Eŋɛnywiwema Luiki Tɔ 22:1-71
-
Avɔnsatɔwo bla gbeju keŋ awu Yesu (1-6)
-
Dradrado nɔ Paki kpɛtɛtɔ lɔ (7-13)
-
Yesu ɖo Axwetɔ Fiɛfiŋɖuɖu lɔ ɖɛ (14-20)
-
“Mɛ ci yí asaŋ le kplɔn nu koɖoŋ” (21-23)
-
Enukplavi lɔwo dɔn nyɔ veviɖe so mɛ ci yí nyi gangantɔ le wo mɛ nu (24-27)
-
Enublabla ci Yesu wa nɔ Fyɔɖuxu ɖeka (28-30)
-
Yesu nu ɖɛ mɔ Piɛ agbe ye (31-34)
-
Ele mɔ enukplavi lɔwo adra do ɖɛ; ewi amɛve (35-38)
-
Gbedoɖa ci Yesu wa le Eto Olivuciwo tɔ ji (39-46)
-
Wolé Yesu (47-53)
-
Piɛ gbe Yesu (54-62)
-
Woko Yesu (63-65)
-
Woɖo kojo nɔ Yesu le Sanhedrɛn lɔ ŋkɔ (66-71)
22 Kpɔnnɔ Majimaji xwe ci woyɔnɔ mɔ Paki gogo.
2 Eyi avɔnsatɔwo gawo koɖo esekplamɛtɔwo jijiɛ lé woawɛ keke awu Yesu, ɖo wovɔnvɔn nɔ amɛwo.
3 Eyi Satana ɖo Ʒudasi ci woyɔnɔ mɔ Iskariɔti mɛ. Éle Amɛ Wive lɔwo mɛ.
4 Éyi avɔnsatɔwo gawo koɖo mɛ ciwo yí kpɔnɔ gbedoxɔ lɔ ji gawo gbɔ yí nu lé asa Yesu do nɔ wo.
5 Éjɔ ji nɔ wo yí wolɔn mɔ yewoana gajunho yi.
6 Eyi exɔ gbe do ji yí tɔ emɔ jiji keŋ asa Yesu nɔ wo. Vɔ deji mɔ yeawɛ le ŋmɛ nɔ amɛwo o.
7 Ci ŋkeke ŋkɔtɔ nɔ Kpɔnnɔ Majimaji xwe ci ji ele mɔ woawu Paki lanwo le ɖoɔ,
8 Yesu dɔ Piɛ koɖo Ʒan yí nu mɔ: “Míyi dra enushianu do ɖɛ nɔ Paki lɔ nɔ mìaɖui.”
9 Wobiɔɛ se mɔ: “Fini èji mɔ mìadra do nɔ Paki xweɖuɖu lɔɔ?”
10 Énu nɔ wo mɔ: “Nɔ míɖo eju lɔ mɛɔ, ŋsu ɖeka ahɛn eshi do eze mɛ ado go mí. Míkplɔɛ do ayi axwe ci mɛ aɖo.
11 Mínu nɔ axwetɔ lɔ mɔ, ‘Enukplamɛtɔ mɔ: “Exɔ ci mɛ naɖu Paki lɔ le koɖo anyi nukplaviwoɔ?”’
12 Ŋsu lɔ adasɛ exɔ gangan ɖeka ci yí le shanŋ ji nɔ mí. Enuwo sɔgbe le mɛ. Mídra nɔ do nɔ Paki lɔ ɖuɖu.”
13 Eyi woyi yí kpɔɛ pɛpɛpɛ shigbe lé enui nɔ wo do nɛ yí wodra nushianu do ɖɛ nɔ Paki lɔ ɖuɖu.
14 Ci ega lɔ xoɔ, yi koɖo apotru lɔwo nɔ kplɔn nu.
15 Énu nɔ wo mɔ: “Ŋji veviɖe mɔ maɖu Paki cɛ koɖo mí gbɔxwe akpe fun.
16 Ŋnukɔ nɔ mí mɔ, ŋdagbeɖu ɖe keke ana nɔ hwenu yí enuwo pleŋ avamɛ le Mawu Fyɔɖuxu lɔ mɛ o.”
