Eŋɛnywiwema Ʒan Tɔ 5:1-47
5 Yi goduɔ, Ʒuifuwo zanɖuɖu ɖeka ɖo yí Yesu yi Ʒerusalɛmu.
2 Eshidu ɖeka le Ʒerusalɛmu le axa nɔ Lɛngbɔwo Gbo yí woyɔɛni le Ebregbe mɛ mɔ Bɛtizata yí wosɔ xɔdomɛkpewo so texwe lɔ do amatɔn.
3 Dɔ̀nɔwo, ŋkuvitɔnnɔwo, ebutɔntɔwo koɖo mɛ ciwo alɔ̀ alo afɔ ku nɔ* sugbɔ yí mlɔ nɔtɔxu.
4 * ——
5 Vɔ ŋsu ɖeka le enɔ yí ble so exwe 38 ke.
6 Ci Yesu kpɔ ŋsu lɔ le nyimlɔxu yí nya mɔ yɛble ejinjin ɔ, ébiɔɛ se mɔ: “Èji mɔ edɔ̀ lɔ le mi nɔ yea?”
7 Ŋsu dɔ̀nɔ lɔ ɖo ŋci ni mɔ: “Mɛgan, ŋdeɖo mɛɖe ci yí akɔŋ do eshidu lɔ mɛ nɔ eshi lɔ blu o. Keke naso amɔ naɖo mɛɔ, mɛbu ɖonɔ mɛ doŋkɔ nɔŋ.”
8 Yesu nu ni mɔ: “Sò je te, sɔ̀ ao ba yí azɔn zɔnlin.”
9 Edɔ̀ mi nɔ ŋsu lɔ zeɖeka yí esɔ yi ba yí tɔ zɔnlin zɔnzɔn.
Sabatigbe yí nyi gbenɔgbe lɔ.
10 Eyi Ʒuifuwo tɔ nunu nɔ ŋsu ci woda dɔ̀ nɔ lɔ mɔ: “Sabatigbe yɔ yí ese dena gbe mɔ àsɔ ao ba o.”
11 Vɔ énu do nu nɔ wo mɔ: “Mɛ ci yí da dɔ̀ nɔŋ lɔ yí nu nɔŋ mɔ, ‘Sɔ̀ ao ba yí azɔn zɔnlin.’”
12 Wobiɔɛ se mɔ: “Mi yí nyi ŋsu ci yí nu nɔ eo mɔ, ‘Sɔ̀ɛ yí azɔn zɔnlin’ ɔ?”
13 Vɔ ŋsu ci edɔ̀ mi nɔ lɔ denya mɛ ci yɔ o, ɖo Yesu bu do amɛwo mɛ le nɔ lɔ.
14 Yi goduɔ, Yesu kpɔɛ le gbedoxɔ lɔ mɛ yí nu ni mɔ: “Kpɔ ɖa, edɔ̀ mi nɔ eo. Ŋgbewa nuvɔn ke o, nɔ ci yí nyina sɔwu ŋtɔ́ ŋgbevajɔ do eo ji o.”
15 Ŋsu lɔ yi nu nɔ Ʒuifu lɔwo mɔ Yesu yí da dɔ̀ nɔ ye.
16 Eyi taɖo Ʒuifuwo tɔ yumɛ cici nɔ Yesu, ɖo éwa ŋcɛwo le Sabatigbe.
17 Vɔ énu do nu nɔ wo mɔ: “Danyɛ kpɔtɔ le edɔ wakɔ keke vaɖo evyɛ yí nyɛ can ŋkpɔtɔ le edɔ wakɔ.”
18 Eyi dɔ yí Ʒuifuwo gbeji veviɖe doji mɔ yewoawui, ɖo égban Sabati se lɔ yí gbeyɔ Mawu mɔ ye Daye yí sɔ yiɖeki sɔ koɖo Mawu.
19 Eyi taɖo Yesu nu nɔ wo mɔ: “Nyɔnɔnwi teŋ yí ŋnukɔ nɔ mí mɔ, Evi lɔ datɛnŋ awa enu kuɖeka kpetii le yiŋtɔ dro mɛ o, vɔ enu ci ekpɔ yí Eda wakɔ ɖekɛ yí ewanɔ. Ðo enu ciwo pleŋ yí Eda wanɔɔ, enu ŋtɔ́wo yí Evi lɔ can wanɔ pɛpɛpɛ nɛ.
20 Eda lɔ lɔn Evi lɔ yí danasɛ enu ciwo pleŋ yiŋtɔ wanɔ ni yí agbedasɛ edɔ ciwo yí wugan cɛwo ni nɔ akpaca míwoŋtɔwo.
21 Ðo shigbe lé Eda fɔnnɔ amɛkukuwo yí nanɔ agbe wo nɛɔ, ahanke Evi lɔ can nanɔ agbe mɛɖekpokpui ci yí drui nɛ.
22 Eda deɖonɔ kojo nɔ mɛɖe o, vɔ ésɔ kojoɖoɖo lɔ pleŋ jo nɔ Evi lɔ,
23 keŋ nɔ mɛshiamɛ abu Evi lɔ shigbe lé wobunɔ Eda lɔ nɛ. Mɛɖekpokpui ci yí debu Evi lɔɔ, debu Eda ci yí dɔɛ ɖaɖa hɛnnɛ o.
24 Nyɔnɔnwi teŋ yí ŋnukɔ nɔ mí mɔ, mɛɖekpokpui ci yí seseɛ anyi nyɔwo yí kando mɛ ci yí dɔŋ ɖaɖa ji akpɔ agbe mavɔ yí wodaɖo kojo ni o, vɔ éfɔn so eku va agbe mɛ.
