Eŋɛnywiwema Ʒan Tɔ 10:1-42
10 “Nyɔnɔnwi teŋ yí ŋnukɔ nɔ mí mɔ, mɛ ci yí deɖonɔ lɛngbɔkpu lɔ mɛ to xɔmɔnu o, vɔ yí fan kpa yí ɖonɔ mɛ to fibuɔ, flafinɔ yí enyi.
2 Vɔ mɛ ci yí ɖonɔ mɛ to xɔmɔnu yí nyi lɛngbɔkplɔtɔ lɔ.
3 Xɔmɔnucɔtɔ lɔ hunnɔ ehɔn ni yí lɛngbɔ lɔwo ɖonɔ to yi gbe. Éyɔnɔ lɛngbɔ ɖekaɖeka ŋkɔ yí kplɔnɔ wo ti.
4 Nɔ ékplɔ yi lɛngbɔ lɔwo pleŋ tiɔ, énɔnɔ ŋkɔ nɔ wo yí lɛngbɔ lɔwo kplɔɛni do, ɖo wojeshi yi gbemɛ.
5 Wodakplɔ mɛdru do o, vɔ woashi ni; ɖo wodejeshi mɛdruwo gbemɛ ɖɛ o.”
6 Yesu do labalu cɛ nɔ wo, vɔ wodemɔŋje nyɔ ci enukɔ mɛ o.
7 Eyi taɖo Yesu gbenu mɔ: “Nyɔnɔnwi teŋ yí ŋnukɔ nɔ mí mɔ, ŋnyi xɔmɔnu ci lɛngbɔwo ato.
8 Mɛ ciwo pleŋ yí va yí nu mɔ yewonyi lɛngbɔkplɔtɔ nywiwoɔ, flafinɔwo yí wonyi yí lɛngbɔ lɔwo deɖonɔ to wo o.
9 Enyɛ yí nyi xɔmɔnu lɔ, mɛɖekpokpui ci yí toto ŋmɛ akpɔ agbe. Áɖo mɛ yí agbeto yí akpɔ egbe aɖu.
10 Flafinɔ devanɔ gbali o. Vɔ évanɔ keŋ afi fi, áwu amɛ alo adahɛn nuwo. Nyɛŋva nɔ lɛngbɔwo akpɔ agbe yí anɔ agbe jinjin.
11 Ŋnyi lɛngbɔkplɔtɔ nywi; lɛngbɔkplɔtɔ nywi sɔ yi gbe* nanɔ do ta nɔ lɛngbɔwo.
12 Nɔ woxɔ mɛɖe ci yí denyi lɛngbɔkplɔtɔ nɔ akpɔnɔ lɛngbɔ ciwo yí denyi yiŋtɔ tɔ jiɔ, éshinɔ yí gbenɔ lɛngbɔ lɔwo ɖɛ nɔ ékpɔ ehla gbɔgbɔ yí ehla lɔ lénɔ lɛngbɔ ɖewo yí kpɛtɛwo gbannɔ hlɛn.
13 Ðo xɔ woxɔɛ mɔ yɛ le kpɔnɔ lɛngbɔ lɔwo ji yí delenɔ bu nɔ wo o.
14 Ŋnyi lɛngbɔkplɔtɔ nywi. Ŋjeshi anyi lɛngbɔwo yí anyi lɛngbɔwo can jeshiŋ.
15 Ahanke Eda jeshiŋ ɖɛ yí nyɛ can ŋjeshi Eda ɖɛ nɛ. Ŋsɔ anyi gbe* na do ta nɔ lɛngbɔ lɔwo.
16 “Eyi lɛngbɔ buwo le ŋshi ciwo yí deso lɛngbɔkpu cɛ mɛ o; ŋɖo akplɔ wowo can vɛ yí woanyi lɛngbɔha kuɖeka yí aɖo lɛngbɔkplɔtɔ kuɖeka.
17 Eda lɔnŋ, ɖo ŋsɔ anyi gbe* na yí agbevaxɔɛ ke.
18 De mɛɖe yí xɔɛ le ŋshi o, vɔ nyɛŋtɔ yí lɔn yí sɔ na. Ŋɖo acɛ asɔ na yí ŋɖo acɛ agbexɔɛ. Danyɛ yí dɔŋ mɔ nyɛ le wɛ ahan.”
