Eŋɛnywiwema Maki Tɔ 4:1-41
4 Yesu gbetɔ enu kplakpla amɛwo le axu lɔ tu yí amɛahwa gangan ɖeka bɔ do gbɔ. Eyi taɖo eɖo tɔjihun ɖeka mɛ yí nɔ nyinɔnɔ do mɛ. Éyi axu lɔ ji le azɔge nɔ wo, vɔ amɛahwa lɔ keŋkeŋ le axu lɔ tu.
2 Étɔ labaluwo dodo yí sɔ kpla nu sugbɔ wo. Ci ele enu lɔ kplakɔ woɔ, énu nɔ wo mɔ:
3 “Míɖo to ase! Jinukudotɔ ɖeka yi jinuku dogbe.
4 Hwenu edokɔ jinuku lɔwoɔ, ɖowo je emɔ tu yí xeviwo va can wo ɖu.
5 Ebuwo je ekpewo mɛ fini ekɔ desugbɔ le o yí womi kaka, ɖo ekɔ lɔ deyi gu o.
6 Vɔ ci nyidɔn tɔ veveɔ, wofyɔn yí ku, ɖo eke deyi gu nɔ wo o.
7 Jinuku buwo je aŋwakanwo mɛ yí aŋwakanwo vlu yí cɔn wo ji yí wodesɛn ku o.
8 Vɔ ebuwo je nyigban nywi ji yí shin yí tɔ sɛnsɛn. Ðewo sɛn 30, ebuwo sɛn 60 yí ebuwo gbesɛn 100.”
9 Eyi enu kpi mɔ: “Mɛ ci eto li nɔ le si.”
10 Ci ele yiɖekɛɔ, mɛ ciwo yí le koɖi koɖo Amɛ Wive lɔwo tɔ nyɔwo biɔbiɔ yi se so labalu lɔwo nu.
11 Énu nɔ wo mɔ: “Wona yí mímɔŋje Mawu Fyɔɖuxu lɔ nyɔwlawla kɔkɔɛwo mɛ. Vɔ mɛkpɛtɛwoɔ, labaluwo mɛ woase enuwo pleŋ le
12 keŋ nɔ wokpɔkpɔɛ can ɔ, wodakpɔ ŋɖe o. Yí nɔ wosisiɛ can ɔ, wodase ŋɖe gɔnmɛ o. Ahanke wodatɛnŋ atrɔva Mawu gbɔ nɔ woasɔ wowo nuvɔnwo ke wo o.”
13 Égbenu nɔ wo mɔ: “Nɔ mídemɔŋje labalu cɛ mɛ ɖe, lé míawɛ amɔŋje kpɛtɛwo pleŋ mɛɔ?
14 “Mawu nyɔ yí jinukudotɔ lɔ dodoɔ.
15 Mɛɖewo le shigbe jinuku ci wodo do mɔ tu nɛ; nɔ wose nyɔ lɔ kakaɔ, Satana va yí sɔnɔ enyɔ ci wodo do wo mɛ si.
16 Mɛbuwo le shigbe jinuku ciwo yí je ekpewo mɛ nɛ; nɔ wose Mawu nyɔ lɔ kakaɔ, woxɔɛni koɖo jijɔ.
17 Vɔ ci Mawu nyɔ lɔ dedo ke do eji mɛ nɔ woɔ, wonini na nɔ hwenu ɖe; eyi nɔ nuwo tɔ wo kpekpe alo wotɔ aya dodo nɔ wo do Mawu nyɔ lɔ ŋciɔ, wojuinni.
18 Ebuwo je aŋwakanwo mɛ. Wowo yí nyi mɛ ciwo yí se Mawu nyɔ lɔ,
19 vɔ tamɛbubukpɔ xexe* cɛ mɛ tɔwo, amɛblebleŋsɛn dɔku tɔwo koɖo enudroamu hamɛhamɛwo ɖonɔ wo mɛ yí vlu cɔnnɔ nyɔ lɔ ji yí devasɛnnɔ ku o.
20 Le vɔvɔnuɔ, ciwo wodo do nyigban nywi ji nyi mɛ ciwo yí se enyɔ lɔ yí xɔɛ nywiɖe yí sɛnkɔ ku. Ðewo sɛn 30, ebuwo sɛn 60 yí ebuwo gbesɛn 100.”
21 Égbenu nɔ wo mɔ: “Wodetɔ kaɖigban yí sɔ danɔ do kishi* gɔnmɛ abi eba gɔnmɛ o, alo? De kaɖigbanhɛnnu ji wosɔ danɔ do ba?
22 Ðo ŋɖekpokpui dale wlawla mɛ keke dagɔnma to o; wodawa ɖaŋ asɔ ŋɖe wla keke davaje dandanŋgbe o.
