Eŋɛnywiwema Ʒan Tɔ 18:1-40
18 Ci Yesu nu enyɔ cɛwo ɖegbɔɔ, yɛ koɖo yi nukplaviwo yi ago xlɔtɔ ji nɔ Sidrɔn Bali* lɔ. Ekpa ɖeka le nɔ yí yɛ koɖo yi nukplaviwo ɖo ekpa lɔ mɛ.
2 Ʒudasi ci yí sɛ can jeshi texwe lɔ ɖɛ, ɖo Yesu donɔ go koɖo yi nukplaviwo le nɔ.
3 Eyi taɖo Ʒudasi kplɔ sɔjawo sɔ kpe nɔ mɛ ciwo yí avɔnsatɔwo gawo koɖo Farizitɔwo dɔ ɖaɖa yí wova nɔtɔxu yí hɛn ezowo, kaɖigbanwo koɖo ahwawanuwo.
4 Vɔ ci Yesu nya enu ciwo pleŋ yí jikɔ ajɔ do jiɔ, évayi ŋkɔ yí biɔ wo se mɔ: “Mi yí míjikɔɔ?”
5 Woɖo ŋci ni mɔ: “Yesu Nazarɛtitɔ lɔ yí mìjikɔ.” Énu nɔ wo mɔ: “Enyɛ yɔ.” Ʒudasi, mɛ ci yí sɛ can le te koɖo wo.
6 Vɔ ci Yesu nu nɔ wo mɔ: “Enyɛ yɔɔ,” woteyi godu yí juin.
7 Eyi egbebiɔ wo se mɔ: “Mi yí míjikɔɔ?” Woɖo ŋci mɔ: “Yesu Nazarɛtitɔ.”
8 Yesu nu do nu mɔ: “Ŋnu nɔ mí mɔ enyɛ yɔ. Nɔ enyɛ yí míjikɔɔ, mítashi mɛ cɛwo nɔ woayi.”
9 Ecɛ na yí enyɔ ci enu ɖɛ vamɛ mɔ: “Ŋdesɔ kuɖeka kpetii bu le mɛ ciwo èsɔ naŋ mɛ o.”
10 Eyi Simɔ Piɛ ɖe ewi ti yí dui ɖaɖa avɔnsatɔ gangantɔ dɔwavi yí kpa ɖushi mɛ to ni. Edɔwavi lɔ tɔ mɔ Malukusi.
11 Vɔ Yesu nu nɔ Piɛ mɔ: “Sɔ̀ ewi lɔ do yi kpa mɛ. Ŋdeɖo anu kɔnkpu ci Danyɛ sɔ nɔŋ ba?”
12 Eyi sɔja lɔwo koɖo sɔjawo ga lɔ sɔ kpe nɔ mɛ ciwo yí Ʒuifuwo dɔ ɖaɖa lé Yesu yí blɛ.
13 Wokplɔɛ yi nɔ Anasi doŋkɔ, ɖo Kayifu ashiɛtɔ yí enyi. Kayifu yí nyi avɔnsatɔ gangantɔ xwenɔxwe.
14 Le nyɔnɔnwi mɛɔ, Kayifu yí kpla nu Ʒuifuwo mɔ nɔ amɛ kuɖeka ku do ta nɔ jukɔn lɔɔ, yɛanyɔ nɔ wo sɔwu.
15 Simɔ Piɛ koɖo Yesu nukplavi bu ɖeka can kplɔ Yesu do. Avɔnsatɔ gangantɔ lɔ jeshi enukplavi lɔ yɛ ɖɛ. Eyi ekplɔ Yesu do yí yi avɔnsatɔ gangantɔ lɔ gbadenu.
16 Vɔ Piɛ le te le agbo ji le xexenu, eyi taɖo enukplavi ɖetɔ lɔ ci yí avɔnsatɔ gangantɔ lɔ jeshi ɖɛ to yí vayi xo nuxu koɖo agbocɔtɔ lɔ yí kplɔ Piɛ ɖo axwe lɔ mɛ.
17 Edɔwavi nyɔnushi ci yí nyi agbocɔtɔ lɔ biɔ Piɛ se mɔ: “Eɔ can dèle ŋsu cɛ nukplaviwo mɛ ba?” Éɖo ŋci mɔ: “Ŋle wo mɛ go.”
18 Edɔwavi lɔwo koɖo sɔjawo le te trɔdo akanzo ɖeka yí xuxuɔ zo, ɖo vuvɔ li. Piɛ can le te le wo gbɔ yí xuxuɔ zo.
19 Avɔnsatɔwo ga lɔ biɔ nyɔ Yesu se so yi nukplaviwo koɖo enu ci ekplakɔ amɛwo nu.
20 Yesu nu do nu ni mɔ: “Ŋxo nuxu nɔ amɛwo pleŋ le jugbaja, ŋkplanɔ nu amɛwo le Ʒuifuwo nukplaxu koɖo gbedoxɔ lɔ mɛ, fini Ʒuifuwo pleŋ va bɔnɔ do yí ŋdenu enyɔ ɖekpokpui le wlawlamɛ o.
