Eŋɛnywiwema Maki Tɔ 12:1-44
-
Labalu ci Yesu do so agbledetɔ amɛwutɔwo nu (1-12)
-
Ŋci woasɔ nɔ Mawu koɖo ŋci woasɔ nɔ Seza (13-17)
-
Wobiɔ nyɔ se so fɔnfɔnsoku nu (18-27)
-
Ese amɛve ciwo yí gangan wu (28-34)
-
Kristo nyi Davidi via? (35-37a)
-
Yesu nu nɔ yi nukplaviwo mɔ wo le cɔ wowoɖekiwo le esekplamɛtɔwo nu (37b-40)
-
Gajunho hwɛhwɛ amɛve ciwo kposhu wamɛnɔ ɖeka na (41-44)
12 Étɔ nuxu xoxo yí dokɔ labaluwo nɔ wo mɔ: “Ŋsu ɖeka de vɛngble yí cu kpa trɔdi yí wa vɛnfiɔnxu do mɛ. Écu exɔ yiji ɖeka ci mɛ woanɔ yí acɔ agble lɔ do mɛ. Ésɔ na agbledetɔwo nɔ woade dema keŋ yí xɔ mɔ yi eju bu mɛ.
2 Ci hwenu ɖo yí woagbɛn vɛnsɛnsɛn lɔwoɔ, édɔ yi hwashi ɖeka ɖaɖa agbledetɔ lɔwo mɔ le yi xɔ vɛnsɛnsɛn ɖewo le wo gbɔ vɛ.
3 Vɔ woli yí xui yí nyi ashigba alɔgba.
4 Égbedɔ hwashi bu ɖaɖa. Wosɔ nu xo ta nɔ yɛ yí do ŋkpɛn yi.
5 Égbedɔ ebu ɖaɖa. Vɔ wowu yɛ. Eyi egbevadɔ amɛ sugbɔ buwo ɖaɖa. Woxo ɖewo yí wu ɖewo.
6 Le vɔvɔnuɔ, botɔ lɔ vaɖo eviɛ vevi ɖaɖa agbledetɔ lɔwo yí mɔ, ‘Woashi ŋmɛ nɔ vinyɛ.’
7 Vɔ agbledetɔ lɔwo nu le wowoɖeɖewo mɛ mɔ, ‘Cinɔɖutɔ lɔ ke. Míva mìawui nɔ cinɔnu lɔ atrɔ mìwotɔ.’
8 Eyi taɖo woli yí wui yí sɔ dɔŋkpe do vɛngble lɔ godu.
9 Nyi botɔ lɔ awaɔ? Áva yí awu agbledetɔ lɔwo keŋ asɔ vɛngble lɔ jo nɔ mɛbuwo.
10 Mídehlɛn enuŋwlɛŋwlɛ cɛ kpɔ ba? Womɔ: ‘Ekpe ci exɔcutɔwo gbeɔ, eyi vatrɔ zoguijikpe* vevitɔ.
11 Yehowa* yí dɔ enyi ahan, eyi enyi enu gangan le ŋmɛ nɔ mì.’”
12 Esekplamɛtɔwo koɖo avɔnsatɔwo gawo ji mɔ yewoali, vɔ wovɔn nɔ amɛahwa lɔ. Ðo wonya mɔ yewo ŋci yí edo labalu lɔ. Eyi taɖo woso gbeɖi ɖɛ.
13 Yi goduɔ, woɖo Farizitɔ ɖewo koɖo Erodi gbɛbɔbɔ mɛ tɔ ɖewo ɖaɖa keŋ nɔ woali le yi nuxuwo mɛ.
14 Ci wovaɖoɔ, wonu ni mɔ: “Enukplamɛtɔ, mìnya mɔ ètonɔ nyɔnɔnwi yí dènɔnɔ mɛɖe ji o, ɖo denyi lé amɛwo le do le agogbe nu èkpɔnɔ do yí sɔ wanɔ nu do wo nu o. Vɔ ènunɔ nyɔnɔnwi so Mawu nu. Esɔgbe le eseɛ mɛ* mɔ woacu taga nɔ Seza a, alo desɔgbe o?
15 Mìɖo ana tagaa, alo mìdeɖo ana o?” Ci Yesu nya ayemɛnu ci wowakɔɔ, énu nɔ wo mɔ: “Nyi yí taɖo mídodoŋ kpɔɔ? Mísɔ denari* ɖeka vɛ makpɔ.”
