Eŋɛnywiwema Ʒan Tɔ 9:1-41
9 Ci Yesu vayikɔɔ, ékpɔ ŋsu ɖeka ci woji ŋkuvitɔnnɔ.
2 Yi nukplaviwo biɔɛ se mɔ: “Rabi, mi yí wa nuvɔn taɖo woji ŋsu cɛ ŋkuvitɔnnɔɔ, ŋsu lɔ ŋtɔ yɔa alo yi jilawo yɔ?”
3 Yesu ɖo ŋci mɔ: “Denyi ŋsu lɔ alo yi jilawo yí wa nuvɔn o, vɔ enyi ahan nɔ Mawu dɔwo aze.
4 Ci kede gbekpɔtɔ liɔ, mìɖo awa mɛ ci yí dɔŋ ɖaɖa dɔwo. Ezan jikɔ ado yí mɛɖe datɛnŋ awa dɔ o.
5 Ci ŋkpɔtɔ le xexe lɔ mɛɔ, ŋnyi klɛnklɛn nɔ xexe lɔ.”
6 Ci enu nyɔ cɛwo ɖegbɔɔ, écu tan do nyigban keŋ sɔ nya ekɔ yí sɔ ekɔ lɔ shishi do ŋkuviwo nɔ ŋsu lɔ
7 yí nu ni mɔ: “Yi klɔɛ le Siloe shidu mɛ” (Siloe gɔnmɛ yí nyi “Wodɔɛ ɖaɖa”). Éyi klɔɛ yí tɔ enu kpɔkpɔ.
8 Axwexatɔwo koɖo mɛ ciwo yí jeshi ɖɛ sa mɔ yɛbiɔnɔ nu tɔ nunu mɔ: “De ŋsu ci yí nɔnɔ nyinɔnɔ yí biɔnɔ nu nɛ ba?”
9 Mɛɖewo nunuɔ mɔ: “Eyi yɔ.” Mɛbuwo nunuɔ mɔ: “Oo, amɛ yí ɖyi.” Ŋsu lɔ ŋtɔ nunuɔ mɔ: “Enyɛ yɔ.”
10 Eyi wobiɔɛ se mɔ: “Lé ao ŋkuviwo wɛ yí hun ɔ?”
11 Éɖo ŋci mɔ: “Ŋsu ci woyɔnɔ mɔ Yesu yí nya ekɔ yí sɔ shishi do ŋkuviwo nɔŋ yí nu nɔŋ mɔ, ‘Yi klɔɛ le Siloe shidu mɛ.’ Eyi ŋvayi klɔɛ yí tɔ enu kpɔkpɔ.”
12 Wobiɔɛ se mɔ: “Fini ŋsu lɔ leɔ?” Énu mɔ: “Ŋnya go.”
13 Wokplɔ ŋsu ci yí nyi ŋkuvitɔnnɔ sa lɔ yi Farizitɔwo gbɔ.
14 Ŋkeke ci ji Yesu nya ekɔ yí hun ŋkuviwo ni le trɔgbɔ nyi Sabatigbe.
15 Eyi taɖo Farizitɔwo can tɔ ŋsu lɔ biɔbiɔ se mɔ, lé enyi do yí etɔ enu kpɔkpɔ ma. Énu nɔ wo mɔ: “Ésɔ baba shishi do ŋkuviwo nɔŋ yí ŋklɔɛ yí tɔ enu kpɔkpɔ.”
16 Farizitɔ ɖewo tɔ nunu mɔ: “Denyi Mawu gbɔ yí ŋsu cɛ so o, ɖo denyinyiɛ Sabati se lɔ o.” Mɛbuwo nunuɔ mɔ: “Lé mɛ ci yí nyi nuvɔnwatɔ atɛnŋ awa enujiŋ cɛwoɔ?” Eyi mama ɖo wo mɛ.
17 Wogbebiɔ ŋsu ŋkuvitɔnnɔ lɔ se mɔ: “Nyɔ ci eɔnukɔ so nuɔ? Ðo ao ŋkuviwo yí ehun.” Ŋsu lɔ nu mɔ: “Enyɔnuɖɛtɔ enyi.”
18 Vɔ Ʒuifuwo dekando ji mɔ ŋkuvitɔnnɔ yí ŋsu lɔ nyi sa gbɔxwe yí vatɔ enu kpɔkpɔ o. Eyi taɖo woyɔ dalɔ koɖo nɔlɔ vɛ.
19 Eyi wobiɔ wo se mɔ: “Míwo vi ci mímɔ yewoji ŋkuvitɔnnɔ kea? Lé ewɛ yí vakpɔkpɔ nu yɛɔ?”
20 Edalɔ koɖo nɔlɔ ɖo ŋci mɔ: “Mìnya mɔ mìwo vi yɔ yí ŋkuvitɔnnɔ enyi mìji.
21 Vɔ lé enyi do yí ekpɔkpɔ nu yɛɔ, mìdenya o. Mìdenya mɛ ci yí hun ŋkuviwo ni o. Míbiɔɛ se, éshin yí axo nuxu yiŋtɔ dru.”
