Eŋɛnywiwema Ʒan Tɔ 4:1-54
4 Axwetɔ lɔ vanya mɔ Farizitɔwo se mɔ yeɖokɔ enukplaviwo yí gbeʒinkɔ amɛwo do shi mɛ sɔwu Ʒan.
2 Vɔ denyi Yesu ŋtɔ yí ʒinkɔ amɛwo do eshi mɛ o, yi nukplaviwo yɔ.
3 Ci Yesu se ahan ɔ, éso le Ʒude yí gbetrɔ yi Galile.
4 Vɔ ele veviɖe ni mɔ áto Samari.
5 Eyi evaɖo Samari ju ɖeka ci woyɔnɔ mɔ Sisha mɛ. Eju cɛ gogo nyigban ci Ʒakɔbu sɔ na eviɛ Ʒozɛfu.
6 Ʒakɔbu dotɔ le nɔ. Ci Yesu zɔn mɔ yí enu cikɔ niɔ, énɔ nyinɔnɔ do dotɔ lɔ tu. Gawive* han yí xoxoɔ.
7 Nyɔnu Samaritɔ ɖeka va eshi kugbe, Yesu nu ni mɔ: “Nà eshiŋ manu.”
8 (Yi nukplaviwo yi ŋɖuɖu xwlegbe le eju lɔ mɛ.)
9 Eyi nyɔnu Samaritɔ lɔ biɔɛ se mɔ: “Lé eo ci yí nyi Ʒuifu abiɔ eshi enyɛ Samaritɔ doɔ?” (Ðo Ʒuifuwo koɖo Samaritɔwo denyinɔ o.)
10 Yesu ɖo ŋci ni mɔ: “Nɔ èjeshi enu ci Mawu nanɔ amɛ faa koɖo mɛ ci yí nu nɔ eo mɔ, ‘Nà eshiŋ manuɔ,’ eo taŋ yí abiɔɛ yí ana agbeshi eo.”
11 Énu ni mɔ: “Mɛgan, tɔka dele eo shi kpetii yí asɔ ku eshi lɔ o yí dotɔ lɔ cito. Fini àkpɔ agbeshi lɔ le anaŋ ɔ?
12 Èwugan mìwo tɔgbi Ʒakɔbu ci yí ɖe dotɔ cɛ nɔ mì yí yɛ koɖo eviɛwo koɖo yi lankuwo nu yi shia?”
13 Yesu nu do nu ni mɔ: “Mɛɖekpokpui ci yí anu eshi cɛɔ, shikɔ agbeci ke.
14 Mɛɖekpokpui ci yí anu eshi ci naniɔ, shikɔ dagbeci gbeɖe o, vɔ eshi ci nani lɔ avatrɔ eshi ci yí ajikɔ le mɛ keke ana agbe mavɔ yi.”
15 Eyi nyɔnu lɔ nu ni mɔ: “Mɛgan, na eshi ŋtɔ́ lɔŋ nɔ shikɔ ŋgbeciŋ alo nyɛŋgbevava lɛ yí avakukɔ eshi ke o.”
16 Yesu nu ni mɔ: “Yi yɔ asuo vɛ.”
17 Nyɔnu lɔ nu do nu mɔ: “Ŋɖo asu go.” Yesu nu ni mɔ: “Ao nyɔ jɔ ci èmɔ, ‘yedeɖo asu o.’
18 Ðo asu amatɔn yí èɖe kpɔ yí ŋsu ci gbɔ èle yɛ denyi asuo o. Èto nyɔnɔnwi.”
