Eŋɛnywiwema Ʒan Tɔ 19:1-42
19 Eyi taɖo Pilati dɔ yí woxo Yesu koɖo lanŋba.
2 Sɔja lɔwo sɔ ŋja lɔn efyɔkuku yí sɔ cɔn ta ni yí do awu lɛgbɛ jin ɖeka ni.
3 Wovakɔ gbɔ yí nukɔ ni mɔ: “Mìdo gbe nɔ eo, Ʒuifuwo Fyɔ!” Woxoxoɔ tomɛ ni hɛnnɛ.
4 Pilati gbeto va wo gbɔ yí nu nɔ wo mɔ: “Míkpɔ ɖa! Ŋkplɔɛ ti nɔ mí nɔ míanya mɔ ŋdekpɔ afɛn ɖe ni o.”
5 Eyi Yesu to va xexenu, ŋjakuku lɔ le ta ni yí ele awu lɛgbɛ jin lɔ mɛ. Pilati nu nɔ wo mɔ: “Míkpɔ ɖa! Ŋsu lɔ ke!”
6 Vɔ ci avɔnsatɔwo gawo koɖo mɛ ciwo yí cɔnɔ gbedoxɔ lɔ kpɔɛɔ, wotɔ axwa dodo mɔ: “Kin do aci nu! Kin do aci nu!” Pilati nu nɔ wo mɔ: “Míwoŋtɔwo míkplɔɛ yi keŋ akin do aci nu, ɖo ŋdekpɔ afɛn ɖe ni o.”
7 Ʒuifu lɔwo nu do nu ni mɔ: “Mìɖo ese ɖeka yí sɔ koɖo ese cɛɔ, éɖo aku; ɖo émɔ yenyi Mawu vi.”
8 Ci Pilati se enyɔ ci wonukɔɔ, vɔnvɔn gbeli doji.
9 Égbetrɔ yi axwe lɔ mɛ yí biɔ Yesu se mɔ: “Fini èsoɔ?” Vɔ Yesu deɖo nyɔ ɖe ŋci ni o.
10 Eyi Pilati nu ni mɔ: “Ègbe mɔ yedaxo nuxu nɔŋ a? Dènya mɔ ŋɖo acɛ ajo eo yí gbeɖo acɛ akan eo do aci nu ba?”
11 Yesu nu do nu ni mɔ: “Dàtɛnŋ aɖo acɛ ɖekpokpui do ŋji nɔ denyi jeŋkwi mɛ èxɔɛ so o. Eyi taɖo mɛ ci yí sɔŋ do alɔ̀ mɛ nɔ eo wa nuvɔn sɔwu.”
12 Ecɛ dɔ yí Pilati kpɔtɔ jijiɛ emɔ ci ji ato ajui. Vɔ Ʒuifuwo do axwa mɔ: “Nɔ èjo ŋsu cɛ pi, anyi dènyi Seza xlɔ o. Mɛɖekpokpui ci yí mɔ yenyi fyɔ fɔn gu do Seza ji.”*
13 Ci Pilati se nyɔ cɛwoɔ, ékplɔ Yesu ti yí vayi nɔ nyinɔnɔ do kojoɖoxu le fini wotɛ kpe do. Woyɔnɔ nɔtɔxu le Ebregbe mɛ mɔ Gabata.
14 Le Dradrado ŋkeke nɔ Paki xweɖuɖu lɔ ji le gawive mɛ han ɔ,* énu nɔ Ʒuifu lɔwo mɔ: “Míkpɔ ɖa! Míwo fyɔ ke!”
15 Vɔ wodo axwa mɔ: “Wui! Wui! Kin do aci nu!” Pilati biɔ wo se mɔ: “Makan míwo fyɔ lɔ do aci nua?” Avɔnsatɔwo gawo ɖo ŋci mɔ: “Mìdeɖo efyɔ bu ɖe sɔ zeto Seza nu o.”
16 Eyi esɔ jo nɔ wo nɔ woakin do aci nu.
Wokplɔ Yesu ɖedo.
