Eŋɛnywiwema Ʒan Tɔ 11:1-57
11 Ecɛyɛɔ, ŋsu ɖeka ci yí tɔ mɔ Laza ble. Éso Betani, eju ci mɛ Mari koɖo nɔviɛ Marta so.
2 Mari cɛ yí sɔ amihwɛnte kɔ do afɔwo ji nɔ Yesu yí cuicui koɖo yi ɖawo. Nɔviɛ* yí nyi Laza ci yí ble.
3 Eyi taɖo dadalɔwo do ŋɛ ɖaɖa Yesu yí nu ni mɔ: “Axwetɔ, ao xlɔ vevi ble.”
4 Ci Yesu se ahan ɔ, énu mɔ: “Edɔ̀ lɔ dawui o, vɔ ahɛn kanfukanfu vɛ nɔ Mawu, keŋ nɔ woato ji akanfu Mawu Vi lɔ.”
5 Yesu lɔn Marta, Mari koɖo Laza.
6 Ele ahan gan, ci ese mɔ Laza bleɔ, égbenɔ fini ele keke wa ŋkeke amɛve.
7 Le yɛ goduɔ, Yesu nu nɔ nukplavi lɔwo mɔ: “Mìagbetrɔ ayi Ʒude.”
8 Enukplavi lɔwo nu ni mɔ: “Rabi, vaanɖe cɛ yɛ yí Ʒudetɔwo mɔ yewoaxo kpe eoŋ yí ègbeji mɔ yeayi nɔ kea?”
9 Yesu nu do nu mɔ: “Gaxoxo 12 yí le kede mɛ, alo? Nɔ mɛɖe zɔnzɔn kede mɛɔ, deklɛnnɔ nu o, ɖo klɛnklɛn xexe cɛ tɔ na yí ekpɔkpɔ nu.
