Eŋɛnywiwema Maki Tɔ 9:1-50
-
Nɔnɔmɛtrɔtrɔ Yesu tɔ (1-13)
-
Yesu da dɔ̀ nɔ ŋsuvihwɛ ɖeka ci mɛ gbɔngbɔnvɔn le (14-29)
-
Mɛ ci shi xɔse le atɛnŋ awa enushianu (23)
-
-
Yesu gbenu yi ku nyɔ ɖɛ (30-32)
-
Enukplavi lɔwo dɔn nyɔ so mɛ ci yí nyi gangantɔ le wo mɛ nu (33-37)
-
Mɛɖekpokpui ci yí detrɔkpe mìɔ, éle koɖo mì (38-41)
-
Afɔklɛnnuwo (42-48)
-
“Mína nɔ eje anɔ mí mɛ” (49, 50)
9 Yesu gbenu nɔ wo mɔ: “Ŋnukɔ nɔ mí le nyɔnɔnwi mɛ mɔ, mɛɖewo le mí mɛ yɛ yí wodaku keke ana nɔ hwenu woakpɔ Mawu Fyɔɖuxu lɔ yí ava le ŋsɛn mɛ o.”
2 Le ŋkeke amadɛn goduɔ, Yesu kplɔ Piɛ, Ʒaki koɖo Ʒan yí wowoɖekɛwo yi eto yiji ɖeka ji. Eyi nɔnɔmɛ trɔ nɔ Yesu le ŋmɛ nɔ wo.
3 Yi wuwo tɔ zo dada yí vaɣe pepepe keke mɛɖe dele nyigban lɔ ji yí anya nu aɣe ahan o.
4 Wokpɔ Eli koɖo Moizi can yí wole seŋ kankɔ koɖo Yesu.
5 Eyi taɖo Piɛ nu nɔ Yesu mɔ: “Rabi, enyɔ mɔ mìle lɛ. Nà mìacu zava amɛtɔn: ɖeka anyi aotɔ, ɖeka anyi Moizi tɔ yí ɖeka anyi Eli tɔ.”
6 Le nyɔnɔnwi mɛɔ, Piɛ dan ŋci awa, ɖo wovɔn sugbɔ.
7 Eyi azɔ ɖeka bla yí cɔn wo ji. Egbe ɖeka ɖyi so azɔ lɔ mɛ yí nu mɔ: “Mɛ cɛ yí nyi anyi Vi ci kɔ ŋdelɔnnɔ nu le o. Míɖo to yi.”
8 Zeɖeka tɔntɔn ɔ, woɖe kɔ trɔdo wowoɖekiwo vɔ wodekpɔ mɛɖe sɔ zeto Yesu nu o.
9 Ci woɖyiɖyiɛ le eto lɔ jiɔ, Yesu do se nɔ wo veviɖe mɔ, woŋgbenu ŋci wokpɔ lɔ nɔ mɛɖe keke ana nɔ hwenu woafɔn Agbetɔvi lɔ so ku o.
10 Wolé nyɔ lɔ ɖɛ do ji mɛ,* vɔ wokankan seŋ so ŋci fɔnfɔnsoku yitɔ lɔ nyi nu le wowoɖeɖewo mɛ.
11 Eyi enukplavi lɔwo tɔ biɔbiɔɛ se mɔ: “Nyi yí taɖo esekplamɛtɔwo nunɔ mɔ, Eli ɖo ava doŋkɔɔ?”
12 Énu nɔ wo mɔ: “Eli ava doŋkɔ nyao yí adra enuwo pleŋ do; gan nyi yí taɖo woŋwlɛ ɖɛ so Agbetɔvi lɔ nu mɔ yɛɖo akpe fun sugbɔ yí woakpɔɛ do nugbali jiɔ?
13 Vɔ ŋnukɔ nɔ mí mɔ Eli va nyao yí ŋci yí dro wo yí wocu kpɔ koɖi shigbe lé woŋwli ɖɛ so nu nɛ.”
14 Ci wova enukplavi kpɛtɛwo gbɔɔ, wokpɔ mɔ amɛahwa gangan ɖeka trɔdo wo yí esekplamɛtɔwo dɔndɔn nyɔ koɖo wo.
15 Vɔ ci amɛahwa lɔ pleŋ kpɔ Yesu zeɖekaɔ, ékpaca wo sugbɔ yí wolɔ ju kpe gbɔ keŋ ado gbe ni.
16 Eyi ebiɔ wo se mɔ: “Enyɔ ci mídɔndɔn koɖo woɔ?”
17 Mɛɖeka le amɛahwa lɔ mɛ ɖo ŋci ni mɔ: “Enukplamɛtɔ, ŋkplɔ vinyɛ ŋsuvi vɛ nɔ eo, ɖo gbɔngbɔnvɔn ɖeka le mɛ ci yí na desɛnŋ xokɔ nuxu o.
