Eŋɛnywiwema Ʒan Tɔ 8:12-59
8 12 Yi goduɔ, Yesu gbenu nɔ wo mɔ: “Enyɛ yí nyi klɛnklɛn nɔ xexe lɔ. Mɛɖekpokpui ci yí kplɔ ŋdo dazɔn vinvin mɛ gbeɖe o, vɔ áɖo klɛnklɛn ci yí nanɔ agbe.”
13 Eyi Farizitɔwo nu ni mɔ: “Èɖekɔ kunu so eɔŋtɔ nu; ao kunuɖeɖe denyi nyɔnɔnwi o.”
14 Yesu nu do nu nɔ wo mɔ: “Nɔ ŋgbeɖekɔ kunu so nyɛŋtɔ nu can ɔ, anyi kunuɖeɖe nyi nyɔnɔnwi, ɖo ŋnya fini ŋso koɖo fini ŋyikɔ. Vɔ míwo denya fini ŋso koɖo fini ŋyikɔ o.
15 Míwo kpɔnɔ lé amɛ le do* yí sɔ ɖonɔ kojo, nyɛŋdeɖonɔ kojo nɔ mɛɖe o.
16 Nɔ ŋɖo kojo ŋtɔkpu can ɔ, anyi kojoɖoɖo nyi nyɔnɔnwi. Ðo ŋdele nyɛɖekɛ o, vɔ Eda ci yí dɔŋ ɖaɖa le koɖoŋ.
17 Gbesɔ kpe niɔ, woŋwlɛ do míwoŋtɔwo Se lɔ mɛ mɔ: ‘Kunuɖeɖe amɛ amɛve tɔ nyi nyɔnɔnwi.’
18 Ŋɖekɔ kunu so nyɛŋtɔ nu yí Eda ci yí dɔŋ ɖaɖa can ɖekɔ kunu so ŋnu.”
19 Eyi wobiɔɛ se mɔ: “Fini Dao lɔ leɔ?” Yesu ɖo ŋci mɔ: “Mídejeshi nyɛ koɖo Danyɛ ɖɛ o. Nɔ míjeshiŋ ɖɛɔ, míajeshi Danyɛ can ɖɛ.”
20 Énu nyɔ cɛwo le fini enujɔjɔdakawo nɔnɔ hwenu ekplakpla nu amɛwo le gbedoxɔ lɔ mɛ. Vɔ mɛɖe desun ji yí li o, ɖo yi ga dexo hɔɖo o.
21 Eyi egbenu nɔ wo mɔ: “Nyɛŋsosoɔ yí míajiŋ kpɔ, vɔ míaku do míwo nuvɔnwo mɛ. Fini ŋyikɔɔ, mídatɛnŋ ava o.”
22 Eyi Ʒuifu lɔwo tɔ nunu mɔ: “Ji ejikɔ awu yiɖekia? Ðo énu mɔ, ‘Fini ŋyikɔɔ, mídatɛnŋ ava o.’”
23 Égbenu nɔ wo mɔ: “Míwo so nyigban ji, nyɛŋso jeŋkwi mɛ. Míwo so xexe cɛ mɛ, nyɛŋdeso xexe cɛ mɛ o.
24 Eyi taɖo ŋnukɔ nɔ mí mɔ: Míaku do míwo nuvɔnwo mɛ. Ðo nɔ mídekando ji mɔ ŋnyi mɛ ci ŋnukɔ mɔ ŋnyiɔ, míaku do míwo nuvɔnwo mɛ.”
25 Eyi wotɔ Yesu biɔbiɔ se mɔ: “Mi ènyiɔ?” Énu do nu nɔ wo mɔ: “Nyi yí taɖo ŋgbexoxoɔ nuxu koɖo mí hɛnnɛ ma?
26 Enyɔ sugbɔ li nanu so mí nu yí enu sugbɔ li ci nu naɖo kojo so. Le nyɔnɔnwi mɛɔ, mɛ ci yí dɔŋ ɖaɖa nyi nyɔnɔnwitotɔ yí enyɔ ciwo ŋse le gbɔ pɛpɛpɛ yí ŋnukɔ le xexe lɔ mɛ.”
