Eŋɛnywiwema Ʒan Tɔ 16:1-33
16 “Ŋnu nyɔ cɛwo nɔ mí nɔ míŋgbeklɛn nu ajuin o.
2 Woanya mí ti le Ʒuifuwo nukplaxuwo. Le nyɔnɔnwi mɛɔ, gaxoxo lɔ gbɔgbɔ yí mɛɖekpokpui ci yí awu mí abukɔ mɔ yewa sɛnsɛndɔ kɔkɔɛ nɔ Mawu.
3 Vɔ woawa enu cɛwo, ɖo wodejeshi Eda o yí wodejeshi nyɛ can o.
4 Gan ŋnu nyɔ cɛwo nɔ mí keŋ nɔ ega lɔ vaxo yí enu lɔwo jɔɔ, míaɖo ŋwi mɔ ŋnu wo nɔ mí sa.
“Ŋdenu nyɔ cɛwo nɔ mí doŋkɔ o, ɖo ŋle mí gbɔ.
5 Ecɛyɛɔ, ŋyikɔ Mɛ ci yí dɔŋ ɖaɖa gbɔ, gan mɛɖe dele mí mɛ yí biɔŋ se mɔ fini ŋyikɔ ma o.
6 Vɔ ci ŋnu nyɔ cɛwo nɔ míɔ, míci ŋshishi mɛ sugbɔ.
7 Gan nyɔnɔnwi yí ŋnukɔ nɔ mí, míwo nyɔna taɖo yí ŋyikɔ. Ðo nɔ ŋdeyiɔ, kpedonutɔ lɔ dava nɔ mí o, vɔ nɔ ŋyiɔ, naɖui ɖaɖa mí.
8 Eyi nɔ évaɖoɔ, ána yí xexe lɔ anya enu ci yí nyi enuvwin, enujɔjɔɛwawa koɖo kojoɖoɖo petii.
9 Doŋkɔɔ, ána woanya enu ci yí nyi enuvwin, ɖo wodexɔŋ ji se o.
10 Yi goduɔ, ána woanya enu ci yí nyi enujɔjɔɛwawa, ɖo ŋyikɔ Eda gbɔ yí mídagbekpɔŋ ke o.
11 Woagbenya enu ci yí nyi kojoɖoɖo hɛnnɛ, ɖo woɖo kojo nɔ mɛ ci yí kpakpa nɔ xexe cɛ.
12 “Enyɔ sugbɔ li nanu nɔ mí, vɔ mídatɛnŋ amɔŋje wo mɛ kakacɛ o.
13 Vɔ nɔ eyɛ* ci yí nyi gbɔngbɔn nyɔnɔnwitɔ lɔ vaɔ, ákplɔ mí to nyɔnɔnwi lɔ pleŋ mɛ. Ðo daxo nuxu le yiŋtɔ dro mɛ o, vɔ enyɔ ci ese yí anu. Ánu ŋciwo yí avajɔ nɔ mí.
14 Eyɛ yí akanfuŋ, ɖo áse nyɔwo so ŋgbɔ yí anu wo nɔ mí.
15 Ŋciwo pleŋ yí le Eda shiɔ, anyitɔ wonyi. Eyi taɖo ŋnu nɔ mí mɔ, yɛase enyɔwo so ŋgbɔ yí anu wo nɔ mí.
16 Sabaɖe yɛɔ, mídagbekpɔŋ o yí zaanɖeɔ, míagbekpɔŋ.”
17 Eyi yi nukplavi ɖewo tɔ wowonɔnɔwo biɔbiɔ se mɔ: “Enyɔ ci ejikɔ anu ci enukɔ nɔ mì mɔ, ‘Sabaɖe yɛɔ, mídagbekpɔŋ o yí zaanɖeɔ, míagbekpɔŋ ɔ’? Enyɔ ci ejikɔ anu ci emɔ, ‘Ðo ŋyikɔ Eda gbɔɔ’?”
18 Eyi taɖo wonunuɔ mɔ: “Gɔnmɛsese ci yí le ‘sabaɖe’ lɔ nu niɔ? Mìnya ŋci nu exokɔ nuxu so ba.”
19 Yesu nya mɔ wojikɔ abiɔ nyɔ ye se. Eyi taɖo ebiɔ wo se mɔ: “Ci ŋnu mɔ: ‘Sabaɖe yɛɔ, mídagbekpɔŋ o yí zaanɖeɔ, míagbekpɔŋ’ taɖo míbiɔkɔ nyɔ míwonɔnɔwo sea?
