Eŋɛnywiwema Maki Tɔ 14:1-72
-
Avɔnsatɔwo bla gbeju keŋ awu Yesu (1, 2)
-
Nyɔnu ɖeka kɔ amihwɛnte do ta nɔ Yesu (3-9)
-
Ʒudasi sa Yesu (10, 11)
-
Paki kpɛtɛtɔ ci Yesu ɖu (12-21)
-
Yesu ɖo Axwetɔ Fiɛfiŋɖuɖu lɔ ɖɛ (22-26)
-
Yesu nu ɖɛ mɔ Piɛ agbe ye (27-31)
-
Yesu do gbe ɖaɖa le Gɛtisemani kpa lɔ mɛ (32-42)
-
Wolé Yesu (43-52)
-
Woɖo kojo nɔ Yesu le Sanhedrɛn lɔ ŋkɔ (53-65)
-
Piɛ gbe Yesu (66-72)
14 Ékpɔtɔ ŋkeke amɛve yí woaɖu Paki koɖo Kpɔnnɔ Majimaji xwe. Eyi avɔnsatɔwo gawo koɖo esekplamɛtɔwo jijiɛ lé woawɛ ato ayemɔ ɖe ji alé Yesu keŋ awui.
2 Vɔ wonunuɔ mɔ: “Danyi exweɖuɖu lɔ hwenu o; etɛnŋ na yí eʒin avatɔn le amɛwo mɛ.”
3 Hwenu Yesu le enu ɖukɔ le Simɔ ci yí lé kpodɔ̀ sa xwe mɛ le Betani ɔ, nyɔnu ɖeka hɛn amihwɛnte nari adodwi ci yí ve ho do egu* mɛ va. Éhun egu lɔ yí sɔ ami lɔ tɔ kɔkɔ do eta nɔ Yesu.
4 Ci mɛɖewo kpɔɛ ahan ɔ, wodo dɔmɛzi yí nu le wowonɔnɔwo mɛ mɔ: “Nyi yí taɖo wodadahɛn amihwɛnte cɛ ahan ɔ?
5 Ðo wohɛn woasa amihwɛnte cɛ awu denari* 300 keŋ asɔ ho lɔ na wamɛnɔwo nɛ!” Eyi wowa dɔmɛzi do* nyɔnu lɔ sugbɔ.
6 Vɔ Yesu mɔ: “Mítashi nyɔnu lɔ. Nyi yí taɖo mídokɔ aya niɔ? Enunywi enyi ewa nɔŋ.
7 Ðo wamɛnɔwo le mí gbɔ tɛgbɛɛ yí míatɛnŋ awa enywi nɔ wo hweɖekpokpuinu ci yí dro mí. Vɔ enyɛɔ, ŋdanɔ mí gbɔ tɛgbɛɛ o.
8 Éwa ŋci atɛnŋ awa, ékɔ amihwɛnte do gotu nɔŋ yí sɔ draŋ do ɖɛ nɔ ɖyiɖyi.
9 Ŋnukɔ nɔ mí le nyɔnɔnwi mɛ mɔ, fishiafi ci woadra eŋɛnywi lɔ le le xexeɛ pleŋ mɛɔ, woanu ŋci nyɔnu cɛ wa hɛnnɛ yí asɔ ɖonɔ ŋwi yi.”
10 Ʒudasi Iskariɔti ci yí le Amɛ Wive lɔwo mɛ yi avɔnsatɔwo gawo gbɔ keŋ asa Yesu nɔ wo.
11 Ci wose ahan ɔ, ejɔ ji nɔ wo yí woɖo gbe ni mɔ yewoana gajunho yi. Eyi etɔ emɔ jiji keŋ asɛ.
12 Le ŋkeke ŋkɔtɔ ji nɔ Kpɔnnɔ Majimaji xwe ci yí nyi azan ci ji wowunɔ Paki lanwo leɔ, yi nukplaviwo va gbɔ yí biɔɛ se mɔ: “Fini èji mɔ mìadra do nɔ eo nɔ Paki xweɖuɖu lɔɔ?”
13 Eyi edɔ yi nukplavi amɛve ɖaɖa yí nu nɔ wo mɔ: “Míyi eju lɔ mɛ, ŋsu ɖeka ahɛn eshi do eze mɛ ado go mí. Míkplɔɛ do.
14 Eyi axwe ci mɛ aɖoɔ, mínu nɔ axwetɔ lɔ mɔ, ‘Enukplamɛtɔ mɔ: “Exɔ ci mɛ naɖu Paki lɔ le koɖo anyi nukplaviwoɔ?”’
15 Ádasɛ exɔ gangan ɖeka ci yí le shanŋ ji nɔ mí, enuwo sɔgbe le mɛ. Mídra nɔ do nɔ Paki lɔ ɖuɖu.”
