Eŋɛnywiwema Luiki Tɔ 12:1-59
-
Farizitɔwo kpɔnnɔcike (1-3)
-
Mívɔn nɔ Mawu, vɔ míŋgbevɔn nɔ agbetɔwo o (4-7)
-
Nunu le amɛwo ŋmɛ mɔ wojeshi Kristo ɖɛ (8-12)
-
Labalu ci Yesu do so ŋsu hotɔnɔ xlunɔ ɖeka nu (13-21)
-
Mími enu lolo kpɔ (22-34)
-
Lɛngbɔha hwɛhwɛ (32)
-
-
Zanŋtenɔnɔ (35-40)
-
Axwejikpɔtɔ ci yí nɔ gbeji koɖo axwejikpɔtɔ ci yí denɔ gbeji o (41-48)
-
De fafa yɔ o, vɔ mama yɔ (49-53)
-
Ele mɔ woalé ŋkuvi do gaxoxowo nu (54-56)
-
Mídra míwo gblamɛ do (57-59)
12 Hwenɔnuɔ, agbetɔ kotokun nɛniɖe va bɔ yí wosugbɔ keke yí ɖoɖoɔ afɔ nɔnɔ ji. Yesu tɔ nunu nɔ yi nukplaviwo doŋkɔ mɔ: “Mínɔ zanŋte do Farizitɔwo kpɔnnɔcike ci yí nyi ayemɛnuwawa nu.
2 Vɔ wodawa ɖaŋ asɔ ŋɖe wla keke davaje dandanŋgbe o yí ŋɖekpokpui ci yí le wlawla mɛɔ, woavanya nu so nu.
3 Enyɔ ɖekpokpui ci mínu le vinvin mɛɔ, woasi le klɛnklɛn mɛ yí nyɔ ɖekpokpui ci míɖɔ kpa yí nu le xɔgan mɛɔ, woade exɔ ta anui.
4 Anyi xlɔwo, ŋnukɔ nɔ mí hɛnnɛ mɔ míŋgbevɔn nɔ mɛ ciwo yí wunɔ lankpu lɔ yí le yɛ goduɔ, wodagbetɛnŋ awa ŋɖe wu hunnɔ o.
5 Vɔ madasɛ mɛ ci míavɔn nɔ nɔ mí: Mívɔn nɔ mɛ ci yí nɔ éwu amɛ ɖegbɔɔ, eɖo acɛ yí sɔ donɔ Gehena* mɛ. Ɛɛ, ŋnukɔ nɔ mí mɔ Mɛ ŋtɔ́ yí míavɔn nɔ nɛ.
6 Wosanɔ hwiʒihwiʒi amatɔn yí xɔnɔ gajun hwɛhwɛ amɛve ciwo yí denyi ŋɖe* o, alo? Gan Mawu deŋlɔnɔbe eɖe le wo mɛ o.*
7 Vɔ éhlɛn eɖakwi ciwo pleŋ yí le ta nɔ mí ŋtɔkpu. Míŋgbevɔn o; míxɔ afi wu hwiʒihwiʒi sugbɔwo.
8 “Mɛɖekpokpui ci yí anu le amɛwo ŋmɛ mɔ yejeshiŋ ɖɛɔ, Agbetɔvi lɔ can anu le ŋmɛ nɔ mawudɔlawo mɔ yejeshi ɖɛ.
9 Vɔ mɛɖekpokpui ci yí agbeŋ le amɛwo ŋmɛɔ, woagbe yɛ can le mawudɔlawo ŋmɛ.
10 Mɛɖekpokpui ci yí nu enyɔvɔn do Agbetɔvi lɔ nuɔ, woasɔ ki. Vɔ mɛɖekpokpui ci yí nu enyɔkpotu do gbɔngbɔn kɔkɔɛ lɔ nuɔ, wodasɔ ki o.
11 Nɔ wokplɔ mí yikɔ amɛahwawo ŋkɔ* alo egawo koɖo acɛkpatɔwo ŋkɔɔ, míŋgbeloloɔ nɔ enyɔ ci míanu asɔ hwlɛn ta nɔ míwoɖekiwo alo lé míanui do o.
12 Ðo gbɔngbɔn kɔkɔɛ lɔ akpla mí enyɔ ciwo míɖo anu le gaxoxo lɔ teŋ mɛ.”
