Eŋɛnywiwema Ʒan Tɔ 7:1-52
7 Le yɛ goduɔ, Yesu kpɔtɔ dandan* to Galile. Deji mɔ yeadan to Ʒude o, ɖo Ʒuifuwo jijiɛ mɔ yewoawui.
2 Vɔ Ʒuifuwo Xweɖuɖu ci yí nyi Zavawo xwe gogo.
3 Eyi taɖo nɔviɛwo nu ni mɔ: “Sò le elɛ yí ayi Ʒude keŋ nɔ ao nukplaviwo can akpɔ edɔ ciwo èwakɔ.
4 Ðo nɔ mɛɖe ji mɔ jugbaja ajeshi ye ɖɛɔ, dewanɔ ŋɖe le wlawla mɛ o. Nɔ èwakɔ enu cɛwoɔ, dàsɛ eoɖeki nɔ xexe lɔ.”
5 Le nyɔnɔnwi mɛɔ, nɔviɛwo dexɔɛ ji se o.
6 Eyi taɖo Yesu nu nɔ wo mɔ: “Anyi ga dexo hɔɖo o, vɔ gaxoxo ɖeshiaɖe nyɔ nɔ míwo.
7 Susu ɖe deli ci yí taɖo xexe lɔ agbe ŋwa nɔ mí o, vɔ égbe ŋwa nɔ nyɛ, ɖo ŋɖekɔ kunu mɔ yi dɔwawawo denyɔ o.
8 Míwo le yi exweɖuɖu lɔ tɔxu. Enyɛ yɛɔ, ŋdeyikɔ exweɖuɖu cɛ tɔxu hɔɖo o, ɖo anyi ga dexo vɛ hɔɖo o.”
9 Eyi taɖo ci enu nyɔ cɛwo ɖegbɔɔ, éci Galile.
10 Gan ci nɔviɛwo yi exweɖuɖu lɔ tɔxuɔ, yɛ can vayi, vɔ éyi le bebemɛ.
11 Eyi Ʒuifuwo tɔ jiji kpɔ le exweɖuɖu lɔ tɔxu yí nukɔ mɔ: “Fini ŋsu ŋtɔ́ leɔ?”
12 Eyi amɛ sugbɔ ɖɔɖɔ kpa yí xoxoɔ nuxu so nu le amɛahwa lɔ mɛ. Mɛɖewo nunuɔ mɔ: “Amɛnywi enyi.” Mɛbuwo nunuɔ mɔ: “De amɛnywi ɖe enyi o. Amɛwo blekɔ ele.”
13 Vɔ mɛɖe detɛnŋ xokɔ nuxu so nu le agbaŋgba o, ɖo wovɔnvɔn nɔ Ʒuifuwo.
14 Ci wotɔ exwe lɔ ɖuɖu yí ewa ŋkeke amɛnɛ han ɔ, Yesu yi gbedoxɔ lɔ mɛ yí tɔ enu kplakpla amɛwo.
15 Eyi ekpaca Ʒuifuwo yí wobiɔbiɔ se mɔ: “Lé ŋsu cɛ wɛ yí jeshi Enuŋwlɛŋwlɛ lɔwo ahan ci deyi suklu* can ɔ?”
16 Eyi Yesu nu do nu nɔ wo mɔ: “Enu ci ŋkplakɔ amɛwo denyi nyɛŋtɔ tɔ o, vɔ mɛ ci yí dɔŋ ɖaɖa tɔ yɔ.
17 Mɛɖekpokpui ci yí ji mɔ yeawa Mawu dro anya nɔ enyi Mawu gbɔ yí enu ci ŋkplakɔ amɛwo so alo nyɛŋtɔ gbɔ eso.
18 Mɛɖekpokpui ci yí xoxoɔ nuxu so yiŋtɔ susuwo nu jijiɛ mɔ wo le kanfu ye, vɔ mɛɖekpokpui ci yí jijiɛ mɔ wo le kanfu mɛ ci yí dɔ ye ɖaɖa nyi nyɔnɔnwitotɔ yí denyi amɛbletɔ o.