17 Éxɔ kɔnkpu ɖeka ci mɛ vɛn le yí do akpe do ji yí nu mɔ: “Míxɔ anu, nɔ mɛɖe nu ɖegbɔɔ, asɔ jo nɔ yi kpena.
18 Ðo ŋnukɔ nɔ mí mɔ so egbɛ jiɔ, ŋdagbenu vɛn keke ana nɔ hwenu Mawu Fyɔɖuxu lɔ ava o.”
19 Ésɔ kpɔnnɔ ɖeka hɛnnɛ yí do akpe do ji yí ŋi mɛ yí sɔ nɔ wo yí mɔ: “Ecɛ le dumɛ nɔ anyi lankpu ci wosɔ na do ta nɔ mí. Míwanɔ ecɛ asɔ ɖonɔ ŋwiŋ.”
20 Ci woɖu nu ɖegbɔɔ, ésɔ kɔnkpu ɖeka ci mɛ vɛn le hɛnnɛ yí nu mɔ: “Kɔnkpu cɛ le dumɛ nɔ enublabla yoyu ci wowa toto anyi hun ci woakɔ ɖɛ do ta nɔ mí ji.
21 “Vɔ míkpɔ ɖa! Mɛ ci yí asaŋ le kplɔn nu koɖoŋ.
22 Ðo le nyɔnɔnwi mɛɔ, Agbetɔvi lɔ aku shigbe lé wonui ɖɛ do nɛ; vɔ babɛ nɔ mɛ ci yí asɛ!”
23 Ci apotru lɔwo se nyɔ cɛwoɔ, wotɔ nunu le wowoɖeɖewo mɛ mɔ mi cucucu yí le yewo mɛ yí jikɔ awa ahan ma.
24 Ele ahan gan, wotɔ enyɔ dɔndɔn sɛnŋsɛnŋɖe le wowoɖeɖewo mɛ so mɛ ci yí nyi gangantɔ le wo mɛ nu.
25 Vɔ énu nɔ wo mɔ: “Efyɔwo ɖunɔ axwetɔ do jukɔnwo ji yí woyɔnɔ mɛ ciwo yí kpanɔ nɔ wo mɔ Ðagbuwatɔwo.
26 Gan deɖo anyi ahan nɔ míwo o, vɔ mɛ ci yí nyi amɛ gangantɔ le mí mɛ le nyi amɛ hwɛhwɛtɔ yí mɛ ci yí le ŋkɔ nɔ mí le nyi edɔwavi nɔ mí.
27 Keŋ ɖe, mɛ ci yí ɖukɔ nu le kplɔn nu nɛ, edɔwavi nɛ, mi yí nyi gangantɔ le wo mɛɔ? De mɛ ci yí ɖukɔ nu le kplɔn nu yɔ ba? Vɔ enyɛɔ, edɔwavi yí ŋnyi le mí mɛ.
28 “Le nyɔnɔnwi mɛɔ, mídegbeŋ ɖɛ le tetekpɔwo hwenu o.
29 Ŋwa enublabla koɖo mí nɔ fyɔɖuxu ɖeka shigbe lé Danyɛ can wa enublabla koɖoŋ nɛ,
30 keŋ nɔ míanɔ anyi kplɔn nu yí aɖu nu yí anu le anyi Fyɔɖuxu lɔ mɛ yí anɔ nyinɔnɔ do efyɔʒinkpinwo ji yí aɖo kojo nɔ Izraɛli kɔta 12 lɔwo.
31 “Simɔ, Simɔ, kpɔ ɖa! Satana ji mɔ yeafu mí pleŋ shigbe lé wofunɔ jinuku nɛ.
32 Vɔ ŋɖe kuku do ta nɔ eo keŋ nɔ ao xɔse ŋgbegbɔjɔ o yí nɔ ao xɔse vasɛnŋ keɔ, nàdo ŋsɛn nɔviowo.”
33 Eyi Piɛ nu ni mɔ: “Axwetɔ, ŋle gbesɔsɔ yí ayi gakpa mɛ koɖo eo yí agbeku koɖo eo.”
34 Vɔ Yesu nu mɔ: “Piɛ, ŋnukɔ nɔ eo mɔ, gbɔxwe kloklo aɖe atɔ gbɛɔ, àgbeŋ zetɔn.”
35 Ébiɔ wo se mɔ: “Ci ŋdɔ mí ɖaɖa Mawu nyɔ nugbe yí mídehɛn ehogodu, ŋɖuɖugodu koɖo fɔkpawo ɖe, ŋɖe wudo mía?” Woɖo ŋci mɔ: “Oo!”
