Eŋɛnywiwema Luiki Tɔ 23:1-56
23 Eyi mɛ lɔwo pleŋ so yí kplɔ Yesu yi Pilati gbɔ.
2 Wotɔ ehwɛ duidui mɔ: “Mìkpɔ ŋsu cɛ yí edodoɔ to nɔ mìwo jukɔn lɔ, égbe mɔ woŋgbecu taga nɔ Seza o yí nunuɔ mɔ eye yí nyi Kristo efyɔ lɔ.”
3 Eyi Pilati biɔɛ se mɔ: “Eo yí nyi Ʒuifuwo Fyɔ lɔa?” Yesu ɖo ŋci ni mɔ: “Yinɛ eoŋtɔ ènukɔ nɛ.”
4 Pilati nu nɔ avɔnsatɔwo gawo koɖo amɛahwa lɔ mɔ: “Ŋkpɔ hwɛ ɖe ado ŋsu cɛ ba.”
5 Vɔ wotɛ gbe do ji yí nu mɔ: “Enu ci ekplakpla amɛwo le Ʒude lɔ pleŋ na yí amɛwo fɔnfɔn gu do acɛkpakpa lɔ ji; étɔɛ ji so Galile keke va lɛ hɛnnɛ.”
6 Ci Pilati se ahan ɔ, ébiɔ se mɔ Galile yí ŋsu lɔ so ma.
7 Ci evanya mɔ eju ci yí Erodi kpakpa nɔ mɛ yí esoɔ, éɖui ɖaɖa Erodi, yɛ can le Ʒerusalɛmu le ŋkeke ŋtɔ́wo mɛ.
8 Ci Erodi kpɔ Yesu ɔ, eji jɔɛ sugbɔ. Éjijiɛ mɔ yeakpɔɛ yɛɔ, desɔ o. Ðo ése nyɔ sugbɔ so nu yí kpɔkpɔ emɔ mɔ yɛawa enujiŋ ɖewo nɔ yeakpɔ.
9 Eyi taɖo etɔ enyɔ sugbɔ biɔbiɔɛ se, vɔ Yesu deɖo eɖe ŋci ni o.
10 Ele ahan gan, avɔnsatɔwo gawo koɖo esekplamɛtɔwo sosoɔ gbɛmɛgbɛmɛ yí dokɔ hwɛwo yi koɖo adan.
11 Yi goduɔ, Erodi koɖo yi sɔjawo gbali, édo awu nyakpɔkpɔ ɖeka ni yí sɔ kuikɔ. Yi goduɔ, étrɔɛ ɖaɖa Pilati.
12 Erodi koɖo Pilati trɔ exlɔwo gbenɔgbe, ɖo wodenyinɔ sa o.
13 Eyi Pilati yɔ avɔnsatɔwo gawo, ejukplɔtɔwo koɖo jukɔn lɔ bɔ.
14 Énu nɔ wo mɔ: “Míkplɔ ŋsu cɛ vɛ nɔŋ mɔ yɛdodoɔ to nɔ jukɔn lɔ nɔ afɔn gu. Vɔ, míwo ŋmɛ yí ŋbiɔ enyɔwo yi se le yí ehwɛ ciwo míduidui ɖekpokpui dele mɛ nyɛŋnya o.
15 Erodi can dekpɔ ehwɛ ɖe yí dui o, eyi taɖo etrɔɛ ɖaɖa mì. Ŋsu cɛ dewa ŋɖe ci yí taɖo woawui o.
16 Eyi taɖo nadɔn to ni yí atashi.”
17 * ——
18 Vɔ amɛahwa lɔ pleŋ le axwa dokɔ mɔ: “Wu ŋsu cɛ* yí ajo Barabasi nɔ mì!”
19 (Egu yí ŋsu cɛ fɔn do acɛkpakpa lɔ nu yí gbewu amɛ taɖo woli do gakpa mɛ.)
20 Pilati gbexo nuxu nɔ wo ke, ɖo éji mɔ yeajo Yesu.
21 Eyi wotɔ axwa dodo yí nunuɔ mɔ: “Kin do aci nu! Kin do aci nu!”
22 Énu nɔ wo zetɔntɔ mɔ: “Nyi yí taɖoɔ? Agɔ ci ŋsu cɛ jeɔ? Ŋkpɔ ŋɖe ci yí na taɖo woawui ba; eyi taɖo nadɔn to ni yí atashi.”
