Eŋɛnywiwema Maki Tɔ 10:1-52
-
Alɔlele koɖo nɔnɔgbegbe (1-12)
-
Yesu cu shi nɔ ɖeviwo (13-16)
-
Enyɔ ci ŋsu hotɔnɔ ɖeka biɔ se (17-25)
-
Vɔnsawo wawa do Fyɔɖuxu lɔ ŋci (26-31)
-
Yesu gbenu yi ku nyɔ ɖɛ (32-34)
-
Ŋci Ʒaki koɖo Ʒan biɔ (35-45)
-
Yesu va keŋ asɔ yi gbe na do ta nɔ amɛ sugbɔ (45)
-
-
Yesu da dɔ̀ nɔ ŋkuvitɔnnɔ ci yí tɔ mɔ Bartime (46-52)
10 Yesu so le nɔ yí va Ʒude lixowo ji le Ʒurdɛn tɔsasa godu. Eyi amɛahwa ɖekawo gbeva trɔdi yí shigbe lé ewɛni nɛɔ, égbetɔ enu kplakpla wo.
2 Eyi Farizitɔwo va Yesu gbɔ mɔ yewoadui kpɔ yí biɔɛ se mɔ, ese ɖe emɔ mɔ ŋsu agbe ashiɛ ma.
3 Éɖo ŋci nɔ wo mɔ: “Ese ci Moizi do nɔ míɔ?”
4 Woɖo ŋci mɔ: “Moizi na gbe mɔ wo le ŋwlɛ nyɔnugbegbewema yí agbe nyɔnu lɔ.”
5 Vɔ Yesu nu nɔ wo mɔ: “Ci eji mɛ sɛnŋ nɔ mí taɖo Moizi ŋwlɛ ese cɛ nɔ mí.
6 Gan so gɔnmɛjeje nɔ enuwawawoɔ, ‘Asu koɖo ashi yí Mawu wa wo.
7 Eyi taɖo, ŋsu aso gbeɖe dalɔ koɖo nɔlɔ ɖɛ
8 yí wo koɖo ve lɔ atrɔ lankpu kuɖeka.’ Eyi wodegbenyi amɛ amɛve o, vɔ lankpu ɖeka.
9 Eyi taɖo, ŋci Mawu bla do ɖekɛɔ, mɛɖe ŋgbema mɛ o.”
10 Ci wogbeva axwe mɛɔ, enukplavi lɔwo tɔ enyɔ biɔbiɔ yi se so nyɔ lɔ nu.
11 Énu nɔ wo mɔ: “Mɛɖekpokpui ci yí gbe ashiɛ keŋ yí ɖe mɛbuɔ, éwa hashi yí je agɔ do nyɔnu lɔ
12 yí nɔ nyɔnu ɖe gbe asuɔ keŋ yí ɖe mɛbuɔ, éwa hashi.”
13 Amɛwo tɔ ɖeviwo kplɔkplɔ va gbɔ nɔ atɔ alɔ̀ wo, vɔ yi nukplaviwo gbe nɔ wo.
14 Ci Yesu kpɔɛ ahan ɔ, éve nu yí enu nɔ wo mɔ: “Mítashi ɖeviɛwo nɔ woava ŋgbɔ, míŋgbexe mɔ nɔ wo o. Ðo mɛ ciwo yí le shigbe wowo hannɛ tɔ yí Mawu Fyɔɖuxu lɔ nyi.
15 Ŋnukɔ nɔ mí le nyɔnɔnwi mɛ mɔ, mɛɖekpokpui ci yí dexɔ Mawu Fyɔɖuxu lɔ shigbe ɖevihwɛ hannɛɔ, datɛnŋ ayi mɛ o.”
16 Eyi exɔ ɖevi lɔwo do alɔ̀ mɛ yí sɔ alɔ̀ da do wo ji yí yra wo.
17 Ci Yesu yikɔɔ, ŋsu ɖeka lɔ ju va gbɔ yí je klo ji ni yí biɔɛ se mɔ: “Enukplamɛtɔ nywi, nyi ŋɖo awa keŋ akpɔ agbe mavɔɔ?”
18 Yesu nu ni mɔ: “Nyi yí taɖo èyɔkɔŋ mɔ amɛnywiɔ? Mɛɖekpokpui denyi amɛnywi sɔ zeto amɛ kuɖeka nu o, eyi nyi Mawu.
19 Èjeshi ese lɔwo: ‘Ŋgbewu amɛ o, ŋgbewa hashi o, ŋgbefi fi o, ŋgbekan ŋsu do nu nɔ amɛ o, ŋgbetafu amɛ o, bu dao koɖo nɔo.’”