13 Eyi mɛɖeka le amɛahwa lɔ mɛ nu ni mɔ: “Enukplamɛtɔ, nu nɔ nɔvinyɛ nɔ mìama mìwo da nuwo.”
14 Ébiɔɛ se mɔ: “Ðajɛ, mi yí sɔŋ sɔ ɖo kojoɖotɔ alo enumatɔ nɔ míwo koɖo veɔ?”
15 Yi goduɔ, énu nɔ amɛahwa lɔ mɔ: “Mína nɔ míwo ŋkuviwo anɔ hunhun yí míacɔ míwoɖekiwo le sukanujiji* ɖekpokpui nu. Ðo nɔ mɛɖe wa enu sugbɔ ɖɛ can ɔ, denyi enu lɔwo yí ana agbe yi o.”
16 Eyi edo labalu ɖeka nɔ wo mɔ: “Ŋsu hotɔnɔ ɖeka nyigbanwo na jinuku nywiɖe.
17 Eyi etɔ drɔdrɔ le yiɖeki mɛ mɔ, ‘Lé nawɛ yɛɔ? Texwe ɖe gbele ŋshi nalɔ anyi jinukuwo kɔ do ba.’
18 Eyi enu mɔ, ‘Enu ci nawa ke: nagban anyi vawo yí acu gangan buwo yí alɔ anyi jinuku koɖo anyi nunywiwo pleŋ do wo mɛ.
19 Eyi manu nɔ nyɛɖeki* mɔ: “Enunywiwo le eo shi yí asun eo na nɔ exwe sugbɔ. Gbɔn domɛ. Ðu yí anu yí aɖu agbe.”’
20 Vɔ Mawu nu ni mɔ, ‘Xlunɔ, wojikɔ axɔ ao gbe* le eo shi le ezan cɛ mɛ. Mi tɔ yí avanyi ŋciwo èbɔ daɖɛ lɔwoɔ?’
21 Eyi taɖo ahan eyinɔ do nɔ mɛ ci yí bɔbɔ dɔkunuwo ɖɛ nɔ yiɖeki vɔ yí denyi dɔkunɔ le Mawu gbɔ nɛ.”
22 Yi goduɔ, énu nɔ yi nukplaviwo mɔ: “Eyi taɖo ŋnunuɔ nɔ mí mɔ, mími lolo nɔ míwo gbewo* nɔ ŋci míaɖu alo nɔ míwo gbazawo nɔ ŋci míado.
23 Ðo agbe* le veviɖe wu ŋci míaɖu yí gbaza le veviɖe wu ŋci míado.
24 Míkpɔ kpafiɔnwo ɖa: Wodedonɔ jinuku o, kpɔ wodeɖenɔ jinuku o; enuɖoxu alo ava dele wo shi o, gan Mawu nanɔ ŋɖuɖu wo. Mídele veviɖe sugbɔ sɔwu xeviwo ba?
25 Mi yí le mí mɛ yí nɔ élolo nu kpɔɔ, atɛnŋ ada kankin* kpetii do yi gbezan jiɔ?
26 Taɖo nɔ mídatɛnŋ awa enu nyɛkuin ŋtɔ́ kpetii ɖe, nyi yí taɖo míloloɔ nɔ enu kpɛtɛwoɔ?
27 Míkpɔ lé gbemɛ sesewo shinnɔ do ɖa: Wodewanɔ dɔ o, kpɔ wodelɔnnɔ avɔn o; vɔ ŋnukɔ nɔ mí mɔ le Salomɔ dradrado gangan lɔ pleŋpleŋ mɛ can ɔ, deje acɔ shigbe wowo ɖe nɛ o.
28 Nɔ Mawu ɖo acɔ nɔ egbe ciwo yí le gbemɛ gbɛ ahan yí esɔ woasɔ wo kɔ do ezo mɛ ɖe, daɖo acɔ nɔ míwo sɔwu ahan ba? Xɔse hwe nɔ mí ɖoɖu!
29 Eyi taɖo mími tamɛ gbangban so ŋci míaɖu koɖo ŋci míanu nu yí ami enu lolo kpɔ ɖoɖu.
30 Ðo ŋcɛwo pleŋ yí xanɔ jukɔn ciwo yí le xexeɛ mɛ veviɖe. Vɔ míwo Da nya mɔ míʒan ŋcɛwo.