23 Vɔ wogbedo axwa doji yí nunuɔ mɔ wu woawui* yí wowo xwadodo lɔ vawugan.
24 Eyi Pilati na gbe mɔ wo le wa ŋci wobiɔbiɔ mɔ yewoawa.
25 Éjo ŋsu ci womɔ yi le jo lɔ. Egu yí ŋsu cɛ fɔn do acɛkpakpa lɔ nu yí gbewu amɛ taɖo woli do gakpa mɛ, vɔ étashi Yesu nɔ wo keŋ nɔ woasɔ wa ŋci yí dro wo.
26 Ci wokplɔ Yesu yikɔɔ, wolé ŋsu ɖeka ci yí so bomɛ vayikɔ. Étɔ mɔ Simɔ yí so Sirɛnu, wodro efuntrenamɛci* lɔ ni mɔ yɛ le hin akplɔ Yesu do.
27 Vɔ amɛwo sugbɔ kpiŋ yí kplɔɛ do. Nyɔnuwo le avin fankɔ veviɖe do nu ni.
28 Yesu trɔ kpɔ nyɔnu lɔwo yí mɔ: “Ʒerusalɛmu nyɔnuwo, mími avin fanfan do nu nɔŋ. Míwoŋtɔwo koɖo míwo viwo míafan avin do nu nɔ.
29 Ðo kpɔ ɖa! Ŋkekewo li gbɔgbɔ yí amɛwo anu mɔ, ‘Nyɔnu konɔwo, mɛ ciwo yí deji evi kpɔ o koɖo mɛ ciwo yí dena anɔ evi kpɔ le kpɔ jijɔ!’
30 Eyi woatɔ nunu nɔ etowo mɔ, ‘Mímu je mì ji!’ yí anu nɔ eto hwɛhwɛwo mɔ, ‘Mícɔn mì ji!’
31 Nɔ wowawa ŋcɛwo hwenu aci lɔ le mumu ɖe, nyi yí ajɔ nɔ evaxuɔ?”
32 Wokplɔ ŋsu danuwatɔ amɛve ɖekawo hɛnnɛ yí ayi wu wo koɖo Yesu.
33 Ci woɖo fini woyɔnɔ mɔ Amɛtaxutɔxu ɔ, wokan Yesu koɖo danuwatɔ lɔwo do aci nu, mɛɖeka le ɖushi mɛ ni yí xlɔtɔ le emiɔ mɛ.
34 Vɔ Yesu nu mɔ: “Edanyɛ, sɔ ke wo, ɖo wodenya ŋci wakɔ wole o.” Wosɔ nu kpɔ do yi wuwo ji hɛnnɛ yí ma wo.
35 Eyi amɛwo le te yí kpɔkpɔ nu. Vɔ jumɛgawo kuikuiɛ yí nunuɔ mɔ: “Éhwlɛn mɛbuwo gan; nɔ eyɛ yí nyi Kristo Mawu tɔ lɔ ci wocan ɔ, le hwlɛn yiɖeki.”
36 Sɔja lɔwo can kuikui hɛnnɛ, wova gbɔ yí na vɛn hwanhwan yi
37 yí nu mɔ: “Nɔ Ʒuifuwo Fyɔ ènyiɔ, hwlɛn eoɖeki gan.”
38 Woŋwlɛ ŋɖeka do tamɛ ni hɛnnɛ mɔ: “Ʒuifuwo Fyɔ lɔ ke.”
39 Vɔ danuwatɔ ciwo wokan do aci nu le nɔtɔxu ɖeka gbalii yí nu mɔ: “De eo yí nyi Kristo lɔ ba? Hwlɛn eoɖeki gan yí ahwlɛn mìwo can!”