16 Enukplavi lɔwo yi yí ɖo eju lɔ mɛ yí kpɔ nu lɔwo shigbe lé enui nɔ wo do nɛ. Eyi wodra nushianu do ɖɛ nɔ Paki lɔ ɖuɖu.
17 Fiɛfimɛɔ, Yesu va enɔ lɔ koɖo Amɛ Wive lɔwo.
18 Ci wole kplɔn nu yí le enu ɖukɔɔ, Yesu mɔ: “Ŋnukɔ nɔ mí le nyɔnɔnwi mɛ mɔ, mɛɖeka le míwo ciwo yí ɖukɔ nu koɖoŋ mɛ asaŋ.”
19 Woci ŋshishi mɛ yí tɔ biɔbiɔɛ se ɖekaɖeka mɔ: “Enyɛ yɔa?”
20 Énu nɔ wo mɔ: “Mɛɖeka le míwo Wive lɔwo mɛ yɔ, mɛ ci yí sɔ alɔ̀ dodoɔ agban mɛ koɖoŋ yɔ.
21 Ðo Agbetɔvi lɔ aku shigbe lé woŋwli ɖɛ so nu nɛ. Vɔ babɛ nɔ mɛ ci yí asa Agbetɔvi lɔ! Anyɔ ni sɔwu nɔ wodeji sa o.”
22 Hwenu wole enu lɔ ɖukɔɔ, ésɔ kpɔnnɔ ɖeka yí do gbe ɖaɖa.* Éŋi mɛ keŋ yí sɔ nɔ wo yí mɔ: “Míxɔɛ; ecɛ le dumɛ nɔ anyi lankpu.”
23 Ésɔ kɔnkpu ɖeka ci mɛ vɛn le hɛnnɛ yí do akpe do ji yí sɔ na wo yí wo pleŋ nui.
24 Énu nɔ wo mɔ: “Ecɛ le dumɛ nɔ anyi hun. Ényi ‘enublabla hun’ ci woakɔ ɖɛ do ta nɔ amɛ sugbɔ.
25 Ŋnukɔ nɔ mí le nyɔnɔnwi mɛ mɔ, ŋdagbenu vɛn cɛ kpɔ keke ana nɔ ŋkeke ŋtɔ́ ci ji nanu vɛn yoyu le le Mawu Fyɔɖuxu lɔ mɛ o.”
26 Le vɔvɔnu ci woji kanfukanfuhawo ɖegbɔɔ, woto yi Eto Olivuciwo tɔ ji.
27 Eyi Yesu nu nɔ wo mɔ: “Mí pleŋ míagbeŋ ɖɛ, ɖo woŋwlɛ ɖɛ mɔ: ‘Naxo lɛngbɔkplɔtɔ lɔ yí lɛngbɔ lɔwo agban hlɛn.’
28 Gan nɔ wofɔnŋ so kuɔ, nayi nɔ te kpɔ mí le Galile.”
29 Vɔ Piɛ nu ni mɔ: “Nɔ mɛkpɛtɛwo pleŋ gbe eo ɖɛ can ɔ, nyɛŋdagbe eo ɖɛ o.”
30 Eyi Yesu nu ni mɔ: “Ŋnukɔ nɔ eo le nyɔnɔnwi mɛ mɔ, egbɛ, ɛɛ, le ezan cɛ mɛ, gbɔxwe kloklo aɖe atɔ zeveɔ, àgbeŋ zetɔn.”
31 Vɔ Piɛ kpɔtɔ tɛtɛ gbe do ji mɔ: “Nɔ ŋɖo aku koɖo eo can ɔ, ŋdagbe eo gbeɖe o.” Mɛkpɛtɛwo pleŋ can tɔ enyɔ ɖekɛ lɔ nunu.
32 Wova texwe ɖeka ci woyɔnɔ mɔ Gɛtisemani. Énu nɔ yi nukplaviwo mɔ: “Mínɔ nyinɔnɔ do lɛ nɔ mayi do gbe ɖaɖa.”
33 Eyi ekplɔ Piɛ, Ʒaki koɖo Ʒan bɔdo yiɖeki nu. Étɔ vevi sese yí xa sugbɔ le yiɖeki mɛ.
34 Énu nɔ wo mɔ: “Ŋsekɔ* vevi sugbɔ keke aku. Mínɔ lɛ yí anɔ zanŋte.”
