Eŋɛnywiwema Maki Tɔ 11:1-33
11 Ecɛyɛ ci wogogokɔ Ʒerusalɛmu yí vaɖo Eto Olivuciwo tɔ ji, fini Bɛtifaʒe koɖo Betani leɔ, Yesu dɔ yi nukplavi amɛve ɖaɖa
2 yí nu nɔ wo mɔ: “Míyi kɔxwi ci míkpɔkpɔ ɖaa mɛ. Nɔ míɖo mɛ kakaɔ, míakpɔ esɔkɛtɛvi ɖeka le ka mɛ; mɛɖekɛ dede ji kpɔ o. Mícu ka ni yí ahin va lɛ.
3 Nɔ mɛɖe biɔ mí se mɔ, ‘Nyi yí taɖo mícucuɔ ka ni maɔ,’ mínu ni mɔ: ‘Axwetɔ lɔ yí ʒin. Ágbetrɔɛ ɖaɖa sabaɖe yɛ.’”
4 Woyi yí kpɔ esɔkɛtɛvi lɔ le ka mɛ le ŋkɔ nɔ ehɔn ɖeka le mɔ tu yí wocui.
5 Vɔ mɛ ciwo yí le te le nɔ ɖewo biɔ wo se mɔ: “Nyi yí taɖo mícucuɔ ka nɔ esɔkɛtɛvi lɔɔ?”
6 Woɖo ŋci nɔ wo shigbe lé Yesu nui nɔ wo do nɛ; eyi wotashi wo yí woyi.
7 Wokplɔ esɔkɛtɛvi lɔ vɛ nɔ Yesu yí sɔ awu jitɔ wowotɔwo da do ji yí enɔ nyinɔnɔ do ji.
8 Amɛ sugbɔ sɔ awu jitɔ wowotɔwo ɖo do emɔ lɔ ji hɛnnɛ yí mɛbuwo so acimawo le bojiwo yí ɖo do emɔ lɔ ji.
9 Mɛ ciwo yí le ŋkɔ koɖo mɛ ciwo yí kplɔɛ do dodoɔ axwa mɔ: “Mìɖe kuku hwlin gan! Woacu shi nɔ mɛ ci yí gbɔgbɔ le Yehowa* ŋkɔ mɛ!
10 Wocu shi nɔ mìwo da Davidi Fyɔɖuxu ci yí gbɔgbɔ! Mìɖe kuku hwlin gan, eo ci yí le jeŋkwi mɛ ɖaa!”
11 Yesu yi Ʒerusalɛmu yí ɖo gbedoxɔ lɔ mɛ yí glo afiwo pleŋ kpɔ. Vɔ ci ezan tɔ dodoɔ, éso yi Betani koɖo Amɛ Wive lɔwo.
12 Yi ŋkegbu ci wososoɔ le Betani ɔ, shive ci.
13 Ékpɔ amawo le figici ɖeka ji le azɔge. Eyi eyi kpɔ mɔ yeakpɔ ŋɖe le ji ma. Ci evayi ɖoɔ, amawo ɖekɛ yí ekpɔ le ji, ɖo denyi figisɛnsɛn hwenu yɔ o.
14 Eyi taɖo enu nɔ figici lɔ mɔ: “Mɛɖe dagbeɖu ao sɛnsɛn kpɔ gbeɖe o.” Eyi yi nukplaviwo si.
15 Ecɛyɛ wova Ʒerusalɛmu. Éyi gbedoxɔ mɛ le nɔ yí tɔ mɛ ciwo yí sasa nu koɖo mɛ ciwo yí xwlexwleɛ nu nyanya ti le gbedoxɔ lɔ mɛ. Éfli mɛ ciwo yí ɖɔkɔli ehowo kplɔnwo koɖo mɛ ciwo yí sakɔ hwanlin ʒinkpinwo.
