Eŋɛnywiwema Ʒan Tɔ 21:1-25
21 Le ŋcɛwo goduɔ, Yesu gbedasɛ yiɖeki nɔ enukplavi lɔwo le Tiberiadi Xu tu. Lé edasɛ yiɖeki do nɔ wo ke:
2 Simɔ Piɛ, Toma (ci wogbeyɔnɔ mɔ Togbo), Natanaɛli ci yí so Kana le Galile, Zebede viwo koɖo yi nukplavi amɛve buwo yí le ju.
3 Simɔ Piɛ nu nɔ wo mɔ: “Nayi le kpavi.” Wonu ni mɔ: “Mìayi koɖo eo.” Eyi woɖo tɔjihun mɛ. Vɔ le ezan lɔ pleŋ mɛɔ, wodele ŋɖe o.
4 Fɔnfɔnmɛɔ, Yesu va nɔ te le axu lɔ tu, vɔ enukplavi lɔwo denya mɔ Yesu yɔ o.
5 Eyi Yesu biɔ wo se mɔ: “Ðeviɛwo, ŋɖe* le mí shi míaɖua?” Woɖo ŋci mɔ: “Oo!”
6 Yesu nu nɔ wo mɔ: “Mída ɖɔ̀ lɔ do ɖushi kpaxwe nɔ tɔjihun lɔ yí akpɔ kpavi alé.” Eyi woda ɖɔ̀ lɔ, vɔ wodesun ji yí duin o. Ðo kpavi sugbɔ le eɖɔ̀ lɔ mɛ kpiŋ.
7 Eyi enukplavi ci Yesu lɔn nu nɔ Piɛ mɔ: “Axwetɔ yɔ!” Ci Simɔ Piɛ se ahan ɔ, ésɔ awu jitɔ yitɔ do. Ðo dedo enu agbu ɖe o,* eyi ezo je etɔ lɔ mɛ.
8 Vɔ enukplavi kpɛtɛwo le tɔjihun hwɛhwɛ lɔ mɛ yí dɔndɔn eɖɔ̀ ci kpaviwo ɖɔ lɔ, ɖo wodejinjin do agoji o, wole mɛta 90 han do agoji.
9 Ci woɖyi va agojiɔ, wokpɔ kpavi le akanzo ji yí kpɔnnɔ le gbɔ.
10 Yesu nu nɔ wo mɔ: “Mísɔ ɖowo le kpavi ciwo míle yɛ mɛ vɛ.”
11 Eyi Simɔ Piɛ yi tɔjihun lɔ mɛ yí dɔn eɖɔ̀ lɔ va agoji. Kpavi gangan 153 yí le mɛ. Ci kpavi lɔwo sugbɔ can ɔ, eɖɔ̀ lɔ dedrɛn o.
12 Yesu nu nɔ wo mɔ: “Míva ɖu nu.” Vɔ mɛɖe degbe dɔn le enukplavi lɔwo mɛ yí biɔɛ se mɔ mi enyi ma o. Ðo wonya mɔ Axwetɔ lɔ yɔ.
13 Yesu sɔ kpɔnnɔ lɔ nɔ wo yí gbesɔ kpavi lɔ can nɔ wo.
14 Zetɔntɔ lɔ ke yí Yesu dadasɛ yiɖeki nɔ enukplavi lɔwo so hwenu efɔn so ku.
15 Ci woɖu nu lɔ ɖegbɔɔ, Yesu biɔ Simɔ Piɛ se mɔ: “Simɔ, Ʒan eviɛ, èlɔnŋ wu ŋcɛwoa?” Éɖo ŋci ni mɔ: “Ɛɛ, Axwetɔ, ènya mɔ ŋlɔn eo.” Yesu nu ni mɔ: “Nà ŋɖuɖu anyi lɛngbɔviwo.”
16 Yesu gbebiɔɛ se zevetɔ lɔ mɔ: “Simɔ, Ʒan eviɛ, èlɔnŋ a?” Éɖo ŋci ni mɔ: “Ɛɛ, Axwetɔ, ènya mɔ ŋlɔn eo.” Yesu nu ni mɔ: “Kplɔ̀ anyi lɛngbɔ hwɛhwɛwo.”
17 Yesu gbebiɔɛ se zetɔntɔ lɔ mɔ: “Simɔ, Ʒan eviɛ, èlɔnŋ a?” Éwa ɖeka nɔ Piɛ mɔ Yesu gbebiɔɛ se zetɔntɔ lɔ mɔ: “Èlɔnŋ a?” Eyi taɖo enu ni mɔ: “Axwetɔ, ènya enushianu, ènya mɔ ŋlɔn eo.” Yesu nu ni mɔ: “Nà ŋɖuɖu anyi lɛngbɔ hwɛhwɛwo.
18 Nyɔnɔnwi teŋ yí ŋnukɔ nɔ eo mɔ hwenu ènyi ɖajɛviɔ, eoŋtɔ donɔ nuwo yí yinɔ fini yí dro eo. Vɔ nɔ èvaku nyɔxoɔ, àvlu ao lɔ̀wo yí mɛbuwo ado nuwo nɔ eo keŋ akplɔ eo yi fini yí dedro eo o.”
19 Énukɔ ahan yí sɔ dre eku ci aku yí asɔ kanfu Mawu. Ci enu ahan ɖegbɔɔ, énu ni mɔ: “Kpɔ̀tɔ akplɔnɔ ŋdo.”
20 Piɛ trɔ yí kpɔ enukplavi ci Yesu lɔn yí ekplɔ wo do. Enukplavi cɛ yí go ɖaɖa akɔnnu nɔ Yesu hwenu woɖukɔ fiɛfi ŋɖuɖu yí biɔɛ se mɔ: “Axwetɔ, mi yí jikɔ asa eoɔ?”
21 Ci Piɛ trɔ yí kpɔɛɔ, ébiɔ Yesu se mɔ: “Axwetɔ, vɔ mɛ cɛ yɛ ɖe?”
22 Yesu nu ni mɔ: “Nɔ anyi dro enyi mɔ ákpɔtɔ ani keke nava ɖe, fini ekan nɔ eoɔ? Eɔ le kpɔtɔ akplɔnɔ ŋdo.”
23 Eyi enyɔ lɔ gban do enukplavi lɔwo mɛ mɔ enukplavi cɛ daku o. Vɔ Yesu denu ni mɔ yɛdaku o, nu enukɔ mɔ: “Nɔ anyi dro enyi mɔ ákpɔtɔ ani keke nava ɖe, fini ekan nɔ eoɔ?”
24 Enukplavi cɛ lɔ yí ɖe kunu so ŋcɛwo nu yí gbeŋwlɛ wo yí mìnya mɔ yi kunuɖeɖe nyi nyɔnɔnwi.
25 Le nyɔnɔnwi mɛɔ, enu sugbɔ buwo gbeli yí Yesu wa yí nɔ womɔ woaŋwlɛ wo pleŋ ɔ, ŋdekando ji mɔ wema ciwo woaŋwlɛ akpɔ texwe le xexe lɔ mɛ o.
