Eŋɛnywiwema Ʒan Tɔ 1:1-51
1 Le gɔnmɛjeje lɔ mɛɔ, Enyɔ lɔ li, Enyɔ lɔ le koɖo Mawu yí Enyɔ lɔ nyi mawu ɖeka.*
2 Mɛ cɛ le koɖo Mawu le gɔnmɛjeje lɔ mɛ.
3 Eyi ji woto yí wa enuwo pleŋ, wodewa enu kuɖeka kpetii eyɛ manɔ mɛ o.
Enu ci wowa
4 toto ji yí nyi agbe yí agbe lɔ nyi klɛnklɛn nɔ agbetɔwo.
5 Eyi klɛnklɛn lɔ kɔkɔ le vinvin mɛ vɔ vinvin lɔ deɖu klɛnklɛn lɔ ji o.
6 Ŋsu ɖeka ci wodɔ ɖaɖa yí enyi Mawu dumɛnɔtɔ vaɖo, yi ŋkɔ yí nyi Ʒan.
7 Ŋsu cɛ va shigbe kunuɖetɔ nɛ yí aɖe kunu so klɛnklɛn lɔ nu keŋ nɔ agbetɔ hamɛhamɛwo pleŋ aɖo xɔse toto ji.
8 De eyi nyi klɛnklɛn lɔ o, vɔ éva mɔ yeaɖe kunu so klɛnklɛn lɔ nu.
9 Klɛnklɛn adodwi ci yí klɛnnɔ nɔ agbetɔ hamɛhamɛwo pleŋ jikɔ ava xexe lɔ mɛ.
10 Énɔ xexe lɔ mɛ yí woto ji yí wa xexe lɔ, gan xexe lɔ dejeshi ɖɛ o.
11 Éva yiŋtɔ xomɛ, vɔ yiŋtɔ mɛwo dexɔɛ o.
12 Gan éna acɛ mɛ ciwo pleŋ yí xɔɛ nɔ woatrɔ Mawu viwo, ɖo woɖo xɔse do yi ŋkɔ nu.
13 Wodeji wo so ehun koɖo lankpu mɛ o yí denyi agbetɔ dro mɛ yí woji wo le o, vɔ Mawu mɛ woso.
14 Enyɔ lɔ vatrɔ agbetɔ* yí nɔ mì mɛ yí mìkpɔ kanfukanfu yitɔ shigbe kanfukanfu ci evi akogo ɖe xɔ so dalɔ gbɔ nɛ yí xomɛvu* Mawu tɔ koɖo nyɔnɔnwi ɖɔɛ.
15 (Ʒan ɖe kunu so nu, ɛɛ, édo axwa mɔ: “Mɛ cɛ nyɔ yí ŋnukɔ nɔ mí ci ŋnu mɔ, ‘Mɛ ci yí le ŋgbe nɔŋ wuganŋ, ɖo éli gbɔxwe ŋvajɔ.’”)
16 Ci xomɛvu koɖo nyɔnɔnwi ɖɔɛɔ, éwa xomɛvu sugbɔ nɔ mì pleŋ.
17 Ðo wona Ese lɔ to Moizi ji yí xomɛvu koɖo nyɔnɔnwi to Yesu Kristo ji yí va.
18 Mɛɖe dekpɔ Mawu kpɔ o; evi kuɖeka kpaŋ ci yí le shigbe Mawu hannɛ yí le axa nɔ Dalɔ* yí dre mɛ ci enyi.
19 Enyɔ cɛwo yí Ʒan nu hwenu Ʒuifuwo dɔ avɔnsatɔwo koɖo Levitɔwo ɖaɖa so Ʒerusalɛmu mɔ wo le biɔɛ se mɔ: “Mi ènyiɔ?”
20 Éɖo ŋci yí ke mɛ gbajɛɛ mɔ: “Ŋdenyi Kristo lɔ o.”