27 Wodemɔŋje mɛ mɔ Eda nu yí exokɔ nuxu so nɔ yewo o.
28 Eyi Yesu nu mɔ: “Nɔ míkan Agbetɔvi lɔ do aci nu gbɔxwe míavanya mɛ ci ŋnyi yí ŋdewanɔ ŋɖekpokpui le nyɛŋtɔ dro mɛ o, vɔ enu ciwo Eda kplaŋ ɔ, wowo yí ŋnunɔ.
29 Mɛ ci yí dɔŋ ɖaɖa le koɖoŋ. Degbeŋ ɖɛ yí ŋci nyɛɖekɛ o, ɖo ŋwanɔ enu ciwo yí jɔnɔ ji ni gashiagamɛ.”
30 Ci enukɔ enyɔ cɛwoɔ, amɛ sugbɔ xɔɛ ji se.
31 Yesu gbenu nɔ Ʒuifu ciwo yí xɔɛ ji se mɔ: “Nɔ míkpɔtɔ wakɔ do anyi nyɔwo jiɔ, anyi mínyi anyi nukplaviwo nyao.
32 Eyi míajeshi nyɔnɔnwi lɔ yí nyɔnɔnwi lɔ ana vovo mí.”
33 Wonu do nu ni mɔ: “Abrahamu viviwo mìnyi yí mìdenyi hwashi nɔ mɛɖe kpɔ o. Lé èwɛ yí nunuɔ mɔ, ‘Mìwo avoɔ’?”
34 Yesu nu do nu nɔ wo mɔ: “Nyɔnɔnwi teŋ yí ŋnukɔ nɔ mí mɔ, mɛɖekpokpui ci yí wakɔ nuvɔn ɔ, hwashi enyi nɔ nuvɔn.
35 Gbesɔ kpe niɔ, hwashi denɔnɔ yi xwetɔ xwe tɛgbɛɛ o; vɔ axwetɔ vi yí nini tɛgbɛɛ.
36 Eyi taɖo nɔ Mawu Vi lɔ na vovo mí gbɔxwe yí míavo nyɔnɔnwitɔ.
37 Ŋnya mɔ Abrahamu viviwo mínyi, vɔ míjiji awuŋ, ɖo mídexɔ anyi nyɔ o.
38 Ŋciwo ŋkpɔ le Danyɛ gbɔ yí ŋnukɔ, vɔ ŋciwo míwo se le míwo da gbɔ yí míwakɔ.”
39 Wonu do nu ni mɔ: “Abrahamu yí nyi mìwo da.” Yesu nu nɔ wo mɔ: “Nɔ enyi Abrahamu viwo mínyiɔ, míawanɔ Abrahamu tɔ han.
40 Vɔ míjijiɛ mɔ yewoawuŋ, enyɛ ci yí nu nyɔnɔnwi ci ŋse so Mawu gbɔ nɔ mí. Abrahamu dewa ahan o.
41 Ŋciwo míwo da wanɔ yí míwakɔ.” Wonu ni mɔ: “Mìdenyi hashi* viwo o. Eda kuɖeka yí le mì shi, eyi nyi Mawu.”
42 Yesu nu nɔ wo mɔ: “Nɔ Mawu yí nyi míwo Daɔ, míalɔnŋ; ɖo Mawu gbɔ ŋso yí va lɛ. Ŋdeva le nyɛŋtɔ dro mɛ o, vɔ eyi dɔŋ ɖaɖa.
