Eŋɛnywiwema Ʒan Tɔ 15:1-27
15 “Enyɛ yí nyi vɛnci adodwi lɔ yí Danyɛ nyi agbledetɔ lɔ.
2 Lɔ̀vi ɖekpokpui ci yí le ŋnu yí desɛnnɔ kuɔ, ésuini si yí lɔ̀vi ɖekpokpui ci yí sɛnsɛn kuɔ, édrɛni do nɔ agbesɛn doji.
3 Enyɔ ci ŋnu nɔ mí dɔ yí mímɛ vɔ.
4 Míkpɔtɔ ale koɖoŋ yí nyɛ can makpɔtɔ ale koɖo mí. Shigbe lé lɔ̀vi lɔ datɛnŋ asɛn ku nɔ dekpɔtɔ le vɛnci lɔ nu nɛɔ, ahanke míwo can mídatɛnŋ asɛn ku nɔ mídekpɔtɔ le koɖoŋ nɛ.
5 Enyɛ yí nyi vɛnci lɔ yí míwo nyi lɔ̀vi lɔwo. Mɛɖekpokpui ci yí kpɔtɔ le koɖoŋ yí ŋle koɖiɔ, ásɛn ku sugbɔ. Ðo nɔ anyitɔ dɛn le mɛɔ, mídatɛnŋ awa ŋɖekpokpui o.
6 Nɔ mɛɖe dele koɖoŋ ɔ, éle shigbe acilɔ̀vi ci woso yí sɔ dɔŋkpe yí exu nɛ. Wobɔnɔ lɔ̀vi ŋtɔ́wo yí sɔ wo donɔ zo mɛ yí wobinɔ.
7 Nɔ míkpɔtɔ le koɖoŋ yí anyi nyɔwo kpɔtɔ le mí mɛɔ, míbiɔ ŋɖekpokpui ci yí dro mí yí avamɛ nɔ mí.
8 Nɔ mísɛnnɔ ku sugbɔ yí danasɛ mɔ yewonyi anyi nukplaviwoɔ, énanɔ kanfukanfu Danyɛ.
9 Shigbe lé Eda lɔnŋ yí nyɛ can ŋlɔn mí nɛɔ, míkpɔtɔ anɔ anyi lɔnlɔn mɛ.
10 Nɔ míwanɔ do anyi sewo jiɔ, míakpɔtɔ anɔ anyi lɔnlɔn mɛ shigbe lé ŋwa do Danyɛ sewo ji yí kpɔtɔ le yi lɔnlɔn mɛ nɛ.
11 “Ŋnu nyɔ cɛwo nɔ mí keŋ nɔ anyi jijɔkpɔkpɔ anɔ mí mɛ yí míaɖɔ koɖo jijɔ.
12 Ese ci ŋdokɔ nɔ mí ke: Mílɔn míwonɔnɔwo shigbe lé ŋlɔn mí do nɛ.
13 Mɛɖe delɔn amɛ sɔ koɖo mɛ ci yí sɔ yi gbe* na do ta nɔ yi xlɔwo o.
14 Nɔ míwanɔ ŋci ŋdɔ míɔ, míanyi anyi xlɔwo.
15 Ŋdegbeyɔnɔ mí mɔ hwashiwo o, ɖo hwashi denyanɔ ŋci yi xwetɔ wanɔ o. Vɔ ŋyɔ mí mɔ exlɔwo, ɖo ŋdasɛ ŋciwo pleŋ ŋse so Danyɛ gbɔ nɔ mí.
16 Denyi míwo yí can nyɛ o, vɔ enyɛ yí can mí nɔ míakpɔtɔ asɛnsɛn ku yí míwo kusɛnsɛn akpɔtɔ ani keŋ nɔ ŋɖekpokpui ci míbiɔ Eda le anyi ŋkɔ mɛɔ, ásɔ na mí.
17 “Ŋnukɔ enyɔ cɛwo nɔ mí keŋ nɔ míalɔn míwonɔnɔwo.
18 Nɔ xexe lɔ gbe ŋwa nɔ míɔ, mínya mɔ yɛgbe ŋwa nɔŋ doŋkɔ gbɔxwe yí vagbe ŋwa nɔ mí.
19 Nɔ mínyi xexe lɔ tɔɔ, xexe lɔ alɔn mí. Vɔ ci mídenyi xexe lɔ tɔ o yí ŋcan mí le xexe lɔ mɛɔ, eyi taɖo xexe lɔ gbe ŋwa nɔ mí.
20 Enyɔ ci ŋnu nɔ mí le kpɔtɔ anɔ susu mɛ nɔ mí: Edɔwavi dewunɔgan yi xwetɔ o. Nɔ woci yumɛ nɔŋ ɔ, woaci yumɛ nɔ míwo can. Nɔ wowa do anyi nyɔ jiɔ, woawa do míwotɔwo can ji.
21 Vɔ woawa enu cɛwo pleŋ koɖo mí do anyi ŋkɔ ŋci, ɖo wodejeshi Mɛ ci yí dɔŋ ɖaɖa o.
22 Nɔ ŋdeva yí xo nuxu nɔ wo saɔ, nuvɔn ɖe dale kɔ nɔ wo o. Vɔ ecɛyɛɔ, kuku ɖe deli woavaɖe nɔ nuvɔn ci wowa o.
23 Mɛɖekpokpui ci yí gbe ŋwa nɔŋ ɔ, égbe ŋwa nɔ Danyɛ hɛnnɛ.
24 Nɔ ŋdewa edɔ ciwo yí mɛɖekɛ dewa kpɔ yí wokpɔ saɔ, nuvɔn ɖekɛ dale kɔ nɔ wo o. Vɔ ecɛyɛɔ, wokpɔŋ gan yí gbe ŋwa nɔ nyɛ koɖo Danyɛ.
25 Vɔ ŋcɛ jɔ keŋ nɔ enyɔ ci woŋwlɛ do wowo Se lɔ mɛ avamɛ mɔ: ‘Wogbe ŋwa nɔŋ do ŋɖemajɔ ji.’
26 Naɖo kpedonutɔ ci yí nyi gbɔngbɔn nyɔnɔnwitɔ lɔ ɖaɖa mí so Eda gbɔ. Nɔ éso Eda gbɔ yí vaɔ, áɖe kunu so ŋnu.
27 Eyi míwo can míaɖe kunu hɛnnɛ, ɖo míle koɖoŋ so tɔtɔmɛ.
Gɔnmɛnuŋwlɛnŋwlɛn
^ Alo “yi se.”
