Eŋɛnywiwema Maki Tɔ 6:1-56
6 Yesu so le nɔ yí va yi ju mɛ yí yi nukplaviwo kplɔɛ do.
2 Le Sabatigbeɔ, étɔ enu kplakpla amɛwo le Ʒuifuwo nukplaxu yí ekpaca amɛ sugbɔtɔ ciwo yí ɖo to yi yí wonu mɔ: “Fini ŋsu cɛ kpla ŋcɛwo soɔ? Nyi yí taɖo wona nunya cɛ yiɔ? Yí nyi yí dɔ ewakɔ enujiŋ cɛwoɔ?
3 De kapita yɔ ba? De Mari vi enyi yí nɔviɛwo nyi Ʒaki, Ʒozɛfu, Ʒudasi koɖo Simɔ ba? Nɔviɛ nyɔnushiwo dele ju cɛ mɛ koɖo mì ba?” Eyi taɖo wogbe mɔ yewodaxɔɛ ji se o.
4 Vɔ Yesu nu nɔ wo mɔ: “Wobunɔ enyɔnuɖɛtɔ le fishiafi, vɔ yiŋtɔ ju mɛ koɖo yiŋtɔ xomu mɛ sɔ kpe nɔ yiŋtɔ xwe ɖekɛ yí wodebuini le o.”
5 Eyi taɖo dewa enujiŋ agbu ɖe le nɔ o, dɔ̀nɔ ɖewo kpoŋ ji esɔ alɔ̀ da do yí da dɔ̀ nɔ wo.
6 Le nyɔnɔnwi mɛ ci wodeɖo xɔseɔ, ékpacɛ sugbɔ yí eso le nɔ yí vayi dan to kɔxwi ciwo yí trɔdo nɔtɔxu mɛ yí kpla nu amɛwo.
7 Ecɛyɛɔ, éyɔ Amɛ Wive lɔwo bɔ yí dɔ wo ɖaɖa eve-eve. Éna ŋsɛn wo nɔ woanyanɔ gbɔngbɔn makɔmakɔwo ti le amɛwo mɛ.
8 Édo se nɔ wo hɛnnɛ mɔ woŋgbesɔ ŋɖe nɔ emɔzɔnzɔn lɔ sɔ zeto ekpo ɖekɛ nu o. Wodasɔ kpɔnnɔ alo ŋɖuɖugodu alo eho* o.
9 Vɔ wo le do fɔkpawo yí woŋgbehɛn awu amɛve* o.
10 Égbenu nɔ wo mɔ: “Nɔ mɛɖe xɔ mí do yi xwe mɛɔ, mínɔ hunnɔ keke ana nɔ hwenu míaso le eju lɔ mɛ.
11 Yí nɔ wodexɔ mí alo se míwo nyɔwo le fiɖekpokpui ci míayiɔ, míxuxu afɔkɔ míwotɔwo nɔ mísosoɔ le hunnɔ keŋ nɔ anyi kunuɖeɖe nɔ wo.”
12 Eyi woɖedo yí tɔ Mawu nyɔ nunu nɔ amɛwo mɔ woɖo atrɔ ji mɛ.
13 Wonya gbɔngbɔnvɔn sugbɔ ti le amɛwo mɛ yí shi ami nɔ dɔ̀nɔ sugbɔ yí da dɔ̀ nɔ wo.
14 Ecɛyɛ Efyɔ Erodi se nyɔ lɔ, ɖo amɛ sugbɔ xokɔ nuxu so Yesu nu. Wonukɔ mɔ: “Ʒan Amɛʒindoshimɛtɔ fɔn so ku. Eyi taɖo ewakɔ enujiŋwo.”
15 Vɔ mɛɖewo nunuɔ mɔ: “Eli yɔ.” Yí mɛbuwo nunuɔ mɔ: “Enyɔnuɖɛtɔ enyi shigbe enyɔnuɖɛtɔ ciwo yí ni sa nɛ.”
16 Vɔ ci Erodi siɔ, émɔ: “Ʒan ci ŋso ta nɔ yɔ. Éfɔn so ku.”
17 Ðo vayiɔ, Erodi ŋtɔ dɔ yí wolé Ʒan cu do gakpa mɛ do Erodiasi ci yí nyi fofoɔ Filipu ashiɛ ci exɔ yí ɖe ŋci.
18 Ðo Ʒan nunɔ ni mɔ: “Desɔgbe mɔ àxɔ fofoo shi aɖe o.”