35 Ci ete yi ŋkɔ hwɛɖekaɔ, éje klo ji yí tɔ gbe dodo ɖa mɔ, nɔ anya wawaɔ, gaxoxo cɛ le to akpa nɔ ye avayi.
36 Eyi enu mɔ: “Abba,* Danyɛ, ŋɖe deglonɔ eo o; te kɔnkpu cɛ so ŋgbɔ. Ŋgbenyi ci nyɛŋjikɔ o, vɔ le nyi ci eɔji.”
37 Étrɔva yí kpɔ wole alɔn dɔnkɔ. Eyi enu nɔ Piɛ mɔ: “Simɔ, alɔn dɔnkɔ èlea? Dàtɛnŋ anɔ zanŋte gaxoxo ɖeka ba?
38 Mínɔ zanŋte yí akpɔtɔ adokɔ gbe ɖaɖa nɔ míŋgbeje tetekpɔ mɛ o. Le nyɔnɔnwi mɛɔ, édrokɔ gbɔngbɔn lɔ veviɖe* vɔ lankpu lɔ gbɔjɔ.”
39 Égbeteyi azɔge yí do gbe ɖaɖa yí nu nyɔ ɖekɛ lɔwo ke.
40 Égbetrɔva wo gbɔ yí kpɔ wole alɔn dɔnkɔ, ɖo alɔn wugan wo. Eyi wodenya nyɔ ci woanu ni o.
41 Étrɔva zetɔntɔ yí nu nɔ wo mɔ: “Hweyɛnu yí míale alɔn dɔnkɔ yí agbɔnkɔ domɛa? Ésun ahan! Ega lɔ xo! Míkpɔ ɖa! Wojikɔ asɔ Agbetɔvi lɔ do alɔ̀ mɛ nɔ nuvɔnwatɔwo.
42 Míso nɔ mìayi. Míkpɔ ɖa! Mɛ ci yí saŋ lɔ gogo.”
43 Ci ele nuxu lɔ xokɔɔ, Ʒudasi ci yí le Amɛ Wive lɔwo mɛ vaɖo zeɖeka tɔntɔn. Amɛahwa ɖeka ci yí so avɔnsatɔwo gawo, esekplamɛtɔwo koɖo jumɛgawo gbɔ kplɔɛ do yí hɛn ewi koɖo kpowo.
44 Mɛ ci yí sɛ lɔ nu jeshi lɔ ɖɛ nɔ wo mɔ: “Mɛ ci nakishi nɔɔ, eyi yɔ. Míli akplɔɛ yi, ŋgbegan le mí shi o.”
45 Ézɔn trelele yí gbosɔ Yesu yí mɔ, “Rabi!” keŋ yí kishi ni.
46 Eyi woje ji yí li.
47 Mɛɖeka le mɛ ciwo yí le te le nɔ mɛ ɖe ewi ti yí kpa to nɔ avɔnsatɔ gangantɔ dɔwavi ɖeka.
48 Vɔ Yesu nu nɔ wo mɔ: “Ewi koɖo ekpowo mísɔ va mɔ yewoaléŋ shigbe flafinɔ gangan ɖe ŋnyi nɛa?
49 Ŋnɔnɔ gbedoxɔ lɔ mɛ koɖo mí yí kplanɔ nu amɛwo ŋkeŋke, gan yí mídeléŋ kpɔ o. Vɔ éjɔ ahan keŋ nɔ Enuŋwlɛŋwlɛ lɔwo avamɛ.”
50 Eyi yi nukplaviwo pleŋ shi gbeɖi ɖɛ.
51 Vɔ ɖajɛvi ɖeka ci yí do awu ɖekɛ ci wosɔ lɛnvɔn cigan tɔ sɔ wa kplɔ Yesu do yí woji mɔ yewoali.
52 Eyi etashi lɛnwu yitɔ lɔ ɖɛ yí shi mama.*
53 Ecɛyɛ wokplɔ Yesu yi nɔ avɔnsatɔ gangantɔ lɔ yí avɔnsatɔwo gawo, jumɛgawo koɖo esekplamɛtɔwo pleŋ bɔ do nɔ.
54 Vɔ Piɛ le azɔge-azɔge nɔ Yesu yí kplɔɛ do keke vayi ɖo avɔnsatɔ gangantɔ lɔ gbadenu. Énɔ nyinɔnɔ do axweɛ mɛ dɔwaviwo gbɔ yí xuxuɔ zo.
55 Hwenɔnuɔ, avɔnsatɔwo gawo koɖo mɛ ciwo pleŋ yí le Sanhedrɛn lɔ mɛ jijiɛ mɛ ciwo yí anu nyɔ do Yesu nu keŋ nɔ woawui. Vɔ wodekpɔkpɔ ɖe o.
56 Le nyɔnɔnwi mɛɔ, amɛ sugbɔ va yí kan ŋsuwo do nu ni, vɔ wowo nyɔ lɔwo trɔkpe nɔnɔ.
57 Mɛɖekawo can so je te yí kankɔ ŋsu do nu ni mɔ:
58 “Mìse yí emɔ, ‘Nagban gbedoxɔ cɛ ci wosɔ alɔ̀ wa yí le ŋkeke amɛtɔn mɛɔ, nacu ebu ci wodasɔ alɔ̀ wa o.’”