43 Nyi yí taɖo mídeseseɛ nyɔ ci ŋnukɔ mɛɔ? Ci mídeɖoɖoɔ to anyi nyɔ yí dɔ.
44 Míwo da Legba gbɔ yí míso yí míjinɔ mɔ yewoawa míwo da dro. Amɛwutɔ enyi so hwenu etɔ egu fɔnfɔn. Dekpɔtɔ nɔ nyɔnɔnwi lɔ mɛ o, ɖo nyɔnɔnwi dele mɛ o. Nɔ éle ŋsu kankɔɔ, éxonɔ nuxu sɔgbe koɖo yiŋtɔ susuwo, ɖo ŋsukantɔ enyi yí gbenyi ŋsukankan dalɔ.
45 Vɔ ci nyɛŋnukɔ nyɔnɔnwi nɔ míɔ, mídekando ŋji o.
46 Mi yí le mí mɛ yí atɛnŋ ado hwɛŋ mɔ ŋwa nuvɔn ɔ? Yí nɔ ŋnu nyɔnɔnwi ɖe, nyi yí taɖo mídekando ŋjiɔ?
47 Mɛ ciwo yí nyi Mawu viwo senɔ Mawu nyɔ, vɔ míwo deji mɔ yewoase o, ɖo mídenyi Mawu viwo o.”
48 Ʒuifu lɔwo nu do nu ni mɔ: “Mìwo nyɔ dejɔ ci mìmɔ, ‘Ènyi Samaritɔ yí gbɔngbɔnvɔn le eo mɛ’ ba?”
49 Yesu nu do nu mɔ: “Gbɔngbɔnvɔn dele ŋmɛ o, vɔ nyɛŋkanfukɔ Danyɛ yí míwo gbalikɔŋ.
50 Gan ŋdejijiɛ nyɛŋtɔ kanfukanfu o; Mawu yí jijiɛ mɔ wo le kanfuŋ, eyi ɖonɔ kojo.
51 Nyɔnɔnwi teŋ yí ŋnukɔ nɔ mí mɔ, nɔ mɛɖe wanɔ do anyi nyɔ jiɔ, daku gbeɖe o.”
52 Eyi Ʒuifu lɔwo nu ni mɔ: “Ecɛyɛ mìnya mɔ gbɔngbɔnvɔn le eo mɛ. Abrahamu ku, enyɔnuɖɛtɔwo can ku. Vɔ eɔnu mɔ, ‘Nɔ mɛɖe wanɔ do anyi nyɔ jiɔ, daku gbeɖe o.’
53 Èwugan mìwo tɔgbi Abrahamu ci yí ku yɔa? Enyɔnuɖɛtɔwo can ku. Lé èkpɔkpɔ eoɖeki do ma?”
54 Yesu nu do nu nɔ wo mɔ: “Nɔ ŋkanfukɔ nyɛɖekiɔ, enugbali wakɔ ŋle, Edanyɛ ci mínukɔ mɔ yɛnyi yewo Mawu yí kanfukɔŋ.
55 Kpɔ mídejeshi ɖɛ o, vɔ nyɛŋjeshi ɖɛ. Nɔ ŋmɔ ŋdejeshi ɖɛɔ, anyi ŋnyi ŋsukantɔ shigbe míwo nɛ. Vɔ ŋjeshi yí wanɔ do yi nyɔ ji.
56 Eji jɔ míwo da Abrahamu sugbɔ mɔ yeakpɔ anyi zan. Ékpɔɛ yí evivi ni.”
57 Eyi Ʒuifu lɔwo biɔɛ se mɔ: “Eɔdeɖo xwe 50 hɔɖo o gan yí mɔ yekpɔ Abrahamu a?”
58 Yesu nu nɔ wo mɔ: “Nyɔnɔnwi teŋ yí ŋnukɔ nɔ mí mɔ, ŋli xoxoxo gbɔxwe Abrahamu avajɔ.”
59 Eyi wosɔ ekpewo mɔ yewoaxo Yesu, vɔ éshi be yí to le gbedoxɔ lɔ mɛ.