22 Ci edalɔ koɖo nɔlɔ vɔnvɔn nɔ Ʒuifuwo taɖo wonu ahan. Ðo Ʒuifuwo tui ɖɛ mɔ, mɛɖekpokpui ci yí anu mɔ eyi nyi Kristo lɔɔ, woanyi ti le Ʒuifuwo nukplaxu lɔ.
23 Eyi taɖo edalɔ koɖo nɔlɔ nu mɔ: “Mɛganxoxu enyi, míbiɔ nyɔ yi se.”
24 Eyi woyɔ ŋsu ci yí nyi ŋkuvitɔnnɔ sa lɔ vɛ zevetɔ yí nu ni mɔ: “Nù nyɔnɔnwi nɔ mì le Mawu ŋmɛ.* Nuvɔnwatɔ ŋsu cɛ nyi mìwo nya.”
25 Énu do nu mɔ: “Nɔ nuvɔnwatɔ enyiɔ, nyɛŋdenya o. Ŋci ŋnya yí nyi mɔ, ŋnyi ŋkuvitɔnnɔ sa; vɔ ecɛyɛɔ, ŋkpɔkpɔ nu.”
26 Eyi wobiɔɛ se mɔ: “Nyi ewa nɔ eoɔ? Lé ehun ŋkuvi lɔwo nɔ eo doɔ?”
27 Éɖo ŋci nɔ wo mɔ: “Ŋnui nɔ mí, vɔ mídese o. Nyi yí taɖo míji mɔ yewoagbesi keɔ? Alo míwo can jikɔ atrɔ yi nukplaviwo yɔa?”
28 Eyi wogbali yí nu ni mɔ: “Eo yí nyi ŋsu ŋtɔ́ nukplavi, vɔ Moizi nukplaviwo mìwo nyi.
29 Mìnya mɔ Mawu xo nuxu nɔ Moizi. Vɔ ŋsu cɛ yɛɔ, mìdenya fini eso o.”
30 Ŋsu lɔ nu do nu nɔ wo mɔ: “Ekpaca amɛ taŋ mɔ mídenya fini eso o, gan eyi trɔgbɔ hun ŋkuviwo nɔŋ.
31 Mìnya mɔ Mawu deɖonɔ to nuvɔnwatɔwo o, vɔ mɛɖekpokpui ci yí vɔnnɔ nɔ Mawu yí wanɔ yi droɔ, éɖonɔ to yi.
32 Mìdese kpɔ gbeɖe mɔ, mɛɖe hun ŋkuviwo nɔ mɛ ci woji ŋkuvitɔnnɔ o.
33 Nɔ ŋsu cɛ deso Mawu gbɔɔ, dasun ji awa enu cɛ hanwo ɖe o.”
34 Wonu do nu ni mɔ: “Eo ci yí ɖɔ koɖo nuvɔn so hwenu woji eo, eo yí jikɔ akpla nu mìa?” Eyi wonyi ti!
35 Yesu se mɔ wonyi ti. Eyi ci ekpɔɛɔ, ébiɔɛ se mɔ: “Èxɔ Agbetɔvi lɔ ji sea?”
36 Ŋsu lɔ ɖo ŋci mɔ: “Mɛgan, mi yí nyi Agbetɔvi lɔ yí naxɔɛ ji seɔ?”
37 Yesu nu ni mɔ: “Èkpɔkpɔɛ vɔ. Le nyɔnɔnwi mɛɔ, eyi nyi mɛ ci yí xokɔ nuxu koɖo eo.”
38 Énu mɔ: “Axwetɔ, ŋxɔɛ ji se.” Eyi eje klo ji yí cɔn ŋmɛ anyi do ŋkɔ ni.
39 Yesu nu mɔ: “Ŋva xexe cɛ mɛ nɔ woaɖo kojo nɔ amɛwo keŋ nɔ mɛ ciwo yí dekpɔkpɔ nu akpɔ nu yí mɛ ciwo yí kpɔkpɔ nu atrɔ ŋkuvitɔnnɔwo.”
40 Farizitɔ ciwo yí le gbɔ yí seseɛ nyɔ cɛwo biɔɛ se mɔ: “Mìwo can nyi ŋkuvitɔnnɔwo yɔa?”
41 Yesu nu nɔ wo mɔ: “Nɔ ŋkuvitɔnnɔwo mínyiɔ, anyi mídeɖo nuvɔn o. Vɔ ecɛyɛɔ, mínukɔ mɔ, ‘Mìkpɔkɔ nu.’ Eyi taɖo wodasɔ míwo nuvɔnwo ke mí o.”
Gɔnmɛnuŋwlɛnŋwlɛn
^ Yi gɔnmɛɖeɖe tiin: “Sɔ̀ kanfukanfu nɔ Mawu.”
