Eŋɛnywiwema Maki Tɔ 3:1-35
3 Yesu gbeyi Ʒuifuwo nukplaxu ɖeka yí kpɔ ŋsu ɖeka ci alɔ̀ ku nɔ le nɔ.
2 Eyi taɖo Farizitɔwo glugluiɛ kpɔ truɖuɖu akpɔ mɔ yɛada dɔ̀ nɔ ŋsu lɔ le Sabatigbe ma, keŋ nɔ woado hwɛ yi.
3 Énu nɔ ŋsu ci alɔ̀ ku nɔ* lɔ mɔ: “So ava nɔ dodomɛ.”
4 Yi goduɔ, ébiɔ wo se mɔ: “Ese na gbe mɔ wo le wa nunywi alo nuvwin le Sabatigbea, ahwlɛn agbe* gan alo awu amɛa?” Vɔ wobɔ nu.
5 Ci xomɛveve wowotɔ na yí ese vevi sugbɔɔ, ésɔ dɔmɛzi glo wo kpɔ juun trɔdo yí nu nɔ ŋsu lɔ mɔ: “Vlu ao lɔ̀.” Eyi evlu yi lɔ̀ yí edɔ̀ lɔ mi ni.
6 Eyi Farizitɔwo to yí tɔ gbeju blabla koɖo Erodi gbɛbɔbɔ mɛ tɔwo do Yesu nu zeɖeka keŋ awui.
7 Vɔ Yesu so le nɔ yí yi axu tu koɖo yi nukplaviwo yí amɛahwa gangan ɖeka so Galile koɖo Ʒude yí kplɔɛ do.
8 Ŋtɔkpu can ɔ, amɛ sugbɔ so Ʒerusalɛmu, Idume, ago xlɔtɔ ji nɔ Ʒurdɛn koɖo eju ciwo yí trɔdo Tiru koɖo Sidɔn yí va, ci wose enujiŋ sugbɔ ciwo ewawa.
9 Eyi enu nɔ yi nukplaviwo mɔ wo le ji tɔjihun hwɛhwɛ ɖeka do alɔ̀ gbɔ ɖɛ nɔ ye keŋ nɔ amɛ sugbɔ lɔwo ŋgbevaxa ye o.
10 Ðo ci eda dɔ̀ nɔ amɛ sugbɔɔ, mɛ ciwo pleŋ yí lé dɔ̀ sɛnŋsɛnŋwo trɔdi gbiŋ yí jijiɛ mɔ yewoatɔ alɔ̀ yi.
11 Hweɖekpokpuinu nɔ gbɔngbɔn makɔmakɔwo ŋtɔkpu can kpɔɛɔ, wojenɔ klo ji ni yí donɔ axwa yí nunɔ mɔ: “Eo yí nyi Mawu Vi lɔ.”
12 Vɔ égbe nɔ wo zenɛniɖe mɔ woŋgbena nɔ mɛɖe anya mɛ ci yenyi o.
13 Éyi eto ɖeka ji yí yɔ mɛ ciwo yí drui yí wova gbɔ.
14 Eyi eɖo* gbɛbɔbɔ ɖeka ci mɛ amɛ 12 le yí na ŋkɔ wo mɔ apotruwo. Mɛ cɛwo akplɔɛni do yí agbeɖonɔ wo ɖaɖa Mawu nyɔ nugbe
15 yí ana ŋsɛn wo hɛnnɛ nɔ woanyanɔ gbɔngbɔnvɔnwo ti le amɛwo mɛ.
16 Amɛ 12 ciwo yí le gbɛbɔbɔ ci eɖo* lɔ mɛ ke: Simɔ ci egbena ŋkɔ mɔ Piɛ,
17 Ʒaki Zebede vi koɖo nɔviɛ Ʒan (égbena ŋkɔ wo mɔ Boanɛrgɛsi ci gɔnmɛ yí nyi “Ejiɖegbe Viwo”),
18 Andre, Filipu, Batelemi, Matie, Toma, Ʒaki Alufe vi, Tade, Simɔ ci yí sɔnɔ zo do enu nu
19 koɖo Ʒudasi Iskariɔti ci yí vasa Yesu.
