Eŋɛnywiwema Maki Tɔ 15:1-47
15 Ci eŋ ke fɔnfɔnmɛ kakaɔ, avɔnsatɔwo gawo, jumɛgawo koɖo esekplamɛtɔwo, nɔ mìanuiɔ, mɛ ciwo pleŋ yí le Sanhedrɛn lɔ mɛ do go keŋ yí ɖe susu so Yesu nu. Woblɛ yí kplɔɛ yi nɔ Pilati.
2 Eyi Pilati biɔɛ se mɔ: “Eo yí nyi Ʒuifuwo Fyɔ lɔa?” Yesu ɖo ŋci mɔ: “Yinɛ eoŋtɔ ènu nɛ.”
3 Vɔ avɔnsatɔwo gawo dodoɔ hwɛ yi nɔ enu sugbɔ.
4 Eyi taɖo Pilati gbebiɔɛ se mɔ: “Dèɖo nyɔ ɖe anu ba? Kpɔ enyɔ sugbɔ ciwo yí wonunuɔ so eo nu ɖa.”
5 Vɔ Yesu degbeɖo enyɔ ɖe ŋci o yí ekpaca Pilati sugbɔ.
6 Le Paki xwe ɖeshiaɖe jiɔ, éjonɔ gakpamɛnɔtɔ ɖeka ci jukɔn lɔ mɔ wo le jo.
7 Hwenɔnuɔ, ŋsu ɖeka ci yí tɔ mɔ Barabasi le gakpa mɛ koɖo egufɔntɔ ciwo yí wu amɛ hwenu wofɔnfɔn gu do acɛkpakpa lɔ nu.
8 Eyi taɖo amɛahwa lɔ va yí tɔ nunu nɔ Pilati mɔ yɛ le wa ŋci yɛwanɔ nɔ yewo.
9 Pilati biɔ wo se mɔ: “Míji mɔ majo Ʒuifuwo Fyɔ lɔ nɔ mía?”
10 Ðo Pilati nya nywiɖe mɔ ŋhwan yí dɔ yí avɔnsatɔwo gawo li vɛ.
11 Vɔ avɔnsatɔwo gawo wɛ keke amɛahwa lɔ mɔ Barabasi yí yɛajo nɔ yewo.
12 Pilati gbebiɔ wo se mɔ: “Ecɛyɛ ɖe, nyi nawa nɔ mɛ ci míyɔnɔ mɔ Ʒuifuwo Fyɔ lɔɔ?”
13 Wogbedo axwa doji mɔ: “Kin do aci nu!”
14 Vɔ Pilati gbebiɔ wo se mɔ: “Nyi yí taɖoɔ? Agɔ ci ejeɔ?” Wokpɔtɔ dodoɔ axwa doji mɔ: “Kin do aci nu!”
15 Eyi ci Pilati ji mɔ yeawa ŋci amɛahwa lɔ jijiɛɔ, éjo Barabasi nɔ wo. Ci ena yí woxo Yesu koɖo lanŋba ɖegbɔɔ, ésɔ jo keŋ nɔ woakin do aci nu.
16 Ecɛyɛɔ, sɔjawo kplɔɛ va gbadenu le ejujikpɔtɔ lɔ xwe mɛ yí woyɔ sɔjawo pleŋ bɔ.
17 Wosɔ awu jin ɖeka do ni yí sɔ ŋja lɔn efyɔkuku yí sɔ cɔn ta ni.
18 Eyi wodo axwa yí nukɔ ni mɔ: “Mìdo gbe nɔ eo, Ʒuifuwo Fyɔ!”
19 Wosɔ klogbuci xoxoɔ ta ni hɛnnɛ yí cucuɔ tan do nu. Wojejeɛ klo ji ni yí dodoɔ ŋdo ni.*
20 Ci wokui ɖegbɔɔ, woɖe awu jin lɔ ni yí sɔ yi wuwo do ni yí kplɔɛ ɖedo keŋ ayi kin do aci nu.
21 Woʒin Simɔ ci yí so bomɛ vayikɔ ji mɔ yɛ le sɔ efuntrenamɛci* Yesu tɔ lɔ. Simɔ cɛ so Sirɛnu yí nyi Alɛsandru koɖo Rufusi dalɔ.
22 Eyi wokplɔɛ va fini woyɔnɔ mɔ Gɔlgota, yi gɔnmɛɖeɖe yí nyi “Amɛtaxutɔxu.”
23 Le nɔɔ, wotekpɔ mɔ yewoana vɛn ci wocaka koɖo miru* yi nɔ anu, vɔ égbe mɔ yedanui o.
24 Wokin do aci nu yí sɔ nu kpɔ do yi wuwo ji keŋ akpɔ ci mɛɖekamɛɖeka axɔ.
25 Nyidin gashiɖekɛ* mɛ han yí wokin do aci lɔ nu.
26 Eyi woŋwlɛ enyɔ ci wosɔ do hwɛ yi mɔ: “Ʒuifuwo Fyɔ.”
27 Wokan flafinɔ gangan amɛve do axa ni. Ðeka le ɖushi mɛ ni yí xlɔtɔ le emiɔ mɛ.
28 * ——
29 Mɛ ciwo yí to nɔ vayikɔ zuizuiɛ. Wohunhunkɔ ta yí nukɔ mɔ: “Hoo nɔ eo! Eo ci yí mɔ yeagban gbedoxɔ lɔ yí atrɔ acui le ŋkeke amɛtɔn mɛ,
30 hwlɛn eoɖeki gan yí aɖyi so efuntrenamɛci* lɔ nu.”
