Eŋɛnywiwema Ʒan Tɔ 2:1-25
2 Le ŋkeke amɛtɔntɔ lɔ jiɔ, woɖukɔ alɔlelezan ɖeka le Kana le Galile yí Yesu nɔlɔ can le nɔ.
2 Woyɔ Yesu koɖo yi nukplaviwo can va alɔlelezan lɔ ɖuxu.
3 Ci vɛn vɔ nɔ woɔ, Yesu nɔlɔ nu ni mɔ: “Vɛn vɔ nɔ wo.”
4 Vɔ Yesu biɔɛ se mɔ: “Nyɔnu, fini nyɔ ŋtɔ́ kan nɔ nyɛ koɖo eoɔ?* Anyi ga dexo hɔɖo o.”
5 Enɔlɔ nu nɔ mɛ ciwo yí mama vɛn mɔ: “Míwa enushianu ci anu nɔ mí.”
6 Eze gangan amadɛn ciwo wosɔ ekpe mɛ le nɔ yí Ʒuifuwo zannɔ wo yí sɔ klɔnɔ wowoɖekiwo shigbe lé wowo kɔnuwo nui do nɛ. Eze ɖeka atɛnŋ axɔ eshi enudrenu* amɛve alo amɛtɔn han.
7 Yesu nu nɔ wo mɔ: “Míku shi kɔ do eze lɔwo mɛ.” Eyi woku shi do wo mɛ yí woɖɔ weɖiweɖi.
8 Énu nɔ wo mɔ: “Míkui hɛn yi nɔ alɔlelezanjikpɔtɔ lɔ.” Eyi wokui hɛn yi ni.
9 Ci alɔlelezanjikpɔtɔ lɔ ta vɛn ci wosɔ eshi trɔ lɔ kpɔɔ, denya fini eso o (vɔ mɛ ciwo yí ku shi lɔ nya fini vɛn lɔ so), alɔlelezanjikpɔtɔ lɔ yɔ nyɔnuɖetɔ lɔ
10 yí nu ni mɔ: “Vɛn nyɔnyɔtɔ yí mɛshiamɛ ɖenɔ ti doŋkɔ yí nɔ amɛwo nu yí muɔ, wovaɖenɔ manyɔmanyɔtɔ lɔ ti. Vɔ èsɔ nyɔnyɔtɔ lɔ wla ɖɛ keke vaɖo hweyɛnu.”
11 Yesu wa enujiŋ ŋkɔtɔ cɛ le Kana le Galile yí ena kanfukanfu yitɔ ze yí yi nukplaviwo xɔɛ se.
12 Le yɛ goduɔ, yɛ koɖo nɔlɔ sɔ kpe nɔ nɔviɛwo koɖo yi nukplaviwo gbɔ va Kapɛrnawumu. Vɔ wodewa azan nɔnwi ɖe le nɔ o.
13 Ecɛyɛɔ, Ʒuifuwo Paki xweɖuɖu gogo yí Yesu yi Ʒerusalɛmu.
14 Ékpɔ mɛ ciwo yí sakɔ nyibuwo, lɛngbɔwo koɖo hwanlinwo sɔ kpe nɔ mɛ ciwo yí ɖɔkɔli ehowo yí wonɔ nyinɔnɔ do wowo ʒinkpinwo ji le gbedoxɔ lɔ mɛ.
15 Eyi ci esɔ eka gui bayɛ ɖegbɔɔ, énya mɛ lɔwo pleŋ koɖo wowo lɛngbɔwo sɔ kpe nɔ wowo nyibuwo ti le gbedoxɔ lɔ mɛ yí sɔ eho kɔŋgbe nɔ mɛ ciwo yí ɖɔkɔli ehowo yí fli wowo kplɔnwo.
16 Eyi enu nɔ mɛ ciwo yí sakɔ hwanlinwo mɔ: “Mísɔ ŋcɛwo so lɛ! Míŋgbesɔ Danyɛ xwe sɔ wa enusaxu* o!”
17 Yi nukplaviwo ɖo ŋwi enyɔ ci woŋwlɛ ɖɛ do Mawu Nyɔ lɔ mɛ mɔ: “Lé ŋlɔn ao xwe do ale shigbe ezo ci yí bibiɛ le anyi ji mɛ nɛ.”
18 Eyi taɖo Ʒuifuwo biɔɛ se mɔ: “Enujiŋ ci yí àtɛnŋ awa nɔ mì asɔ dasɛ mɔ èɖo acɛ awa enu cɛwoɔ?”
19 Yesu nu nɔ wo mɔ: “Mígban gbedoxɔ cɛ, eyi nagbetrɔ acui le ŋkeke amɛtɔn mɛ.”
20 Ʒuifu lɔwo biɔɛ se mɔ: “Exwe 46 yí wosɔ cu gbedoxɔ cɛ yí àtrɔ acui le ŋkeke amɛtɔn mɛa?”
21 Vɔ gbedoxɔ ci yí nyi yi lankpu nu exoxoɔ nuxu so.
22 Hwenu Yesu fɔn so kuɔ, yi nukplaviwo ɖo ŋwi mɔ yɛnunɔ nyɔ cɛ blaŋblaŋ yí wokando enuŋwlɛŋwlɛ lɔ koɖo enyɔ ciwo enu ji.
23 Hwenu ele Ʒerusalɛmu le Paki xweɖuɖu lɔ hwenuɔ, amɛ sugbɔ xɔɛ ji se* ci wokpɔ enujiŋ ciwo ewakɔ.
24 Vɔ Yesu yɛdekando wo ji o, ɖo éjeshi wo pleŋ ɖɛ
25 yí deʒan mɔ mɛɖe adre ŋɖe so agbetɔ nu ni o, ɖo énya ŋci yí le agbetɔ mɛ.
Gɔnmɛnuŋwlɛnŋwlɛn
^ Enyɔgbe ɖeka enyi yí danasɛ mɔ wodelɔn do ŋɖe ji o. Enyɔgbe “nyɔnu” ci ezan dedasɛ amɛmashi o.
^ Enudrenu lɔ yí nyinyiɛ Bati. Bati ɖeka axɔ lita 22 han. Kpɔ Enumɛɖeɖewo B14.
^ Alo “afisaxu;” abi “ajɔdoxu.”
^ Yi gɔnmɛɖeɖe tiin: “woxɔ yi ŋkɔ ji se.”
