔ?
Ao xlɔ alo ao xomumɛtɔ ɖe ku le majinjinɖe mɛa? Nɔ ahan yɔ nɛɔ, nyɔci cɛ atɛnŋ akpedo eo nu nakpanŋkɔ vevisse ci mɛ èle.
Ŋciwo yí le nyɔci cɛ mɛ
Ŋsekɔ vevi ɖoɖu yɔa?
Le amɛ sugbɔ gomɛɔ, vevi ci wosenɔ nɔ amɛ ku nɔ wo sɛnnɔŋ keke yí devɔnɔ blaŋ o.
“Ŋkeke ɖe devayinɔ yí ŋgɔnma ɖonɔ ŋwi tɔgbinyɛ o. Ci enyi xwe amɛve ke yí eku can ɔ, ŋkpɔtɔ fannɔ avin nɔ ŋxokɔ nuxu so nu.”—Olivia.
“Mamanyɛ yí donɔ ŋsɛnŋ sugbɔ mɔ nyɛle ɖo anyi tajinuwo gbɔ, vɔ denɔ agbe yí kpɔ eɖe le tajinu ciwo gbɔ ŋɖo mɛ o. Ŋsenɔ vevi sugbɔ nɔ ŋɖo anyi tajinu ɖe gbɔ, ɖo degbeli yí akpɔɛ o.”—Alison.
Vevisese lɔ atɛnŋ ana naɖo seselelanmɛ vovowo. Le kpɔwɛ mɛ:
“Ci tashinyɛ su kuɔ, deɖyi nyɔnɔnwi do nu nɔŋ o, ejinjin sugbɔ gbɔxwe ŋvakando ji mɔ yɛ ku. Ecɛ yí nyi ŋkɔtɔ ci anyi mɛ vevi ɖe ku, yí ele shigbe pipan kpɛnkpin ɖe yí gblaŋ xwin nɛ.”—Nadine.
“Ŋwa dɔmɛzi do tɔgbinyɛ hwenu eku, ɖo ci mìdo ŋsɛn yi mɔ le lebu nɔ yi lanmɛsɛn can ɔ dewɛ o.”—Carlos.
“Nyɛ koɖo dadanyɛ yí nyi xomu lɔ mɛ tɔ ciwo yí dele nɔ gbɔxwe mìwo tɔgbi ku o. Le yi goduɔ, ŋdo hwɛ nyɛɖeki ɖo ŋdele nɔ yí do yiagbɔ ni nywiɖe o.”—Adriana.
“Asu koɖo ashi ɖeka ci yí nyi xlɔ koɖo mìwo xomu lɔ ku le ehun fɔku ɖeka mɛ. Yi goduɔ, hwedekpokpuinu ci mìwo xomumɛtɔ ɖe so le axomɛɔ, ŋvɔnnɔ ɖo ŋbuini mɔ taŋfuin yɛ can yaku.”—Jared.
“Ci mamanyɛ ku xwetɔn ke vayiɔ, eveŋ mɔ ŋdeji gamɛ sugbɔ sɔ nɔ ju koɖi hwenu ele agbe o.”—Julianna.
Nɔ amɛ vevi ku nɔ mìɔ, esɔgbe mɔ daɖyi nyɔnɔnwi nɔ mì kaka o, mìawa dɔmɛzi, mìado hwɛ mìwoɖeki, mìavɔn, alo enu ave mì nu. Nɔ èɖo seselelanmɛ ɖe le ecɛwo mɛɔ, kando ji mɔ le yiyimɛɔ, avaɖe kpɔtɔ. Vɔ le kakayɛ mɛ ɖɛ, lé àwɛ akpanŋkɔ vevisese lɔɔ?
Lé nawɛ akpanŋkɔ vevisese
Nu ao jimɛnyɔwo nɔ ao xlɔ ɖe. Bibla nu mɔ exlɔ adodwi nyinɔ nɔvi nɔ amɛ “le cukaɖawo hwenu hɛnnɛ.” (Elododo Wema 17:17) Nɔ èxo nuxu so lé ewawa nɔ eo nu nɔ mɛɖeɔ, atɛnŋ akpedo eo nu naxɔ kpekpedonu ci èʒan.
“Esɔgbe mɔ woase vevi. Hweɖewonuɔ àtɛnŋ asekɔ vevi eoɖekɛ, vɔ nɔ denya wawaɔ, vevisese lɔ awugan. Eyi taɖo enyɔ mɔ nakan seŋ koɖo mɛɖe.”—Yvette.