59 Vɔ le nyɔ cɛwo mɛ hɛnnɛɔ, wowo nyɔ lɔwo trɔkpe nɔnɔ.
60 Eyi avɔnsatɔ gangantɔ lɔ so je te le dodomɛ nɔ wo yí biɔ Yesu se mɔ: “Dèɖo nyɔ ɖe anu do nu ba? Enyɔ ci yí nyi cɛ ŋsu cɛwo nunuɔ do eo nuɔ?”
61 Vɔ Yesu bɔ nu kplikplikpli yí denu nyɔ ɖe do nu ni o. Avɔnsatɔ gangantɔ lɔ gbebiɔɛ se mɔ: “Eo yí nyi Kristo, Mawu ci wokannɔfu Vi lɔa?”
62 Yesu ɖo ŋci mɔ: “Enyɛ yɔ; eyi míakpɔ Agbetɔvi lɔ yí ale nyinɔnɔ le ɖushi mɛ nɔ Ŋsɛntɔnɔ lɔ yí agbɔgbɔ le azɔwo mɛ le jeŋkwi mɛ.”
63 Eyi avɔnsatɔ gangantɔ lɔ drɛn awu le kɔ nɔ yiɖeki yí mɔ: “Mìgbeʒan kunuɖetɔ bua?
64 Míse enyɔkpotu ci enuŋ? Lé míkpɔɛ doɔ?” Wo pleŋ do hwɛ yi mɔ yɛje nɔ eku.
65 Eyi mɛɖewo tɔ etan cucu do nu, wosɔ nu cɔn ŋmɛ ni yí xu kɔn yi yí nu ni mɔ: “Nɔ enyɔnuɖɛtɔ ènyiɔ, nu mɛ ci yí xo eo!” Sɔja ciwo yí cɔnɔ kojoɖoxu lɔ xo tomɛ ni yí kplɔɛ ɖedo.
66 Ci Piɛ le gbadenu le gɔnmɛɔ, nyɔnuvi ciwo yí wanɔ dɔ le avɔnsatɔ gangantɔ lɔ xomɛ ɖeka va.
67 Ékpɔ Piɛ le ezo xukɔ yí glui kpɔ juun yí mɔ: “Eɔ can ènɔnɔ koɖo Yesu Nazarɛtitɔ cɛ.”
68 Vɔ émɔ, yí nu mɔ: “Ŋdejeshi ɖɛ o yí ŋdenya nyɔ ci nukɔ èle hɛnnɛ o.” Eyi eto yí kpe agbo* lɔ gbɔ.
69 Nyɔnuvi lɔ gbekpɔɛ yí tɔ nunu nɔ mɛ ciwo yí le te le nɔ mɔ: “Mɛ cɛ can le mɛ lɔwo mɛ.”
70 Égbemɔ ke. Sabaɖeɔ, mɛ ciwo yí le te le nɔ tɔ nunu nɔ Piɛ mɔ: “Nyɔnɔnwi yɔ, eɔ can èle mɛ lɔwo mɛ. Ðo Galiletɔ ènyi hɛnnɛ.”
71 Vɔ Piɛ tɔ enu dodo yiɖeki yí ta nu mɔ: “Ŋdejeshi ŋsu ŋtɔ́ ci nyɔ mínukɔ o!”
72 Eyi zeɖeka vɔɔ, kloklo ɖe atɔ zevetɔ yí Piɛ ɖo ŋwi enyɔ ci Yesu nu ni mɔ: “Gbɔxwe kloklo aɖe atɔ zeveɔ, àgbeŋ zetɔn.” Eyi eci ŋshishi mɛ yí tɔ avin fanfan.
Gɔnmɛnuŋwlɛnŋwlɛn
^ Yi gɔnmɛɖeɖe tiin: “alabastru gu.” Le gɔnmɛjejeɔ, egu hwɛhwɛ ɖeka enyi yí wosɔ ekpe ci wokpɔnɔ le fini yí gogo Albâtre ju le Eʒipti sɔ wɛni.
^ Kpɔ Enumɛɖeɖewo B14.
^ Alo “woxo nuxu ni koɖo dɔmɛzi, wogbe nyɔ ni.”
^ Alo “yra do ji.”
^ Alo “Anyi se sekɔ.”
^ Ebre alo Aramu nyɔgbe ci gɔnmɛ yí nyi “Oo, Danyɛ!”
^ Alo “jijiɛ.”
^ Alo “dedo nu agbu ɖe o; awu gɔnmɛ tɔ ɖekɛ mɛ eci.”
^ Alo “agbonuxɔ.”