18 Fishiafi ci gbɔngbɔnvɔn lɔ va ji leɔ, ésɔ xunɔ nyigban; fucukɔ tonɔ le aglan mɛ ni, éɖunɔ aɖukli yí ŋsɛn vɔnɔ ni. Ŋnu nɔ ao nukplaviwo mɔ wo le nya gbɔngbɔnvɔn lɔ ti le mɛ, vɔ wodekpe ji o.”
19 Yesu nu nɔ wo mɔ: “Egbɛvi maɖoxɔsewo, keke na nɔ hwenu yí nanɔ mí gbɔ asɔ sɛn ɔ? Keke na nɔ hwenu yí nado ji asɔ nɔ koɖo míɔ? Míkplɔ ɖevi lɔ vɛ nɔŋ.”
20 Eyi wokplɔ ŋsuvi lɔ vɛ ni. Vɔ ci gbɔngbɔnvɔn lɔ kpɔ Yesu ɔ, éhunhun ɖevi lɔ kpikpikpi yí ɖevi lɔ juin yí tɔ blibli to nyigban yí fucukɔ totoɔ le aglan mɛ ni.
21 Eyi Yesu biɔ dalɔ se mɔ: “So hwenu yí ŋcɛ tɔ wɛwɛɔ?” Énu ni mɔ: “So vihwɛ mɛ ɖii.
22 Eyi blaŋblaŋ ɔ, gbɔngbɔnvɔn lɔ sɔ xunɔ ezo koɖo eshi mɛ keŋ awui. Vɔ nɔ àtɛnŋ awa ŋɖeɔ, ku ŋshishi nɔ mì yí akpedo mì nu.”
23 Yesu nu do nu ni mɔ: “Nyi yí taɖo èmɔ, ‘Nɔ àtɛnŋ awɛɔ’? Mɛ ci shi xɔse le atɛnŋ awa nushianu.”
24 Zeɖeka kakaɔ, ɖevi lɔ dalɔ do axwa yí nu mɔ: “Ŋɖo xɔse! Kpedo ŋnu le fini ŋʒan xɔse le!”
25 Ci Yesu kpɔ mɔ amɛahwa ɖeka lɔ ju gbɔgbɔ yewo gbɔɔ, éwa adan do gbɔngbɔn makɔmakɔ lɔ mɔ: “Eo, gbɔngbɔn ci yí na wonyinɔ nuxumaxotɔ koɖo tokunɔ, ŋɖe gbe nɔ eo mɔ, to le mɛ yí ŋgbetrɔva mɛ ke o!”
26 Gbɔngbɔn lɔ do axwa yí hunhun ɖevi lɔ kpikpikpi zenɛniɖe keŋ yí to le mɛ. Ci ɖevi lɔ ci nɔ shigbe mɛ ci yí ku hannɛɔ, amɛ sugbɔ tɔ nunu mɔ: “Éku!”
27 Vɔ Yesu le alɔ̀ ni yí kpedo nu eso je te.
28 Yi godu ci Yesu ɖo axwe ɖeka mɛɔ, yi nukplaviwo va kpɔɛ do akpo yí biɔɛ se mɔ: “Nyi yí taɖo mìwo detɛnŋ nyi tiɔ?”
29 Yesu ɖo ŋci nɔ wo mɔ: “Gbedoɖa ɖekɛ ji woato gbɔxwe anya cɛ han yɛ ti.”
30 Woso le nɔ yí to Galile, vɔ deji mɔ mɛɖekɛ anya o.
31 Ðo ékplakɔ nu yi nukplaviwo yí nukɔ nɔ wo mɔ: “Wojikɔ asa Agbetɔvi lɔ yí asɔ do alɔ̀ mɛ nɔ amɛwo. Woawui, vɔ nɔ wowui can ɔ, woafuin do agbe le ŋkeke amɛtɔntɔ lɔ gbe.”
32 Wodemɔŋje yi nyɔ lɔ mɛ o, vɔ wovɔnvɔn yí wodebiɔ nyɔ ɖe yi se o.
33 Wova Kapɛrnawumu. Hwenu ele axwe mɛɔ, ébiɔ wo se mɔ: “Enyɔ ci mídɔndɔn le mɔ ji gbɛsaɔ?”
34 Wobɔ nu kplikplikpli. Ðo ci wole mɔ lɔ jiɔ, wowoɖeɖewo dɔndɔn nyɔ so mɛ ci yí nyi gangantɔ le wo mɛ nu.
35 Eyi taɖo enɔ nyinɔnɔ yí yɔ Amɛ Wive lɔwo yí nu nɔ wo mɔ: “Nɔ mɛɖe ji mɔ yeanyi amɛ ŋkɔtɔɔ, éɖo anyi godutɔ nɔ amɛshiamɛ yí anyi dɔwavi nɔ amɛwo pleŋ.”