Ðonɔ ŋwi ao mɛ vevi lɔ. Bibla nu mɔ “amɛ nywi sɔnɔ enu nywi le dɔku nywi ci yí le eji mɛ.” (Luiki 6:45) Àtɛnŋ aŋwlɛnɔ enunywi ciwo èɖonɔ ŋwi so nu daɖɛ.
“Ŋsɔ gbeta yí ŋwlɛ enu ciwo anyi xlɔ lɔ kplanɔŋ gbɔxwe vaku daɖɛ, ecɛ wɛ mɔ ŋkpɔtɔ kpɔkɔ ele so kpɔwɛ ci eɖo ɖɛ nɔŋ mɛ. Ci ŋŋwlɛ wo ɖɛɔ èkpedo ŋnu ŋkpanŋkɔ vevisese lɔ.”—Jeffrey.
Le bu nɔ ao lanmɛsɛn. Bibla nu mɔ nyɔna le kanmɛtete mɛ. (1 Timɔte 4:8) Kpɔ gbɔ mɔ ye ɖukɔ nu, teteɛkanmɛ yí gbe gbɔnkɔ domɛ nywiɖe shigbe le ye ʒan do nɛ.
“Vevisese atɛnŋ ana dabunɔ tamɛkpɔ nywiɖe o, eyi taɖo èɖo atekpɔ anɔnɔ lanmɛsɛn mɛ. Ŋgbe gbe enu ɖuɖu alo alɔn dɔndɔn nywiɖe o.”—Maria.
Kpenɔdo mɛbuwo nu. Bibla nu mɔ: “Jijɔkpɔkpɔ le enunanamɛ sɔwu enuxɔxɔ.”—Edɔwawawo 20:35.
“Tekpɔ awa ŋɖe nɔ mɛbuwo, vevitɔ nɔ mɛ ciwo amɛ ku nɔ hɛnnɛ. Ecɛ atɛnŋ aɖonɔ ŋwi nɔ eo mɔ mɛbuwo kpekpeɛ fun hɛnnɛ.”—Carlos.
Nu ao seselelanmɛwo nɔ Yehowa le gbedodoɖa mɛ. Bibla nu mɔ Yehowa Mawu ‘senɔ mìwo kwifanwo.’ (Ehajiji Wema 65:2) Egbenu hɛnnɛ mɔ Yehowa “da edɔ̀ nɔ wowo ciwo yí xa le wowo jiwo mɛ, yí bla wowo kpawo.”—Ehajiji Wema 147:3.
“Biɔ Yehowa mɔ le na ye kpedonu koɖo ŋsɛndoamunyɔ ciwo ye ʒan. Ŋkeke ɖewo sɛnnɔŋ sɔwu ebuwo, vɔ Yehowa kpenɔdo mì nu gashiagamɛ.”—Jeanette.
Ðo susu sɔgbe do ao nɔnɔmɛwo nu. Ðo ŋwi mɔ lé mɛɖekamɛɖeka senɔ vevido to akpo. Bibla nu mɔ Ʒakɔbu “kpɔtɔ le vevi sese mɛ” ɖo ébu mɔ ye viye ku. (Gɔnmɛjeje 37:35) Eyi taɖo, ŋgbekpaca eo mɔ vevisese yetɔ devɔvɔ o.
“Nɔgannyɛ ku yɛɔ ewa xwe wiatɔn vɔ enu sugbɔ dɔ yí ŋɖonɔ ŋwii.”—Taylor.
Sɔɛ mɔ exu ɖe ŋɛ nɔ eo. Àse vevi sugbɔ yí etɛnŋ xɔ gamɛ gbɔxwe exu lɔ aca. Gbɔxwe anyi ahan ɔ, doto anu ŋɖewo ciwo àwakɔ nɔ ao lanmɛ lɔ ahaya.
Ecɛ sɔ koɖo lé ao mɛ vevi ɖe aku yí vevisese lɔ aɖekɔ kpɔtɔ vivivi. Exɔnɔ gamɛ gbɔxwe vevisese sɛnŋsɛnŋ ɖenɔ kpɔtɔ. Eyi taɖo gbɔn ji ɖɛ. Bu tamɛ kpɔ so enukplamu ciwo yí le nyɔci cɛ mɛ nu, keŋ akpɔ ciwo yí akpedo eo nu sɔwu.