19 Nyɔnu lɔ nu ni mɔ: “Mɛgan, ŋkpɔ mɔ enyɔnuɖɛtɔ ènyi.
20 Eto cɛ ji yí mìwo tɔgbiwo sɛn Mawu le, vɔ míwo nunɔ mɔ Ʒerusalɛmu yí woɖo asɛn Mawu le.”
21 Yesu nu ni mɔ: “Nyɔnu, kando ŋji, gaxoxo lɔ gbɔgbɔ yí dagbenyi eto cɛ ji alo Ʒerusalɛmu yí míasɛn Mawu le o.
22 Míwo sɛnkɔ ŋci mídejeshi ɖɛ o, mìwo sɛnkɔ ŋci mìjeshi ɖɛ, ɖo Ʒuifuwo ji yí hwlɛngan lɔ tɔ so.
23 Vɔ gaxoxo lɔ gbɔgbɔ yí evaɖo hɛnnɛ vɔ yí Mawu sɛntɔ adodwiwo asɛn Mawu le gbɔngbɔn koɖo nyɔnɔnwi mɛ, ɖo mɛ ŋtɔ́ hanwo yí Mawu jijiɛ mɔ wo le sɛn ye nɛ.
24 Mawu nyi gbɔngbɔn yí mɛ ciwo yí sinkɔ ɖo asin le gbɔngbɔn koɖo nyɔnɔnwi mɛ.”
25 Nyɔnu lɔ nu ni mɔ: “Ŋnya mɔ Mɛsia ci woyɔnɔ mɔ Kristo lɔ gbɔgbɔ yí nɔ évaɖoɔ, ánu enyɔwo pleŋ nɔ mì gbajɛɛ.”
26 Yesu nu ni mɔ: “Enyɛ ci yí xokɔ nuxu nɔ eo yí nyi Mɛsia* lɔ.”
27 Le gaxoxo ŋtɔ́ mɛɔ, yi nukplaviwo gbɔ. Eyi ekpaca wo mɔ éxokɔ nuxu koɖo nyɔnu. Vɔ mɛɖe debiɔɛ se mɔ: “Nyi èjijiɛɔ?” alo “Nyi yí taɖo èxoxoɔ nuxu koɖiɔ?”
28 Eyi nyɔnu lɔ tashi eshize yitɔ lɔ ɖɛ yí yi eju lɔ mɛ yí nu nɔ amɛwo mɔ:
29 “Míva kpɔ ŋsu ɖeka ɖa, énu ŋciwo pleŋ ŋwa kpɔ nɔŋ. De eyi anyi Kristo lɔ ba?”
30 Eyi woso le eju lɔ mɛ yí va Yesu gbɔ.
31 Hwenɔnuɔ, yi nukplaviwo ɖeɖeɛ kuku ni yí nukɔ mɔ: “Rabi, ɖu nu.”
32 Gan énu nɔ wo mɔ: “Ŋɖuɖu le ŋshi yí naɖu, vɔ míwo denya ŋci yɔ o.”
33 Eyi enukplavi lɔwo biɔ wowonɔnɔwo se mɔ: “Alo mɛɖe hɛn ŋɖuɖu vɛ ni yɔa?”
34 Yesu nu nɔ wo mɔ: “Anyi ŋɖuɖu yí nyi mɔ mawa edro mɛ ci yí dɔŋ ɖaɖa tɔ yí aɖegbɔ yi dɔ.
35 Mídenukɔ mɔ wleci amɛnɛ yí kpɔtɔ nɔ jinukuɖeɖe ba? Míkpɔ ɖa! Ŋnukɔ nɔ mí mɔ: Mífɔn eta yi ji yí aglo ebo lɔwo kpɔ. Jinuku lɔwo xu yí woaɖe.
36 Jinukuɖetɔ lɔ xɔxɔ yi fɛncu vɔ yí bɔbɔ jinuku ɖɛ nɔ agbe mavɔ lɔ keŋ nɔ jinukudotɔ koɖo jinukuɖetɔ lɔ abɔ akpɔ jijɔ doju.
37 Ðo elo cɛ nyi nyɔnɔnwi le enyɔ cɛ mɛ: Mɛɖe yí donɔ yí mɛbu vaɖini.
38 Ŋɖo mí ɖaɖa nɔ míaɖe jinuku ciwo mídedo gbla nɔ o. Mɛbuwo yí wa dɔ yí mívaɖuɖuɔ ele nɔ edɔ ci wowo wa.”