19 Eyi taɖo Ʒan nu venɔ Erodiasi nu yí eji mɔ yeawui, vɔ detɛnŋ kpe ji o.
20 Erodi vɔnnɔ nɔ Ʒan, ɖo énya mɔ amɛjɔjɔɛ koɖo amɛkɔkɔɛ enyi. Eyi taɖo Erodi glɔnnɔ ta nɔ Ʒan. Nɔ ése Ʒan nyɔwo ɖegbɔɔ, denyanɔ ŋci awa o. Gan yi nyɔwo vivinɔ sese ni.
21 Vɔ gbeɖekaɔ, Erodiasi vakpɔ lé awɛ awu Ʒan hwenu Erodi ɖukɔ yi jigbezan yí yɔ ega ganganwo, sɔjawo gawo koɖo mɛ ciwo ŋkɔ yi to nɔ le Galile mɔ wo le va ɖu azan koɖo ye fiɛfi ɖeka.
22 Eyi Erodiasi viɛ nyɔnuvi va yí ɖu we yí ejɔ ji nɔ Erodi koɖo mɛ ciwo yí ɖukɔ nu* koɖi. Efyɔ lɔ nu nɔ nyɔnuvi lɔ mɔ: “Ŋɖekpokpui ci èjiɔ, biɔŋ yí nasɔɛ nɔ eo.”
23 Éta nu ŋtɔkpu yí nu ni mɔ: “Biɔ ŋɖekpokpuiŋ yí nasɔɛ nɔ eo, nɔ egbenyi anyi fyɔɖuxu mamamɛ yɔ can.”
24 Eyi taɖo eso vayi nɔlɔ gbɔ yí biɔɛ se mɔ: “Nyi nabiɔ?” Énu ni mɔ: “Biɔ Ʒan Amɛʒindoshimɛtɔ lɔ ta.”
25 Éɖe blɛ vayi efyɔ lɔ gbɔ zeɖeka yí nu ni mɔ: “Ŋji mɔ àsɔ Ʒan Amɛʒindoshimɛtɔ lɔ ta do kpanutasɛ mɛ anaŋ kakayɛ.”
26 Ci enyɔ lɔ wa ɖeka nɔ efyɔ lɔ sugbɔ can ɔ, deji mɔ yeagbe o, ɖo éta nu le ŋmɛ nɔ mɛdru* yitɔwo.
27 Eyi efyɔ lɔ ɖo sɔja ciwo yí nɔnɔ koɖi ɖeka ɖaɖa zeɖeka mɔ yɛ le yi sɔ Ʒan ta vɛ. Eyi taɖo sɔja lɔ yi yí vayi so ta nɔ Ʒan le gakpa lɔ mɛ.
28 Ésɔ ta lɔ do kpanutasɛ mɛ vɛ yí sɔ jo nɔ nyɔnuvi lɔ yí nyɔnuvi lɔ sɔ yi jo nɔ nɔlɔ.
29 Ci Ʒan nukplaviwo siɔ, wova sɔ yi cɔ yí vayi ɖyi do yɔdu mɛ.*
30 Apotru lɔwo va bɔ do Yesu gbɔ yí nu ŋciwo pleŋ wowa koɖo ŋciwo wokpla amɛwo ni.
31 Énu nɔ wo mɔ: “Míva nɔ mìwoɖekɛwo mìayi fini mɛɖe dele keŋ agbɔn domɛ hwɛɖeka.” Ðo amɛ sugbɔ vava yí gbeyiyiɛ yí wodekpɔ vovo aɖu nu kpetii o.
32 Eyi taɖo woɖo tɔjihun mɛ yí ɖedo fini mɛɖe dele o yí anɔ nɔ wowoɖekɛwo.
33 Vɔ ci woyikɔɔ, amɛwo kpɔ wo. Eyi amɛ sugbɔ si yí lɔ ju so eju lɔwo pleŋ mɛ yí vayi ɖo nɔtɔxu doŋkɔ nɔ wo.
34 Ci eɖyi le tɔjihun lɔ mɛɔ, ékpɔ amɛ sugbɔ ɖekawo yí wowo nu wa ŋshishi ni, ɖo wole shigbe lɛngbɔ ciwo yí deɖo kplɔtɔ nɛ yí etɔ enu sugbɔ kplakpla wo.
35 Fiɛfimɛɔ, yi nukplaviwo va gbɔ yí nu ni mɔ: “Fini mìle jinjin do axwe gbɔ yí gamɛ can yi.
36 Eyi taɖo tashi wo, nɔ woayi boji koɖo kɔxwi ciwo yí trɔdo mì mɛ ayi xwle nu aɖu.”
37 Éɖo ŋci nɔ wo mɔ: “Míwoŋtɔwo mína ŋɖuɖu wo nɔ woaɖu.” Eyi wobiɔɛ se mɔ: “Mìasɔ denari* 200 ayi xwle kpɔnnɔ nɔ wo yí woaɖua?”