20 Nyɔnɔnwi teŋ yí ŋnukɔ nɔ mí mɔ, míafan avin yí afan gbɛkwi, vɔ xexe lɔ ale jijɔ kpɔkɔ. Míaci ŋshishi mɛ, vɔ ŋshishi míwotɔ atrɔ jijɔ.
21 Nɔ nyɔnu jikɔ aji viɔ, ésenɔ gbazavi, ɖo evijiji ga xo ni. Vɔ nɔ éji vi lɔ ɖegbɔɔ, degbeɖonɔ ŋwi gbazavi ci ese o, ɖo evi ci eji na yí ekpɔkɔ jijɔ.
22 Eyi taɖo míwo can ɔ, míle ŋshishi mɛ yɛ. Vɔ nagbevakpɔ mí yí míale jijɔ mɛ yí mɛɖekpokpui daxɔ jijɔ míwotɔ le mí shi o.
23 Le ŋkeke ŋtɔ́ jiɔ, mídagbebiɔ nyɔ ɖe ŋse o. Nyɔnɔnwi teŋ yí ŋnukɔ nɔ mí mɔ, nɔ míbiɔ ŋɖekpokpui Edaɔ, ána mí le anyi ŋkɔ mɛ.
24 Keke vaɖo evyɛɔ, mídebiɔ enu kuɖeka kpetii le anyi ŋkɔ mɛ hɔɖo o. Míbiɔ yí woana mí keŋ nɔ míakpɔ jijɔ sugbɔ.
25 “Ŋdo labaluwo yí sɔ nu enyɔ cɛwo nɔ mí. Gaxoxo lɔ gbɔgbɔ yí ŋdagbedo labaluwo asɔ xo nuxu nɔ mí o. Vɔ naxo nuxu nɔ mí so Eda nu gbajɛɛ.
26 Le ŋkeke ŋtɔ́ jiɔ, míabiɔ nu Eda le anyi ŋkɔ mɛ. Vɔ ŋdenukɔ mɔ nabiɔ nu Eda do nu nɔ mí o.
27 Ðo Eda ŋtɔ lɔn mí ci mílɔnŋ yí gbekando ji mɔ ŋnyi Mawu fɔsɔɖotetɔ.
28 Ŋnyi afɔsɔɖotetɔ nɔ Eda yí va xexe lɔ mɛ. Ecɛyɛɔ, ŋsosoɔ le xexe lɔ mɛ yí ayi Eda gbɔ.”
29 Yi nukplaviwo nu mɔ: “Kpɔ ɖa! Ecɛyɛɔ, èxoxoɔ nuxu gbajɛɛ yí dègbedodoɔ labaluwo o.
30 Mìvanya hɔntɔn mɔ, èjeshi enuwo pleŋ yí deʒan mɔ woagbebiɔ nyɔ ɖe eo se o. Ecɛ na yí mìkando ji mɔ Mawu gbɔ yí èso.”
31 Yesu biɔ wo se mɔ: “Míkando ji hɔntɔn a?
32 Míkpɔ ɖa! Gaxoxo lɔ gbɔgbɔ yí evaɖo hɛnnɛ vɔ yí mí pleŋ agban do yí ayi míwo xwewo yí atashi nyɛɖekɛ ɖɛ. Vɔ ŋdaci nyɛɖekɛ o, ɖo Eda le koɖoŋ.
33 Ŋnu nyɔ cɛwo nɔ mí keŋ nɔ míakpɔ fafa toto ŋji. Míakpe fun le xexe lɔ mɛ. Vɔ mígbe dɔn, ŋɖu xexe lɔ ji.”
Gɔnmɛnuŋwlɛnŋwlɛn
^ “Eyɛ” ci Yesu zan le kpukpui 13 koɖo 14 lɔ mɛ le dumɛ nɔ “kpedonutɔ lɔ” ci nu exo nuxu so le kpukpui 7 mɛ. Yesu zan enyɔgbe “kpedonutɔ” shigbe agbetɔ enyi nɛ ci exoxoɔ nuxu so gbɔngbɔn kɔkɔɛ lɔ ci yí nyi ŋsɛn ci wodekpɔnɔ nu.