19 De Moizi yí na Ese lɔ mí ba? Vɔ mɛɖe dele mí mɛ yí wawa do Ese lɔ ji o. Nyi yí taɖo míjijiɛ mɔ yewoawuŋ ɔ?”
20 Amɛahwa lɔ nu do nu mɔ: “Gbɔngbɔnvɔn ɖeka le eo mɛ. Mi yí jiji awu eoɔ?”
21 Yesu ɖo ŋci nɔ wo mɔ: “Enu kuɖeka kpoŋ yí ŋwa yí ekpaca mí pleŋ.
22 Vɔ míbu nyɔ cɛ kpɔ. Moizi do evososo se nɔ mí (denyi Moizi gbɔ yí ese lɔ so o, vɔ tɔgbiwo gbɔ yɔ) yí mísonɔ vo nɔ amɛ le sabatigbe ŋtɔkpu.
23 Nɔ wososoɔ vo nɔ amɛ le sabatigbe keŋ asɔ wa do Moizi Se lɔ ji ɖe, nyi yí taɖo mído dɔmɛzi sugbɔ doŋ ahan ci ŋda dɔ̀ nɔ amɛ le sabatigbe yí edɔ̀ mi ni keŋkeŋ ɔ?
24 Míŋgbekpɔnɔ lé amɛ le do asɔ ɖo kojo ni o, vɔ míɖonɔ kojo jɔjɔɛ.”
25 Ʒerusalɛmutɔ ɖewo tɔ nunu mɔ: “De ŋsu cɛ wojijiɛ keŋ awu ba?
26 Míkpɔ ɖa, éxoxoɔ nuxu le jugbaja gan yí wodenunuɔ nyɔ ɖe ni o. Abi jumɛgawo vanya hɔntɔn mɔ eyi nyi Kristo lɔa?
27 Mìnya fini ŋsu cɛ yɛso, vɔ nɔ Kristo lɔ yɛvaɔ, mɛɖe danya fini eso o.”
28 Eyi ci Yesu kplakɔ nu amɛwo le gbedoxɔ lɔ mɛɔ, édo axwa yí nu mɔ: “Míjeshiŋ ɖɛ yí nya fini ŋso yí ŋdeva le nyɛŋtɔ dro mɛ o, vɔ mɛ ci yí dɔŋ ɖaɖa li ŋtɔŋtɔ yí mídejeshi ɖɛ o.
29 Nyɛŋjeshi ɖɛ, ɖo ŋnyi yi dumɛnɔtɔ; eyi dɔŋ ɖaɖa.”
30 Eyi wotɔ jiji mɔ yewoali, vɔ mɛɖe desun ji yí tɔ alɔ̀ yi o, ɖo yi ga dexo hɔɖo o.
31 Ele ahan gan, amɛ sugbɔ le amɛahwa lɔ mɛ yí xɔɛ ji se. Wonunuɔ mɔ: “Nɔ Kristo lɔ va ɖe, áwa enujiŋwo sɔwu ŋsu cɛa?”
32 Farizitɔwo se yí amɛahwa lɔ ɖɔɖɔ kpa yí nunuɔ enyɔ cɛwo so nu. Eyi avɔnsatɔwo gawo koɖo Farizitɔwo ɖo sɔjawo ɖaɖa nɔ woali.
33 Eyi Yesu nu mɔ: “Nagbenɔ mí gbɔ hwɛɖeka gbɔxwe ayi mɛ ci yí dɔŋ ɖaɖa gbɔ.
34 Míajiŋ kpɔ vɔ mídakpɔŋ o yí mídatɛnŋ ava fini nale o.”
35 Eyi taɖo Ʒuifuwo tɔ nunu le wowoɖeɖewo mɛ mɔ: “Fini ŋsu cɛ jikɔ mɔ yeayi yí mìdavakpɔɛɔ? Ʒuifu ciwo yí gban do Grɛkitɔwo mɛ gbɔ ejikɔ ayi keŋ akpla nu Grɛkitɔwoa?
