Eŋɛnywiwema Ʒan Tɔ 6:1-71
6 Le yɛ goduɔ, Yesu yi ago xlɔtɔ ji nɔ Galile Xu, ci wogbeyɔnɔ mɔ Tiberiadi.
2 Amɛwo sugbɔ yí kplɔɛ do, ɖo wokpɔ enujiŋ ciwo ewakɔ yí dakɔ dɔ̀ nɔ amɛwo.
3 Eyi Yesu de eto ɖeka ji yí yɛ koɖo yi nukplaviwo nɔ nyinɔnɔ do nɔ.
4 Ecɛyɛɔ, Paki ci yí nyi Ʒuifuwo xwe gogo.
5 Ci Yesu fɔn ta yi ji yí kpɔ amɛ sugbɔ ciwo yí gbɔgbɔ gbɔɔ, ébiɔ Filipu se mɔ: “Fini mìakpɔ kpɔnnɔ le axwle nɔ mɛ cɛwo nɔ woaɖuɔ?”
6 Vɔ énu ahan yí sɔ dui kpɔ yɔ, ɖo énya enu ci ejikɔ awa.
7 Filipu ɖo ŋci ni mɔ: “Kpɔnnɔ denari* sanŋdi amɛve dasun keke mɛɖekaɖeka le wo mɛ akpɔ kankin kpetii aɖu o.”
8 Andre, Simɔ Piɛ nɔviɛ ci yí nyi ɖeka le yi nukplaviwo mɛ nu ni mɔ:
9 “Kpɔnnɔ* amatɔn koɖo kpavi hwɛhwɛ amɛve le ŋsuvihwɛ ɖeka shi le lɛ, vɔ fini asun nɔ amɛ sugbɔ cɛwoɔ?”
10 Yesu nu mɔ: “Mínu nɔ mɛ lɔwo nɔ woanɔ nyinɔnɔ.” Egbe sugbɔ le nɔ, eyi taɖo mɛ lɔwo nɔ nyinɔnɔ do nɔ, ŋsuwo ayi 5 000 han.
11 Yesu sɔ kpɔnnɔ lɔwo yí do akpe do wo ji keŋ yí ma wo nɔ mɛ ciwo yí nɔ nyinɔnɔ do nɔ; éwɛ ahan nɔ kpavi hwɛhwɛ lɔwo hɛnnɛ yí woxɔ wo yí ɖu lé edro wo do.
12 Vɔ ci woɖu nu yí xodu ɖɔ wo ɖegbɔɔ, énu nɔ yi nukplaviwo mɔ: “Míbɔ kankan kpɛtɛwo nɔ eɖe ŋgbela amɛ o.”
13 Eyi wobɔ wo yí kpɔnnɔ amatɔn ciwo woɖu kpɔtɔ kankan lɔwo ɖɔ kishi 12.
14 Ci amɛwo kpɔ enujiŋ ci ewaɔ, wotɔ nunu mɔ: “Mɛ cɛ yí nyi enyɔnuɖɛtɔ ci yí ava xexe lɔ mɛ nyao.”
15 Vɔ ci Yesu nya mɔ wojikɔ avalé ye asɔ ɖo fyɔɔ, égbeso le wo gbɔ keŋ yí yi eto lɔ ji yí nɔ nɔtɔxu yiɖekɛ.
16 Ci fiɛfi ɖoɔ, yi nukplaviwo ɖyi va axu lɔ tu.
17 Woɖo tɔjihun ɖeka mɛ yí kui kpe Kapɛrnawumu. Ecɛyɛ ezan do, vɔ Yesu dekpɔ vaɖo wo gbɔ o.
18 Gbesɔ kpe niɔ, axu lɔ le adan ji, ɖo jihɔn sɛnŋsɛnŋ ɖeka xoxoɔ.
19 Ci woku tɔjihun lɔ kpeci amatɔn alo amadɛn han ɔ,* wokpɔ Yesu yí ezɔn zɔnlin to axu lɔ ji yí gogokɔ tɔjihun lɔ yí vɔnvɔn lé wo.