40 Amɛ amɛvetɔ lɔ gbe nyɔ ni mɔ: “Dèvɔnnɔ nɔ Mawu ŋtɔkpu ba? Eto ɖekɛ ŋmɛ lɔ yí wodɔndɔn nɔ eo koɖo yɛ.
41 Esɔgbe mɔ woadɔn to nɔ mìwo ahan, ɖo ŋciwo mìwa lɔzu yí mìɖukɔ, vɔ ŋsu cɛ yɛdeje agɔ ɖekpokpui o.”
42 Yi goduɔ, énu mɔ: “Yesu, ɖo ŋwiŋ hwenu àva ao Fyɔɖuxu lɔ mɛ.”
43 Eyi Yesu nu ni mɔ: “Nyɔnɔnwi ŋnukɔ nɔ eo gbɛ mɔ, àvanɔ Paradiso mɛ koɖoŋ.”
44 Gawive han* yí xoxoɔ, gan vinvin do le eju lɔ pleŋ mɛ keke na nɔ wetrɔ gatɔ̀n mɛ han.*
45 Ðo ewe klɛnklɛn degbeli o, eyi xɔmɛsovɔn ci yí le kɔkɔɛtɔxu lɔ zɛn do ve.
46 Eyi Yesu do axwa gangan ɖeka yí mɔ: “Danyɛ, ŋsɔ anyi gbɔngbɔn do alɔ̀ mɛ nɔ eo.” Ci enu ahan ɖegbɔɔ, éku.*
47 Ci sɔjawo ga lɔ kpɔ ŋci yí jɔɔ, ékanfu Mawu yí nu mɔ: “Amɛjɔjɔɛ yí ŋsu cɛ nyi nyao.”
48 Ci amɛahwa ciwo pleŋ yí bɔ do nɔ kpɔ ŋciwo yí jɔɔ, wotrɔ yi axwe yí xokɔ akɔnta koɖo vevisese.
49 Mɛ ciwo yí jeshi ɖɛ pleŋ le te le azɔge. Nyɔnu ciwo yí kplɔɛ do so Galile can le nɔtɔxu yí kpɔkpɔ ŋcɛwo.
50 Ŋsu ɖeka tɔ mɔ Ʒozɛfu yí le Ʒuifuwo Kojoɖoxu gangantɔ lɔ mɛ. Ényi amɛnywi yí gbewanɔ enujɔjɔɛ.
51 (Ŋsu cɛ dexɔ gbe do gbeju ci wobla koɖo wowo nuwanawo ji o.) Éso Arimate le Ʒude ju mɛ yí nɔkɔ te kpɔ Mawu Fyɔɖuxu lɔ.
52 Ŋsu cɛ yi Pilati gbɔ yí biɔ Yesu cɔ lɔ.
53 Eyi eɖi so aci lɔ nu yí sɔ lɛnvɔn cigan tɔ tro di keŋ yí sɔ mlɔ yɔdu* ɖeka mɛ. Woɖe yɔdu lɔ do ekpe mɛ yí wodeɖyi mɛɖe do mɛ kpɔ o.
54 Dradrado ŋkeke yɔ yí Sabati jikɔ atɔ ji.
55 Vɔ nyɔnu ciwo yí kplɔ Yesu do so Galile yi hɛnnɛ; wokpɔ yɔdu* ci mɛ wosɔ mlɔ koɖo lé wosɔ mlɔ mɛ do.
56 Eyi wotrɔ yi axwe keŋ adra enuhwɛnte koɖo amihwɛntewo do. Vɔ wogbɔn le Sabatigbe shigbe lé ese lɔ nui do nɛ.
Gɔnmɛnuŋwlɛnŋwlɛn
^ Kpɔ Enumɛɖeɖewo A3.
^ Yi gɔnmɛɖeɖe tiin: “Bu ŋmɛ ni.”
^ Alo “woakin do aci nu.”
^ Kpɔ Enyɔgbe Veviwo mɛ Ðeɖe.
^ Yi gɔnmɛɖeɖe tiin: “gaxoxo amadɛntɔ lɔ han.”
^ Yi gɔnmɛɖeɖe tiin: “gaxoxo amashiɖekɛtɔ lɔ han.”
^ Alo “yi gbɔngbɔn ɖo te.”
^ Alo “eŋwiɖoɖo yɔdu.”
^ Alo “eŋwiɖoɖo yɔdu.”