16 Wosɔ denari ɖeka ni. Ébiɔ wo se mɔ: “Mi takpu koɖo mi ŋkɔ yí le gajun lɔ jiɔ?” Woɖo ŋci ni mɔ: “Seza tɔ yɔ.”
17 Yesu nu mɔ: “Mísɔ ŋciwo yí nyi Seza tɔwo nɔ Seza. Vɔ ŋciwo yí nyi Mawu tɔwoɔ, mísɔ wo nɔ Mawu.” Eyi yi nu kpaca wo.
18 Ecɛyɛɔ, Sadusitɔ ciwo yí nunɔ mɔ fɔnfɔnsoku deli va gbɔ yí biɔɛ se mɔ:
19 “Enukplamɛtɔ, Moizi ŋwlɛ ɖɛ nɔ mì mɔ nɔ mɛɖe ku gbeɖe ashiɛ ɖɛ yí deji viɔ, nɔviɛ ɖo asɔ kpo ashiɛ lɔ yí aji viwo nɔ fofoɔ ci yí ku lɔ.
20 Ecɛyɛɔ, nɔjinɔ amadrɛ ɖekawo li. Amɛ ŋkɔtɔ ɖe nyɔnu, vɔ deji vi gbɔxwe yí ku o.
21 Amɛvetɔ lɔ sɔ kpo nyɔnu lɔ vɔ yɛ can deji vi gbɔxwe yí ku o. Amɛtɔntɔ lɔ can ahanke yɔ nɛ.
22 Amadrɛ lɔwo pleŋ ku evi maji. Nyɔnu lɔ yí vanyi amɛ kpɛtɛkpɛtɛtɔ ci yí ku.
23 Nɔ wovafɔn so ku ɖe, mi shi avanyiɔ? Ðo ŋsu amadrɛ lɔwo ɖi ɖɛ kpɔ.”
24 Yesu nu nɔ wo mɔ: “Mídenya Enuŋwlɛŋwlɛ lɔwo alo lé Mawu ŋsɛn gangan do o. Eyi dɔ míle afɛn wakɔ.
25 Ðo nɔ wofɔn so kuɔ, ŋsuwo daɖe nyɔnu o yí wodasɔ nyɔnuwo na asu hɛnnɛ o. Vɔ woale shigbe mawudɔla ciwo yí le jeŋkwi mɛ nɛ.
26 Kuso amɛkukuwo fɔnfɔnsoku nu ɖe, mídehlɛn ŋjaci xolɔlɔ ci yí le Moizi wema mɛ ba? Mawu nu ni mɔ: ‘Ŋnyi Abrahamu Mawu, Izaki Mawu koɖo Ʒakɔbu Mawu.’
27 Denyi amɛkukuwo Mawu enyi o. Vɔ amɛleagbuwo Mawu yɔ. Míbu emɔ gbijigbiji.”
28 Esekplamɛtɔ ɖeka va yí se enyɔ ci wodɔn koɖo Yesu. Ékpɔ mɔ Yesu wa ɖaŋ ɖo nyɔ ŋci nɔ wo nywiɖe yí ebiɔɛ se mɔ: “Ese ci yí nyi ŋkɔtɔ* le ese lɔwo pleŋ mɛɔ?”
29 Yesu ɖo ŋci mɔ: “Ŋkɔtɔ lɔ yí nyi, ‘Oo Izraɛli se! Yehowa* mìwo Mawu nyi Yehowa* ɖekɛ kpaŋ.
30 Èɖo alɔn Yehowa* ao Mawu koɖo ao ji pleŋ, ao se* pleŋ, ao susu pleŋ koɖo ao ŋsɛn pleŋ.’
31 Amɛvetɔ lɔ yí nyi, ‘Èɖo alɔn ao kpena shigbe eoŋtɔ nɛ.’ Ese bu ɖe deli yí gangan wu cɛwo o.”
32 Esekplamɛtɔ lɔ nu ni mɔ: “Enukplamɛtɔ, èwa ɖaŋ nui yí esɔ koɖo nyɔnɔnwi lɔ, ‘Mawu kuɖeka yɔ yí ebu ɖe degbeli bɔdo nu o.’