21 Eyi wobiɔɛ se mɔ: “Vɔ mi ènyiɔ? Eo yí nyi Eli a?” Éɖo ŋci mɔ: “Enyɛ yɔ go.” “Enyɔnuɖɛtɔ ènyia?” Eyi eɖo ŋci mɔ: “Oo!”
22 Eyi taɖo wobiɔɛ se mɔ: “Mi ènyiɔ? Nui nɔ mì keŋ nɔ mìanya nyɔ ci mìavayi nu nɔ mɛ ciwo yí dɔ mì ɖaɖa. Enyɔ ci ènukɔ so eoɖeki nuɔ?”
23 Énu mɔ: “Enyɛ yí nyi mɛ ci yí dodoɔ axwa le zogbeji yí nukɔ mɔ: ‘Míwɛ nɔ Yehowa mɔ ajɔ’ shigbe lé enyɔnuɖɛtɔ Ezai nui ɖɛ nɛ.”
24 Mɛ ciwo wodɔ ɖaɖa lɔwo nyi Farizitɔwo.
25 Eyi taɖo wobiɔɛ se mɔ: “Ci dènyi Kristo lɔ alo Eli alo enyɔnuɖɛtɔ ɖe, nyi yí taɖo èʒinkɔ amɛwo do eshi mɛɔ?”
26 Ʒan nu do nu nɔ wo mɔ: “Eshi mɛ nyɛŋʒinkɔ amɛwo do. Vɔ, mɛɖeka le mí mɛ ci mídejeshi ɖɛ o,
27 éle ŋgbe nɔŋ gbɔgbɔ, ŋdeje acu yi fɔkpakawo o.”
28 Ŋcɛwo jɔjɔ le Betani le Ʒurdɛn godu fini Ʒan ʒinkɔ amɛwo do shi mɛ le.
29 Yi ŋkegbuɔ, Ʒan kpɔ Yesu gbɔkɔ gbɔ, eyi enu mɔ: “Míkpɔ ɖa, Lɛngbɔvi Mawu tɔ ci yí aɖe nuvɔn so xexe lɔ mɛ ke!
30 Yi nyɔ yí ŋnu sa mɔ: ‘Mɛ ci yí le ŋgbe nɔŋ gbɔgbɔ wuganŋ, ɖo éli gbɔxwe ŋvajɔ.’
31 Nyɛŋtɔkpu ŋdejeshi ɖɛ sa o, vɔ ŋʒinkɔ amɛwo do eshi mɛ keŋ nɔ Izraɛli atɛnŋ ajeshi ɖɛ.”
32 Ʒan ɖe kunu hɛnnɛ mɔ: “Ŋkpɔ gbɔngbɔn lɔ yí eso jeŋkwi mɛ shigbe hwanlin nɛ yí va nɔ ji.
33 Nyɛŋtɔkpu ŋdejeshi ɖɛ sa o, vɔ mɛ ci yí dɔŋ mɔ nyɛ le ʒin amɛwo do eshi mɛ nu nɔŋ mɔ: ‘Mɛ ci ji àkpɔ gbɔngbɔn lɔ aɖyi je yí anɔ jiɔ, eyi asɔ gbɔngbɔn kɔkɔɛ wa ʒinʒindoshimɛ nɔ amɛwo.’
34 Ŋkpɔɛ yí ŋɖe kunu so nu mɔ mɛ cɛ yí nyi Mawu Vi lɔ.”
35 Ci eŋ bu gbekeɔ, Ʒan vale te koɖo yi nukplavi amɛve.
36 Eyi ci ekpɔ Yesu zɔn afɔ yikɔɔ, énu mɔ: “Míkpɔ ɖa, Mawu Lɛngbɔvi lɔ ke!”
37 Ci enukplavi amɛve lɔwo se enyɔ ci enuɔ, wokplɔ Yesu do.
38 Ci Yesu trɔ yí kpɔ wo yí wokplɔɛ doɔ, ébiɔ wo se mɔ: “Nyi míjikɔɔ?” Eyi wobiɔɛ se mɔ: “Rabi (ci gɔnmɛ yí nyi “Enukplamɛtɔ”), fini ènɔnɔɔ?”