10 Vɔ nɔ mɛɖe zɔnzɔn vinvin mɛɔ, áklɛn nu; ɖo klɛnklɛn dele mɛ o.”
11 Ci enu nyɔ cɛwo ɖegbɔɔ, énu kpe ni mɔ: “Mìwo xlɔ Laza le alɔn dɔnkɔ, vɔ nayi nɔ keŋ afuin.”
12 Eyi enukplavi lɔwo nu ni mɔ: “Axwetɔ, nɔ alɔn dɔnkɔ eleɔ, anyi edɔ̀ ami ni.”
13 Vɔ eku yitɔ nu yí Yesu xokɔ nuxu so yí wowo bui mɔ alɔn ŋtɔŋtɔ nyɔ yí enukɔ.
14 Eyi Yesu ɖe mɛ nɔ wo gbajɛɛ mɔ: “Laza ku.
15 Nyɔna enyi nɔ mí mɔ ŋdele nɔ o, ɖo míwo xɔse asɛnŋ. Ecɛyɛɔ, mìayi gbɔ.”
16 Eyi Toma ci woyɔnɔ mɔ Togbo nu nɔ yi kpena nukplavi lɔwo mɔ: “Mìwo can mìayi keŋ ayi ku koɖi.”
17 Ci Yesu vaɖoɔ, ékpɔ mɔ woɖyi Laza keke ewa ŋkeke amɛnɛ le yɔdu* mɛ vɔ.
18 Betani jinjin le Ʒerusalɛmu gbɔ kpeci amɛtɔn han.*
19 Eyi Ʒuifu sugbɔ va Marta koɖo Mari gbɔ keŋ afa kɔn nɔ wo nɔ wowo nɔvi ci yí ku lɔ.
20 Ci Marta se mɔ Yesu gbɔgbɔɔ, éso keŋ ayi do go yi, vɔ Mari yɛle nyinɔnɔ le axomɛ.
21 Eyi Marta nu nɔ Yesu mɔ: “Axwetɔ, nɔ èle lɛ saɔ, nɔvinyɛ daku o.
22 Vɔ kakacɛ can ɔ, ŋnya mɔ ŋɖekpokpui ci àbiɔ Mawu ɔ, Mawu ana eo.”
23 Yesu nu ni mɔ: “Nɔvio afɔn so ku.”
24 Marta nu ni mɔ: “Ŋnya mɔ áfɔn so ku le azan godugodutɔ lɔ gbe.”
25 Yesu nu ni mɔ: “Enyɛ yí nyi fɔnfɔnsoku koɖo agbe lɔ. Nɔ mɛ ci yí xɔŋ ji se ku can ɔ, áfɔn do agbe
26 yí mɛɖekpokpui ci yí le agbe yí xɔŋ ji se daku kpɔ gbeɖe o. Èkando jia?”
27 Énu ni mɔ: “Ɛɛ Axwetɔ, ŋkando ji mɔ eo yí nyi Kristo lɔ, Mawu Vi ci yí gbɔgbɔ xexe lɔ mɛ.”
28 Ci enu ahan ɖegbɔɔ, étrɔ yí vayi yɔ nɔviɛ Mari yí ɖɔ kpa ni mɔ: “Enukplamɛtɔ lɔ le lɛ yí yɔyɔ eo.”
29 Ci ese ahan ɔ, éso zeɖeka yí yi gbɔ.
30 Yesu deva eju lɔ mɛ hɔɖo o, vɔ ékpɔtɔ le fini Marta do go yi do sa.
31 Ci Ʒuifu ciwo yí le koɖo Mari le xɔ lɔ mɛ yí fafa akɔn ni kpɔɛ yí eso zeɖeka yí toɔ, wowo can kplɔɛ do yí bubuɔ mɔ yɔdu* lɔ tu eyikɔ keŋ afan avin.
32 Ci Mari va fini Yesu le yí kpɔɛɔ, éje klo ji do afɔ gbɔ ni yí nu ni mɔ: “Axwetɔ, nɔ èle lɛ saɔ, nɔvinyɛ daku o.”
33 Ci Yesu kpɔɛ yí ele avin fankɔ yí Ʒuifu ciwo yí zɔn koɖi can le avin fankɔɔ, ése hun yí se gbazavi sugbɔ.
34 Yesu biɔ se mɔ: “Fini mísɔ mlɔɔ?” Woɖo ŋci ni mɔ: “Axwetɔ, va kpɔɛ ɖa.”
35 Yesu fan avin.
36 Eyi Ʒuifu lɔwo tɔ nunu mɔ: “Míkpɔ ɖa, éluin kekeɖe!”
37 Vɔ mɛɖewo le wo mɛ nu mɔ: “Ŋsu cɛ ci yí hun ŋkuviwo nɔ ŋkuvitɔnnɔ lɔ dawɛ do ɖe sa yí Laza daku ba?”
38 Eyi ci Yesu gbese hun keɔ, éva yɔdu* lɔ gbɔ, ekpetui mɛ woɖyi do yí sɔ ekpe ɖeka cu nu ni.
39 Yesu nu mɔ: “Míɖe ekpe lɔ swi.” Vɔ mɛ ci yí ku dadalɔ Marta nu mɔ: “Axwetɔ, átɔ hwɛnhwɛn, ɖo éwa ŋkeke amɛnɛ vɔ.”
40 Yesu nu ni mɔ: “Ŋdenu nɔ eo mɔ nɔ èxɔɛ seɔ, àkpɔ kanfukanfu Mawu tɔ ba?”
41 Woɖe ekpe lɔ swi. Eyi Yesu fɔn ta yi ji yí nu mɔ: “Eda, akpe nɔ eo mɔ èɖo toŋ.
42 Le nyɔnɔnwi mɛɔ, ŋnya mɔ èɖonɔ toŋ gashiagamɛ. Vɔ amɛahwa ci yí le te le elɛ taɖo yí ŋnu ahan keŋ nɔ woakando ji mɔ, eo yí dɔŋ ɖaɖa.”