21 Nyi yí taɖo èbiɔkɔ nyɔŋ seɔ? Mɛ ciwo yí se anyi nyɔwo yí àbiɔ nyɔ se. Kpɔ ɖa! Mɛ cɛwo nya nyɔ ciwo ŋnu.”
22 Ci Yesu nu nyɔ cɛwo ɖegbɔɔ, sɔja ciwo yí le te le nɔ ɖeka xo tomɛ ni yí biɔɛ se mɔ: “Ahan àɖo nyɔ ŋci nɔ avɔnsatɔwo ga lɔ nɛa?”
23 Yesu nu do nu ni mɔ: “Nɔ ŋwa fɛn xo nuxuɔ, drè nyɔ ci ŋnu yí wa afɛn. Vɔ nɔ ŋwa ɖaŋ xo nuxu ɖe, nyi yí taɖo èxoŋ ɔ?”
24 Éle blabla yí Anasi ɖui ɖaɖa avɔnsatɔ gangantɔ Kayifu.
25 Simɔ Piɛ le te le nɔ yí xuxuɔ zo. Eyi wobiɔɛ se mɔ: “Eɔ can dèle yi nukplaviwo mɛ ba?” Égbe yí nu mɔ: “Ŋle wo mɛ go.”
26 Avɔnsatɔ gangantɔ dɔwavi ɖeka ci yí nyi mɛ ci Piɛ kpa to nɔ xomumɛtɔ biɔ Piɛ se mɔ: “Ŋdekpɔ eɔ can le ekpa lɔ mɛ koɖi ba?”
27 Vɔ Piɛ gbegbe ke. Eyi zeɖeka vɔɔ, kloklo ɖe atɔ.
28 Yi goduɔ, wokplɔ Yesu so Kayifu gbɔ yí hin yi ejujikpɔtɔ lɔ xomɛ. Nyidin kannyakannya yɔ, vɔ wowoŋtɔwo deɖo ejujikpɔtɔ lɔ xomɛ yí avaxo ɖyi keŋ nɔ Paki xwe lɔ ɖuɖu avaglo wo o.
29 Eyi taɖo Pilati to va wo gbɔ yí biɔ se mɔ: “Ehwɛ ci mídodoɔ ŋsu cɛɔ?”
30 Woɖo ŋci ni mɔ: “Nɔ ŋsu cɛ denyi enubaɖawatɔɔ,* mìdakplɔɛ vɛ nɔ eo o.”
31 Eyi Pilati nu nɔ wo mɔ: “Míkplɔɛ yi míwoŋtɔwo ayi ɖo kojo ni sɔgbe koɖo míwo se.” Ʒuifu lɔwo nu ni mɔ: “Ese deɖe emɔ mɔ mìwo le wu mɛɖe o.”
32 Ecɛ jɔ do ji keŋ nɔ enyɔ ci Yesu nu so eku ci aku nu avamɛ.
33 Pilati gbetrɔ yi axwe lɔ mɛ yí yɔ Yesu keŋ yí biɔɛ se mɔ: “Eo yí nyi Ʒuifuwo Fyɔ lɔa?”
34 Yesu biɔɛ se mɔ: “Eoŋtɔ yí bu tamɛ kpɔ yí biɔkɔ nyɔ cɛ sea alo mɛbuwo yí nu anyi nyɔ nɔ eo?”
35 Pilati nu do nu ni mɔ: “Ʒuifu ŋnyia? Eoŋtɔ jumɛtɔwo koɖo avɔnsatɔwo gawo yí kplɔ eo vɛ nɔŋ. Nyi èwaɔ?”
36 Yesu ɖo ŋci mɔ: “Anyi Fyɔɖuxu denyi xexe cɛ tɔ o. Nɔ anyi Fyɔɖuxu nyi xexe cɛ tɔ saɔ, anyi dɔwaviwo awa ahwa do ta nɔŋ keke wodasɔŋ do alɔ̀ mɛ nɔ Ʒuifuwo o. Vɔ shigbe lé ele do nɛɔ, anyi Fyɔɖuxu deso xexe cɛ mɛ o.”
37 Eyi taɖo Pilati biɔɛ se mɔ: “Anyi efyɔ ènyi nɛŋ?” Yesu ɖo ŋci ni mɔ: “Yinɛ eoŋtɔ ènukɔ nɛ. Ðo ŋci yí taɖo wojiŋ yí ŋva xexe lɔ mɛ yí nyi mɔ, maɖe kunu so nyɔnɔnwi lɔ nu. Mɛɖekpokpui ci yí le nyɔnɔnwi lɔ kpaxwe ɖonɔ to anyi gbe.”
38 Pilati biɔɛ se mɔ: “Nyi yí nyi nyɔnɔnwi lɔɔ?”
Ci ebiɔɛ se ahan ɖegbɔɔ, égbetrɔ yi Ʒuifu lɔwo gbɔ yí nu nɔ wo mɔ: “Ŋdekpɔ afɛn ɖe ni o.
39 Gbesɔ kpe niɔ, ŋɖo ajo mɛɖeka nɔ mí le Paki xweɖuɖu lɔ ji sɔgbe koɖo míwo kɔnu. Taɖo míji mɔ majo Ʒuifuwo Fyɔ lɔ nɔ mía?”
40 Wogbedo axwa mɔ: “Oo, ŋsu ŋtɔ́ yí àjo nɛ go, Barabasi yí àjo!” Vɔ Barabasi trɔ nyi flafinɔ.
