Eŋɛnywiwema Maki Tɔ 1:1-45
-
Ʒan Amɛʒindoshimɛtɔ nunuɔ Mawu nyɔ (1-8)
-
Ʒinʒindoshimɛ Yesu tɔ (9-11)
-
Satana te Yesu kpɔ (12, 13)
-
Yesu tɔ Mawu nyɔ nunu le Galile (14, 15)
-
Enukplavi ŋkɔtɔ ciwo Yesu yɔ (16-20)
-
Yesu nya gbɔngbɔn makɔmakɔwo ti le amɛwo mɛ (21-28)
-
Yesu da dɔ̀ nɔ amɛ sugbɔ le Kapɛrnawumu (29-34)
-
Yesu do gbe ɖaɖa yiɖekɛ le fini mɛɖe dele o (35-39)
-
Yesu da dɔ̀ nɔ kponɔ ɖeka (40-45)
1 Lé eŋɛnywi ci yí xo nuxu so Yesu Kristo, Mawu Vi lɔ nu tɔ ji do ke:
2 Enyɔnuɖɛtɔ Ezai ŋwlɛ ɖɛ mɔ: “(Kpɔ ɖa! Ŋdɔdɔ anyi ŋɛdotɔ ɖaɖa ŋkɔ nɔ eo,* áje ŋkɔ nɔ eo yí adra emɔ ji do ɖɛ nɔ eo.)
3 Mɛɖeka dodoɔ axwa le zogbeji yí nunuɔ mɔ: ‘Mídra Yehowa* mɔ do! Míwɛ nɔ yi mɔwo ajɔ.’”
4 Ʒan Amɛʒindoshimɛtɔ va zogbeji yí drakɔ Mawu nyɔ nɔ amɛwo mɔ woɖo awa ʒinʒindoshimɛ asɔ dasɛ mɔ yewotrɔ ji mɛ, nɔ woasɔ nuvɔnwo ke wo.
5 Eyi mɛ ciwo pleŋ yí le Ʒude kan mɛ koɖo Ʒerusalɛmutɔwo pleŋ vanɔ gbɔ yí eʒinnɔ* wo do Ʒurdɛn Tɔsasa lɔ mɛ yí wohunnɔ wowo nuvɔnwo mɛ le jugbaja.
6 Ʒan do awu ci wosɔ esɔkpotɔnɔfu sɔ wa yí sɔ elangbaza kpablanu bla do alin. Ejawo koɖo enyishi gbemɛtɔ yí nyi yi ŋɖuɖu.
7 Eyi enukɔ nɔ amɛwo mɔ: “Mɛɖeka gbɔgbɔ yí sɛnŋ wuŋ, ŋdeje abubɔ acu yi fɔkpakawo o.
8 Eshi mɛ yí nyɛŋʒinkɔ mí do, vɔ gbɔngbɔn kɔkɔɛ yɛasɔ wa ʒinʒindoshimɛ nɔ mí.”
9 Le ŋkeke ŋtɔ́wo mɛɔ, Yesu so Nazarɛti le Galile va yí Ʒan ʒin do Ʒurdɛn Tɔsasa lɔ mɛ.
10 Ci eto le eshi lɔ mɛ kakaɔ, ékpɔ jeŋkwi hun yí gbɔngbɔn kɔkɔɛ ɖyi va ji shigbe hwanlin nɛ.
11 Eyi egbe ɖeka ɖyi so jeŋkwi mɛ yí nu mɔ: “Eo yí nyi Vinyɛ ci kɔ ŋdelɔnnɔ nu le o. Ao nu kpenɔ nɔŋ.”
12 Zeɖeka tɔntɔn ɔ, gbɔngbɔn lɔ sɔɛ yi zogbeji.
13 Éwa ŋkeke 40 le zogbe lɔ ji yí Satana ti kpɔ. Énɔ koɖo gbemɛlanwo, vɔ mawudɔlawo kpedo nu.
