Eŋɛnywiwema Maki Tɔ 13:1-37
13 Ci Yesu tokɔ le gbedoxɔ lɔ mɛɔ, yi nukplavi ɖeka nu ni mɔ: “Enukplamɛtɔ, kpɔ ekpe koɖo exɔ nyakpɔkpɔ cɛwo ɖa!”
2 Vɔ Yesu nu ni mɔ: “Èkpɔkpɔ exɔ gangan cɛwoa? Woagban ekpe ciwo pleŋ yí le lɛ yí ekpe ɖe dagbele yi kpena ji o.”
3 Ci enɔ nyinɔnɔ do Eto Olivuciwo tɔ ji yí kpanŋkɔ gbedoxɔ lɔɔ, Piɛ, Ʒaki, Ʒan koɖo Andre va gbɔ wowoɖekɛwo yí biɔɛ se mɔ:
4 “Nui nɔ mì, hwenu yí ŋcɛwo ajɔɔ, yí jeshidu ci yí adasɛ mɔ ŋcɛwo pleŋ jikɔ avɔɔ?”
5 Eyi Yesu nu nɔ wo mɔ: “Míkpɔ nywiɖe nɔ mɛɖe ŋgbeble mí o.
6 Ðo amɛ sugbɔ ava asɔ anyi ŋkɔ anukɔ mɔ, ‘Enyɛ yí nyi Kristo lɔ’ yí akplɔ amɛ sugbɔ bu mɔ.
7 Ahanke nɔ míse mɔ wowawa ahwa le texwe ciwo yí sɔ mí gbɔ koɖo texwe ciwo yí jinjin le mí gbɔɔ, jika ŋgbeso mí o. Ðo ŋcɛwo ajɔ dandan, gan vɔvɔnu lɔ deva hɔɖo o.
8 “Ðo jukɔn atɔ ahwa koɖo jukɔn bu yí fyɔɖuxu atɔ ahwa koɖo fyɔɖuxu bu. Nyigban ahunhun le texwe vovovowo yí eju ato hɛnnɛ. Ŋcɛwo pleŋ le shigbe lé nyɔnu funɔ senɔ gbazavi nɔ evi dɔmɛ tɔ ɖuɖui nɛ.
9 “Vɔ míwoɔ, míkpɔ míwoɖekiwo ji. Amɛwo akplɔ mí yi kojoɖoxuwo, woaxo mí le Ʒuifuwo nukplaxuwo yí asɔ mí do alɔ̀ mɛ nɔ ejukplɔtɔwo koɖo efyɔwo do enyɛ ŋci nɔ anyi kunuɖeɖe nɔ wo.
10 Woɖo adra eŋɛnywi lɔ hɛnnɛ le jukɔnwo pleŋ mɛ doŋkɔ.
11 Eyi nɔ wolé mí hɛn yikɔ kojoɖoxuɔ, míŋgbeloloɔ nɔ enyɔ ci míavayi nu o. Vɔ enyɔ ɖekpokpui ci woana mí le gaxoxo ŋtɔ́ mɛɔ, mínui. Ðo denyi míwo yí le nuxu xokɔ o, vɔ gbɔngbɔn kɔkɔɛ lɔ yɔ.
12 Gbesɔ kpe niɔ, nɔvi asɔ nɔvi jo amɔ wo le wu, eda asɔ evi jo. Eviwo afɔn gu do wowo da koɖo wowo nɔwo ji yí ana woawu wo.
13 Eyi amɛwo pleŋ agbe ŋwa nɔ mí do anyi ŋkɔ ŋci. Vɔ mɛ ci yí ado ji* keke ayi vɔvɔnuɔ, woahwlin gan.
14 “Vɔ nɔ míkpɔ enunyɔŋ ci yí gbannɔ nu le fini yí deɖo anɔɔ, (mɛ ci yí hlɛnkɔ nu lɔ le bu tamɛ kpɔ), mɛ ciwo yí le Ʒude le shi yi etowo ji.
15 Mɛ ci yí le xɔ ta ŋgbeɖyi mɔ yeasɔ ŋɖe le ye xɔ mɛ o.
16 Mɛ ci yí le boji ŋgbetrɔgbɔ va axomɛ mɔ yeasɔ awu jitɔ yetɔ o.
17 Babɛ nɔ nyɔnu funɔwo koɖo mɛ ciwo yí dodoɔ anɔ nɔ evi le ŋkeke ŋtɔ́wo ji!
18 Mídodoɔ gbe ɖaɖa nɔ ŋgbevanyi vuvɔ hwenu o.
19 Ðo ŋkeke ŋtɔ́wo anyi efunkpekpe ŋkekewo. Yi hanci deva kpɔ so gɔnmɛjeje nɔ ŋciwo Mawu wa keke vakɔ do evyɛ o yí yi hanci dagbevava kpɔ gbeɖe o.
