Eŋɛnywiwema Maki Tɔ 5:1-43
5 Eyi wovaɖo ago xlɔtɔ ji nɔ axu lɔ le Gerazeni kan mɛ.
2 Ci Yesu to le tɔjihun lɔ mɛ zeɖekaɔ, ŋsu ɖeka ci gbɔngbɔn makɔmakɔ ɖeka dokɔ aya nɔ to so yɔduwo* gblamɛ yí va do go yi.
3 Yɔduwo gblamɛ yí enɔnɔ yí keke vaɖo hwenɔnuɔ, mɛɖekpokpui detɛnŋ kpe ji yí blɛ ɖɛ o. Wodekpe ji yí blɛ ɖɛ koɖo awlɛga ŋtɔkpu o.
4 Zenɛniɖe yí wosɔ awlɛga bla alɔ̀wo ni yí do ketiketi afɔwo ni, vɔ ésonɔ wo yí mɛɖe deɖo ŋsɛn yí kpenɔ ji o.
5 Eyi ezan koɖo kede gashiagamɛɔ, énɔnɔ axwa ji le amɛɖyixu lɔ koɖo etowo ji yí sɔ ekpewo drɛnnɔ yiɖeki.
6 Vɔ ci ekpɔ Yesu le azɔge ɖaaɔ, élɔ ju yí va je klo ji ni.
7 Édo axwa sɛnsinɖe yí mɔ: “Yesu, Mawu Ejiɖaatɔ Vi, enyɔ ci yí le gblamɛ nɔ nyɛ koɖo eoɔ? Ta Mawu mɔ yedatre fun nɔŋ o.”
8 Ðo Yesu nu ni mɔ: “Eo gbɔngbɔn makɔmakɔ, to le ŋsu lɔ mɛ.”
9 Vɔ Yesu biɔɛ se mɔ: “Lé woyɔnɔ eoɔ?” Éɖo ŋci mɔ: “Woyɔnɔŋ mɔ Ahwakɔn, ɖo mìsugbɔ.”
10 Eyi ŋsu lɔ ɖe kuku nɔ Yesu veviɖe mɔ yɛŋgbenya gbɔngbɔn lɔwo so eju lɔ mɛ o.
11 Vɔ eha sugbɔ ɖekawo le nɔtɔxu yí ɖukɔ nu le eto lɔ ji.
12 Eyi taɖo gbɔngbɔnvɔn lɔwo ɖe kuku nɔ Yesu mɔ: “Sɔ mì ɖaɖa eha lɔwo mɛ nɔ mìaɖo wo mɛ.”
13 Éna gbe wo. Eyi gbɔngbɔn makɔmakɔ lɔwo to yí vayi ɖo eha lɔwo mɛ. Eha lɔwo lɔ ju so eto lɔ tamɛ hwlihwlihwli yí je axu lɔ mɛ yí nu shi yí ku. Eha lɔwo ayi 2 000 han.
14 Vɔ mɛ ciwo yí kpɔnɔ eha lɔwo ji shi yí vayi nu ŋci yí jɔ lɔ le eju lɔ koɖo kɔxwi lɔ mɛ yí amɛwo va keŋ akpɔ ŋci yí jɔ.
15 Wova Yesu gbɔ yí kpɔ ŋsu ci mɛ gbɔngbɔnvɔnwo hwakɔn le sa yí edo awu yí le nyinɔnɔ yí le nywiɖe. Eyi vɔnvɔn lé wo.
16 Gbesɔ kpe niɔ, mɛ ciwo yí kpɔ ŋci yí jɔ do ŋsu ci mɛ gbɔngbɔnvɔn lɔwo le sa koɖo eha lɔwo ji nu nyɔ lɔwo nɔ mɛ ciwo yí va.
17 Eyi taɖo wotɔ kuku ɖeɖe nɔ Yesu mɔ yɛ le so le yewo ju mɛ.
18 Ecɛyɛ ci Yesu ɖoɖoɔ tɔjihun lɔ mɛɔ, ŋsu ci mɛ gbɔngbɔnvɔnwo le sa ɖe kuku ni mɔ yeayi koɖi.
19 Vɔ Yesu delɔn ni o. Énu ni mɔ: “Yi axomɛ le ao mɛwo gbɔ yí anu ŋciwo pleŋ Yehowa* wa nɔ eo koɖo ŋshishi ci yí eku nɔ eo nɔ wo.”
20 Ŋsu cɛ yi tɔ ŋciwo pleŋ Yesu wa ni nunu le Dekapoli* yí ekpaca amɛwo pleŋ.
21 Ci Yesu gbeɖo tɔjihun mɛ yí yi ago xlɔtɔ ji nɔ axu lɔɔ, amɛ sugbɔ ɖekawo va bɔ do gbɔ hwenu ele axu lɔ tu.
22 Ŋsu ɖeka ci yí tɔ mɔ Ʒairu yí le mɛ ciwo yí kpɔnɔ Ʒuifuwo nukplaxu lɔ ji mɛ va gbɔ yí je klo ji ni.
23 Éɖe kuku ni zenɛniɖe mɔ: “Anyi vi nyɔnuvi ble veviɖe.* Ŋɖe kuku va sɔ ao lɔ̀wo da do ji nɔ edɔ̀ lɔ ami ni nɔ aci agbe.”
