Eŋɛnywiwema Ʒan Tɔ 3:1-36
3 Ŋsu ɖeka le Farizitɔwo mɛ yí tɔ mɔ Nikodɛmu, ényi Ʒuifuwo ga ɖeka.
2 Ŋsu cɛ va Yesu gbɔ le zanmɛ yí nu ni mɔ: “Rabi, mìnya mɔ Mawu gbɔ èso yí nyi enukplamɛtɔ, ɖo mɛɖe dasɛnŋ awa enujiŋ ciwo èwakɔ nɔ Mawu dele koɖi o.”
3 Yesu nu do nu ni mɔ: “Nyɔnɔnwi teŋ yí ŋnukɔ nɔ eo mɔ nɔ wodetrɔ yí ji mɛɖeɔ,* datɛnŋ akpɔ Mawu Fyɔɖuxu lɔ o.”
4 Nikodɛmu biɔɛ se mɔ: “Lé woatrɔ aji mɛɖe ci yí nyi mɛganxoxu doɔ? Alo átɛnŋ aɖo nɔlɔ xomɛ yí woaji zevetɔa?”
5 Yesu ɖo ŋci mɔ: “Nyɔnɔnwi teŋ yí ŋnukɔ nɔ eo mɔ nɔ wodesɔ eshi koɖo gbɔngbɔn ji mɛɖeɔ, dasɛnŋ aɖo Mawu Fyɔɖuxu lɔ mɛ o.
6 Enu ci woji so gbaza mɛ nyi gbaza yí enu ci woji so gbɔngbɔn mɛ nyi gbɔngbɔn.
7 Ŋgbekpaca eo ci ŋnu nɔ eo mɔ: Woɖo atrɔ agbeji mí o.
8 Aya xonɔ yi fini yí drui yí èsenɔ egbe yitɔ vɔ dènya fini eso koɖo fini eyikɔ o. Ahan ele nɔ mɛɖekpokpui ci wosɔ gbɔngbɔn ji nɛ.”
9 Nikodɛmu biɔɛ se mɔ: “Lé enu cɛwo atɛnŋ ajɔ doɔ?”
10 Yesu nu do nu mɔ: “Ènyi enukplamɛtɔ nɔ Izraɛli gan yí dènya enu cɛwoa?
11 Nyɔnɔnwi teŋ yí ŋnukɔ nɔ eo mɔ enyɔ ci mìnyaɔ, mìnuini yí ŋci mìkpɔɔ, mìɖenɔ kunu so nu, vɔ mídelɔnnɔ do kunu ci mìɖe ji o.
12 Nɔ ŋxo nuxu nɔ mí so nyigban ji nuwo nu yí mídekando ji ɖe, lé míawɛ akando ji nɔ ŋxo nuxu nɔ mí so jeŋkwi mɛ nuwo nuɔ?
13 Ahanke mɛɖe deyi jeŋkwi mɛ kpɔ o, vɔ mɛ ci yí ɖyi so jeŋkwi mɛ yí nyi Agbetɔvi lɔ.
14 Shigbe lé Moizi kɔ edan do eji le zogbeji nɛɔ, ahanke woɖo akɔ Agbetɔvi lɔ do eji nɛ,
15 keŋ nɔ mɛɖekpokpui ci yí axɔɛ ji se akpɔ agbe mavɔ.
16 “Ðo Mawu lɔn xexe lɔ sugbɔ keke sɔ Eviɛ akogo lɔ na keŋ nɔ mɛɖekpokpui ci yí xɔɛ ji se dagu o, vɔ ákpɔ agbe mavɔ.
17 Mawu dedɔ Eviɛ ɖaɖa xexe lɔ mɛ nɔ aɖo kojo nɔ xexe lɔ o, vɔ nɔ ahwlɛn xexe lɔ gan to ji.
18 Wodaɖo kojo nɔ mɛɖekpokpui ci yí axɔɛ ji se o. Mɛɖekpokpui ci yí daxɔɛ seɔ, woɖo kojo ni xoxo. Ðo dexɔ Mawu Vi akogo lɔ ŋkɔ ji se o.