23 Mɛ ci eto li nɔ le si.”
24 Égbenu nɔ wo mɔ: “Míɖo to ase nyɔ ci míseseɛ nywiɖe. Ŋci mísɔ drekɔ nu nɔ amɛwoɔ, yi lɔ ke woasɔ dre nu nɔ mí. Ɛɛ, woana sugbɔ mí doji hɛnnɛ.
25 Mɛ ci shi enu leɔ, woana sugbɔ yi doji; vɔ mɛ ci shi enu deleɔ, woaxɔ kankin ci yí le shi ŋtɔkpu.”
26 Égbenu mɔ: “Mawu Fyɔɖuxu lɔ le shigbe ŋsu ɖeka ci yí wu jinuku do nyigban nɛ.
27 Édɔnnɔ alɔn zanmɛ yí nɔ eŋ keɔ, éfɔnnɔ yí jinuku lɔwo minɔ yí shinnɔ, vɔ denyanɔ lé eyinɔ do teŋ o.
28 Nyigban lɔ ŋtɔ na jinuku lɔ shinnɔ vivivi. Doŋkɔɔ, étonɔ ama. Yi goduɔ, édonɔ se. Yí le vɔvɔnuɔ, ésɛnnɔ ku.
29 Vɔ nɔ éshin kuɔ, agbledetɔ lɔ yi sɔnɔ nuku lɔ, ɖo jinukusɔsɔ hwenu vaɖo.”
30 Eyi egbenu nɔ wo mɔ: “Nyi nu mìasɔ Mawu Fyɔɖuxu lɔ dre doɔ, alo labalu ci mìatɛnŋ ado asɔ dre mɛɔ?
31 Éle shigbe mutadiku* nɛ. Le yi dodo hwenuɔ, eyi nyi aciku ci yí hwe wu aciku ciwo pleŋ yí le nyigban lɔ ji.
32 Vɔ nɔ woduiɔ, éshinnɔ yí vagangannɔ wu aci kpɛtɛwo pleŋ. Yi lɔ̀viwo gangannɔ keke xeviwo va benɔ nyidɔn do wo mɛ.”
33 Édonɔ labalu hamɛhamɛ ŋtɔ́ hanwo yí sɔ drenɔ Mawu nyɔ lɔ mɛ nɔ wo. Labalu ciwo gɔnmɛ woatɛnŋ ase ɖekɛwo edonɔ.
34 Le nyɔnɔnwi mɛɔ, dexonɔ nuxu nɔ wo labalu mado o, vɔ nɔ yi koɖo yi nukplaviwo ɖekɛ valeɔ, éɖenɔ nuwo pleŋ mɛ nɔ wo.
35 Gbenɔgbe lɔ ci fiɛfi ɖoɔ, énu nɔ wo mɔ: “Mìayi ago xlɔtɔ ji nɔ axu lɔ.”
36 Ci wotashi amɛahwa lɔ yí eso ɖegbɔɔ, ékpɔtɔ le tɔjihun lɔ mɛ yí wokui ɖedo. Woku tɔjihun buwo kplɔɛ do.
37 Jihɔn gangan ɖeka tɔ xoxo yí axublablawo gbangban kɔ do tɔjihun lɔ mɛ keke ekpɔtɔ hwɛɖeka tɔjihun lɔ anu shi.
38 Vɔ Yesu le tɔjihun lɔ mɛ le godu yí sɔ kɔɖonu* ɖo kɔ yí dɔndɔn alɔn. Eyi wofuin yí biɔɛ se mɔ: “Enukplamɛtɔ ci mìjikɔ avɔ ɖe, dewa ɖe nɔ eo ba?”
39 Eyi eso je te yí wa adan do jihɔn gangan lɔ yí nu nɔ axu lɔ mɔ: “Kaba! Eɖa le ɖo!” Yí jihɔn lɔ mi xoxo yí eɖa ɖo tototo.
40 Yi goduɔ, ébiɔ wo se mɔ: “Nyi yí taɖo mívɔnvɔn* ahan ɔ? Yí enyi mídeɖo xɔse hɔɖoa?”
41 Vɔ vɔnvɔn gangan ɖeka lé wo yí wonu le wowoɖeɖewo mɛ mɔ: “Mi yí nyi mɛ cɛ yɛ teŋ mɔ? Keke jihɔn koɖo axuwo can sekɔ tonu ni.”
Gɔnmɛnuŋwlɛnŋwlɛn
^ Kpɔ Enyɔgbe Veviwo mɛ Ðeɖe.
^ Alo “kishi ci wosɔ drenɔ nu.”
^ Ényi aciku hwɛhwɛ ɖeka ci wokpɔnɔ le Palestine yí aci yitɔ jinjinnɔ mɛta amɛnɛ han.
^ Alo “sunŋɖe.”
^ Alo “jika sokɔ mí.”