24 Eyi Yesu yi koɖi. Amɛahwa gangan ɖeka kplɔɛ do yí xɛkɔ gijigiji.
25 Nyɔnu ɖeka ci nu ehun ŋɛŋɛ do so exwe 12 ke le nɔ.
26 Ékpe fun haan* le edɔ̀datɔ sugbɔ lɔ̀ mɛ. Ézan yi nuwo pleŋ do mɛ, vɔ edɔ̀ lɔ dekandomɛ ni o. Ewaɖeɔ, nyi enyinakɔ doji.
27 Ci ese nyɔ ci amɛwo nu so Yesu nuɔ, éto godu ni le amɛwo mɛ yí tɔ alɔ̀ yi wu toga.
28 Ðo énunuɔ le yiɖeki mɛ mɔ: “Nɔ ŋvlɛ yí tɔ alɔ̀ yi wuɔ, anyi dɔ̀ ami.”
29 Eyi zeɖeka kakaɔ, ehun lɔ ɖo te yí ekpɔ mɔ, edɔ̀vwin lɔ mi nɔ ye.
30 Yesu nya zeɖeka mɔ ŋsɛn to le ye mɛ, eyi etrɔ le dodomɛ nɔ amɛahwa lɔ yí biɔ se mɔ: “Mi yi tɔ alɔ̀ anyi wuɔ?”
31 Vɔ yi nukplaviwo ɖo ŋci ni mɔ: “Èkpɔ amɛwo xaxa eo gijigiji ahan yí èbiɔkɔ se mɔ, ‘Mi yí tɔ alɔ̀ ye maa?’”
32 Vɔ ésa ŋkuvi trɔdo keŋ akpɔ mɛ ci yí wa nu lɔ.
33 Jika so nyɔnu lɔ yí ehunhunkɔ, ɖo énya ŋci yí jɔ do ji. Éva je klo ji do ŋkɔ nɔ Yesu yí nu nyɔnɔnwi lɔ pleŋ ni.
34 Yesu nu ni mɔ: “Evinyɛ, xɔse ci èɖo na edɔ̀ mi nɔ eo. Yi le fafa mɛ yí edɔ̀vwin lɔ le mi nɔ eo.”
35 Ci ele nuxu lɔ xokɔɔ, ŋsu ɖekawo so Ʒuifuwo nukplaxu jikpɔtɔ lɔ xwe mɛ yí va nu ni mɔ: “Ao vi nyɔnuvi ku! Nyi àgbedo aya nɔ Enukplamɛtɔ lɔ nɔɔ?”
36 Vɔ Yesu se nyɔ ci wonukɔ yí nu nɔ Ʒuifuwo nukplaxu jikpɔtɔ lɔ mɔ: “Ŋgbevɔn o,* ɖò xɔse kpoŋ.”
37 Vɔ delɔn yí mɛɖekɛ kplɔɛ do sɔ zeto Piɛ, Ʒaki koɖo Ʒan ci yí nyi Ʒaki nɔviɛ nu o.
38 Eyi wovaɖo Ʒuifuwo nukplaxu jikpɔtɔ lɔ xwe mɛ yí kpɔ yí eʒin tɔnkɔ, ɖo amɛwo le avin ji yí le bobo kpakɔ.
39 Ci eɖo axwe lɔ mɛɔ, ébiɔ wo se mɔ: “Nyi yí taɖo míle avin fankɔ yí le eʒin nakɔɔ? Ðevi lɔ deku o, vɔ alɔn dɔnkɔ ele.”
40 Eyi wotɔ kuikui. Vɔ ci enya wo pleŋ ti ɖegbɔɔ, ékplɔ ɖevi lɔ dalɔ koɖo nɔlɔ sɔ kpe nɔ mɛ ciwo yí bɔdo nu yí woyi fini ɖevi lɔ le.
41 Yi goduɔ, élé alɔ̀ nɔ ɖevi lɔ yí nu ni mɔ: “Talita kumi,” ci gɔnmɛ yí nyi mɔ: “Nyɔnuvihwɛ, ŋnukɔ nɔ eo mɔ, ‘So je te!’”
42 Eyi zeɖeka tɔntɔn ɔ, nyɔnuvi lɔ fɔn yí tɔ zɔnlin zɔnzɔn. (Exwe 12 yí eɖo.) Ékpaca wo keke yí wokpɔ jijɔ manumanu.
43 Vɔ égbe nɔ wo zenɛniɖe* mɔ woŋgbena nɔ mɛɖe anya o. Eyi enu nɔ wo mɔ wo le na nu yi nɔ aɖu.
Gɔnmɛnuŋwlɛnŋwlɛn
^ Alo “eŋwiɖoɖo yɔduwo.”
^ Kpɔ Enumɛɖeɖewo A5.
^ Alo “Eju Amɛ́wo lɔwo Kan mɛ.”
^ Alo “éle ekudunu.”
^ Alo “ése vevi sugbɔ.”
^ Alo “Mi vɔnvɔn.”
^ Alo “édo se nɔ wo veviɖe.”