25 “Nyɔnɔnwi teŋ yí ŋnukɔ nɔ mí mɔ, gaxoxo lɔ gbɔgbɔ yí evaɖo vɔ yí amɛkukuwo ase Mawu Vi lɔ gbe. Eyi mɛ ciwo yí se tonu anɔ agbe.
26 Ðo shigbe lé agbe le Eda lɔ ŋtɔ* mɛ hannɛɔ, ahanke ena yí agbe le Evi lɔ ŋtɔ mɛ hɛnnɛ nɛ.
27 Eyi ena acɛ yi nɔ aɖo kojo, ɖo eyi nyi Agbetɔvi lɔ.
28 Ecɛ ŋgbekpaca mí o, ɖo gaxoxo lɔ gbɔgbɔ yí mɛ ciwo pleŋ yí le eŋwiɖoɖo yɔduwo mɛ ase yi gbe
29 yí ato. Mɛ ciwo yí wa enunywiwo afɔn so ku yí anɔ agbe yí mɛ ciwo yí wa enuvwinwo afɔn so ku yí woaɖo kojo nɔ wo.
30 Ŋdatɛnŋ awa enu kuɖeka kpetii le nyɛŋtɔ dro mɛ o, enyɔ ci Danyɛ nu nɔŋ ji ŋzɔnnɔ do yí sɔ ɖonɔ kojo nɔ amɛwo. Ŋɖonɔ kojo jɔjɔɛ nɔ wo, ɖo ŋdewakɔ nyɛŋtɔ dro o, vɔ Eda ci yí dɔŋ ɖaɖa dro wakɔ ŋle.
31 “Nɔ enyi nyɛɖekɛ yí ɖekɔ kunu so nyɛŋtɔ nu saɔ, anyi kunuɖeɖe anyitɔ denyi nyɔnɔnwi o.
32 Mɛbu li yí ɖeɖeɛ kunu so ŋnu yí ŋnya mɔ kunu ci eɖekɔ so ŋnu nyi nyɔnɔnwi.
33 Mídɔ amɛwo ɖaɖa Ʒan gbɔ yí eɖe kunu so nyɔnɔnwi lɔ nu.
34 Gan ŋdeʒan kunuɖeɖe so agbetɔ gbɔ o, vɔ ŋnukɔ nyɔ cɛwo nɔ míakpɔ hwlɛngan.
35 Ʒan le shigbe kaɖigban ci yí jejeɛ yí klɛnklɛn nɛ yí míji mɔ yewoakpɔ jijɔ sugbɔ le klɛnklɛn yitɔ lɔ mɛ na nɔ hwenu kleŋ ɖe.
36 Ʒan nu nɔ amɛwo mɔ, Eda yí dɔŋ ɖaɖa, vɔ ŋɖo kpeɖoji ci yí gangan wu ŋtɔ́ yí dasɛ mɔ Eda yí dɔŋ ɖaɖa: Eyi nyi edɔ ciwo edɔŋ yí ŋwakɔ.
37 Eda ci yí dɔŋ ɖaɖa ŋtɔ ɖe kunu so ŋnu hɛnnɛ. Mídese yi gbemɛ kpɔ o yí mídekpɔɛ kpɔ hɛnnɛ o.
38 Mídexɔ mɛ ci edɔ ɖaɖa ji se o, eyi taɖo yi nyɔ deɖo ji mɛ nɔ mí o.
39 “Míkplakpla Enuŋwlɛŋwlɛ lɔwo kitokito, ɖo míbubuɔ mɔ wowo ji yewoato yí akpɔ agbe mavɔ. Vɔ wowo taŋtaŋ yí ɖeɖeɛ kunu so ŋnu.
40 Ele ahan gan, mídeji mɔ yewoava ŋgbɔ keŋ akpɔ agbe o.
41 Ŋdexɔnɔ kanfukanfu ci yí sonɔ agbetɔwo gbɔ o,
42 vɔ ŋnya nywiɖe mɔ lɔnlɔn Mawu tɔ dele ji mɛ nɔ mí o.
43 Ŋva le Danyɛ ŋkɔ mɛ gan mídexɔŋ o. Nɔ mɛbuɖe va le yiŋtɔ ŋkɔ mɛɔ, míaxɔ yɛ.
44 Lé míawɛ axɔ se ci enyi míwonɔnɔwo gbɔ míxɔkɔ kanfukanfu so yí mídejijiɛ mɔ yewoaxɔ kanfukanfu ci yí sonɔ Mawu ɖekɛ gbɔɔ?
45 Míŋgbebukɔ mɔ nado hwɛ mí le Eda gbɔ o; mɛ ci yí dodoɔ hwɛ mí yí nyi Moizi, mɛ ci nu míɖoŋ do.
46 Le nyɔnɔnwi mɛɔ, nɔ míkando Moizi jiɔ, míakando nyɛ can ji hɛnnɛ, ɖo éŋwlɛ nu so ŋnu.
47 Vɔ nɔ mídekando enu ciwo eŋwlɛ ji ɖe, lé míawɛ akando enyɔ ciwo ŋnukɔ jiɔ?”
Gɔnmɛnuŋwlɛnŋwlɛn
^ Alo “mɛ ciwo yí alɔ̀ alo afɔ xo kplɛ nɔ.”
^ Kpɔ Enumɛɖeɖewo A3.
^ Alo “éɖo ŋsɛn yí ana agbe amɛ.”