19 Klɛnklɛn lɔ va xexe lɔ mɛ, vɔ agbetɔwo lɔn vinvin sɔwu klɛnklɛn lɔ. Ðo wowo dɔwawawo nyina. Eyi taɖo woado hwɛ wo.
20 Mɛɖekpokpui ci yí wanɔ enubaɖawoɔ, delɔnnɔ klɛnklɛn lɔ o yí devanɔ klɛnklɛn lɔ gbɔ nɔ yi nuwanawo aze o.
21 Vɔ mɛɖekpokpui ci yí wanɔ enujɔjɔɛ vanɔ klɛnklɛn lɔ mɛ nɔ yi nuwanawo aze mɔ wosɔgbe koɖo Mawu dro.”
22 Yi goduɔ, Yesu koɖo yi nukplaviwo yi Ʒude kɔxwiwo mɛ yí nɔ hunnɔ hwɛɖeka yí ʒinkɔ amɛwo do shi mɛ.
23 Vɔ Ʒan can ʒinkɔ amɛwo do shi mɛ le Ayinɔnu ci yí sɔ Salimu gbɔ, ɖo eshi sugbɔ le nɔ yí amɛwo kpɔtɔ vakɔ gbɔ yí eʒinkɔ wo do eshi mɛ.
24 Wodelé Ʒan do gakpa mɛ hwenɔnu o.
25 Ʒan nukplaviwo dɔn nyɔ koɖo Ʒuifu ɖeka so lé woamɛ́ le ŋmɛ nɔ Mawu do nu.
26 Eyi taɖo woyi Ʒan gbɔ yí nu ni mɔ: “Rabi, ŋsu ci nu èɖe kunu so yí eo koɖo yɛ le Ʒurdɛn godu ʒinkɔ amɛwo do eshi mɛ yí amɛwo pleŋ yikɔ gbɔ.”
27 Ʒan nu do nu mɔ: “Mɛɖe datɛnŋ axɔ ŋɖe nɔ wodeni so jeŋkwi mɛ o.
28 Míwoŋtɔwo míle nɔtɔxu gbɔxwe ŋnu mɔ, ‘De enyɛ yí nyi Kristo lɔ o, vɔ wodɔŋ ɖaɖa nɔ maje ŋkɔ ni.’
29 Mɛ ci yí ɖe nyɔnu tɔ yí nyɔnu yoyu nyinɔ. Vɔ nɔ mɛ ci yí ɖe nyɔnu lɔ xlɔ le axa ni yí se exoxoɔ nuxuɔ, eji jɔɛni sugbɔ. Ahanke eji jɔjɔ nyɛ can sugbɔ nɛ.
30 Yɛɖo ayikɔ ŋkɔ, vɔ nyɛŋɖo ayikɔ godu.”
31 Mɛ ci yí so jeŋkwi mɛ le ta nɔ amɛwo pleŋ. Mɛ ci yí so nyigban ji xonɔ nuxu so nyigban ji nuwo nu, ɖo nyigban ji eso. Mɛ ci yí so jeŋkwi mɛ le ta nɔ amɛwo pleŋ.
32 Éɖe kunu so enu ciwo ekpɔ koɖo nyɔ ciwo ese nu, vɔ mɛɖe delɔn do yi nyɔwo ji o.
33 Mɛɖekpokpui ci yí lɔn do yi kunuɖeɖe ji dasɛ* mɔ Mawu nyi nyɔnɔnwitotɔ.
34 Eyi mɛ ci Mawu dɔ ɖaɖa nunɔ Mawu nyɔwo, ɖo Mawu nanɔ yi gbɔngbɔn lɔ faa.*
35 Eda lɔn Evi lɔ yí sɔ enuwo pleŋ do alɔ̀ mɛ ni.
36 Mɛ ci yí xɔ Evi lɔ ji se akpɔ agbe mavɔ; mɛ ci yí dese tonu nɔ Evi lɔ dakpɔ agbe o, vɔ Mawu akpɔtɔ adodoɔ dɔmɛzi di.
Gɔnmɛnuŋwlɛnŋwlɛn
^ Alo taŋfuin, “nɔ wodetrɔ yí ji mɛɖe so jeŋkwi mɛɔ,”
^ Yi gɔnmɛɖeɖe tiin: “ɖo kpe yi ji.”
^ Alo “dedrini kpɔ gbɔxwe yí nini o.”