20 Vɔ Yesu nu nɔ wo mɔ: “Enyɛ yɔ; míŋgbevɔn o!”
21 Woji mɔ yewoakɔɛ do tɔjihun lɔ mɛ. Eyi sabaa vɔɔ, tɔjihun lɔ va ci te do agoji le fini woyikɔ.
22 Yi ŋkegbuɔ, amɛahwa ci yí ci ago xlɔtɔ ji nɔ axu lɔ kpɔ mɔ tɔjihun ɖe degbele enɔ o. Tɔjihun hwɛhwɛ ɖeka le nɔ sa, vɔ Yesu deɖo mɛ koɖo yi nukplaviwo o, ɖo yi nukplaviwo ɖekɛ yí so.
23 Ele ahan gan, tɔjihunwo so Tiberiadi yí va fini yí gogo texwe ci Yesu do akpe do kpɔnnɔ ji le yí woɖu.
24 Ci amɛahwa lɔ dekpɔ Yesu alo yi nukplaviwo le hunnɔɔ, woɖo wowo tɔjihunwo mɛ yí yi Kapɛrnawumu keŋ aji Yesu kpɔ.
25 Ci wokpɔ yí eso axu lɔɔ, wobiɔɛ se mɔ: “Rabi, hwenu èva lɛɔ?”
26 Yesu nu do nu nɔ wo mɔ: “Nyɔnɔnwi teŋ yí ŋnukɔ nɔ mí mɔ, denyi enujiŋ ciwo míkpɔ yí dɔ míjijiɛŋ kpɔ o, vɔ ci míɖu kpɔnnɔ yí xodu ɖɔ mí taɖo yɔ.
27 Míŋgbedo gbla nɔ ŋɖuɖu ci yí danahɛn o, vɔ mído gbla nɔ ŋɖuɖu ci yí ani yí ana agbe mavɔ mí. Ŋɖuɖu cɛ yí Agbetɔvi lɔ ana mí, ɖo yi nu jenɔŋ nɔ Eda ci yí nyi Mawu ŋtɔ.”
28 Eyi taɖo wobiɔɛ se mɔ: “Nyi mìɖo awa yí anyi mìwawa Mawu dɔwoɔ?”
29 Yesu ɖo ŋci nɔ wo mɔ: “Nɔ míxɔ mɛ ci Mawu dɔ ɖaɖa ji seɔ, anyi míwawa Mawu dɔ.”
30 Yi goduɔ, wobiɔɛ se mɔ: “Enujiŋ ci àwa nɔ mìakpɔ keŋ axɔ eo ji seɔ? Enujiŋ ci àwaɔ?
31 Mìwo tɔgbiwo ɖu mana le zogbeji shigbe lé woŋwli do Mawu Nyɔ mɛ nɛ mɔ: ‘Éna ŋɖuɖu wo so jeŋkwi mɛ yí woɖu.’”
32 Eyi Yesu nu nɔ wo mɔ: “Nyɔnɔnwi teŋ yí ŋnukɔ nɔ mí mɔ, denyi Moizi yí na ŋɖuɖu mí so jeŋkwi mɛ o, vɔ Edanyɛ yí na ŋɖuɖu ŋtɔŋtɔ mí so jeŋkwi mɛ.
33 Ðo Mawu ŋɖuɖu yí nyi mɛ ci yí so jeŋkwi mɛ yí va yí nanɔ agbe xexe lɔ.”
34 Eyi taɖo wonu ni mɔ: “Axwetɔ, nànɔ ŋɖuɖu ŋtɔ́ lɔ mì tɛgbɛɛ.”
35 Yesu nu nɔ wo mɔ: “Enyɛ yí nyi ŋɖuɖu ci yí nanɔ agbe lɔ. Mɛɖekpokpui ci yí va ŋgbɔɔ, shive dagbeci gbeɖe o yí mɛɖekpokpui ci yí xɔŋ ji seɔ, shikɔ dagbeci gbeɖe o.