39 Samaritɔ sugbɔ ciwo yí so eju lɔ mɛ xɔ Yesu ji se, ɖo nyɔnu lɔ ɖe kunu so nu yí mɔ: “Énu ŋciwo pleŋ ŋwa kpɔ nɔŋ.”
40 Eyi ci Samaritɔ lɔwo va Yesu gbɔɔ, wonu ni mɔ yɛ le nɔ yewo gbɔ yí enɔ hunnɔ yí wa ŋkeke amɛve.
41 Ecɛ na yí amɛ sugbɔ buwo xɔɛ ji se ci wose enyɔ ciwo yí enu.
42 Eyi wonu nɔ nyɔnu lɔ mɔ: “Denyi nyɔ ci ènu nɔ mì ɖekɛ yí dɔ mìxɔ se o, ɖo mìwoŋtɔwo si hɛnnɛ yí nya mɔ ŋsu cɛ yí nyi hwlɛngantɔ nɔ xexe lɔ nyao.”
43 Le ŋkeke amɛve lɔwo goduɔ, Yesu so le nɔ yí kpe Galile.
44 Vɔ Yesu ŋtɔ ɖe kunu mɔ, wodebunɔ enyɔnuɖɛtɔ le yiŋtɔ ju mɛ o.
45 Ci evaɖo Galile ɔ, Galiletɔwo xɔɛ nywiɖe, ɖo wokpɔ enu ciwo pleŋ ewa le Ʒerusalɛmu le azanɖuɖu lɔ hwenu, ɖo wowo can yi azanɖuxu lɔ hɛnnɛ.
46 Yɛ goduɔ, égbeva Kana le Galile, fini esɔ eshi sɔ trɔ vɛn le. Ecɛyɛɔ, ŋsu ɖeka ci yí wanɔ dɔ le efyɔ xomɛ vi ŋsuvi ble le Kapɛrnawumu.
47 Ci ŋsu cɛ se mɔ Yesu so le Ʒude yí va Galile ɔ, éyi gbɔ yí ɖe kuku ni mɔ yi le va da edɔ̀ nɔ ye viye ŋsuvi, ɖo éle kudunu.
48 Vɔ Yesu nu ni mɔ: “Nɔ mídekpɔ enujiŋ hamɛhamɛwoɔ, mídaxɔ se gbeɖe o.”
49 Ŋsu ci yí wanɔ edɔ le efyɔ xomɛ lɔ nu ni mɔ: “Axwetɔ, va kaba nɔ vinyɛ ŋgbeku o.”
50 Yesu nu ni mɔ: “So yi, evio le agbe.” Ŋsu lɔ kando enyɔ ci Yesu nu ni ji yí so ɖedo.
51 Vɔ ci ele emɔ ji yikɔɔ, yi dɔwaviwo va do go yi yí nu ni mɔ, eviɛ lɔ le agbe.*
52 Eyi ebiɔ wo se mɔ ga nɛni mɛ yí edɔ̀ lɔ mi ni ma. Woɖo ŋci ni mɔ: “Vuvɔfu lɔ mi ni esɔ nyidɔnmɛ gaɖeka han.”*
53 Eyi vida lɔ kpɔ mɔ gaxoxo ŋtɔ́ mɛ pɛpɛpɛ yí Yesu nu mɔ: “Evio le agbe.” Eyi taɖo yɛ koɖo yi xomɛtɔwo pleŋ trɔ xɔsetɔwo.
54 Ecɛ yí nyi enujiŋ amɛvetɔ ci Yesu wa hwenu eso le Ʒude vayi Galile.
Gɔnmɛnuŋwlɛnŋwlɛn
^ Yi gɔnmɛɖeɖe tiin: “gaxoxo amadɛntɔ.”
^ Yi g̱ɔnmɛɖeɖe tiin: “Enyɛ yɔ.”
^ Alo “edɔ̀ lɔ mi ni.”
^ Yi gɔnmɛɖeɖe tiin: “gaxoxo amadrɛtɔ lɔ ji.”
