Eŋɛnywiwema Luiki Tɔ 20:1-47
20 Gbeɖeka ci Yesu le enu kplakɔ amɛwo le gbedoxɔ lɔ mɛ yí drakɔ eŋɛnywi lɔɔ, avɔnsatɔwo gawo, esekplamɛtɔwo koɖo jumɛgawo va
2 yí biɔɛ se mɔ: “Nu acɛ ci èɖo yí sɔ wakɔ ŋcɛwo nɔ mì. Mi yí na acɛ lɔ eoɔ?”
3 Yesu nu do nu nɔ wo mɔ: “Nyɛ can nabiɔ nyɔ ɖeka mí se. Mínui nɔŋ:
4 Fini Ʒan kpɔ acɛ so yí ʒin amɛwo do shi mɛɔ? Jeŋkwi mɛa alo agbetɔwo gbɔ?”
5 Eyi woli kpɔ le wowonɔnɔwo mɛ mɔ: “Nɔ mìmɔ, ‘Jeŋkwi mɛ exɔɛ soɔ,’ ábiɔ mì se mɔ, ‘Nyi yí taɖo mídekando jiɔ?’
6 Vɔ nɔ mìmɔ, ‘Agbetɔwo gbɔ yɔɔ,’ mɛ lɔwo pleŋ axo kpe mì, ɖo wokando ji mɔ enyɔnuɖɛtɔ yí Ʒan nyi.”
7 Eyi taɖo woɖo ŋci mɔ yewodenya fini exɔɛ so o.
8 Yesu nu nɔ wo mɔ: “Nyɛ can ŋdanu fini ŋxɔ acɛ so yí wawa ŋcɛwo nɔ mí o.”
9 Yi goduɔ, étɔ labalu cɛ dodo nɔ amɛwo mɔ: “Ŋsu ɖeka de vɛngble yí sɔ na agbledetɔwo nɔ woade dema yí xɔ mɔ yi eju bu mɛ yí nɔ nɔ na nɔ hwenu jinjinɖe.
10 Ci hwenu ɖo yí woagbɛn vɛnsɛnsɛn lɔwoɔ, édɔ yi hwashi ɖeka ɖaɖa agbledetɔ lɔwo mɔ le yi xɔ vɛnsɛnsɛn ɖewo le wo gbɔ vɛ. Vɔ agbledetɔ lɔwo xui yí nyi ashigba alɔgba.
11 Égbedɔ hwashi bu ɖaɖa. Vɔ woxo yɛ hɛnnɛ yí do ŋkpɛn yi yí nyi ashigba alɔgba.
12 Gan égbedɔ amɛ amɛtɔntɔ ɖaɖa. Wodo akpa yɛ nu hɛnnɛ yí li dɔŋkpe.
13 Eyi botɔ lɔ mɔ, ‘Nyi nawa yɛɔ? Naɖo vinyɛ vevi ɖaɖa. Wotɛnŋ shi ŋmɛ nɔ yɛ.’
14 Ci agbledetɔ lɔwo kpɔɛɔ, wonu le wowoɖeɖewo mɛ mɔ, ‘Cinɔɖutɔ lɔ ke. Míva mìawui nɔ cinɔnu lɔ atrɔ mìwotɔ.’
15 Eyi woduin ti le vɛngble lɔ mɛ keŋ yí wui. Ecɛyɛ ɖe, nyi botɔ lɔ awa nɔ agbledetɔ lɔwoɔ?
16 Áva yí awu agbledetɔ lɔwo keŋ asɔ vɛngble lɔ jo nɔ mɛbuwo.”
Ci mɛ lɔwo se nyɔ cɛɔ, wonu mɔ: “Ŋcɛ ajɔ gbeɖe go!”
17 Vɔ Yesu glo wo kpɔ juun yí nu mɔ: “Lé míse enyɔ cɛ ci woŋwlɛ ɖɛ gɔnmɛ doɔ? ‘Ekpe ci exɔcutɔwo gbeɔ, eyi vatrɔ zoguijikpe* vevitɔ.’
18 Mɛ ci yí aje ekpe cɛ ji aŋɛ kpeɖekpeɖe. Yí mɛɖekpokpui ci ji aje acuku hannyahannya.”
19 Esekplamɛtɔwo koɖo avɔnsatɔwo gawo ji mɔ yewoali le gaxoxo ŋtɔ́ cucucu mɛ, vɔ wovɔn nɔ amɛahwa lɔ, ɖo wonya mɔ yewo ŋci yí edo labalu lɔ.
20 Ci woglui kpɔ juun ɖegbɔɔ, wodɔ ŋsu ɖekawo ciwo woda le bebemɛ nɔ woawa nu shigbe wonyi amɛjɔjɔɛwo nɛ yí ali le yi nuxuwo mɛ keŋ akplɔɛ yi nɔ egawo koɖo acɛkpatɔ lɔ.
21 Eyi wobiɔɛ se mɔ: “Enukplamɛtɔ, mìnya mɔ èwa ɖaŋ xonɔ nuxu yí tonɔ nyɔnɔnwi yí dènɔnɔ mɛɖe ji o, vɔ ènunɔ nyɔnɔnwi so Mawu nu.
22 Ésɔgbe le eseɛ mɛ mɔ* woacu taga nɔ Seza a, alo desɔgbe o?”
23 Vɔ ci Yesu nya ayemɛnu ci wowakɔɔ, énu nɔ wo mɔ:
24 “Mídasɛ denari* ɖeka nɔŋ. Mi takpu koɖo mi ŋkɔ yí le jiɔ?” Woɖo ŋci mɔ: “Seza tɔ yɔ.”
