Eŋɛnywiwema Ʒan Tɔ 12:1-50
12 Ŋkeke amadɛn doŋkɔ nɔ Paki xweɖuɖu lɔɔ, Yesu va Betani, fini Laza ci efɔn so ku le.
2 Woɖa fiɛfi ŋɖuɖu nɔ Yesu le nɔ. Eyi Marta mama ŋɖuɖu lɔ nɔ wo. Laza can le mɛ ciwo yí ɖukɔ nu koɖi mɛ.
3 Eyi Mari sɔ amihwɛnte nari adodwi ci yí ve ho lita mamu han yí kɔɛ do afɔwo ji nɔ Yesu keŋ yí sɔ yi ɖawo cuicuikɔ. Etehwɛnhwɛn ami lɔ tɔ gban do axwe lɔ pleŋ mɛ.
4 Vɔ yi nukplavi ɖeka ci yí tɔ mɔ Ʒudasi Iskariɔti ci yí asɛ le majinjinɖe mɛ nu mɔ:
5 “Nyi yí taɖo wodasa amihwɛnte cɛ denari* 300 yí asɔ eho lɔ na wamɛnɔwoɔ?”
6 De wamɛnɔwo tɔ ebubuɔ kpɔ yí nu ahan o, vɔ flafinɔ enyi. Eyi hɛnnɔ dakavi ci mɛ eho nɔnɔ lɔ yí finɔ le mɛ.
7 Yesu nu do nu ni mɔ: “Tashi nyɔnu lɔ nɔ awa cɛ yí asɔ draŋ do ɖɛ nɔ gbecigbe woaɖyiŋ.
8 Ðo wamɛnɔwo le mí gbɔ tɛgbɛɛ. Vɔ enyɛɔ, ŋdanɔ mí gbɔ tɛgbɛɛ o.”
9 Ʒuifu sugbɔtɔ nya mɔ yɛle nɔ yí wova keŋ akpɔ Yesu yí agbekpɔ Laza ci efɔn so ku.
10 Avɔnsatɔwo gawo bla gbeju mɔ yewoawu Laza hɛnnɛ,
11 ɖo eyɛ ŋci yí Ʒuifu sugbɔ yikɔ nɔtɔxu yí xɔkɔ Yesu ji se.
12 Yi ŋkegbuɔ, amɛ sugbɔ ciwo yí va azanɖuxu lɔ se mɔ Yesu gbɔgbɔ Ʒerusalɛmu.
13 Eyi taɖo wosɔ edebayawo yí yi do go yi. Wodo axwa yí nukɔ mɔ: “Mìɖe kuku hwlin gan! Woacu shi nɔ mɛ ci yí gbɔgbɔ le Yehowa* ŋkɔ mɛ, woacu shi nɔ Izraɛli Fyɔ lɔ!”
14 Ci Yesu kpɔ esɔkɛtɛvi ɖekaɔ, éde ji shigbe lé woŋwli ɖɛ nɛ mɔ:
15 “Siɔn cugbejɛvi ŋgbevɔn o. Kpɔ ɖa! Ao fyɔ gbɔgbɔ yí nɔ nyinɔnɔ do esɔkɛtɛvi ji.”
16 Yi nukplaviwo demɔŋje ŋcɛwo mɛ kaka o, vɔ ci wovasɔ Yesu ɖo texwe gangan ɔ, wovaɖo ŋwi mɔ woŋwlɛ ŋcɛwo so nu yí wowa wo ni.
17 Amɛahwa ci yí le Yesu gbɔ hwenu eyɔ Laza ti le yɔdu mɛ yí fuin so ku kpɔtɔ nukɔ ŋci yí jɔ lɔ nɔ mɛbuwo.
18 Ŋcɛ can dɔ hɛnnɛ yí amɛahwa lɔ vayi do go yi, ɖo wose mɔ yɛwa enujiŋ ŋtɔ́.