36 Nyɔ ci ejikɔ anu ci emɔ, ‘Míajiŋ kpɔ vɔ mídakpɔŋ o yí mídatɛnŋ ava fini naleɔ’?”
37 Le ŋkeke kpɛtɛtɔ ci yí nyi azan vevitɔ nɔ exweɖuɖu lɔ jiɔ, Yesu so je te yí do axwa mɔ: “Nɔ shikɔ ci mɛɖekpokpuiɔ, le va ŋgbɔ axɔ shi anu.
38 Mɛɖekpokpui ci yí xɔŋ ji seɔ, ‘eshi ci yí nanɔ agbe amɛ asa to mɛ’ shigbe lé Enuŋwlɛŋwlɛ lɔwo nui nɛ.”
39 Gbɔngbɔn kɔkɔɛ lɔ nu yí Yesu xoxoɔ nuxu so. Dajinjin o yí mɛ ciwo yí xɔɛ ji se axɔ gbɔngbɔn kɔkɔɛ lɔ, vɔ wodexɔɛ hɔɖo o; ɖo Yesu dexɔ kanfukanfu yitɔ hɔɖo o.
40 Mɛɖewo ciwo yí se enyɔ cɛwo tɔ nunu mɔ: “Enyɔnuɖɛtɔ yí mɛ cɛ nyi nyao.”
41 Mɛbuwo nunuɔ mɔ: “Mɛ cɛ yí nyi Kristo lɔ.” Vɔ mɛbuwo biɔbiɔ se mɔ: “Galile yí Kristo lɔ asoa?
42 Enuŋwlɛŋwlɛ lɔwo denu mɔ Kristo lɔ aso Davidi kannu mɛ le Bɛtɛlɛhɛmu ci yí nyi Davidi ju mɛ ba?”
43 Eyi taɖo egbe klan nɔ amɛahwa lɔ do Yesu ŋci.
44 Mɛɖewo le wo mɛ ji mɔ yewoali, vɔ mɛɖe desun ji yí tɔ alɔ̀ yi o.
45 Sɔja lɔwo trɔ gbɔ va avɔnsatɔwo gawo koɖo Farizitɔ lɔwo gbɔ. Eyi wobiɔ wo se mɔ: “Nyi yí taɖo mídeli vɛɔ?”
46 Sɔja lɔwo ɖo ŋci mɔ: “Mìdekpɔ mɛɖe exo nuxu ahan kpɔ o.”
47 Farizitɔ lɔwo biɔ wo se mɔ: “Alo éble míwo can yɔa?
48 Alo jumɛga ɖe abi Farizitɔ ɖe xɔɛ ji sea?
49 Mɛ ciwo wosɛn kpɛn nɔ yí nyi amɛahwa cɛ ci yí dejeshi Ese lɔ o.”
50 Nikodɛmu ci yí yi Yesu gbɔ vayi sa can le Farizitɔ lɔwo mɛ. Ébiɔ wo se mɔ:
51 “Mìwo Se lɔ ɖonɔ kojo nɔ amɛ nɔ dese mɛ lɔ ŋtɔ numɛgbe yí nya ŋci ewa gbɔxwea?”
52 Woɖo ŋci ni mɔ: “Galile yí eɔ can èsoa? Ji dwi ni kpɔ yí akpɔ mɔ enyɔnuɖɛtɔ ɖe atɛnŋ aso Galile ma.”*
Gɔnmɛnuŋwlɛnŋwlɛn
^ Alo “zɔn afɔ yí ɖyiɖyiɛ sa.”
^ Edasɛ mɔ, suklu ciwo Rabiwo yinɔ.
^ Kpukpui 53 vayi eta 8:11 dele le alɔnuŋwlɛŋwlɛ xoxui ciwo nu kankandoji le sugbɔtɔ mɛ o.