36 Yi goduɔ, ékplɔ vihwɛ ɖeka va dodomɛ nɔ wo yí sɔ alɔ̀ kpla kɔ ni yí nu nɔ wo mɔ:
37 “Mɛɖekpokpui ci yí xɔ ɖevi cɛ hanwo ɖeka do anyi ŋkɔ ŋciɔ, éxɔ nyɛ can hɛnnɛ yí mɛɖekpokpui ci yí xɔŋ ɔ, de nyɛɖekɛ exɔ o; vɔ éxɔ Mɛ ci yí dɔŋ ɖaɖa hɛnnɛ.”
38 Ʒan nu ni mɔ: “Enukplamɛtɔ, mìkpɔ mɛɖeka zan ao ŋkɔ yí sɔ nyanya gbɔngbɔnvɔnwo yí mìgbe ni, ɖo dekplɔnɔ mì do o.”
39 Vɔ Yesu nu mɔ: “Míŋgbegbe ni o, ɖo mɛɖe deli ci yí azan anyi ŋkɔ asɔ wa enujiŋ yí nɔ éwɛ ɖegbɔ zeɖekaɔ, atɛnŋ anu enyɔdɔndɔn ɖe so ŋnu o.
40 Ðo mɛɖekpokpui ci yí detrɔkpe mìɔ, éle mì ji
41 yí mɛɖekpokpui ci yí ana eshi kɔnkpu ɖeka mí míanu ci mínyi Kristotɔ ŋciɔ, ŋnukɔ nɔ mí le nyɔnɔnwi mɛ mɔ, dagɔn yi fɛncu maxɔ gbeɖe o.
42 Vɔ mɛɖekpokpui ci yí ado afɔbli ɖevi cɛwo ɖe ciwo yí ɖo xɔseɔ, anyɔ ni sɔwu nɔ wobla ekpecunu ci esɔkɛtɛ tronɔ do kɔ ni yí sɔ dɔ ɖaɖa axu mɛ.
43 “Nɔ ao lɔ̀ dɔnkɔ eo do nuvɔn mɛɔ, swi si. Ðo anyɔ nɔ eo mɔ alɔ̀ kuɖeka ale eo shi yí nàkpɔ agbe sɔwu mɔ alɔ̀ amɛve ale eo shi gan yí nàyi Gehena* ci yí nyi ezo ci wodatɛnŋ ci mɛ.
44 * ——
45 Eyi nɔ ao fɔ dɔnkɔ eo do nuvɔn mɛɔ, swi si. Ðo anyɔ nɔ eo mɔ afɔ kuɖeka ale eo shi yí nàkpɔ agbe sɔwu mɔ afɔ amɛve ale eo shi gan yí woasɔ eo dɔŋkpe do Gehena* mɛ.
46 * ——
47 Nɔ ao ŋkuvi dɔnkɔ eo do nuvɔn mɛɔ, ɖi swi asɔ dɔŋkpe ɖaɖa azɔge. Ðo anyɔ nɔ eo mɔ ŋkuvi kuɖeka ale eo shi yí nàyi Mawu Fyɔɖuxu lɔ mɛ sɔwu mɔ ŋkuvi amɛve ale eo shi gan yí woasɔ eo dɔŋkpe do Gehena* mɛ
48 fini yekuiwo dekunɔ le o yí ezo decinɔ le hɛnnɛ o.
49 “Ðo ele mɔ woaɖe zo kɔ do mɛshiamɛ ji shigbe lé woɖenɔ je kɔ do nu ji nɛ.
50 Enunywi yí eje nyi, vɔ nɔ ébu vivivivi yitɔ ɖe, lé woawɛ ni yí agbetrɔ ejeɔ? Mína nɔ eje anɔ mí mɛ yí míanɔ fafa mɛ koɖo míwonɔnɔwo.”
Gɔnmɛnuŋwlɛnŋwlɛn
^ Alo “enyɔ lɔ ci wowoɖeɖewo gblamɛ.”
^ Kpɔ Enyɔgbe Veviwo mɛ Ðeɖe.
^ Kpɔ Enumɛɖeɖewo A3.
^ Kpɔ Enyɔgbe Veviwo mɛ Ðeɖe.
^ Kpɔ Enumɛɖeɖewo A3.
^ Kpɔ Enyɔgbe Veviwo mɛ Ðeɖe.
