Eŋɛnywiwema Ʒan Tɔ 20:1-31
20 Le ŋkeke ŋkɔtɔ ji nɔ kwɛshila lɔ, nyidin kucukucu hwenu eŋ deke vɛɔ, Mari Magdalɛnu yi yɔdu* lɔ tu. Ékpɔ yí woɖe ekpe ci wosɔ cu nu nɔ yɔdu* lɔ swi.
2 Eyi elɔ ju va Simɔ Piɛ koɖo enukplavi ɖetɔ lɔ ci Yesu lɔn gbɔ yí nu nɔ wo mɔ: “Wosɔ Axwetɔ lɔ so yɔdu lɔ mɛ yí mìdenya fini wosɔ da do o.”
3 Piɛ koɖo nukplavi ɖetɔ lɔ kpe yɔdu lɔ gbɔ.
4 Wo koɖo ve do afɔ ju mɛ, vɔ nukplavi ɖetɔ lɔ lɔ ju wu Piɛ yí ɖo yɔdu lɔ gbɔ doŋkɔ.
5 Ci ebubɔ yí glo yɔdu lɔ mɛ kpɔ ɖaɖaɔ, ékpɔ lɛnvɔn lɔwo, vɔ deɖo yɔdu lɔ mɛ o.
6 Simɔ Piɛ can le ŋgbe ni yí vaɖo, eyi eɖo yɔdu lɔ mɛ yí kpɔ lɛnvɔn lɔwo le nɔ.
7 Avɔn ci wosɔ bla eta ni can le enɔ, vɔ dele koɖo avɔn kpɛtɛwo o. Woŋwla yɛ yí sɔ da do fibu.
8 Eyi nukplavi ɖetɔ lɔ ci yí va yɔdu lɔ gbɔ doŋkɔ can ɖo yɔdu lɔ mɛ. Ci ekpɔ enu lɔwo ahan ɔ, ékando nyɔ ci wonu ni ji.
9 Ðo wodekpɔ se enuŋwlɛŋwlɛ lɔ mɛ hɔɖo mɔ yɛɖo afɔn so ku o.
10 Eyi enukplavi lɔwo trɔ yi wowo xwewo mɛ.
11 Vɔ Mari yɛkpɔtɔ le yɔdu lɔ tu yí le avin fankɔ. Hwenu ele avin lɔ fankɔɔ, ébubɔ mɔ yeaglo yɔdu lɔ mɛ kpɔ.
12 Eyi ekpɔ mawudɔla amɛve le awu ɣiwo mɛ. Ðeka le tagbe nɔ fini wosɔ Yesu mlɔ yí ɖeka le fɔde.
13 Mawudɔla lɔwo biɔɛ se mɔ: “Nyɔnu, nyi yí taɖo èle avin fankɔɔ?” Énu nɔ wo mɔ: “Wosɔ anyi Xwetɔ swi yí ŋdenya fini wosɔ da do o.”
14 Ci enu ahan ɖegbɔɔ, éɖe kɔ yí kpɔ Yesu le te le nɔ, vɔ denya mɔ Yesu yɔ o.
15 Yesu biɔɛ se mɔ: “Nyɔnu, nyi yí taɖo èle avin fankɔɔ? Mi èjijiɛ kpɔɔ?” Ébukɔ mɔ ekpajikpɔtɔ lɔ yɔ. Eyi enu ni mɔ: “Mɛgan, nɔ enyi eo yí va sɔɛɔ, nù fini èsɔ da do nɔŋ nɔ mayi sɔɛ.”
16 Yesu yɔɛ mɔ: “Mari!” Eyi etrɔ kpanŋkɔ yi yí yɔɛ le Ebregbe mɛ mɔ: “Raboni!” (ci gɔnmɛ yí nyi “Enukplamɛtɔ!”)
17 Yesu nu ni mɔ: “Ŋgbekutɔŋ ɖɛ o, ɖo ŋdeyi Eda gbɔ hɔɖo o. Vɔ yi nɔvinyɛwo gbɔ yí anu nɔ wo mɔ, ‘Ŋyikɔ Danyɛ ci yí nyi míwo Da koɖo anyi Mawu ci yí nyi míwo Mawu gbɔ.’”