20 Ŋsu lɔ nu ni mɔ: “Enukplamɛtɔ, ŋwakɔ ŋcɛwo pleŋ so vihwɛ mɛ ɖii.”
21 Yesu kpɔɛ juun yí luin yí nu ni mɔ, “Ŋɖeka kpɔtɔ nɔ eo: Yi sa ao nuwo yí asɔ eho lɔ na wamɛnɔwo yí awa dɔkunuwo ɖɛ le jeŋkwi mɛ; yi goduɔ, nàkplɔ ŋdo.”
22 Vɔ enyɔ lɔ ku lanmɛ ni yí eɖedo ŋshishitɔ, ɖo enu sugbɔ le shi.
23 Yesu glo amɛwo kpɔ trɔdo yí nu nɔ yi nukplaviwo mɔ: “Mawu Fyɔɖuxu lɔ mɛ ɖoɖo agbɔnnu nɔ ehotɔnɔwo kekeɖe!”
24 Vɔ yi nyɔ lɔwo kpaca yi nukplaviwo. Eyi taɖo Yesu gbetrɔ yí nu nɔ wo mɔ: “Vinyɛwo, Mawu Fyɔɖuxu lɔ mɛ ɖoɖo agbɔnnu kekeɖe!
25 Ale fafɛɖe nɔ esɔkpotɔnɔ mɔ ato tɔnnyi tu mɛ sɔwu nɔ dɔkunɔ mɔ aɖo Mawu Fyɔɖuxu lɔ mɛ.”
26 Égbekpaca wo doji yí wobiɔɛ se* mɔ: “Mi yí atɛnŋ akpɔ hwlɛngan ɔ?”
27 Yesu kpɔ ŋmɛ nɔ wo juun yí nu nɔ wo mɔ: “Agbetɔwo gbɔ yí aglo le, vɔ danyi ahan nɔ Mawu o. Ðo ŋɖe deglonɔ Mawu o.”
28 Piɛ nu ni mɔ: “Kpɔ ɖa! Mìgbe nuwo pleŋ ɖɛ yí kplɔ eo do.”
29 Yesu mɔ: “Ŋnukɔ nɔ mí le nyɔnɔnwi mɛ mɔ, mɛɖekpokpui ci yí tashi axwe, fofo alo nɔviwo, enɔ alo eda, eviwo alo agblewo do anyi ŋkɔ koɖo eŋɛnywi lɔ ŋciɔ,
30 ákpɔ axwewo, fofowo, nɔviwo, enɔwo, eviwo koɖo agblewo wu donu sanŋdi ɖeka le kakacɛ mɛ sɔ kpe nɔ yumɛcici yí le xexe* ci yí gbɔgbɔ mɛɔ, ákpɔ agbe mavɔ.
31 Vɔ amɛ sugbɔ ciwo yí nyi ŋkɔtɔwo avanyi godutɔwo yí amɛ godutɔwo avanyi ŋkɔtɔwo.”
32 Ecɛyɛɔ, wosɔ emɔ kpe Ʒerusalɛmu. Yesu le ŋkɔ nɔ wo yí ekpaca wo; mɛ ciwo yí kplɔ wo do tɔ vɔnvɔn. Égbeyɔ Amɛ Wive lɔwo do akpo yí tɔ ŋciwo yí jikɔ ajɔ do ji nunu nɔ wo mɔ:
33 “Míkpɔa? Mìyikɔ Ʒerusalɛmu. Eyi woasɔ Agbetɔvi lɔ do alɔ̀ mɛ nɔ avɔnsatɔwo gawo koɖo esekplamɛtɔwo. Woaso eku kojo ni yí asɔ do alɔ̀ mɛ nɔ jukɔn bu mɛ tɔwo,
34 keŋ nɔ woakui, acu tan do nu, ayɛ koɖo lanŋba yí awui. Vɔ woafuin do agbe le ŋkeke amɛtɔntɔ lɔ gbe.”
35 Ʒaki koɖo Ʒan ciwo yí nyi Zebede viwo va gbɔ yí nu ni mɔ: “Enukplamɛtɔ, mìji mɔ ŋɖekpokpui ci mìabiɔ eoɔ, nàwɛ nɔ mì.”
36 Ébiɔ wo se mɔ: “Nyi míji mɔ mawa nɔ míɔ?”