Yi goduɔ, éɖo axwe ɖeka mɛ
20 yí amɛ sugbɔ ɖekawo gbevabɔ keke yɛ koɖo yi nukplaviwo detɛnŋ ɖu nu o.
21 Vɔ ci yi xomumɛtɔwo se ahan ɔ, wova mɔ yewoali. Ðo wonunuɔ mɔ: “Éje suku.”
22 Esekplamɛtɔ ciwo yí so Ʒerusalɛmu yí va can nunuɔ mɔ: “Bɛlzebul* yí le mɛ yí gbɔngbɔnvɔnwo ga yí na ŋsɛn yi yí esɔ nyakɔ gbɔngbɔnvɔnwo.”
23 Eyi taɖo ci eyɔ wo va yiɖeki gbɔ ɖegbɔɔ, édo labaluwo nɔ wo mɔ: “Lé Satana awɛ anya Satana ɔ?
24 Nɔ amɛwo le vu wakɔ le fyɔɖuxu ɖe mɛɔ, fyɔɖuxu lɔ dasɛnŋ alo do o;
25 eyi nɔ amɛwo le vu wakɔ le axwe ɖe mɛɔ, axwe lɔ dasɛnŋ anɔ te o.
26 Ahanke nɔ Satana trɔkpe yiɖeki yí le vu wakɔ koɖo yiɖekiɔ, datɛnŋ anɔ te o, vɔ yiŋtɔ agu.
27 Le nyɔnɔnwi mɛɔ, nɔ mɛɖe ɖo ŋsɛntɔnɔ ɖe xwe mɛ yí afi yi nuwoɔ, éɖo abla ŋsɛntɔnɔ lɔ doŋkɔ keŋ gbɔxwe asɛnŋ alɔ yi nuwo.
28 Ŋnukɔ nɔ mí le nyɔnɔnwi mɛ mɔ, Mawu asɔ ŋciwo pleŋ agbetɔviwo wa sɔ ke wo, nɔ wogbewa nuvɔn ɖekpokpui alo nu nyɔkpotu ɖekpokpui can.
29 Vɔ nɔ mɛɖe nu enyɔkpotu do gbɔngbɔn kɔkɔɛ lɔ nuɔ, wodasɔ ki kpɔ gbeɖe o, ɖo nuvɔn ci yí davɔ so kɔ ni gbeɖe yí ewa.”
30 Yesu nu ahan ɖo wonukɔ mɔ: “Gbɔngbɔn makɔmakɔ yí le mɛ.”
31 Enɔlɔ koɖo nɔviɛwo va le te le xexenu yí ɖo mɛɖeka ɖaɖa mɔ wo le yɔɛ vɛ.
32 Vɔ ci amɛwo sugbɔ le nyinɔnɔ trɔdiɔ, wonu ni mɔ: “Nɔo koɖo nɔviowo le xexenu yí jijiɛ eo.”
33 Énu do nu nɔ wo mɔ: “Miwo yí nyi nɔnyɛ koɖo nɔvinyɛwoɔ?”
34 Eyi eglo mɛ ciwo yí le nyinɔnɔ trɔdi kpɔ godogluu yí mɔ: “Nɔnyɛ koɖo nɔvinyɛwo ke!
35 Mɛɖekpokpui ci yí wakɔ Mawu droɔ, eyi nyi nɔvinyɛŋsu, nɔvinyɛnyɔnu koɖo nɔnyɛ.”
Gɔnmɛnuŋwlɛnŋwlɛn
^ Alo “alɔ̀ xo kplɛ nɔ.”
^ Alo “ese.”
^ Alo “écan.”
^ Alo “ecan.”
^ Satana woyɔnɔ ahan.