31 Míkpɔtɔ ajijiɛ yi Fyɔɖuxu lɔ yí woasɔ ŋcɛwo kpi nɔ mí.
32 “Lɛngbɔha hwɛhwɛ, míŋgbevɔn o. Ðo jijɔ enyi nɔ míwo Da mɔ yeasɔ Fyɔɖuxu lɔ na mí.
33 Mísa ŋciwo yí le mí shi yí ana nuwo wamɛnɔwo.* Míwa ehogodu ciwo yí dedanahɛn o, ciwo yí nyi dɔkunu ciwo yí devɔnɔ ɖɛ do jeŋkwi mɛ, fini flafinɔwo devanɔ o yí kɔnsubabawo can dedanahɛn nu le nɔ o.
34 Ðo fini míwo dɔkunuwo leɔ, nɔtɔxu míwo jiwo anɔ hɛnnɛ nɛ.
35 “Mídra do yí ale gbesɔsɔ* yí míwo kaɖigbanwo le kpɔtɔ ajejeɛ
36 yí ale shigbe hwashi ciwo yí le te kpɔ wowo xwetɔ ci yí agbɔ so alɔlele tɔxu nɛ. Eyi nɔ égbɔ yí xuxu hɔn ɔ, woahuin ni zeɖeka.
37 Hwashi ciwo yí axwetɔ lɔ agbɔ avakpɔ le zanŋte akpɔ jijɔ! Ŋnukɔ nɔ mí le nyɔnɔnwi mɛ mɔ, yiŋtɔ adra do* nɔ edɔwawa yí anu nɔ wo mɔ wo le nɔ kplɔn nu yí ama ŋɖuɖu nɔ wo.
38 Eyi nɔ évagbɔ le ezan gashiɖekɛ koɖo ezan gawive gblamɛ* alo nɔ egbenyi ezan gawive koɖo fɔnfɔnmɛ gatɔ̀n gblamɛ* yɔ can yí kpɔ wo wole gbesɔsɔɔ, woakpɔ jijɔ!
39 Vɔ mínya mɔ nɔ axwetɔ nya gaxoxo ci mɛ flafinɔ avaɔ, dalɔn woagban axwe ni o.
40 Míwo can míle gbesɔsɔ, ɖo gaxoxo ci nu mídeɖoŋ do o yí Agbetɔvi lɔ ava.”
41 Eyi Piɛ biɔɛ se mɔ: “Axwetɔ, mìwoɖekɛwo yí èdodoɔ labalu cɛ nɔa alo mɛshiamɛ yɔ?”
42 Axwetɔ lɔ nu mɔ: “Mi cucucu yí nyi axwejikpɔtɔ egbejinɔtɔ ci yí nya ŋɖɛ ci yi xwetɔ asɔ ɖo nu nɔ yi dɔwaviwo* nɔ akpɔtɔ ananɔ ŋɖuɖu ci yí asunnɔ wo do gamɛ nywitɔ jiɔ?
43 Hwashi ŋtɔ́ akpɔ jijɔ nɔ yi xwetɔ va kpɔɛ yí ele dɔ ji ahan!
44 Ŋnunuɔ nɔ mí le nyɔnɔnwi mɛ mɔ, ásɔ ɖo nu nɔ yi nuwo pleŋ.
45 Vɔ nɔ hwashi ŋtɔ́ nu le yi ji mɛ mɔ, ‘Anyi xwetɔ degbɔgbɔ kaba o,’ keŋ yí tɔ hwashi ŋsu koɖo nyɔnuwo xoxo yí le nu ɖukɔ yí le aha nukɔ keke yí muɔ,
46 yi xwetɔ ava le ŋkeke ci ji deɖoŋ do o koɖo gaxoxo ci denya mɛ. Eyi adɔn to ni sɛnŋsɛnŋɖe yí ahlin do egbejimanɔtɔwo mɛ.
47 Ci edɔwavi ŋtɔ́ jeshi yi xwetɔ dro gan yí dele gbesɔsɔ o alo dewa ŋci emɔ yi le waɔ, woaxui veviɖe.
48 Vɔ mɛ ci yí denya yí wa ŋciwo yí ana woaxuiɔ, woaxui hwɛɖeka. Ðo mɛɖekpokpui ci wona nu sugbɔɔ, woabiɔ sugbɔ so shi yí mɛɖekpokpui ci wosɔ ɖo nu nɔ enu sugbɔɔ, woabiɔ nu sugbɔ sɔwu so shi.
49 “Ŋva yí ado zo do nyigban lɔ ji. Eyi nɔ ezo lɔ je ɖegbɔ ɖe, nyi nagbeji wu cɛɔ?