38 Ébiɔ wo se mɔ: “Kpɔnnɔ nɛni yí le mí shiɔ? Míyi kpɔɛ ɖa!” Ci woyi kpɔɛɔ, wonu ni mɔ: “Kpɔnnɔ amatɔn koɖo kpavi amɛve.”
39 Eyi enu nɔ mɛ lɔwo pleŋ mɔ wo le ma do texwe vovovowo yí anɔ nyinɔnɔ do egbewo ji.
40 Eyi taɖo wonɔ nyinɔnɔ yí ma do texwe vovovowo. Ðewo nyi 100 yí ɖewo nyi 50.
41 Ésɔ kpɔnnɔ amatɔn koɖo kpavi amɛve lɔwo yí kɔ ta yi ji yí do gbe ɖaɖa.* Éŋɛ kpɔnnɔ lɔwo mɛ yí tɔ wo sɔsɔ nɔ yi nukplaviwo yí yi nukplaviwo sɔ wo jo nɔ mɛ lɔwo. Woma kpavi amɛve lɔwo nɔ wo pleŋ
42 yí wo pleŋ ɖu nu yí xodu ɖɔ.
43 Wolɔ kpɔnnɔ kankan ciwo yí kpɔtɔ yí woɖɔ kishi 12. Kpaviwo dele mɛ o.
44 Mɛ ciwo yí ɖu kpɔnnɔ lɔwo hlɛnhlɛnmɛ nyi ŋsu 5 000.
45 Zeɖeka le yɛ goduɔ, éna yi nukplaviwo ɖo tɔjihun mɛ yí kpe ago xlɔtɔ ji nɔ axu lɔ le Bɛtsaida hwenu yiŋtɔ le amɛahwa lɔ klankɔ.
46 Vɔ ci eklan wo ɖegbɔɔ, éyi to ji keŋ ado gbe ɖaɖa.
47 Ci ezan doɔ, tɔjihun lɔ ɖo dodomɛ nɔ axu lɔ, vɔ Yesu ɖekɛ ci agogbe.
48 Ékpɔ mɔ tɔjihun lɔ kuku gbɔnkɔnu nɔ wo, ɖo jihɔn xo yí dodoɔ go wo. Le nyidin fɔnfɔnmɛɔ,* ézɔn afɔ to axu lɔ ji yí kpe wo gbɔ. Vɔ éwa shigbe mɛ ci yí jikɔ aze to wo nu nɛ.
49 Ci enukplavi lɔwo kpɔ Yesu zɔn axu lɔ ji gbɔgbɔɔ, wonu mɔ: “Edrɔ mìkukua?” Yí wodo axwa.
50 Ðo wo pleŋ kpɔɛ yí jika so wo. Vɔ Yesu xo nuxu nɔ wo zeɖeka yí mɔ: “Mígbe dɔn! Enyɛ yɔ; míŋgbevɔn o.”
51 Éɖo tɔjihun lɔ mɛ le wo gbɔ yí aya lɔ mi xoxo. Éjiŋ nɔ wo sugbɔ,
52 ɖo wodemɔŋje enujiŋ ci Yesu wa koɖo kpɔnnɔ mɛ o yí egbɔngbɔnnu nɔ wo mɔ woase nuwo gɔnmɛ.
53 Ci woso axu lɔɔ, wovaɖo Genezarɛti yí ci te do nɔ.
54 Vɔ ci woto le tɔjihun lɔ mɛ kakaɔ, amɛwo kpɔ Yesu yí jeshi.
55 Eyi wodo afɔ ju mɛ yí yi nu nɔ mɛ ciwo pleŋ yí le eju lɔ mɛ yí wokɔ dɔ̀nɔwo do ebawo ji yí va fini wose mɔ Yesu le.
56 Fishiafi ci eyi le kɔxwiwo mɛ alo ejuwo mɛ alo agblewo mɛɔ, wokɔnɔ dɔ̀nɔwo va danɔ do afisasa tɔxuwo yí woɖenɔ kuku ni mɔ, yewoatɔ alɔ̀ yi wu toga kpetii. Eyi edɔ̀ mi nɔ mɛ ciwo pleŋ yí tɔ alɔ̀ yi wu.
Gɔnmɛnuŋwlɛnŋwlɛn
^ Yi gɔnmɛɖeɖe tiin: “gajun.”
^ Alo “awu bu.”
^ Alo “nɔ kplɔn nu.”
^ Alo “mɛ ciwo yí le kplɔn nu.”
^ Alo “eŋwiɖoɖo yɔdu.”
^ Kpɔ Enumɛɖeɖewo B14.
^ Alo “éyra do wo ji.”
^ Ényinyiɛ ezan gatɔ̀n va nyidin gadɛn han.
