Eŋɛnywiwema Ʒan Tɔ 13:1-38
13 Yesu nya doŋkɔ nɔ Paki xweɖuɖu lɔ mɔ, ega xo nɔ ye yí yeaso le xexe cɛ mɛ ayi Eda gbɔ. Eyi ci elɔn yi mɛ ciwo yí le xexe lɔ mɛɔ, élɔn wo keke yi vɔvɔnu.
2 Ci wole fiɛfi nu ɖukɔɔ, Legba sɔ susu lɔ do ji mɛ nɔ Ʒudasi Iskariɔti, Simɔ viɛ mɔ yɛ le sa Yesu.
3 Ci Yesu nya mɔ Eda sɔ enuwo pleŋ do alɔ̀ mɛ nɔ ye yí yeso Mawu gbɔ yí gbetrɔ yikɔ gbɔɔ,
4 éso je te hwenu wole enu lɔ ɖukɔ yí ɖe awu jitɔ yitɔ daɖɛ yí sɔ enucucugotu sa do alin.
5 Éku shi do agban gangan ɖeka mɛ yí tɔ afɔ klɔklɔ nɔ nukplavi lɔwo yí sɔ enucucugotu ci esɔ sa do alin cucukɔ afɔ nɔ wo.
6 Ci evaɖo Simɔ Piɛ jiɔ, Piɛ biɔɛ se mɔ: “Axwetɔ, èjikɔ aklɔ anyi fɔwo yɔa?”
7 Yesu nu do nu ni mɔ: “Dàtɛnŋ amɔŋje enu ci ŋwakɔ mɛ kakayɛ o, vɔ àvamɔŋje mɛ.”
8 Piɛ nu ni mɔ: “Àklɔ anyi fɔwo gbeɖe go.” Yesu nu do nu ni mɔ: “Nɔ ŋdeklɔ afɔwo nɔ eoɔ, anyi dàkpɔ ŋɖe axɔ le ŋgbɔ o.”
9 Simɔ Piɛ nu ni mɔ: “Axwetɔ, denyi afɔwo ɖekɛ àklɔ nɔŋ o, klɔ̀ anyi lɔwo koɖo anyi ta hɛnnɛ.”
10 Yesu nu ni mɔ: “Mɛ ci yí le shiɔ, afɔwo ɖekɛ yí aklɔ, ɖo émɛ keŋkeŋ. Eyi mímɛ, vɔ denyi mí pleŋ yɔ o.”
11 Ðo énya mɛ ci yí asɛ, eyi taɖo enu mɔ: “De mí pleŋ yí mɛ́ o.”
12 Ecɛyɛ ci eklɔ afɔwo nɔ wo ɖegbɔɔ, ésɔ awu jitɔ yitɔ lɔ do yí gbeva nɔ nyinɔnɔ do kplɔn nu yí biɔ wo se mɔ: “Mímɔŋje ŋci ŋwa nɔ mí mɛa?
13 Míyɔnɔŋ mɔ ‘Enukplamɛtɔ’ koɖo ‘Axwetɔ’ yí míwo nyɔ jɔ, ɖo ŋnyi Enukplamɛtɔ koɖo Axwetɔ nyao.
14 Eyi taɖo nɔ enyɛ ci yí nyi Axwetɔ koɖo Enukplamɛtɔ klɔ afɔwo nɔ míɔ, míwo can míɖo aklɔ afɔwo nɔ míwonɔnɔwo.
15 Ðo kpɔwɛ enyi yí ŋɖo ɖɛ nɔ mí yí shigbe lé ŋwɛ nɔ mí nɛɔ, míwo can míɖo awɛni ahan.
16 Nyɔnɔnwi teŋ yí ŋnukɔ nɔ mí mɔ, edɔwavi dewunɔgan yi xwetɔ o yí mɛ ci wodɔ ɖaɖa dewunɔgan mɛ ci yí dɔɛ ɖaɖa o.
17 Nɔ míjeshi enu cɛwoɔ, míakpɔ jijɔ nɔ míwanɔ do wo ji.
18 Denyi mí pleŋ nu yí ŋxokɔ nuxu so o, ŋjeshi mɛ ciwo yí ŋcan, vɔ enyi ahan nɔ ŋci woŋwlɛ ɖɛ lɔ ajɔ do ji mɔ: ‘Mɛ ci yí ɖukɔ anyi ŋɖuɖu fɔn gu do ŋji.’*
19 So kakacɛɔ, ŋnuikɔ nɔ mí gbɔxwe avajɔ yí nɔ evajɔ do jiɔ, míakando ji mɔ enyɛ nu yí enuŋwlɛŋwlɛ cɛ xokɔ nuxu so.
20 Nyɔnɔnwi teŋ yí ŋnukɔ nɔ mí mɔ, mɛ ci yí xɔ mɛɖekpokpui ci ŋdɔ ɖaɖaɔ, éxɔ nyɛ can yí mɛ ci yí xɔŋ ɔ, éxɔ Mɛ ci yí dɔŋ ɖaɖa hɛnnɛ.”