16 Delɔn yí mɛɖe sɔ ŋɖe to gbedoxɔ lɔ mɛ vayi o.
17 Ékpla nu wo yí nu nɔ wo mɔ: “Wodeŋwlɛ do Mawu Nyɔ lɔ mɛ ɖɛ mɔ, ‘Woayɔ anyi xwe mɔ gbedoɖawaxu nɔ jukɔnwo pleŋ ba’? Vɔ míwo sɔ trɔ flafiwo nɔxu.”
18 Avɔnsatɔwo gawo koɖo esekplamɛtɔwo se enyɔ ci Yesu nu yí tɔ emɔ jiji mɔ yewoawui. Wovɔnvɔn ni, ɖo yi nukplamuwo kpaca amɛahwa lɔ pleŋ.
19 Fiɛfimɛɔ, woso le eju lɔ mɛ.
20 Vɔ ci wovayikɔ nyidin fɔnfɔnmɛɔ, wokpɔ mɔ figici lɔ ku xoxo keke kɔ do ekewo ji.
21 Piɛ ɖo ŋwi ŋci yí jɔ yí nu ni mɔ: “Rabi, kpɔ ɖa! Figici ci èsɛn kpɛn nɔ lɔ ku do te.”
22 Yesu nu nɔ wo mɔ: “Míkando Mawu ji.
23 Ŋnukɔ nɔ mí le nyɔnɔnwi mɛ mɔ mɛɖekpokpui ci yí anu nɔ eto cɛ mɔ, ‘So ayi je axu mɛ’ yí dexo nu kpɔ le yi ji mɛ o, vɔ yí kando nyɔ ci enukɔ ji mɔ yɛavamɛɔ, ajɔ do ji.
24 Eyi taɖo ŋnukɔ nɔ mí mɔ enu ciwo pleŋ mídonɔ gbe ɖaɖa yí biɔnɔɔ, míkando ji mɔ míxɔ wo vɔ, eyi míaxɔ wo.
25 Nɔ míle te yí dokɔ gbe ɖaɖaɔ, mísɔ ŋɖekpokpui ci amɛwo wa do mí ke wo, eyi míwo Da ci yí le jeŋkwi mɛ can asɔ míwo gɔjejewo ke mí hɛnnɛ.”
26 * ——
27 Wogbetrɔ va Ʒerusalɛmu. Eyi ci eto gbedoxɔ lɔ mɛ yikɔɔ, avɔnsatɔwo gawo, esekplamɛtɔwo koɖo jumɛgawo va
28 yí biɔɛ se mɔ: “Acɛ ci èɖo yí wakɔ ŋcɛwoɔ? Alo mi yí na acɛ eo yí èsɔ wakɔ enu lɔwoɔ?”
29 Yesu nu nɔ wo mɔ: “Nabiɔ nyɔ ɖeka mí se, nɔ míɖo ŋci nɔŋ ɔ, nanu acɛ ci ŋɖo yí sɔ wakɔ ŋcɛwo nɔ mí.
30 Fini Ʒan kpɔ acɛ so yí sɔ ʒin amɛwo do shi mɛɔ? Jeŋkwi mɛa alo agbetɔwo gbɔ? Mínui nɔŋ.”
31 Eyi wotɔ drɔdrɔɛ kpɔ le wowoɖeɖewo mɛ mɔ: “Nɔ mímɔ, ‘Jeŋkwi mɛ exɔɛ soɔ,’ ábiɔ mì se mɔ, ‘Nyi yí taɖo mídekando jiɔ?’
32 Vɔ mìagbe dɔn amɔ, ‘agbetɔwo gbɔ esoa’?” Wovɔnvɔn nɔ amɛahwa lɔ, ɖo wo pleŋ kpɔnɔ Ʒan mɔ yɛnyi enyɔnuɖɛtɔ ŋtɔŋtɔ.
33 Eyi taɖo woɖo ŋci nɔ Yesu mɔ: “Mìdenya o.” Yesu nu nɔ wo mɔ: “Nyɛ can ŋdanu fini ŋxɔ acɛ so yí wawa ŋcɛwo nɔ mí o.”