17 Yesu ŋtɔ hɛn efuntrenamɛci* lɔ yí yi fini woyɔnɔ mɔ Amɛtaxutɔxu. Woyɔnɔ texwe cɛ le Ebregbe mɛ mɔ Gɔlgota.
18 Wokan Yesu do aci nu yí kan ŋsu amɛve buwo do axa ni yí ele dodomɛ nɔ wo.
19 Pilati ŋwlɛ ŋɖeka hɛnnɛ yí wokin do efuntrenamɛci lɔ nu. Enu ci eŋwlɛ ke: “Yesu Nazarɛtitɔ, Ʒuifuwo Fyɔ lɔ.”
20 Ʒuifu sugbɔ hlɛn nu lɔ, ɖo fini wokan Yesu do sɔ jugan lɔ gbɔ yí woŋwlɛ nu lɔ do Ebregbe, Latɛngbe koɖo Grɛkigbe mɛ.
21 Vɔ Ʒuifuwo vɔnsatɔwo gawo nu nɔ Pilati mɔ: “Nyi yí taɖo èŋwlɛ mɔ, ‘Ʒuifuwo Fyɔɔ’? Ðɔli keŋ aŋwlɛ enyɔ ci enu mɔ, ‘Ŋnyi Ʒuifuwo Fyɔ.’”
22 Pilati nu do nu mɔ: “Enu ci ŋŋwlɛɔ, ŋwli yɔ.”
23 Ci sɔja lɔwo kan Yesu do aci nu ɖegbɔɔ, wosɔ awu jitɔ yitɔwo yí ma wo do texwe amɛnɛ keŋ nɔ sɔja ɖeka axɔ ɖeka. Wosɔ awu gɔnmɛtɔ lɔ hɛnnɛ. Wodetɔn awu gɔnmɛtɔ lɔ o, vɔ woluin so eji va gɔnmɛ.
24 Eyi taɖo sɔja lɔwo nu le wowoɖeɖewo mɛ mɔ: “Mìdadrɛn ecɛ yɛ o, vɔ mìasɔ nu kpɔ do ji keŋ akpɔ mɛ ci tɔ anyi.” Ecɛ jɔ keŋ nɔ enuŋwlɛŋwlɛ lɔ avamɛ mɔ: “Woma anyi wuwo le wowoɖeɖewo mɛ yí sɔ nu kpɔ do anyi nudodo ji.” Ŋcɛwo pɛpɛpɛ yí sɔja lɔwo wa.
25 Vɔ Yesu nɔlɔ koɖo Yesu nɔɖiɛ le te le efuntrenamɛci* lɔ gbɔ. Mari ci yí nyi Klopasi ashiɛ koɖo Mari Magdalɛnu can le nɔ.
26 Eyi ci Yesu kpɔ nɔlɔ koɖo nukplavi ci elɔn yí wole te le nɔɔ, énu nɔ nɔlɔ mɔ: “Nyɔnu, kpɔ ɖa! Evio nɛ!”
27 Yi goduɔ, énu nɔ nukplavi lɔ mɔ: “Kpɔ ɖa! Nɔo nɛ!” Eyi so gbenɔgbeɔ, enukplavi lɔ kplɔ Yesu nɔlɔ yi yiŋtɔ xomɛ yí eci gbɔ.
28 Le yɛ godu ci Yesu nya mɔ enushianu va vɔvɔnu hɔntɔn ɔ, énu mɔ: “Shikɔ ciŋ,” keŋ nɔ enuŋwlɛŋwlɛ lɔ ajɔ do ji.
29 Eze ɖeka le nɔ yí vɛn hwanhwan ɖɔɛ, eyi wosɔ kocan ʒin do vɛn hwanhwan lɔ mɛ yí sɔ bla do izɔpuci* nu yí dui ɖaɖa enu gbɔ ni.