33 Eyi woaluin koɖo eji pleŋ, enugɔnmɛsese amɛ tɔ pleŋ koɖo ŋsɛn amɛ tɔ pleŋ yí agbelɔn amɛ kpena shigbe amɛ ŋtɔ nɛ le veviɖe wu enunana ci wotɔnɔ zo pleŋ koɖo vɔnsawo pleŋ.”
34 Ci Yesu kpɔ mɔ yɛxo nuxu koɖo nunyaɔ, énu ni mɔ: “Dèjinjin le Mawu Fyɔɖuxu lɔ gbɔ o.” Yi goduɔ, mɛɖe degbegbe dɔn yí biɔ nyɔ ɖe yi se o.
35 Vɔ ci Yesu kplakɔ nu amɛwo le gbedoxɔ lɔ mɛɔ, émɔ: “Lé esekplamɛtɔwo wɛ yí nunuɔ mɔ Kristo nyi Davidi viɔ?
36 Gbɔngbɔn kɔkɔɛ na yí Davidi ŋtɔ nu mɔ, ‘Yehowa* nu nɔ anyi Xwetɔ mɔ: “Nɔ nyinɔnɔ do anyi ɖushi mɛ keke je hwenu yí nasɔ ao ketɔnɔwo do afɔwo gɔnmɛ nɔ eo.”’
37 Davidi ŋtɔ yɔɛ mɔ Axwetɔ; taɖo lé ewɛ yí gbenyi eviɛɔ?”
Amɛ sugbɔ ɖokɔ to yi yí evivikɔ nɔ wo.
38 Ci ekplakɔ nu mɛ lɔwoɔ, égbenu mɔ: “Míkpɔ míwoɖekiwo ji nywiɖe le esekplamɛtɔwo nu. Wojinɔ mɔ yewoado awu lɛgbɛwo yí adandan yí woadodoɔ gbe nɔ yewo koɖo bubu le amɛwo mɛ.*
39 Ʒinkpin ŋkɔtɔwo* ji nɔnɔ le Ʒuifuwo nukplaxuwo koɖo texwe veviwo nɔnɔ le azanɖuxuwo jɔnɔ ji nɔ wo.
40 Wofinɔ nuwo le kposhuwo shi* yí wanɔ gbedoɖa jinjinwo nɔ amɛwo akpɔ* wo. Kojo ci woaɖo nɔ wo asɛnŋ* sɔwu.”
41 Yesu nɔ nyinɔnɔ yí kpanŋkɔ enujɔjɔdakawo yí kpɔ amɛwo va sɔ eho sugbɔ dodoɔ wo mɛ. Dɔkunɔ sugbɔ va yí sɔ eho sugbɔ do wo mɛ.
42 Eyi kposhu wamɛnɔ ɖeka va yí sɔ eho hwɛhwɛ amɛve ciwo yí denyi ŋɖe* do mɛ.
43 Eyi eyɔ yi nukplaviwo va yiɖeki gbɔ yí nu nɔ wo mɔ: “Ŋnukɔ nɔ mí le nyɔnɔnwi mɛ mɔ, kposhu wamɛnɔ cɛ na eho wu mɛkpɛtɛ ciwo pleŋ yí sɔ eho do enujɔjɔdaka lɔwo mɛ.
44 Ðo wo pleŋ sɔ le sugbɔ ci yí le wo shi nu yí sɔ do mɛ. Vɔ eyɛ ci yí nyi wamɛnɔ sɔ ŋciwo pleŋ yí le shi yí asɔ nɔ agbe do mɛ.”
Gɔnmɛnuŋwlɛnŋwlɛn
^ Yi gɔnmɛɖeɖe tiin: “eta nɔ zogui.”
^ Kpɔ Enumɛɖeɖewo A5.
^ Alo “ényɔ mɔ.”
^ Kpɔ Enumɛɖeɖewo B14.
^ Alo “ci yí le veviɖe wu.”
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Kpɔ Enyɔgbe Veviwo mɛ Ðeɖe.
^ Kpɔ Enumɛɖeɖewo A5.
^ Yi gɔnmɛɖeɖe tiin: “afiwo mɛ.”
^ Alo “nywiwo.”
^ Yi g̱ɔnmɛɖeɖe tiin: “Wovɔnɔ kposhuwo xwewo.”
^ Alo “amɛwo ŋmɛ.”
^ Alo “ci yí akpɛn.”
^ Yi gɔnmɛɖeɖe tiin: “lɛpta amɛve” ciwo yí wa kuadran ɖeka. Kpɔ Enumɛɖeɖewo B14.