18 Mari Magdalɛnu va yí nu nɔ enukplavi lɔwo mɔ: “Ŋkpɔ Axwetɔ lɔ!” Eyi egbedo Yesu ŋɛ nɔ wo.
19 Gbenɔgbe nyi ŋkeke ŋkɔtɔ nɔ kwɛshila lɔ. Fiɛfimɛɔ, enukplavi lɔwo cu hɔn do ta, ɖo wovɔnvɔn nɔ Ʒuifuwo. Yesu va yí nɔ te do dodomɛ nɔ wo yí nu mɔ: “Fafa nɔ mí.”
20 Ci enu ahan ɖegbɔɔ, édasɛ yi lɔ̀wo koɖo yi xadamɛ nɔ wo. Eyi eji jɔ enukplavi lɔwo mɔ yewokpɔ Axwetɔ lɔ.
21 Yesu gbetrɔ yí nu nɔ wo mɔ: “Fafa nɔ mí. Shigbe lé Eda dɔŋ ɖaɖa nɛɔ, nyɛ can ŋdɔdɔ mí ɖaɖa hɛnnɛ.”
22 Ci enu nyɔ cɛ ɖegbɔɔ, éɖe fufu do wo yí nu nɔ wo mɔ: “Míxɔ gbɔngbɔn kɔkɔɛ.
23 Nɔ mísɔ nuvɔnwo ke mɛɖeɔ, anyi wosɔ ki, vɔ nɔ mídesɔ nuvɔnwo ke mɛɖeɔ, anyi wodesɔ ki o.”
24 Vɔ Amɛ Wive lɔwo ɖeka ci yí tɔ mɔ Toma yí wogbeyɔɛni mɔ Togbo dele wo gbɔ hwenu Yesu va o.
25 Eyi taɖo enukplavi kpɛtɛwo nu ni mɔ: “Mìkpɔ Axwetɔ lɔ!” Vɔ énu nɔ wo mɔ: “Nɔ ŋdekpɔ gaswi lɔwo tɔxu le alɔ̀wo mɛ ni yí sɔ anyi lɔ̀vi do gaswi lɔwo tɔxu yí gbesɔ anyi lɔ̀ do axadamɛ niɔ, ŋdakando ji gbeɖe o.”
26 Vɔ le ŋkeke amɛnyi goduɔ, enukplavi lɔwo gbeva bɔ do axwe ɖeka mɛ yí Toma le wo mɛ. Ci ehɔn lɔwo le glagla can ɔ, Yesu va yí nɔ te do dodomɛ nɔ wo yí nu mɔ: “Fafa nɔ mí.”
27 Yi goduɔ, énu nɔ Toma mɔ: “Sɔ̀ ao lɔ̀vi do elɛ, kpɔ̀ anyi lɔ̀wo yí asɔ ao lɔ̀ do axadamɛ nɔŋ yí ami enu xoxo kpɔ keŋ akando ji.”
28 Eyi Toma nu mɔ: “Anyi Xwetɔ koɖo anyi Mawu!”
29 Yesu nu ni mɔ: “Ci èkpɔŋ taɖo èkando jia? Mɛ ciwo yí dekpɔ gan yí kando ji akpɔ jijɔ.”
30 Le nyɔnɔnwi mɛɔ, Yesu gbewa enujiŋ sugbɔ buwo le ŋmɛ nɔ yi nukplaviwo yí wodeŋwlɛ wo do wemaŋwlaŋwla cɛ mɛ o.
31 Vɔ woŋwlɛ ŋcɛwo ɖɛ nɔ míakando ji mɔ Yesu yí nyi Kristo, Mawu Vi lɔ yí ci míkando jiɔ, míakpɔ agbe to yi ŋkɔ ji.