36 Vɔ shigbe lé ŋnui nɔ mí do nɛɔ, míkpɔŋ gan mídexɔ se o.
37 Mɛ ciwo pleŋ Eda sɔ naŋ ava ŋgbɔ yí ŋdanya mɛ ci yí va ŋgbɔ gbeɖe o.
38 Ðo ŋso le jeŋkwi mɛ yí va yí awa mɛ ci yí dɔŋ ɖaɖa dro yí denyi nyɛŋtɔ dro o.
39 Mɛ ci yí dɔŋ ɖaɖa dro yí nyi mɔ, ŋdeɖo asɔ mɛɖe bu le mɛ ciwo pleŋ esɔ naŋ mɛ o, vɔ ŋɖo afɔn wo do agbe le azan godugodutɔ lɔ gbe.
40 Ðo Edanyɛ dro yí nyi mɔ, mɛɖekpokpui ci yí jeshi Evi lɔ ɖɛ yí xɔɛ ji se ɖo akpɔ agbe mavɔ yí nafuin do agbe le azan godugodutɔ lɔ gbe.”
41 Eyi Ʒuifuwo tɔ ekpa ɖɔɖɔ yí totoɔ nyɔ so nu ci enu mɔ: “Ŋnyi ŋɖuɖu ci yí so jeŋkwi mɛ va.”
42 Eyi wotɔ nunu mɔ: “Denyi Yesu Ʒozɛfu vi ci mìjeshi eda koɖo enɔ ɖɛ nɔ yɔ ba? Ecɛyɛ ɖe, lé ewɛ yí nunuɔ mɔ, ‘Ŋso jeŋkwi mɛ yí vaɔ?’”
43 Yesu nu do nu nɔ wo mɔ: “Mími enyɔ toto le míwoɖeɖewo mɛ.
44 Mɛɖekpokpui datɛnŋ ava ŋgbɔ nɔ Eda ci yí dɔŋ ɖaɖa deduin va ŋgbɔ o yí nafuin do agbe le azan godugodutɔ lɔ gbe.
45 Enyɔnuɖɛtɔwo ŋwlɛ ɖɛ mɔ: ‘Yehowa* akpla nu wo pleŋ.’ Mɛɖekpokpui ci yí ɖokɔ to Eda yí kplakɔ nu so gbɔ vanɔ ŋgbɔ.
46 Mɛɖe dekpɔ Eda kpɔ sɔ zeto mɛ ci yí so Mawu gbɔ yí va nu o; mɛ cɛ yí kpɔ Eda lɔ.
47 Nyɔnɔnwi teŋ yí ŋnukɔ nɔ mí mɔ, mɛɖekpokpui ci yí xɔ se akpɔ agbe mavɔ.
48 “Enyɛ yí nyi ŋɖuɖu ci yí nanɔ agbe amɛ.
49 Míwo tɔgbiwo ɖu mana le zogbeji gan woku.
50 Ecɛ yí nyi ŋɖuɖu ci yí so jeŋkwi mɛ va yí mɛɖekpokpui ci yí ɖui daku o.
51 Enyɛ yí nyi ŋɖuɖu ci yí nanɔ agbe amɛ yí so jeŋkwi mɛ va. Mɛɖekpokpui ci yí ɖu ŋɖuɖu cɛ anɔ agbe tɛgbɛɛ. Eyi le nyɔnɔnwi mɛɔ, ŋɖuɖu ci nana do ta nɔ xexe lɔ nɔ akpɔ agbe yí nyi anyi lankpu.”
52 Eyi Ʒuifuwo tɔ nunu le wowoɖeɖewo mɛ mɔ: “Lé ŋsu cɛ awɛ asɔ yi lan nɔ mì nɔ mìaɖuɔ?”
53 Eyi taɖo Yesu nu nɔ wo mɔ: “Nyɔnɔnwi teŋ yí ŋnukɔ nɔ mí mɔ, nɔ mídeɖu Agbetɔvi lɔ lan yí nu yi hun ɔ, agbe ɖekɛ dale mí mɛ o.
54 Mɛɖekpokpui ci yí ɖu anyi lan yí nu anyi hun akpɔ agbe mavɔ yí nafuin do agbe le azan godugodutɔ lɔ gbe.
55 Ðo anyi lan nyi ŋɖuɖu adodwi yí anyi hun nyi enu adodwi ci woanu.