36 Eyi enu nɔ wo mɔ: “Vɔ ecɛyɛɔ, mɛ ci shi ehogodu le le sɔɛ hɛn. Ahanke nɔ ŋɖuɖugodu le mɛɖe shiɔ, le sɔɛ hɛn yí nɔ ewi dele mɛɖe shiɔ, le sa awu jitɔ yitɔ keŋ axwle ɖeka.
37 Ðo ŋnukɔ nɔ mí mɔ enyɔ ci woŋwlɛ ɖɛ mɔ, ‘Woahlin do esejimanɔtɔwo mɛ’ ɖo ajɔ do ŋji. Enyɔ ci woŋwlɛ ɖɛ yí jɔjɔ do ŋji.”
38 Eyi wonu ni mɔ: “Axwetɔ, kpɔ ɖa! Ewi amɛve ke.” Énu nɔ wo mɔ: “Ésun.”
39 Ci eso le nɔɔ, éyi Eto Olivuciwo tɔ ji shigbe lé ewɛni nɛ yí yi nukplaviwo can yi koɖi.
40 Ci woɖo nɔtɔxuɔ, énu nɔ wo mɔ: “Mídodoɔ gbe ɖaɖa keŋ nɔ míŋgbeje tetekpɔ mɛ o.”
41 Eyi ete yi azɔge kli yí tɔ gbe dodo ɖa.
42 Énu mɔ: “Danyɛ, nɔ edro eoɔ, te kɔnkpu cɛ so ŋgbɔ. Gan danyi lé nyɛŋdro do o, vɔ ao dro le nyi wawa.”
43 Eyi mawudɔla ɖeka so jeŋkwi mɛ yí dasɛ yiɖeki ni yí do ŋsɛn yi.
44 Vɔ ésekɔ gbazavi sugbɔ yí kpɔtɔ dodoɔ gbe ɖaɖa veviɖe keke ade ci yí kɔkɔ ni vale shigbe ehunkɔnwo nɛ yí jaja kɔ do nyigban.
45 Ci edo gbe ɖaɖa ɖegbɔɔ, éyi yi nukplaviwo gbɔ yí kpɔ wo wole alɔn dɔnkɔ, ɖo woci ŋshishi mɛ keke enu cikɔ nɔ wo.
46 Yesu nu nɔ wo mɔ: “Nyi yí taɖo mídɔndɔn alɔn ɔ? Míso yí akpɔtɔ adodoɔ gbe ɖaɖa keŋ nɔ míŋgbeje tetekpɔ mɛ o.”
47 Ci ele nuxu lɔ xokɔɔ, kpɔ ɖa! Amɛahwa ɖeka vaɖo yí ŋsu ci woyɔnɔ mɔ Ʒudasi ci yí le Amɛ Wive lɔwo mɛ le ŋkɔ nɔ wo. Égbosɔ Yesu keŋ yí ki shi ni.
48 Vɔ Yesu biɔɛ se mɔ: “Ʒudasi, eshi àki nɔ Agbetɔvi lɔ yí asɔ sɛa?”
49 Ci mɛ ciwo yí le koɖi kpɔ enu ciwo yí jɔkɔɔ, wobiɔ se mɔ: “Axwetɔ, mìasɔ ewi wa hwa koɖo woa?”
50 Mɛɖeka le wo mɛ ŋtɔkpu do ewi ɖaɖa avɔnsatɔ gangantɔ dɔwavi yí kpa ɖushi mɛ to ni.
51 Vɔ Yesu nu mɔ: “Ésun ahan. Mími.” Eyi etɔ alɔ̀ eto lɔ yí da dɔ̀ ni.
52 Yesu biɔ avɔnsatɔwo gawo, mɛ ciwo yí kpɔnɔ gbedoxɔ lɔ ji gawo koɖo jumɛga ciwo yí va liligbe se mɔ: “Ewi koɖo ekpowo mísɔ va mɔ yewoaléŋ shigbe flafinɔ gangan ɖe ŋnyi nɛa?