25 Énu nɔ wo mɔ: “Eyi taɖo mísɔ ŋciwo yí nyi Seza tɔwo sɔ na Seza, vɔ ŋciwo yí nyi Mawu tɔwoɔ, mísɔ wo nɔ Mawu.”
26 Ahan yí wodesun ji yí lé Yesu le yi nuxuwo mɛ le amɛahwa lɔ ŋmɛ nɛ, vɔ ɖoŋci yitɔ kpaca wo yí wobɔ nu.
27 Ele ahan gan, Sadusitɔ ciwo yí nunɔ mɔ fɔnfɔnsoku deli ɖewo va yí biɔɛ se mɔ:
28 “Enukplamɛtɔ, Moizi ŋwlɛ ɖɛ nɔ mì mɔ, ‘Nɔ mɛɖe ku gbeɖe ashiɛ ɖɛ yí deji viɔ, nɔviɛ ɖo asɔ kpo ashiɛ lɔ yí aji viwo nɔ fofoɔ ci yí ku lɔ.’
29 Ecɛyɛɔ, nɔjinɔ amadrɛ ɖekawo li. Amɛ ŋkɔtɔ ɖe nyɔnu, vɔ deji vi gbɔxwe yí ku o.
30 Amɛvetɔ sɔ kpo nyɔnu lɔ yí yɛ can ku,
31 ŋɖekɛ lɔ ke yí jɔ do nɔviɛ amɛtɔntɔ ji. Ahan yí nɔjinɔ amadrɛ lɔwo pleŋ ɖe nyɔnu lɔ yí eɖe deji vi le wo mɛ gbɔxwe yí ku nɛ.
32 Le vɔvɔnuɔ, nyɔnu lɔ can vaku.
33 Taɖo ɖe, mi shi avanyi nɔ wovafɔn so kuɔ? Ðo ŋsu amadrɛ lɔwo ɖi ɖɛ kpɔ.”
34 Yesu nu nɔ wo mɔ: “Xexe* cɛ mɛ viwo ɖenɔ nyɔnu yí wosɔ nyɔnuwo nanɔ asu,
35 vɔ mɛ ciwo yí wokpɔ mɔ woje yí anɔ agbe le xexe ŋtɔ́ mɛ yí wofɔn wo so ku daɖe nyɔnu alo woasɔ wo na asu o.
36 Le nyɔnɔnwi mɛɔ, wodagbeku hɛnnɛ o, ɖo woale shigbe mawudɔlawo nɛ yí ci woafɔn wo do agbeɔ, woanyi Mawu viwo.
37 Vɔ Moizi can nu le ŋjaci xolɔlɔ lɔ mɛ mɔ woafɔn amɛkukuwo ci eyɔ Yehowa* mɔ ‘Abrahamu Mawu, Izaki Mawu koɖo Ʒakɔbu Mawu.’
38 Denyi amɛkukuwo Mawu enyi o, vɔ amɛleagbuwo Mawu yɔ, ɖo wo pleŋ le agbe ni.”
39 Esekplamɛtɔ ɖewo nu do nu ni mɔ: “Enukplamɛtɔ, èwa ɖaŋ xo nuxu.”
40 Eyi wodegbegbe dɔn yí biɔ enyɔ kuɖeka kpetii yi se o.
41 Eyi ebiɔ wo se mɔ: “Lé ewɛ yí amɛwo nunuɔ mɔ Kristo nyi Davidi viɔ?
42 Ðo, Davidi ŋtɔ nu le Ehajiji Wema mɛ mɔ, ‘Yehowa* nu nɔ anyi Xwetɔ mɔ: “Nɔ nyinɔnɔ do anyi ɖushi mɛ
43 keke je hwenu yí nasɔ ao ketɔnɔwo wa afɔɖojinu nɔ eo.”’
44 Taɖo ci Davidi yɔɛ mɔ Axwetɔ ɖe, lé ewɛ yí gbenyi eviɛɔ?”
45 Ecɛyɛ ci amɛwo pleŋ ɖokɔ to yiɔ, énu nɔ yi nukplaviwo mɔ:
46 “Míkpɔ míwoɖekiwo ji nywiɖe le esekplamɛtɔwo nu, wojinɔ mɔ yewoado awu lɛgbɛwo yí adandan yí woadodoɔ gbe nɔ yewo koɖo bubu le amɛwo mɛ.* Ʒinkpin ŋkɔtɔwo* ji nɔnɔ le Ʒuifuwo nukplaxuwo koɖo texwe veviwo nɔnɔ le azanɖuxuwo jɔnɔ ji nɔ wo.
47 Wofinɔ nuwo le kposhuwo shi* yí wanɔ gbedoɖa jinjinwo nɔ amɛwo akpɔ wo.* Kojo ci woaɖo nɔ wo asɛnŋ* sɔwu.”
Gɔnmɛnuŋwlɛnŋwlɛn
^ Yi gɔnmɛɖeɖe tiin: “eta nɔ zogui.”
^ Alo “Ényɔ mɔ.”
^ Kpɔ Enumɛɖeɖewo B14.
^ Kpɔ Enyɔgbe Veviwo mɛ Ðeɖe.
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Yi gɔnmɛɖeɖe tiin: “afiwo mɛ.”
^ Alo “nywiwo.”
^ Alo “Wovɔnɔ kposhuwo xwewo.”
^ Alo “le amɛwo ŋmɛ.”
^ Alo “akpɛn.”