19 Enyɔ cɛwo na yí mama gbeɖo Ʒuifuwo mɛ ke.
20 Amɛ sugbɔ le wo mɛ nunuɔ mɔ: “Gbɔngbɔnvɔn le mɛ, sukunɔ yɔ. Nyi yí taɖo míɖoɖoɔ to yiɔ?”
21 Mɛbuwo nu mɔ: “Nɔ gbɔngbɔnvɔn le mɛɔ, datɛnŋ axoxoɔ nuxu cɛwo o. Gbɔngbɔnvɔn atɛnŋ ahun ŋkuvi nɔ ŋkuvitɔnnɔwoa?”
22 Hwenɔnuɔ, woɖuɖuɔ Gbedoxɔ Ðeɖetizan Xwe le Ʒerusalɛmu. Vuvɔ hwenu yɔ
23 yí Yesu ɖyiɖyiɛ sa to gbedoxɔ lɔ mɛ le Salomɔ kpatɛ mɛ.
24 Eyi Ʒuifuwo trɔdi yí tɔ biɔɛbiɔɛ se mɔ: “Hwenu ànu nyɔnɔnwi nɔ mì so eɔɖeki nuɔ? Nɔ eo yí nyi Kristo lɔɔ, nui nɔ mì.”
25 Yesu nu do nu nɔ wo mɔ: “Ŋnui nɔ mí vɔ mídexɔɛ se o. Edɔ ciwo ŋwakɔ le Danyɛ ŋkɔ mɛ ɖekɔ kunu so ŋnu;
26 gan mídekando ji o, ɖo mídenyi anyi lɛngbɔwo o.
27 Anyi lɛngbɔwo ɖonɔ to anyi gbe, ŋjeshi wo yí wokplɔnɔ ŋdo.
28 Nana agbe mavɔ wo yí wodaku gbeɖe o yí mɛɖe datɛnŋ agui wo le ŋshi o.
29 Lɛngbɔ ciwo Danyɛ sɔ nɔŋ le veviɖe wu enu kpɛtɛwo pleŋ yí mɛɖekɛ datɛnŋ agui wo le alɔ̀ mɛ nɔ Eda o.
30 Nyɛ koɖo Danyɛɔ, enu kuɖeka yí mìnyi.”*
31 Eyi Ʒuifuwo gbesɔ ekpewo mɔ yewoaxui.
32 Yesu biɔ wo se mɔ: “Ŋwa edɔ nywi sugbɔ ciwo Danyɛ dɔŋ yí ŋsɔ wo dasɛ nɔ mí. Edɔ lɔwo domɛtɔ ci ŋci míjikɔ axo kpeŋ doɔ?”
33 Ʒuifu lɔwo ɖo ŋci ni mɔ: “De edɔ nywi ɖe ŋci yí mìjikɔ axo ekpe eo do o, vɔ ènu enyɔkpotu do Mawu nu; ɖo ènyi agbetɔ, gan yí sɔ eoɖeki wakɔ mawu.”
34 Yesu biɔ wo se mɔ: “Wodeŋwlɛ do míwo Se lɔ mɛ mɔ, ‘Mawu nu mɔ: “Mínyi mawuwo”’* ba?
35 Mawu yɔ mɛ ciwo yí yi nyɔ lɔ do hwɛ mɔ, ‘mawuwo’ yí mɛɖe datɛnŋ atrɔ enyɔ ci enuŋwlɛŋwlɛ lɔ nu o.
36 Vɔ enyɛɔ, ŋnyi mɛ ci Mawu sɔ do akpo yí dɔ ɖaɖa xexe lɔ mɛ, taɖo lé míawɛ anu nɔŋ mɔ, ‘Ènu enyɔkpotu do Mawu nu’ ci ŋmɔ ‘Ŋnyi Mawu Viɔ’?
37 Nɔ ŋdewakɔ Danyɛ dɔwoɔ, míŋgbexɔŋ ji se o.
38 Vɔ nɔ ŋwakɔ edɔ lɔwo yí mídexɔŋ ji se can ɔ, míkando edɔ lɔwo ji keŋ nɔ míanya yí agbemɔŋje mɛ mɔ Eda le koɖoŋ yí nyɛ can ŋle koɖo Eda.”
39 Eyi wogbetekpɔ mɔ yewoali, vɔ éshi le wo gbɔ.
40 Égbeyi ago xlɔtɔ ji nɔ Ʒurdɛn tɔsasa lɔ le fini Ʒan ʒinnɔ amɛwo do shi mɛ le sa yí nɔ nɔtɔxu.
41 Eyi amɛ sugbɔ va gbɔ yí tɔ nunu mɔ: “Ʒan dewa enujiŋ kuɖeka kpetii o, vɔ enyɔ ciwo pleŋ enu so ŋsu cɛ nu nyi nyɔnɔnwi.”
42 Eyi amɛ sugbɔ xɔɛ ji se le nɔ.
Gɔnmɛnuŋwlɛnŋwlɛn
^ Alo “yi se.”
^ Alo “anyi se.”
^ Alo “anyi se.”
^ Alo “mìle ju.”
^ Alo “Míle shigbe mawuwo nɛ.”