53 Ŋnɔnɔ gbedoxɔ lɔ mɛ koɖo mí ŋkeŋke, gan yí mídeléŋ kpɔ o. Vɔ míwo ga yí xo yɛ yí ega xo nɔ mɛ ciwo yí le vinvin mɛ hɛnnɛ yí woakpa acɛ.”
54 Eyi wolé Yesu hɛn yi, wokplɔɛ yi avɔnsatɔ gangantɔ lɔ xwe mɛ; vɔ Piɛ le azɔge-azɔge nɔ wo yí kplɔ wo do.
55 Ci mɛɖekawo bɔ zo do dodomɛ nɔ avɔnsatɔ gangantɔ lɔ gbadenu yí nɔ nyinɔnɔ trɔdiɔ, Piɛ can nɔ nyinɔnɔ do wo mɛ.
56 Vɔ ci nyɔnuvi ɖeka ci yí wanɔ dɔ le axweɛ mɛ kpɔ Piɛ le nyinɔnɔ le ezo lɔ gbɔɔ, églui kpɔ juun yí nu mɔ: “Ŋsu cɛ can le koɖi.”
57 Vɔ Piɛ mɔ yí nu mɔ: “Nyɔnu cɛ, ŋjeshi ɖɛ go.”
58 Le hwenu kleŋ ɖe goduɔ, mɛbu kpɔɛ yí nu mɔ: “Eɔ can èle mɛ lɔwo mɛ.” Vɔ Piɛ nu mɔ: “Mɛgan, ŋle wo mɛ go.”
59 Le gaxoxo ɖeka han goduɔ, ŋsu bu tɔ nunu koɖo ŋsɛn mɔ: “Nyɔnɔnwi yɔ, ɖayɛ cɛ can le koɖi, ɖo Galiletɔ enyi hɛnnɛ!”
60 Vɔ Piɛ nu mɔ: “Ŋsu cɛ, ŋdenya enyɔ ci nukɔ èle o.” Enyɔ lɔ enukɔ vɔɔ yí kloklo ɖe atɔ.
61 Eyi Axwetɔ lɔ trɔ yí glo Piɛ kpɔ ɖaɖa yí Piɛ ɖo ŋwi enyɔ ci Axwetɔ lɔ nu hwenu enu ni mɔ: “Gbɔxwe kloklo aɖe atɔ gbɛɔ, àgbeŋ zetɔn.”
62 Eyi Piɛ to yi xexenu yí fan avin haan.
63 Ŋsu ciwo yí cɔcɔ Yesu tɔ zuzui yí xuxuiɛ;
64 wosɔ enu cɔn ŋmɛ ni yí nunuɔ ni mɔ: “Enyɔnuɖɛtɔ ènyiŋ? Nu mɛ ci yí xo eo!”
65 Wonu enyɔkpotu sugbɔ buwo do nu hɛnnɛ.
66 Ci eŋ keɔ, jumɛgawo gbɛbɔbɔ lɔ, avɔnsatɔwo gawo koɖo esekplamɛtɔwo va bɔ, wokplɔ Yesu yi wowo Sanhedrɛn lɔ mɛ yí biɔɛ se mɔ:
67 “Nɔ eo yí nyi Kristo lɔɔ, nui nɔ mì.” Vɔ énu do nu nɔ wo mɔ: “Nɔ ŋnui nɔ mí can ɔ, mídakando ji ɖeeɖe o.
68 Yí nɔ ŋbiɔ nyɔ mí se hɛnnɛɔ, mídaɖo ŋci o.
69 Vɔ so kakacɛ sɔ ɖedoɔ, Agbetɔvi lɔ anɔ nyinɔnɔ do ɖushi mɛ nɔ Mawu Ŋsɛntɔnɔ lɔ.”
70 Eyi wo pleŋ biɔɛ se mɔ: “Enyi eo yí nyi Mawu Vi nɛŋ?” Eyi enu nɔ wo mɔ: “Yinɛ míwoŋtɔwo mínunuɔ nɛ.”
71 Wonu mɔ: “Mìgbeʒan kunuɖetɔ bua? Ðo mìwoŋtɔwo yí si le aglan mɛ ni.”
