Eŋɛnywiwema Maki Tɔ 16:1-8
-
Mawu fɔn Yesu do agbe (1-8)
16 Ci Sabatigbe vayiɔ, Mari Magdalɛnu koɖo Mari Ʒaki nɔlɔ sɔ kpe nɔ Salome xwle amihwɛntewo keŋ ayi shi nɔ Yesu cɔ lɔ.
2 Eyi woso nyidin kucukucu le ŋkeke ŋkɔtɔ ji nɔ kwɛshila lɔ yí vaɖo yɔdu* lɔ tu hwenu ewe to.
3 Wobiɔbiɔ wowonɔnɔwo se mɔ: “Mi yí abli ekpe ci wosɔ cu yɔdu lɔ nu swi nɔ mìɔ?”
4 Vɔ ci wofɔn ta yi jiɔ, wokpɔ mɔ wobli ekpe lɔ swi vɔ ci egangan sugbɔ can.
5 Ci woɖo yɔdu lɔ mɛɔ, wokpɔ ɖajɛvi ɖeka ci yí do awu lɛgbɛ ɣi yí ele nyinɔnɔ le ɖushi mɛ. Eyi jika so wo.
6 Énu nɔ wo mɔ: “Jika ŋgbeso mí o. Ŋnya mɔ Yesu Nazarɛtitɔ ci wokan do aci nu yí míjijiɛ. Éfɔn so eku. Degbele lɛ o. Míkpɔ ɖa, fini wosɔ mlɔ sa ke.
7 Vɔ míyi nu nɔ yi nukplaviwo koɖo Piɛ mɔ, ‘Éje ŋkɔ nɔ mí ɖedo nɔ Galile. Enɔ míakpɔɛ le nɛ shigbe lé enui nɔ mí do nɛ.’”
8 Ci woto le yɔdu lɔ mɛɔ, wodafɔ ju mɛ ɖedo. Wohunhunkɔ yí vɔnvɔn leleɛ wo sugbɔ. Wodenu nyɔ ɖe nɔ mɛɖe o, ɖo wovɔnvɔn.*
Gɔnmɛnuŋwlɛnŋwlɛn
^ Alo “eŋwiɖoɖo yɔdu.”
^ Sɔgbe koɖo alɔnuŋwlɛŋwlɛ ŋkɔtɔ ciwo nu kankandoji leɔ, enyɔ ciwo yí le kpukpui 8 tɔ lɔ mɛ ji yí Eŋɛnywiwema Maki tɔ lɔ vɔ do. Kpɔ Enumɛɖeɖewo A3.