14 Ci wolé Ʒan goduɔ, Yesu yi Galile yí drakɔ Mawu ŋɛnywi lɔ.
15 Énunuɔ mɔ: “Gamɛ ci woɖo ɖɛ lɔ sun yí Mawu Fyɔɖuxu lɔ gogo. Mítrɔ ji mɛ, yí axɔ eŋɛnywi lɔ ji se.”
16 Hwenu Yesu zɔn Galile Xu lɔ tu vayikɔɔ, ékpɔ Simɔ koɖo nɔviɛ Andre yí wodakɔ wowo ɖɔ̀wo do axu lɔ mɛ, ɖo eɖɔ̀datɔwo yí wonyi.
17 Eyi Yesu nu nɔ wo mɔ: “Míkplɔ ŋdo nɔ masɔ mí wa eɖɔ̀datɔ ciwo yí alénɔ agbetɔwo.”*
18 Wotashi wowo ɖɔ̀ lɔwo ɖɛ le afɔdumɛ yí kplɔɛ do.
19 Ci eyi ŋkɔ hwɛɖekaɔ, ékpɔ Ʒaki, Zebede viɛ koɖo nɔviɛ Ʒan yí wole tɔjihun mɛ yí dradra wowo ɖɔ̀wo do.
20 Éyɔ wo zeɖeka le afɔdumɛ. Eyi wotashi wowo da Zebede koɖo mɛ ciwo yí wakɔ edɔ ni do tɔjihun lɔ mɛ yí kplɔɛ do.
21 Woyi Kapɛrnawumu.
Ci Sabati ŋkeke lɔ tɔ ji zeɖekaɔ, éyi Ʒuifuwo nukplaxu yí tɔ enu kplakpla amɛwo.
22 Eyi lé ekpla nu amɛ do kpaca amɛwo, ɖo ékpla nu lɔ shigbe mɛ ci yí xɔ ŋsɛn so Mawu gbɔ nɛ yí dewɛ shigbe esekplamɛtɔwo nɛ o.
23 Hwenɔnuɔ, ŋsu ɖeka ci gbɔngbɔn makɔmakɔ ɖeka dokɔ aya nɔ le enukplaxu lɔ. Édo axwa mɔ:
24 “Yesu Nazarɛtitɔ, enyɔ ci yí le gblamɛ nɔ mìwo koɖo eoɔ? Èva yí agu mì yɔa? Ŋnya mɛ ci ènyi nywiɖe, Amɛkɔkɔɛ Mawu tɔ ènyi!”
25 Vɔ Yesu wa adan do gbɔngbɔnvɔn lɔ mɔ: “Bɔ nu yí ato le mɛ!”
26 Ci gbɔngbɔn makɔmakɔ lɔ hunhun ŋsu lɔ sɛnsinɖe ɖegbɔɔ, édo axwa cicici yí to le mɛ.
27 Ékpaca mɛ ciwo pleŋ yí le nɔ yí wotɔ nunu le wowoɖeɖewo mɛ mɔ: “Nyi yí nyi cɛɔ? Enu yoyu yí ekplakɔ mì! Éɖo acɛ keke yí ɖekɔ gbe nɔ gbɔngbɔnvɔnwo ŋtɔkpu yí woseseɛ gbe ni.”
