Eŋɛnywiwema Maki Tɔ 2:1-28
2 Le ŋkeke ɖewo goduɔ, égbetrɔ yi Kapɛrnawumu yí amɛwo se mɔ yɛle axomɛ.
2 Eyi taɖo amɛwo va ɖɔ nɔtɔxu gbiŋ keke texwe degbeli o. Xɔmɔnu lɔ can jan yí Yesu tɔ Mawu nyɔ nunu nɔ wo.
3 Eyi ŋsu amɛnɛ ɖekawo kɔ mɛɖeka ci yí kplibɔ vɛ ni.
4 Vɔ ci amɛwo ɖɔ nɔ gbiŋ ɔ, wodesɛnŋ kɔɛ va Yesu gbɔ o. Eyi taɖo woko xɔ lɔ do fini Yesu le. Ci woko xɔ lɔ ɖegbɔɔ, wosɔ eba ci ji kplibɔtɔnɔ lɔ mlɔ to nɔ.
5 Ci Yesu kpɔ xɔse ci woɖoɔ, énu nɔ kplibɔtɔnɔ lɔ mɔ: “Vinyɛ, wosɔ ao nuvɔnwo ke eo.”
6 Vɔ esekplamɛtɔ ɖewo le nyinɔnɔ le nɔ yí nunuɔ le wowo jiwo mɛ mɔ:
7 “Nyi yí taɖo ŋsu cɛ xoxoɔ nuxu ahan ɔ? Énunuɔ enyɔkpotu. Mi yí atɛnŋ asɔ nuvɔnwo ke amɛ sɔ zeto Mawu nuɔ?”
8 Vɔ Yesu nya ŋci wobubuɔ kpɔ le wowoɖekiwo mɛ zeɖeka. Eyi dɔ enu nɔ wo mɔ: “Nyi yí taɖo míbubuɔ ŋtɔ́wo kpɔ le míwo jiwo mɛɔ?
9 Nɔ woanu nɔ kplibɔtɔnɔ mɔ, ‘Wosɔ ao nuvɔnwo ke eo;’ alo, ‘So je te asɔ ao ba yí azɔn zɔnlin’ ɖe, ci nunu yí le fafɛɖe wuɔ?
10 Gan nɔ míanya mɔ Agbetɔvi lɔ ɖo acɛ le nyigban ji yí asɔ nuvɔnwo ke amɛɔ, . . .” énu nɔ kplibɔtɔnɔ lɔ mɔ:
11 “Ŋnukɔ nɔ eo mɔ: So je te, sɔ ao ba yí ayi axomɛ.”
12 Eyi mɛ ci yí kplibɔ lɔ so yí sɔ yi ba zeɖeka yí ɖedo le ŋmɛ nɔ wo pleŋ. Ékpaca mɛshiamɛ yí wokanfu Mawu yí mɔ: “Mìdekpɔ ŋcɛ hanci kpɔ o.”
13 Égbetrɔ yi axu lɔ tu yí amɛahwa lɔ pleŋ va gbɔ yí etɔ enu kplakpla wo.
14 Ci evayikɔɔ, ékpɔ Levi, Alfe viɛ yí enɔ nyinɔnɔ do tagajɔxu. Énu ni mɔ: “Kplɔ ŋdo.” Eyi eso yí kplɔɛ do.
15 Ci Yesu vale enu ɖukɔ* le Levi xomɛɔ, tagajɔtɔ koɖo nuvɔnwatɔ sugbɔ ɖuɖuɔ nu* koɖo yɛ koɖo yi nukplaviwo, ɖo sugbɔtɔ le wo mɛ kplɔ Yesu do.
16 Vɔ ci Farizitɔ ciwo yí nyi esekplamɛtɔwo kpɔ yí eɖukɔ nu koɖo nuvɔnwatɔwo sɔ kpe nɔ tagajɔtɔwoɔ, wotɔ yi nukplaviwo biɔbiɔ se mɔ: “Tagajɔtɔwo koɖo nuvɔnwatɔwo eɖukɔ nu koɖoa?”
17 Ci ese ahan ɔ, énu nɔ wo mɔ: “Denyi mɛ ciwo yí le nywiɖe yí ʒan doto o, vɔ dɔ̀nɔwo yí ʒan doto. Denyi amɛjɔjɔɛwo yɔgbe ŋva o, vɔ nuvɔnwatɔwo yɔ.”
18 Ʒan nukplaviwo koɖo Farizitɔwo blanɔ nu. Eyi taɖo wova yí biɔɛ se mɔ: “Nyi yí taɖo Ʒan nukplaviwo koɖo Farizitɔwo nukplaviwo blanɔ nu, gan yí ao nukplaviwo deblanɔ nuɔ?”
19 Yesu nu nɔ wo mɔ: “Mɛ ci yí jikɔ aɖe nyɔnu xlɔwo abla nu hwenu ekpɔtɔ le wo gbɔa? Nɔ mɛ ci yí jikɔ aɖe nyɔnu lɔ kpɔtɔ le wo gbɔɔ, dele mɔ woabla nu o.
20 Vɔ gbeɖekaɔ, woavakplɔ mɛ ci yí jikɔ aɖe nyɔnu lɔ so wo gbɔ yí woabla nu gbenɔgbe.
21 Mɛɖe desɔ avɔn yoyu kankan sɔ tanɔ awu xoxwi o. Nɔ wowɛ ahan ɔ, avɔn yoyu lɔ anyɔ awu xoxwi lɔ yí fini edrɛn do agangan doji.
22 Ahanke mɛɖe desɔ vɛn yoyu kɔnɔ do elangbazagodu xoxwi mɛ nɛ. Nɔ wowɛ ahan ɔ, vɛn lɔ awó elangbazagodu lɔ. Eyi vɛn lɔ fin, elangbazagodu lɔ fin ala amɛ. Vɔ elangbazagodu yoyu mɛ wosɔ vɛn yoyu kɔnɔ do.”
23 Yesu to jinukugble ɖeka mɛ vayikɔ le Sabatigbe. Ci wovayikɔɔ, yi nukplaviwo tɔ jinuku lɔwo sunsun.
24 Eyi taɖo Farizitɔwo nu nɔ Yesu mɔ: “Kpɔ ɖa! Nyi yí taɖo wowakɔ ŋci ese gbe le Sabatigbeɔ?”
25 Vɔ énu nɔ wo mɔ: “Mídehlɛn ŋci Davidi wa hwenu ŋɖuɖu din yí shive ci yɛ koɖo yi mɛwo ba?
26 Shigbe lé exolɔlɔ ci yí xo nuxu so avɔnsatɔwo ga Abiata nu nui nɛɔ, éɖo Mawu xwe lɔ mɛ yí ɖu kpɔnnɔ kɔkɔɛwo* yí na ŋsu ciwo yí le koɖi hɛnnɛ. Gan avɔnsatɔwo ɖekɛ yí ese ɖe emɔ nɔ mɔ woaɖu kpɔnnɔ ŋtɔ́wo.”
27 Égbenu nɔ wo mɔ: “Agbetɔ ŋci yí woɖo Sabati, vɔ denyi Sabati ŋci yí wowa agbetɔ o.
28 Eyi taɖo Agbetɔvi lɔ nyi Axwetɔ nɔ Sabati lɔ ŋtɔkpu.”
Gɔnmɛnuŋwlɛnŋwlɛn
^ Alo “nɔ kplɔn nu.”
^ Alo “nɔ kplɔn nu.”
^ Alo “kpɔnnɔ ciwo wosɔ ɖo ŋmɛ nɔ Mawu.”