39 Énu nɔ wo mɔ: “Míva kpɔɛ ɖa.” Eyi woyi yí kpɔ fini enɔnɔ. Wetrɔ ganɛ* mɛ han yɔ, eyi wonɔ gbɔ gbenɔgbe lɔ.
40 Andre ci yí nyi Simɔ Piɛ nɔviɛ* nyi ɖeka le amɛ amɛve ciwo yí se enyɔ ciwo Ʒan nu yí kplɔ Yesu do mɛ.
41 Ékpɔ fofoɔ Simɔ doŋkɔ yí nu ni mɔ: “Mìkpɔ Mɛsia lɔ.” (Yi gɔnmɛ yí nyi “Kristo”).
42 Eyi ekplɔɛ yi nɔ Yesu. Ci Yesu kpɔɛɔ, énu mɔ: “Eo yí nyi Simɔ, Ʒan viɛ, woayɔ eo mɔ Sefasi” (ci gɔnmɛ yí nyi “Piɛ”).
43 Yi ŋkegbuɔ, Yesu ji mɔ yeayi Galile. Eyi ci ekpɔ Filipu ɔ, énu ni mɔ: “Kplɔ ŋdo.”
44 Filipu so Bɛtsaida, eju ci mɛ Piɛ koɖo Andre can so.
45 Filipu kpɔ Natanaɛli yí nu ni mɔ: “Mìkpɔ mɛ ci nu Moizi Se lɔ koɖo enyɔnuɖɛtɔwo xo nuxu so, eyi nyi: Yesu, Ʒozɛfu vi ci yí so Nazarɛti.”
46 Vɔ Natanaɛli biɔɛ se mɔ: “Enunywi ɖe atɛnŋ ato so Nazarɛti a?” Filipu nu ni mɔ: “Va kpɔ ɖa.”
47 Ci Yesu kpɔ Natanaɛli yí egbɔgbɔ gbɔɔ, énu so nu mɔ: “Izraɛlivi ŋtɔŋtɔ ci mɛ amɛbleble dele ke.”
48 Natanaɛli biɔɛ se mɔ: “Lé èwɛ yí jeshiŋ ɔ?” Yesu ɖo ŋci ni mɔ: “Gbɔxwe Filipu ayɔ eo hwenu èle figici lɔ gɔnmɛɔ, ŋkpɔ eo.”
49 Natanaɛli nu do nu ni mɔ: “Rabi, Mawu Vi ènyi, eo yí nyi Izraɛli Fyɔ.”
50 Yesu biɔɛ se mɔ: “Ci ŋnu nɔ eo mɔ ŋkpɔ eo le figici lɔ gɔnmɛ taɖo èkando jia? Àkpɔ enu ciwo yí gangan wu ecɛwo.”
51 Eyi enu ni mɔ: “Nyɔnɔnwi ŋtɔ yí ŋnukɔ nɔ mí mɔ míakpɔ jeŋkwi ahun yí mawudɔlawo ayikɔ eji yí agbeɖyikɔ va Agbetɔvi lɔ gbɔ.”
Gɔnmɛnuŋwlɛnŋwlɛn
^ Alo “mawu han.”
^ Yi gɔnmɛɖeɖe tiin: “lankpu.”
^ Alo “ŋshishikuku.”
^ Alo “le akɔnnu nɔ Dalɔ.” Ecɛ dasɛ mɔ éle texwe vevi ɖeka.
^ Yi gɔnmɛɖeɖe tiin: “Gaxoxo amɛ́wotɔ.”
^ Grɛki nyɔgbe ci wozan dedasɛ teŋ mɔ fofoɔ alo nɔviɛ yí enyi o.