31 Ahanke avɔnsatɔwo gawo koɖo esekplamɛtɔwo kuikuiɛ le wowoɖeɖewo mɛ nɛ, wonunuɔ mɔ: “Éhwlɛn mɛbuwo gan; vɔ detɛnŋ hwlɛn yiɖeki gan o!
32 Kristo, Izraɛli Fyɔ le ɖyi so efuntrenamɛci* lɔ nu nɔ mìakpɔ yí akando ji.” Mɛ ciwo yí wokan do aci nu do axa ni ŋtɔkpu can zuikɔ.
33 Ci exo gawive* han ɔ, vinvin do le eju lɔ pleŋ mɛ keke na nɔ wetrɔ gatɔ̀n* mɛ han.
34 Gatɔ̀n lɔ mɛ han ɔ, Yesu do axwa sɛnsinɖe yí mɔ: “Eli, Eli, lama sabaktani?” ci gɔnmɛ yí nyi mɔ: “Anyi Mawu, anyi Mawu, nyi yí taɖo ègbeŋ ɖɛɔ?”
35 Ci mɛ ciwo yí le te le nɔ ɖewo siɔ, wotɔ nunu mɔ: “Míkpɔ ɖa! Éyɔkɔ Eli.”
36 Yi goduɔ, mɛɖeka shi ju yí sɔ kocan do vɛn hwanhwan mɛ yí sɔ do klogbuci nu keŋ yí dui ɖɛɖɛ nɔ anu. Mɛ lɔ nu mɔ: “Mítashi! Mìakpɔ mɔ Eli ava ɖi so aci lɔ nu ma.”
37 Vɔ Yesu do axwa gangan ɖeka yí ku.*
38 Eyi xɔmɛsovɔn ci yí le kɔkɔɛtɔxu lɔ zɛn do ve so eji va gɔnmɛ.
39 Ci sɔjawo ga ci yí le te yí kpanŋkɔ Yesu kpɔ ŋciwo yí jɔ gbɔxwe ekuɔ, émɔ: “Mawu Vi yí ŋsu cɛ nyi nyao.”
40 Nyɔnuwo can le azɔge yí kpɔkpɔ nu. Mari Magdalɛnu, Mari ci yí nyi Ʒoze koɖo Ʒaki hwɛhwɛtɔ nɔlɔ sɔ kpe nɔ Salome le wo mɛ.
41 Nyɔnu cɛwo kplɔnɔ Yesu do yí kpenɔdo nu hwenu ele Galile. Nyɔnu sugbɔ bu ciwo yí kplɔɛ do va Ʒerusalɛmu le koɖo wo hɛnnɛ.
42 Ecɛyɛɔ, ewe yi xɔ yí ci egbenyi Dradrado ŋkeke ci yí nyi ŋkeke ci yí doŋkɔ nɔ Sabatigbe yɔɔ,
43 Ʒozɛfu ci yí so Arimate yí nyi amɛŋkuvileji ɖeka le Ʒuifuwo Kojoɖoxu gangantɔ lɔ va. Yɛ can nɔkɔ te kpɔ Mawu Fyɔɖuxu lɔ. Égbe dɔn yí yi Pilati gbɔ yí biɔ Yesu cɔ lɔ.
44 Vɔ Pilati biɔbiɔ yiɖeki se mɔ yɛaku vɔ ma. Eyi taɖo eyɔ sɔjawo ga ɖeka yí biɔɛ se mɔ Yesu ku vɔ ma.
45 Ci sɔjawo ga lɔ nu ni mɔ yɛku vɔɔ, éna gbe Ʒozɛfu nɔ asɔ ecɔ lɔ.
46 Ʒozɛfu xwle lɛnvɔn cigan tɔ ɖeka yí ɖe Yesu le aci lɔ nu yí sɔ lɛnvɔn lɔ tro di yí sɔ mlɔ yɔdu* mɛ. Woɖe yɔdu lɔ do ekpe mɛ. Eyi ebli ekpe ɖeka yí sɔ cu nu nɔ yɔdu lɔ.
47 Vɔ Mari Magdalɛnu koɖo Mari Ʒoze nɔlɔ ci nɔtɔxu yí kpɔkpɔ fini wosɔ Yesu mlɔ.
Gɔnmɛnuŋwlɛnŋwlɛn
^ Alo “nakɔ bubu yi.”
^ Kpɔ Enyɔgbe Veviwo mɛ Ðeɖe.
^ Kpɔ Enyɔgbe Veviwo mɛ Ðeɖe.
^ Eyi nyi gaxoxo amɛtɔntɔ.
^ Kpɔ Enumɛɖeɖewo A3.
^ Kpɔ Enyɔgbe Veviwo mɛ Ðeɖe.
^ Kpɔ Enyɔgbe Veviwo mɛ Ðeɖe.
^ Eyi nyi gaxoxo amadɛntɔ.
^ Eyi nyi gaxoxo amashiɖekɛtɔ.
^ Alo “yi gbɔngbɔn ɖo te.”
^ Alo “eŋwiɖoɖo yɔdu.”