37 Woɖo ŋci mɔ: “Nà gbe nɔ mìanɔ axa nɔ eo hwenu àkpakpa acɛ le ao Fyɔɖuxu lɔ mɛ. Mɛɖeka anɔ ɖushi mɛ nɔ eo yí mɛɖeka anɔ emiɔ mɛ.”
38 Vɔ Yesu nu nɔ wo mɔ: “Mídenya ŋci biɔkɔ míle o. Míakpe ji anu enu ci ŋnukɔ yí awa ʒinʒindoshimɛ ci ŋwakɔa?”
39 Woɖo ŋci ni mɔ: “Mìakpe ji.” Eyi Yesu nu nɔ wo mɔ: “Ŋci ŋnukɔɔ, míanui yí ʒinʒindoshimɛ ci ŋwakɔɔ, míawɛ.
40 Vɔ ŋdeɖo acɛ ana gbe mɛɖe mɔ, yɛ le nɔ ɖushi mɛ alo emiɔ mɛ nɔŋ o. Mɛ ciwo Mawu dra texwe lɔwo do ɖɛ nɔ tɔwo yí wonyi.”
41 Ci amɛ amɛ́wo kpɛtɛwo se nyɔ lɔɔ, wodo dɔmɛzi do Ʒaki koɖo Ʒan.
42 Vɔ Yesu yɔ wo va yiɖeki gbɔ yí nu nɔ wo mɔ: “Mínya mɔ mɛ ciwo wokpɔnɔ mɔ wonyi* egawo ɖunɔ axwetɔ do jukɔnwo ji yí mɛ ciwo yí gangan wu kpanɔ nɔ wo.
43 Deɖo anyi ahan le míwo mɛ o; vɔ mɛɖekpokpui ci yí ji mɔ, yeanyi amɛ gangan le mí mɛ ɖo anyi dɔwavi nɔ mɛkpɛtɛwo.
44 Yí mɛɖekpokpui ci yí ji mɔ, yeanyi amɛ ŋkɔtɔ le mí mɛ ɖo anyi hwashi nɔ mɛshiamɛ.
45 Ðo Agbetɔvi lɔ ŋtɔkpu can deva mɔ woasumɔ ye o, vɔ éva mɔ yeasumɔ amɛwo yí asɔ ye gbe* cu tafɛn do ta nɔ amɛ sugbɔ.”
46 Wovaɖo Ʒeriko. Vɔ ci yɛ koɖo yi nukplaviwo koɖo amɛahwa gangan ɖeka totoɔ le Ʒeriko ju lɔ mɛɔ, Bartime (Time vi) ci yí nyi ŋkuvitɔnnɔ koɖo enubiɔtɔ le nyinɔnɔ le mɔ tu.
47 Ci ese mɔ Yesu Nazarɛtitɔ lɔ yɔɔ, étɔ axwa dodo mɔ: “Yesu, Davidi Vi, ku ŋshishi nɔŋ!”
48 Eyi amɛ sugbɔ tɔ adan wawa di mɔ yɛ le bɔ nu. Vɔ égbedo axwa doji mɔ: “Davidi Viɛ, ku ŋshishi nɔŋ!”
49 Eyi taɖo Yesu ci te yí mɔ: “Míyɔɛ vɛ nɔŋ.” Eyi woyɔ ŋsu ŋkuvitɔnnɔ lɔ yí nu ni mɔ: “Ŋgbevɔn o! So je te, éyɔyɔ eo.”
50 Éɖe awu jitɔ yitɔ dɔŋkpe yí so hayaŋ yí yi Yesu gbɔ.
51 Eyi Yesu biɔɛ se mɔ: “Nyi èji mɔ mawa nɔ eoɔ?” Ŋsu ŋkuvitɔnnɔ lɔ nu ni mɔ: “Raboni,* wɛ nɔ magbetɔ enu kpɔkpɔ.”
52 Yesu nu ni mɔ: “So yi. Xɔse ci èɖo na edɔ̀ mi nɔ eo.” Eyi zeɖeka tɔntɔn ɔ, étɔ enu kpɔkpɔ yí kplɔ Yesu do koɖo amɛahwa lɔ.
Gɔnmɛnuŋwlɛnŋwlɛn
^ Alo taŋfuin, “wobiɔ wowonɔnɔwo se.”
^ Kpɔ Enyɔgbe Veviwo mɛ Ðeɖe.
^ Alo “mɛ ciwo wojeshi ɖɛ mɔ wonyi.”
^ Alo “ese.”
^ Yi gɔnmɛ yí nyi “Enukplamɛtɔ.”