43 Ci enu nyɔ cɛwo ɖegbɔɔ, édo axwa sɛnsinɖe mɔ: “Laza, to va!”
44 Eyi ŋsu ci yí ku lɔ to koɖo ŋciwo wosɔ bla alɔ̀wo koɖo afɔwo ni. Wobla ŋmɛ ni hɛnnɛ. Yesu nu nɔ wo mɔ: “Mícu wo ni yí atashi ayi.”
45 Ecɛ na yí Ʒuifu sugbɔ ciwo yí va Mari gbɔ yí kpɔ ŋci Yesu wa tɔxu xɔɛ ji se.
46 Vɔ mɛɖewo le wo mɛ yi Farizitɔwo gbɔ yí nu ŋci Yesu wa nɔ wo.
47 Eyi avɔnsatɔwo gawo koɖo Farizitɔwo yɔ Sanhedrɛn mɛ tɔwo bɔ yí nu mɔ: “Lé mìawɛɔ? Ðo ŋsu cɛ le enujiŋ sugbɔ wakɔ.
48 Nɔ mìbɔ nu yí ele ji ahan ɔ, wo pleŋ axɔɛ ji se yí Rɔmatɔwo ava keŋ axɔ mìwo texwe* koɖo mìwo ju lɔ le mì shi.”
49 Vɔ mɛɖeka le wo mɛ yí tɔ mɔ Kayifu, eyi nyi avɔnsatɔ gangantɔ xwenɔxwe. Énu nɔ wo mɔ: “Mínya ɖe go.
50 Mídenya mɔ míwo nyɔna enyi nɔ amɛ kuɖeka ku do ta nɔ jukɔn lɔ sɔwu mɔ jukɔn lɔ pleŋ agu ba?”
51 Enyɔ cɛ ci enu denyi yiŋtɔ susu o, vɔ ci enyi avɔnsatɔ gangantɔ xwenɔxwe taɖo enu nyɔ ɖɛ mɔ, Yesu aku do ta nɔ jukɔn lɔ.
52 Denyi jukɔn lɔ ɖekɛ aku do ta nɔ o, vɔ ábɔ Mawu vi ciwo yí gban hlɛn doju hɛnnɛ.
53 Eyi so gbenɔgbeɔ, wobla gbeju mɔ yewoawui.
54 Eyi taɖo Yesu degbeyinɔ Ʒuifuwo mɛ le jugbaja o. Vɔ éso le nɔ yí yi eju ɖeka ci woyɔnɔ mɔ Efraimu mɛ. Ényi eju ɖeka ci yí gogo zogbeji. Éci nɔ koɖo yi nukplaviwo.
55 Vɔ Paki ci yí nyi Ʒuifuwo xwe lɔ gogo, eyi amɛ sugbɔ so kɔxwi kɔxwiwo mɛ yí va Ʒerusalɛmu doŋkɔ nɔ Paki xweɖuɖu lɔ keŋ aklɔ wowoɖekiwo shigbe lé Ʒuifuwo wɛni nɛ.
56 Eyi wojijiɛ Yesu kpɔ. Wole te le gbedoxɔ lɔ mɛ yí biɔbiɔ wowonɔnɔwo se mɔ: “Míwo nya ɖe nia? Degbɔgbɔ exweɖuɖu lɔ tɔxu o?”
57 Vɔ avɔnsatɔwo gawo koɖo Farizitɔwo do se mɔ, nɔ mɛɖekpokpui nya fini Yesu leɔ, le va nu nɔ yewo nɔ yewoali.
Gɔnmɛnuŋwlɛnŋwlɛn
^ Bibla denu teŋ mɔ Laza nyi vihwɛ nɔ Mari koɖo Marta o.
^ Alo “eŋwiɖoɖo yɔdu.”
^ Yi gɔnmɛɖeɖe tiin: “Stadi 15 han.” Kpɔ Enumɛɖeɖewo B14.
^ Alo “eŋwiɖoɖo yɔdu.”
^ Alo “eŋwiɖoɖo yɔdu.”
^ Eyi nyi gbedoxɔ lɔ.