28 Eyi zeɖeka tɔntɔn ɔ, yi nyɔ gban kpedo fishiafi le Galile ju lɔ mɛ.
29 Ci woso le Ʒuifuwo nukplaxu lɔɔ, woyi Simɔ koɖo Andre xwe mɛ. Ʒaki koɖo Ʒan can yi koɖo wo.
30 Vɔ vuvɔfu wakɔ Simɔ ashiɛnɔ yí ele nyimlɔxu. Wonu yi nyɔ nɔ Yesu zeɖeka.
31 Yesu yi gbɔ yí lé alɔ̀ ni yí fuin do te. Eyi vuvɔfu lɔ mi ni yí exɔ wo mɛdru.
32 Fiɛfi ci ewe yi xɔɔ, wotɔ mɛ ciwo pleŋ yí ble koɖo mɛ ciwo gbɔngbɔnvɔnwo dokɔ aya nɔ kplɔkplɔ va gbɔ.
33 Yí eju lɔ pleŋ va bɔ do ehɔn lɔ gbɔ.
34 Eyi eda dɔ̀ nɔ amɛ sugbɔ ciwo yí lé edɔ̀ hamɛhamɛwo. Énya gbɔngbɔnvɔn sugbɔ ti le amɛwo mɛ, vɔ detanɔshi gbɔngbɔnvɔn lɔwo yí woxonɔ nuxu o. Ðo wonya mɔ eyi nyi Kristo* lɔ.
35 Nyidin fɔnfɔnmɛ hwenu eŋ dekpɔ ke nywiɖeɔ, éto yí yi fini mɛɖe dele o yí tɔ egbe dodo ɖa.
36 Vɔ Simɔ koɖo yi kpenawo ji kpɔ keke.
37 Eyi ci wovakpɔɛɔ, wonu ni mɔ: “Mɛshiamɛ jijiɛ eo kpɔ.”
38 Vɔ énu nɔ wo mɔ: “Mìayi fibu, eju ciwo yí gogo lɛtɔxuwo mɛ keŋ nɔ manu Mawu nyɔ le nɔtɔxuwo hɛnnɛ. Ðo eyi taɖo ŋva.”
39 Édan to Galile ju lɔ pleŋ mɛ yí nukɔ Mawu nyɔ le Ʒuifuwo nukplaxuwo yí nyakɔ gbɔngbɔnvɔnwo ti le amɛwo mɛ.
40 Le nɔɔ, kponɔ ɖeka va gbɔ yí ɖe kuku ni keke je klo ji ni yí mɔ: “Ŋnya mɔ nɔ èlɔn ɔ, àwɛ yí namɛ́ dru.”
41 Yi nu sadɔnu nɔ Yesu yí edo alɔ̀ ɖaɖa yí tɔ alɔ̀ yi yí nu ni mɔ: “Ŋlɔn! Gbaza le mɛ́ nɔ eo.”
42 Eyi kpodɔ̀ lɔ vɔ ni zeɖeka le afɔdumɛ yí gbaza mɛ ni.
43 Yesu do se ni veviɖe yí nu ni zeɖeka mɔ yɛ le yi.
44 Énu ni hɛnnɛ mɔ: “Ŋgbenu nɔ mɛɖe o. Vɔ so yi dasɛ eoɖeki nɔ avɔnsatɔ yí ana ŋciwo Moizi mɔ wo le na, ɖo gbaza mɛ nɔ eo, keŋ nɔ avɔnsatɔwo anya mɔ edɔ̀ mi nɔ eo.”
45 Vɔ ci ŋsu lɔ ɖedoɔ, étɔ enyɔ lɔ nunu nɔ mɛshiamɛ yí enyɔ lɔ gban kpedo fishiafi keke Yesu degbesun ji yí ɖonɔ eju ɖe mɛ gannaganna o. Vɔ écinɔ eju lɔ godu fini amɛwo dele o. Ci enyi ahan can ɔ, amɛwo kpɔtɔ sonɔ fishiafi yí vanɔ gbɔ.
Gɔnmɛnuŋwlɛnŋwlɛn
^ Yi gɔnmɛɖeɖe tiin: “ɖaɖa ŋmɛ nɔ eo.”
^ Kpɔ Enumɛɖeɖewo A5.
^ Alo “éʒinnɔ wo do eshiɛ mɛ wobunɔ keŋkeŋ.”
^ Alo “amɛwo.”
^ Alo taŋfuin, “wonya mɛ ci ŋmɛ enyi.”
