Eŋɛnywiwema Ʒan Tɔ 14:1-31
14 “Jika ŋgbeso mí o, míxɔ Mawu ji se yí axɔ nyɛ can ji se.
2 Le Danyɛ xomɛɔ, texwe* sugbɔ yí li, nɔ denyi ahan saɔ, nanui nɔ mí. Ðo ŋyikɔ keŋ ayi dra texwe do ɖɛ nɔ mí.
3 Eyi nɔ ŋvayi dra texwe do ɖɛ nɔ mí ɖegbɔɔ, natrɔ gbɔ yí axɔ mí do nyɛɖeki gbɔ keŋ nɔ fini ŋleɔ, míwo can míanɔ nɔ.
4 Fini ŋyikɔɔ, míjeshi emɔ lɔ.”
5 Toma nu ni mɔ: “Axwetɔ, mìnya fini èyikɔ ba, lé mìawɛ ajeshi emɔ lɔɔ?”
6 Yesu nu ni mɔ: “Enyɛ yí nyi emɔ lɔ, nyɔnɔnwi lɔ koɖo agbe lɔ. Mɛɖe datɛnŋ ava Eda gbɔ nɔ deto ŋji o.
7 Nɔ míjeshiŋ ɔ, anyi míjeshi Danyɛ hɛnnɛ yí so kakacɛɔ, míjeshi yí gbekpɔɛ.”
8 Filipu nu ni mɔ: “Axwetɔ, dàsɛ Eda nɔ mì, yɛ ɖekɛ sun nɔ mì xoxo.”
9 Yesu nu ni mɔ: “Filipu, ŋle mí gbɔ yɛɔ, ejinjin yí dèjeshiŋ ɖɛa? Mɛɖekpokpui ci yí kpɔŋ ɔ, ékpɔ Eda hɛnnɛ. Lé èwɛ yí nunuɔ mɔ, ‘Dàsɛ Eda nɔ mìɔ’?
10 Dèxɔɛ se mɔ ŋle koɖo Eda yí Eda le koɖoŋ ba? Denyi nyɛŋtɔ gbɔ yí enyɔ ciwo ŋnunuɔ nɔ mí so o, vɔ Eda ci yí kpɔtɔ le koɖoŋ yí le yi dɔwo wakɔ.
11 Míkando ŋji mɔ ŋle koɖo Eda yí Eda can le koɖoŋ. Nɔ egloɔ, míakpɔ do edɔ ciwo ŋwakɔ nu yí akando ŋji.
12 Nyɔnɔnwi teŋ yí ŋnukɔ nɔ mí mɔ, mɛɖekpokpui ci yí xɔŋ ji se awa edɔ ciwo ŋwakɔ hɛnnɛ, áwa edɔ ciwo yí gangan wu ecɛwo, ɖo ŋyikɔ Eda gbɔ.
13 Ŋɖekpokpui ci míabiɔ le anyi ŋkɔ mɛ hɛnnɛɔ, nawɛ keŋ nɔ woakanfu Eda toto Evi lɔ ji.
14 Nɔ míbiɔ ŋɖekpokpui le anyi ŋkɔ mɛɔ, nawɛ.
15 “Nɔ mílɔnŋ ɔ, míawanɔ do anyi sewo ji.
16 Eyi nabiɔ Eda mɔ yɛ le na kpedonutɔ* bu mí yí anɔ koɖo mí keke sɔyi mavɔ.
17 Ána mí gbɔngbɔn nyɔnɔnwitɔ ci xexe lɔ datɛnŋ axɔ o, ɖo dekpɔkpɔɛ o yí dejeshi ɖɛ can o. Vɔ míwo jeshi ɖɛ, ɖo éle koɖo mí yí le mí mɛ.
18 Ŋdagbe mí ɖɛ yí míaci míwoɖekɛwo* o. Natrɔ va mí gbɔ.
19 Sabaɖe yɛɔ, xexe lɔ dagbekpɔŋ o. Vɔ míwo akpɔŋ, ɖo ŋle agbe yí míwo can míale agbe.
20 Le ŋkeke ŋtɔ́ jiɔ, míanya mɔ ŋle koɖo Danyɛ yí míwo can míle koɖoŋ yí ŋle koɖo mí hɛnnɛ.
21 Mɛɖekpokpui ci yí lɔn do anyi sewo ji yí wanɔ do wo ji nyi mɛ ci yí lɔnŋ. Eyí mɛɖekpokpui ci yí lɔnŋ ɔ, Edanyɛ aluin hɛnnɛ, nyɛ can naluin yí adasɛ nyɛɖeki ni petii.”
22 Ʒudasi ci yí denyi Iskariɔti biɔɛ se mɔ: “Axwetɔ, nyi yí jɔ èji mɔ yeadasɛ eoɖeki nɔ mì petii yí dèji mɔ yeadasɛ eoɖeki nɔ xexe lɔɔ?”
23 Yesu ɖo ŋci ni mɔ: “Nɔ mɛɖe lɔnŋ ɔ, áwa do anyi nyɔ ji yí Danyɛ aluin, eyi mìava nɔ gbɔ.
24 Mɛ ci yí delɔnŋ ɔ, dewanɔ do anyi nyɔwo ji o. Enyɔ ci mísekɔ denyi anyitɔ o, vɔ Eda ci yí dɔŋ ɖaɖa tɔ yɔ.
25 “Ŋnu nyɔ cɛwo nɔ mí ci ŋkpɔtɔ le mí gbɔ.
26 Vɔ kpedonutɔ lɔ ci yí nyi gbɔngbɔn kɔkɔɛ ci Danyɛ aɖo ɖaɖa le anyi ŋkɔ mɛ akpla enuwo pleŋ mí yí míaɖo ŋwi ŋciwo pleŋ ŋnu nɔ mí.
27 Ŋgbegbeɛ fafa ɖɛ nɔ mí. Ŋnana anyi fafa mí. Ŋdenikɔ shigbe lé xexe lɔ nini nɛ o. Jika ŋgbeso mí o yí míŋgbevɔn o.
28 Míse ŋnu nɔ mí mɔ, ‘Ŋyikɔ yí natrɔ va mí gbɔ.’ Nɔ mílɔnŋ ɔ, eji ajɔ mí mɔ ŋyikɔ Eda gbɔ, ɖo Eda gangan wuŋ.
29 Eyi taɖo ŋnui nɔ mí gbɔxwe avajɔ yí nɔ evajɔjɔɔ, míakando ji.
30 Ŋdagbexo nuxu koɖo mí sugbɔ o, ɖo xexe lɔ cɛkpatɔ gbɔgbɔ yí deɖo acɛ ɖe do ŋji o.*
31 Vɔ nɔ xexe lɔ anya mɔ ŋlɔn Edaɔ, ŋci Eda dɔŋ pɛɛ yí ŋwakɔ. Míso je te nɔ mìaso le elɛ.
Gɔnmɛnuŋwlɛnŋwlɛn
^ Alo “nɔxu.”
^ Alo “akɔnfanamɛtɔ.”
^ Alo “míale shigbe nyɔcɔviwo nɛ.”
^ Alo “deɖo ŋsɛn ɖe do ŋji o.”