30 Ci Yesu tɔ aɖe vɛn hwanhwan lɔ kpɔɔ, énu mɔ: “Enushianu vɔ!” Eyi edo ta gu yí gbɔngbɔn vɔ ni.*
31 Ci enyi Dradrado ŋkeke yɔɔ, Ʒuifuwo deji mɔ amɛkukuwo akpɔtɔ le efuntrenamɛci lɔwo nu le Sabatigbe o (ɖo Sabatigbe ŋtɔ́ nyi Sabati gangan). Eyi taɖo Ʒuifuwo nu nɔ Pilati mɔ yɛ le dɔ nɔ woaŋɛ́ afɔwo nɔ ŋsu lɔwo keŋ aɖe wowo cɔwo so aci lɔwo nu.
32 Eyi sɔja lɔwo va yí ŋɛ́ afɔwo nɔ ŋsu amɛve ciwo wokan do aci nu do axa nɔ Yesu.
33 Ci wovaɖo Yesu jiɔ, wokpɔ mɔ yɛku vɔ, eyi taɖo wodeŋɛ́ afɔwo nɔ yɛ o.
34 Vɔ sɔja lɔwo ɖeka sɔ ehwan tɔ axadamɛ nɔ Yesu, eyi ehun koɖo eshi kɔ zeɖeka.
35 Mɛ ci yí kpɔ enu cɛwo tɔxu yí ɖe kunu so wo nu yí kunuɖeɖe yitɔ nyi nyɔnɔnwi. Amɛ ŋtɔ́ nya mɔ, enyɔ ci yenunɔ nyi nyɔnɔnwi keŋ nɔ míwo can míaxɔɛ se.
36 Le nyɔnɔnwi mɛɔ, enu cɛwo jɔ do ji keŋ nɔ enuŋwlɛŋwlɛ lɔ avamɛ mɔ: “Wodaŋɛ́* yi xu kuɖeka kpetii o.”
37 Eyi enuŋwlɛŋwlɛ bu gbenu mɔ: “Woacu ŋkuviwo do mɛ ci wotɔ ehwan ji.”
38 Le ŋcɛwo goduɔ, Ʒozɛfu ci yí so Arimate biɔ gbe Pilati mɔ yeasɔ Yesu cɔ lɔ. Ényi Yesu nukplavi le bebemɛ, ɖo évɔnvɔn nɔ Ʒuifuwo. Ci Pilati na gbe yiɔ, éva sɔ Yesu cɔ lɔ hɛn yi.
39 Nikodɛmu ci yí nyi ŋsu ɖeka ci yí va Yesu gbɔ vayi le zanmɛ can va yí hɛn Miru koɖo aluɛsi ciwo wosɔ caka kilo egban han vɛ.
40 Eyi wosɔ Yesu cɔ lɔ yí shi amihwɛntewo ni keŋ yí sɔ lɛnvɔn tro di shigbe lé Ʒuifuwo dranɔ ecɔ do gbɔxwe yí ɖyinɔ nɛ.
41 Vɔ ekpa ɖeka le fini wokan Yesu do aci nu le yí yɔdu* yoyu ɖeka le ekpa lɔ mɛ, wodeɖyi mɛɖe do mɛ kpɔ o.
42 Ci enyi Dradrado ŋkeke Ʒuifuwo tɔ yɔ yí yɔdu lɔ can sɔ nɔɔ, wosɔ Yesu cɔ lɔ mlɔ mɛ.
Gɔnmɛnuŋwlɛnŋwlɛn
^ Alo “trɔkpe.”
^ Yi gɔnmɛɖeɖe tiin: “gaxoxo amadɛntɔ mɛ han.”
^ Kpɔ Enyɔgbe Veviwo mɛ Ðeɖe.
^ Kpɔ Enyɔgbe Veviwo mɛ Ðeɖe.
^ Kpɔ Enyɔgbe Veviwo mɛ Ðeɖe.
^ Yi gɔnmɛɖeɖe tiin: “esɔ yi gbɔngbɔn jo.”
^ Alo “Wodacuku.”
^ Alo “eŋwiɖoɖo yɔdu.”