20 Le nyɔnɔnwi mɛɔ, nɔ Yehowa* deɖe ŋkeke lɔwo kpɔtɔɔ, mɛɖekɛ* daci agbe o. Vɔ amɛcancanwo ŋci yí aɖe ŋkeke lɔwo kpɔtɔ.
21 “Eyi nɔ mɛɖe nu nɔ mí mɔ, ‘Kpɔ ɖa! Kristo le lɛ’ alo ‘Kpɔ ɖa! Éle hunɖaɔ,’ míŋgbekando ji o.
22 Ðo ŋsukankan Kristowo koɖo enyɔnuɖɛtɔ ŋsukantɔwo ava yí awa enujiŋ hamɛhamɛwo asɔ ble amɛwo. Eyi nɔ woasun jiɔ, woable amɛcancanwo.
23 Eyi taɖo mínɔ zanŋte. Ŋnu nyɔwo pleŋ nɔ mí yí sɔ kankanxle mí ɖɛ.
24 “Vɔ le ŋkeke ŋtɔ́wo mɛ le efunkpekpe gangan lɔ goduɔ, ewe ado vinvin yí wleci dagbeklɛn o.
25 Wleciviwo ajuin so jeŋkwi mɛ yí woahunhun ŋsɛn ciwo yí le jeŋkwi mɛ.
26 Eyi woakpɔ Agbetɔvi lɔ agbɔgbɔ le azɔwo mɛ koɖo ŋsɛn gangan koɖo kanfukanfu.
27 Ádɔ yi dɔlawo ɖaɖa yí abɔ yi mɛcancanwo so zogui amɛnɛ lɔwo ji nɔ xexe lɔ, so nyigban vɔvɔnu yi jeŋkwi vɔvɔnu.
28 “Ecɛyɛ míkpla nu so figici labalu cɛ mɛ: Nɔ ézɛn lɔ̀vi yoyuwo yí wodɔn amaɔ, mínyanɔ mɔ fyɔta hwenu gogo.
29 Ahanke míwo can nɔ míkpɔ ŋcɛwo jɔjɔɔ, mínya mɔ Agbetɔvi lɔ gogo yí le hɔn ji.
30 Ŋnukɔ nɔ mí le nyɔnɔnwi mɛ mɔ, jijimɛ cɛ davayi kpɔ gbeɖe gbɔxwe ŋcɛwo pleŋ ajɔ o.
31 Jeŋkwi koɖo nyigban avayi, vɔ anyi nyɔwo davayi kpɔ gbeɖe o.
32 “Mɛɖekɛ dejeshi ŋkeke hunnɔ alo gaxoxo hunnɔ o. Mawudɔla ciwo yí le jeŋkwi mɛ dejeshi o, Evi lɔ can dejeshi o, vɔ Eda ɖekɛ yí jeshi.
33 Míkpɔ míwoɖekiwo ji nywiɖe yí anɔ zanŋte. Ðo mídenya hwenu ci woɖo ɖɛ lɔ o.
34 Ele shigbe ŋsu ɖeka ci yí jikɔ axɔ mɔ ayi ejugodu nɛ. Ésɔ yi xwe jo nɔ yi dɔwaviwo mɔ wo le kpɔkpɔ ji nɔ ye. Éna acɛ wo yí ɖo dɔwo nɔ wo ɖekaɖeka yí nu nɔ agbocɔtɔ mɔ yɛ le nɔ zanŋte.
35 Eyi taɖo mínɔ zanŋte, ɖo mídenya hwenu yí axwetɔ lɔ agbɔ o. Etɛnŋ nyi fiɛfi alo zandomɛ alo fɔnfɔnmɛ* alo nyidin.
36 Nɔ denyi ahan ɔ, ávagbɔ le avomɛ yí akpɔ mí míale alɔn dɔnkɔ.
37 Vɔ nyɔ ci ŋnukɔ nɔ míɔ, ŋnuikɔ nɔ mɛshiamɛ mɔ: Mínɔ zanŋte.”
Gɔnmɛnuŋwlɛnŋwlɛn
^ Alo “mɛ ci yí kpɔtɔ dodoɔ ji.”
^ Kpɔ Enumɛɖeɖewo A5.
^ Yi gɔnmɛɖeɖe tiin: “ŋcilan ɖekɛ.”
^ Yi gɔnmɛɖeɖe tiin: “hwenu kloklo aɖe atɔ.”