19 Eyi Farizitɔwo nu le wowoɖeɖewo mɛ mɔ: “Míkpɔ mɔ mídesun ŋɖe ji yí wakɔŋ? Míkpɔ ɖa! Xexe lɔ pleŋ nɛ kplɔɛ do nɛ.”
20 Grɛkitɔ ɖewo can va Mawu sɛngbe le azanɖuɖu lɔ hwenu.
21 Wova Filipu gbɔ. Filipu so Bɛtsaida le Galile. Wonu ni mɔ: “Mɛgan, mìji mɔ mìakpɔ Yesu.”
22 Filipu va nui nɔ Andre, eyi Andre koɖo Filipu va nui nɔ Yesu.
23 Vɔ Yesu ɖo ŋci nɔ wo mɔ: “Ega xo yí woakanfu Agbetɔvi lɔ.
24 Nyɔnɔnwi teŋ yí ŋnukɔ nɔ mí mɔ nɔ jinuku deje nyigban yí kuɔ, ékpɔtɔ nyinɔ jinuku kuɖeka. Vɔ nɔ ékuɔ, énanɔ jinuku sugbɔ.
25 Mɛɖekpokpui ci yí lɔn yi gbeɔ, ásɔ bu. Vɔ mɛɖekpokpui ci yí lɔn mɔ yeasɔ ye gbe bu le xexe cɛ mɛɔ, áhwlin gan yí akpɔ agbe mavɔ.
26 Nɔ mɛɖe ji mɔ yeanyi anyi dɔwaviɔ, le kplɔ ŋdo yí fini ŋleɔ, anyi dɔwavi can ale nɔ. Nɔ mɛɖe ji mɔ yeanyi anyi dɔwaviɔ, Eda acu shi ni.
27 Ecɛyɛɔ, ŋcaka le nyɛɖeki* mɛ. Nyɔ ci nanu yɛɔ? Eda, hwlɛnŋ gan le gaxoxo cɛ mɛ. Vɔ gaxoxo cɛ yí taɖo ŋva.
28 Eda, kanfu ao ŋkɔ.” Eyi egbe ɖeka ɖyi so jeŋkwi mɛ yí mɔ: “Ŋkanfui yí nagbekanfui ke.”
29 Amɛahwa ci yí le nɔ yí se egbe lɔ tɔ nunu mɔ eji yí ɖe gbe. Mɛbuwo nu mɔ: “Mawudɔla yí xo nuxu ni.”
30 Yesu nu mɔ: “De enyɛ yí egbe cɛ ɖyi nɔ o, vɔ míwo yí eɖyi nɔ.
31 Gamɛ sun mɔ woaɖo kojo nɔ xexe cɛ. Ecɛyɛɔ, woanya xexe cɛ cɛkpatɔ swi.
32 Vɔ nɔ míkanŋ do aci nuɔ, nadɔn agbetɔ hamɛhamɛwo pleŋ va nyɛɖeki gbɔ.”
33 Le nyɔnɔnwi mɛɔ, énukɔ ahan yí asɔ dasɛ eku ci han ejikɔ aku.
34 Eyi amɛahwa lɔ biɔɛ se mɔ: “Mìse yí Ese lɔ nu mɔ, Kristo lɔ ani keke sɔyi mavɔ. Nyi yí taɖo èvanukɔ mɔ woɖo akan Agbetɔvi lɔ do aci nuɔ? Mi yí nyi Agbetɔvi lɔɔ?”
35 Yesu nu do nu nɔ wo mɔ: “Klɛnklɛn lɔ agbenɔ mí gbɔ na nɔ hwenu kleŋ ɖe. Mízɔn zɔnlin hwenu yí klɛnklɛn lɔ kpɔtɔ li keŋ nɔ vinvin ŋgbevakpa acɛ nɔ mí o. Mɛ ci yí zɔnkɔ vinvin mɛ denya fini eyikɔ o.