50 Le nyɔnɔnwi mɛɔ, ʒinʒindoshimɛ ɖeka li nawa. Eyi ŋloloɔ ni keke ana nɔ hwecinu yí avɔ!
51 Míbukɔ mɔ fafa yí ŋhɛn va nyigban lɔ jia? Oo, vɔ ŋnukɔ nɔ mí mɔ, egbemanɔju yí ŋhɛn vɛ.
52 Ðo so egbɛ jiɔ, manyimanyi anɔ xomu mɛ. Nɔ amɛ amatɔn yí le xomu lɔ mɛɔ, amɛ amɛtɔn afɔn gu do amɛ amɛve ji yí amɛ amɛve afɔn gu do amɛ amɛtɔn ji.
53 Woama, eda afɔn gu do evi ŋsuvi ji yí evi ŋsuvi afɔn gu do eda ji. Enɔ afɔn gu do evi nyɔnuvi ji yí evi nyɔnuvi afɔn gu do enɔ ji. Asunɔ afɔn gu do evishi ji yí evishi afɔn gu do asunɔ ji.”
54 Yi goduɔ, énu nɔ amɛahwa lɔ hɛnnɛ mɔ: “Nɔ míkpɔ eshi tɔ ɖoɖo le wezexuɔ, mínunɔ zeɖeka mɔ, ‘Jihɔnshi gangan ɖeka aja,’ eyi enyinɔ ahan.
55 Eyi nɔ míkpɔ aya xo so fɔde nɔ nyigban lɔɔ, mínunɔ mɔ, ‘Zozu awugan,’ eyi enyinɔ ahan.
56 Ayemɛnuwatɔwo, mínya ŋkuvi lele do nyigban lɔ koɖo jeŋkwi mɛ nɔnɔmɛ nu yí nyanɔ ŋci yí jikɔ ajɔ. Vɔ lé ewɛ yí mídenya lé míalé ŋkuvi do gaxoxo cɛ cucucu nuɔ?
57 Nyi yí taɖo míwoŋtɔwo mídenyanɔ ŋci yí sɔgbe yí míawaɔ?
58 Le kpɔwɛ mɛ, nɔ eo koɖo mɛ ci yí sanma eo le emɔ ji yí yikɔ ega ɖe gbɔɔ, je agbla nɔ míakpɔ enyɔ ci yí le gblamɛ nɔ eo koɖo yɛ gbɔ nɔ míle emɔ lɔ ji yikɔ keŋ nɔ ŋgbekplɔ eo hɛn yi kojoɖotɔ gbɔ yí kojoɖotɔ lɔ asɔ eo jo nɔ gakpajikpɔtɔ yí yɛasɔ eo do gakpa mɛ o.
59 Ŋnukɔ nɔ eo mɔ, nɔ dècu ho lɔwo pleŋ keke je gajunho hwɛhwɛtɔ* jiɔ, dàto le gakpa lɔ mɛ o.”
Gɔnmɛnuŋwlɛnŋwlɛn
^ Kpɔ Enyɔgbe Veviwo mɛ Ðeɖe.
^ Yi gɔnmɛɖeɖe tiin: “asariɔn.” Kpɔ Enumɛɖeɖewo B14.
^ Alo “ékpɔnɔ wo ji.”
^ Alo “Ʒuifuwo nukplaxuwo.”
^ Alo “enuciŋmɛnamɛ.”
^ Alo “anyi se.”
^ Alo “ao se.”
^ Alo “míwo sewo.”
^ Alo “ese.”
^ Kpɔ Enumɛɖeɖewo B14.
^ Yi gɔnmɛɖeɖe tiin: “aku ŋshishi nɔ amɛwo yí ana nu wo.” Kpɔ Enyɔgbe Veviwo mɛ Ðeɖe.
^ Yi gɔnmɛɖeɖe tiin: “abla alin mɛ.”
^ Alo “abla alin mɛ.”
^ Yi gɔnmɛɖeɖe tiin: “ezan mamamɛ amɛvetɔ.”
^ Yi gɔnmɛɖeɖe tiin: “ezan mamamɛ amɛtɔntɔ.”
^ Alo “axwe lɔ mɛ dɔwaviwo.”
^ Yi gɔnmɛɖeɖe tiin: “lɛpta hwɛhwɛtɔ.” Kpɔ Enumɛɖeɖewo B14.
