Eŋɛnywiwema Ʒan Tɔ 17:1-26
17 Ci Yesu nu nyɔ cɛwo ɖegbɔɔ, éfɔn ta yi ji yí nu mɔ: “Eda, ega lɔ xo. Kanfu vio keŋ nɔ vio akanfu eo
2 shigbe lé èna acɛ yi do agbetɔwo* pleŋ ji nɛ keŋ nɔ atɛnŋ ana agbe mavɔ mɛ ciwo pleŋ èsɔ ni.
3 Agbe mavɔ lɔ yí nyi mɔ woajeshi* eo, Mawu adodwi kuɖeka kpaŋ lɔ koɖo Yesu Kristo ci èdɔ ɖaɖa.
4 Ŋkanfu eo le nyigban lɔ ji yí ɖegbɔ nɔ edɔ ci èdɔŋ mɔ nyɛ le wa.
5 Eyi taɖo ecɛyɛɔ, Eda, nà matrɔ va eo gbɔ yí axɔ kanfukanfu ci ŋɖo le eo gbɔ sa gbɔxwe woavawa xexe lɔ.
6 “Ŋdasɛ* ao ŋkɔ nɔ mɛ ciwo yí èsɔ so xexe lɔ mɛ yí sɔ naŋ. Aotɔwo yí wonyi yí èsɔ wo naŋ yí wowa do ao nyɔwo ji.
7 Ecɛyɛɔ, wovanya mɔ ŋciwo pleŋ èsɔ naŋ ɔ, eo gbɔ yí woso.
8 Ðo ŋnu enyɔ ciwo yí ŋxɔ so eo gbɔ nɔ wo yí woxɔ wo yí vanya mɔ, enyɛ yí nyi ao fɔsɔɖotetɔ ci yí va nyao. Wokando ji mɔ eo yí dɔŋ ɖaɖa.
9 Wowo yí ŋdodoɔ gbe ɖaɖa do ta nɔ, denyi xexe lɔ ŋdodoɔ gbe ɖaɖa do ta nɔ o. Vɔ mɛ ciwo yí èsɔ naŋ yí ŋdodoɔ gbe ɖaɖa do ta nɔ, ɖo aotɔwo yí wonyi.
10 Enu ciwo pleŋ yí nyi anyitɔ nyi tɔo yí aotɔwo nyi kinyɛ, eyi wokanfuŋ le wo mɛ.
11 “Ŋsosoɔ le xexe lɔ mɛ yí gbɔgbɔ eo gbɔ. Vɔ wowo kpɔtɔ le xexe lɔ mɛ. Eda kɔkɔɛ, kpɔ do ao ŋkɔ ci èsɔ naŋ nu yí acɔn alɔ̀ wo ji keŋ nɔ woanyi enu kuɖeka* shigbe lé nyɛ koɖo eo can nyi enu kuɖeka* nɛ.
12 Hwenu ŋle koɖo woɔ, ŋkpɔ do eoŋtɔ ŋkɔ ci èsɔ naŋ nu yí cɔn alɔ̀ wo ji. Ŋcɔn alɔ̀ wo ji keke eɖe detrɔn le wo mɛ sɔ zeto trɔntrɔn vi lɔ nu o keŋ nɔ enuŋwlɛŋwlɛ lɔ ajɔ do ji.
13 Vɔ ecɛyɛɔ, ŋgbɔgbɔ eo gbɔ yí ŋnunuɔ nyɔ cɛwo le xexe lɔ mɛ keŋ nɔ anyi jijɔkpɔkpɔ aɖɔ wo mɛ.
14 Ŋsɔ ao nyɔ lɔ na wo, vɔ xexe lɔ gbe ŋwa nɔ wo. Ðo wodenyi xexe lɔ tɔ o shigbe lé nyɛ can ŋdenyi xexe lɔ tɔ nɛ.
15 “Ŋdebiɔkɔ eo mɔ eɔ le ɖe wo ti le xexe lɔ mɛ o, vɔ ŋbiɔkɔ eo mɔ eɔ le cɔn alɔ̀ wo ji do nuvwinwatɔ lɔ ŋci.
16 Wodenyi xexe lɔ tɔ o shigbe lé nyɛ can ŋdenyi xexe lɔ tɔ nɛ.
17 Nà nɔ woamɛ́* sɔ to nyɔnɔnwi lɔ ji, ao nyɔ nyi nyɔnɔnwi.
18 Shigbe lé èdɔŋ ɖaɖa xexe lɔ mɛ nɛɔ, nyɛ can ŋdɔ wo ɖaɖa xexe lɔ mɛ.
19 Ŋkpɔtɔ le mɛmiɖe do wowo ŋci keŋ nɔ wowo can amɛ́ to nyɔnɔnwi lɔ ji.
20 “Denyi wowoɖekɛ yí ŋdodoɔ gbe ɖaɖa do ta nɔ o. Vɔ ŋdodoɔ gbe ɖaɖa do ta nɔ mɛ ciwo yí axɔŋ ji se sɔ to wowo nyɔwo ji hɛnnɛ,
21 keŋ nɔ wo pleŋ anyi enu kuɖeka shigbe lé eo Eda, èle koɖoŋ yí nyɛ can ŋle koɖo eo nɛ; nɔ wowo can ale koɖo mì keŋ nɔ xexe lɔ axɔɛ se mɔ eo yí dɔŋ ɖaɖa.
22 Kanfukanfu ci èsɔ naŋ ɔ, ŋsɔ na wo keŋ nɔ woanyi enu kuɖeka shigbe lé mìnyi enu kuɖeka nɛ.
23 Ŋle koɖo wo yí èle koɖoŋ keŋ nɔ woanyi enu kuɖeka vɛ keŋkeŋ, nɔ xexe lɔ anya mɔ eo yí dɔŋ ɖaɖa yí èlɔn wo shigbe lé èlɔnŋ do nɛ.
24 Eda, ŋji mɔ mɛ ciwo èsɔ naŋ le nɔ koɖoŋ le fini ŋle keŋ nɔ woakpɔ kanfukanfu ci èsɔ naŋ. Ðo èlɔnŋ gbɔxwe yí vawa xexe lɔ.
25 Eda ci yí le jɔjɔɛɖe, le nyɔnɔnwi mɛɔ, xexe lɔ dejeshi eo hɔɖo o, vɔ nyɛŋjeshi eo yí mɛ cɛwo vanya mɔ eo yí dɔŋ ɖaɖa.
26 Ŋna yí wojeshi ao ŋkɔ yí nana woagbejeshi doji keŋ nɔ woalɔnnɔ amɛ shigbe lé èlɔnŋ do nɛ yí nale koɖo wo.”
Gɔnmɛnuŋwlɛnŋwlɛn
^ Yi gɔnmɛɖeɖe tiin: “ŋcilanwo.”
^ Grɛki nyɔgbe ci wozan dasɛ mɔ woakpɔtɔ awɛwɛ tɛgbɛɛ.
^ Alo “Ŋna wojeshi.”
^ Alo “woale ju.”
^ Alo “le ju.”
^ Alo “Ðè wo do akpo, wɛ̀ nɔ woale kɔkɔɛɖe.”