36 Ci klɛnklɛn lɔ kpɔtɔ le mí gbɔɔ, míxɔ klɛnklɛn lɔ ji se keŋ anyi klɛnklɛn lɔ viwo.”
Yesu nu nyɔ cɛwo yí so le wo gbɔ yí be do wo.
37 Ci ewa enujiŋ sugbɔ le ŋmɛ nɔ wo can ɔ, wodexɔɛ ji se o,
38 keŋ nɔ enyɔ ci enyɔnuɖɛtɔ Ezai nu ɖɛ ajɔ do ji. Émɔ: “Yehowa,* mi yí xɔ enyɔ ci ese le mì gbɔ ji seɔ? Mi yí wodasɛ Yehowa* ŋsɛn* nɔɔ?”
39 Susu ci yí taɖo wodetɛnŋ xɔɛ ji se yí nyi enyɔ ci Ezai gbenu mɔ:
40 “Étɔn ŋkuviwo nɔ wo. Éna yí wowo ji sɛnŋ, nɔ woŋgbekpɔ nu koɖo wowo ŋkuviwo yí ase nu gɔnmɛ koɖo wowo jiwo keŋ atrɔ va nɔ mada edɔ̀ nɔ wo o.”
41 Ezai nu nyɔ cɛwo ɖo ékpɔ kanfukanfu yitɔ yí xo nuxu so nu.
42 Ci enyi ahan can ɔ, jumɛga sugbɔ ŋtɔkpu can xɔɛ ji se. Vɔ sɔ kudo Farizitɔwo ŋciɔ, wodejinɔ mɔ yewoanui o, nɔ woŋgbenya wo ti le Ʒuifuwo nukplaxu o.
43 Ðo wolɔnnɔ mɔ agbetɔ le kanfu yewo sɔwu mɔ Mawu akanfu wo.
44 Vɔ Yesu do axwa yí nu mɔ: “Nɔ mɛɖe xɔŋ ji seɔ, de nyɛɖekɛ ji exɔ se o, vɔ éxɔ mɛ ci yí dɔŋ ɖaɖa ji se hɛnnɛ.
45 Mɛɖekpokpui ci yí kpɔŋ ɔ, ékpɔ mɛ ci yí dɔŋ ɖaɖa hɛnnɛ.
46 Ŋnyi klɛnklɛn yí va xexe lɔ mɛ keŋ nɔ mɛɖekpokpui ci yí xɔŋ ji seɔ, dagbekpɔtɔ anɔ vinvin mɛ o.
47 Mɛɖekpokpui ci yí senɔ anyi nyɔwo yí dewanɔ do wo jiɔ, ŋdaɖo kojo ni o. Ðo ŋdeva kojo ɖogbe nɔ xexe lɔ o, vɔ ŋva yí ahwlɛn xexe lɔ gan.
48 Mɛɖeka li yí aɖo kojo nɔ mɛɖekpokpui ci yí gbeŋ yí dese anyi nyɔwo o. Enyɔ ciwo ŋnu yí aɖo kojo ni le azan godugodutɔ lɔ gbe.
49 Ðo ŋdexo nuxu le nyɛŋtɔ dro mɛ o, vɔ Eda ci yí dɔŋ ɖaɖa ŋtɔ nu enyɔ ci nanu koɖo lé nanui do nɔŋ.
50 Ŋnya mɔ yi sewo nyi agbe mavɔ. Eyi taɖo enyɔ ɖekpokpui ci ŋnukɔɔ, ŋnuini shigbe lé Eda nui do nɔŋ nɛ.”
Gɔnmɛnuŋwlɛnŋwlɛn
^ Kpɔ Enumɛɖeɖewo B14.
^ Kpɔ Enumɛɖeɖewo A5.
^ Alo “anyi se.”
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Yi gɔnmɛɖeɖe tiin: “alɔ̀.”