21 Ci Yesu nu nyɔ cɛwo ɖegbɔɔ, éxa le yiɖeki mɛ yí nu mɔ: “Nyɔnɔnwi teŋ yí ŋnukɔ nɔ mí mɔ, mɛɖeka le mí mɛ asaŋ.”
22 Enukplavi lɔwo tɔ wowonɔnɔwo gloglo kpɔ yí ci tuu, ɖo wodenya mɛ ci nu exokɔ nuxu so o.
23 Enukplavi lɔwo ɖeka ci Yesu lɔn nɔ nyinɔnɔ do axa ni cucucu.*
24 Eyi taɖo Simɔ Piɛ wa alɔ̀ nɔ nukplavi lɔ yí mɔ: “Nu mɛ ci nyɔ enukɔ nɔ mì.”
25 Eyi enukplavi lɔ go ɖaɖa akɔnnu nɔ Yesu yí biɔɛ se mɔ: “Axwetɔ, mi yɔɔ?”
26 Yesu ɖo ŋci mɔ: “Mɛ ci nakan kpɔnnɔ asɔ tɔ nu le agban mɛ asɔ jo nɔ yɔ.” Eyi ci esɔ kpɔnnɔ tɔ nu le agban mɛ ɖegbɔɔ, ésɔ jo nɔ Ʒudasi, Simɔ Iskariɔti viɛ.
27 Ci Ʒudasi xɔ kpɔnnɔ kankan lɔ ɖegbɔɔ, Satana ɖo mɛ. Eyi Yesu nu ni mɔ: “Enu ci èwakɔɔ, wɛ kaba.”
28 Vɔ mɛɖe dele mɛ ciwo yí le ekplɔn lɔ nu mɛ yí nya ŋci yí taɖo enu ahan ni o.
29 Le nyɔnɔnwi mɛɔ, mɛɖewo bukɔ mɔ ci enyi Ʒudasi yí hɛnnɔ dakavi ci mɛ eho nɔnɔ lɔɔ, nu Yesu nukɔ ni mɔ yɛ le xwle enu ci woʒan nɔ exweɖuɖu lɔ alo yɛ le na ŋɖe wamɛnɔwo.
30 Ci Ʒudasi xɔ kpɔnnɔ kankan lɔɔ, éto zeɖeka. Ezan do hwenɔnu.
31 Ci eto yí ɖedoɔ,Yesu nu mɔ: “Ecɛyɛɔ, wokanfu Agbetɔvi lɔ yí woto Agbetɔvi lɔ ji yí kanfu Mawu hɛnnɛ.
32 Mawu ŋtɔ akanfu Agbetɔvi lɔ yí akanfui zeɖeka.
33 Vinyɛwo, nagbenɔ mí gbɔ hwɛɖeka. Míajiŋ kpɔ yí shigbe lé ŋnui nɔ Ʒuifuwo nɛɔ, ‘Fini ŋyikɔɔ, mídatɛnŋ ava o.’ Ecɛyɛɔ, ŋnuikɔ nɔ míwo can.
34 Ŋnakɔ ese yoyu ɖeka mí mɔ, míalɔn míwonɔnɔwo. Shigbe lé ŋlɔn mí do nɛɔ, míwo can mílɔn míwonɔnɔwo ahan.
35 Nɔ mílɔnnɔ míwonɔnɔwoɔ, ána yí amɛwo pleŋ anya mɔ anyi nukplaviwo mínyi.”
36 Simɔ Piɛ biɔ Yesu se mɔ: “Axwetɔ, fini èyikɔɔ?” Éɖo ŋci mɔ: “Fini ŋyikɔɔ, dàtɛnŋ akplɔ ŋdo kakacɛ o, vɔ àvava.”
37 Piɛ nu ni mɔ: “Axwetɔ nyi yí taɖo ŋdatɛnŋ kplɔ eo do kakayɛɔ? Nasɔ anyi gbe* na do ta nɔ eo.”
38 Yesu nu do nu ni mɔ: “Àsɔ ao gbe* na do ta nɔŋ a? Nyɔnɔnwi teŋ yí ŋnukɔ nɔ eo mɔ, kloklo daɖe atɔ gbɔxwe àgbeŋ zetɔn o.”
Gɔnmɛnuŋwlɛnŋwlɛn
^ Yi gɔnmɛɖeɖe tiin: “kɔ fɔŋguinu yi ji do ŋji.”
^ Yi gɔnmɛɖeɖe tiin: “zan ɖaɖa akɔnmɛ ni.”
^ Alo “anyi se.”
^ Alo “ao se.”