56 Mɛɖekpokpui ci yí ɖu anyi lan yí nu anyi hun le koɖoŋ yí nyɛ can ŋle koɖi.
57 Shigbe lé Eda ci yí le agbe dɔŋ ɖaɖa yí ŋle agbe ni nɛɔ, ahanke mɛ ci yí ɖu anyi lan anɔ agbe nɔŋ nɛ.
58 Ecɛ yí nyi ŋɖuɖu ci yí so jeŋkwi mɛ yí va. Dele shigbe ci yí míwo tɔgbiwo ɖu gan yí ku nɛ o. Mɛɖekpokpui ci yí ɖu ŋɖuɖu cɛ anɔ agbe tɛgbɛɛ.”
59 Yesu nu enyɔ cɛwo hwenu ekplakɔ nu amɛwo le Ʒuifuwo nukplaxu* le Kapɛrnawumu.
60 Ci yi nukplaviwo se nyɔ cɛɔ, amɛ sugbɔ nu le wo mɛ mɔ: “Enyɔ cɛ denya sese o. Mi yí atɛnŋ ado ji aseseɛ enyɔ cɛɔ?”
61 Vɔ ci Yesu ŋtɔ nya mɔ ye nukplaviwo ɖɔɖɔ kpa yí totoɔ nyɔ so enyɔ lɔ nuɔ, ébiɔ wo se mɔ: “Enyɔ cɛ nyi afɔklɛnnu nɔ mí yɔa?
62 Vɔ lé avanyi do nɔ míkpɔ Agbetɔvi lɔ so kpe jeŋkwi mɛ fini enɔ saɔ?
63 Gbɔngbɔn lɔ yí nanɔ agbe; lankpu yɛdenyi ŋɖe o. Enyɔ ciwo ŋnu nɔ mí so gbɔngbɔn mɛ yí gbenanɔ agbe.
64 Vɔ mɛɖewo le mí mɛ yí wodexɔ se o.” Ðo Yesu nya mɛ ciwo yí daxɔ se o koɖo mɛ ci yí asɛ so tɔtɔmɛ.
65 Yesu gbenu mɔ: “Eyi taɖo ŋnu nɔ mí mɔ, mɛɖekpokpui datɛnŋ ava ŋgbɔ nɔ Eda dena emɔ yi o.”
66 Ecɛ na yí yi nukplavi sugbɔ trɔ yi wowo nu ciwo wogbe ɖɛ gbɔ yí wodegbeji mɔ yewoazɔn koɖi o.
67 Eyi taɖo Yesu biɔ Amɛ Wive lɔwo se mɔ: “Míwo can mídeji mɔ yewoayi ba?”
68 Simɔ Piɛ ɖo ŋci ni mɔ: “Axwetɔ, mi gbɔ mìayiɔ? Agbe mavɔ nyɔwo le eo shi.
69 Mìxɔɛ se yí gbenya mɔ eo yí nyi Amɛkɔkɔɛ Mawu tɔ lɔ.”
70 Yesu nu do nu nɔ wo mɔ: “De enyɛ yí can míwo wive lɔwo ba? Gan mɛɖeka le mí mɛ yí nyi eɖyixoamɛtɔ.”*
71 Le nyɔnɔnwi mɛɔ, Ʒudasi ci yí nyi Simɔ Iskariɔti eviɛ nu exoxoɔ nuxu so, ɖo eyi avasɛ ci ele Amɛ Wive lɔwo mɛ can.
Gɔnmɛnuŋwlɛnŋwlɛn
^ Kpɔ Enumɛɖeɖewo B14.
^ Yi gɔnmɛɖeɖe tiin: “Kpɔnnɔ ci wosɔ ɔrʒi sɔ wa.”
^ Yi gɔnmɛɖeɖe tiin: “stadi 25 alo 30 han.” Stadi ɖeka nyi mɛta 185. Kpɔ Enumɛɖeɖewo B14.
^ Kpɔ Enumɛɖeɖewo A5.
^ Alo taŋfuin, “fini amɛwo bɔ do.”
^ Alo “legba.”
